Mipi’n ngaisiam ding in bialtu MLA Ginsuanhau in ngen
Lamka, May-6: Ginsuanhau @ G.S Haupu, MLA (SingngatA/C ) in tuni sun dak 12:00 in Lailam Veng a inn ah Press-te kimuhpih in Chura-Sugnu road black-topping pailel pen quality maintain theihlouh thu mipi leh organization tuamtuamte’n theisiam dingin ngen hi. Aman a genna ah Chura-Sugnu road ah kum 2011-12 in Special Plan Assistance (SPA) fund zang in zero point-km 5 tan black-topping zawh hi’n gen a, 2013-14 a Central Road Fund (CRF) tungtawn in km 5-10 sung black-topping bawlna dingin Rs 8 crore zat din proposal piaklut himahleh govt in Rs 3 crore kia sanction a, huai lakah culvert leh retaining wall bawlna ah Rs 42 lakh bei a, adangte in Chura-Sugnu road black-topping nasepna pailel hi’n gen hi.
Black-topping bawlna quality control sawm hileleng fund kidaihlouh ziakin control theihlouh hi’n gen a, maban ah black-topping bawl naihlouhna km 16 tan bawlna dingin Non Lapsable Central Pool of Resources (NLCPR) tungtawna fund ngetsawm hi’n gen hi. Chief Minister leh Work Minister-te’ lemsakpihna poimawh hi’n gen a, govt in fund hong piak leh Chura-Sugnu road km 26 asau black- topping bawl zawh hiding chi’n gen hi.
Thudangkhat ah Singngat A/C sung ah kum 2013-14 a 1st phase in SSA nuai ah school building 4 bawl hiding in gen a, 2nd phase ah school building 10 (room extension 6, new construction 4) bawl hidin gen hi. School buiding kibawl dingte hoihtaka sepkhiak ahihtheih na dingin SMDC Chairman-te’ kiangah mawhpuakna piak hi’n gen a, hoihtaka etkaitouh hiding a genkawm in school building hoihtaka bawlzawh ahih theihna ding in mipi’n kithuahpih dingin GS Haupu, MLA (Singngat A/C ) in ngen hi.

Petrol/diesel tamtak mankhia
Lamka, May-6: Police leh VDF kithuah in zan nitaklam in Lamka khawpi sung mun tuamtuam ah surprise check/raid bawl in black a kizuak petrol litre 117 leh diesel litre 55 mukhia uh a,Police station ah koih uhi. Khawpi sungah black a kizuak petrol leh diesel neitute’ Police station ah aki-report hunhun un CJM court ah dinsak hiding uh a, court in liausak ding hi’n kigen hi.

Kha 1 sungin gari 136 register thak
Lamka, May-6: DTO/CCpur office ah April 2014 sungin gari 136 thak register kibawl thakte lakah Truck 1, Van 10,Car 13, Maxi cab 3, Jeep 2, Auto Rickshaw 6 leh Bike/Activa 101 hi a, huai hunsung mah in revenue in Rs.12,20,811 /- mukhia uhi.

CCpur dist a office teng suti ding
Lamka, May-6: CCpur district a Govt office leh institution teng May 7, 2014 in Missionary Day ziakin suti hiding a, Bank leh commercial institution te bel ngeina banga kai in nasem ding uhi. CCpur district ah March 31,2014 (Cheiraoba) zatni in office kai uh a, huaisik in Missionary Day suti hiding in govt in lemsakpih hi.

Lampi gei a singkung kiphuk om
Lamka, May-6:Forest deptt panlakna in khawpi sung mun tuamtuam ah kum teng in singnou suan hi a, huaite a pichin hun ah nuamtuam mahmah hi. Kum 2012 in Forest deptt in Chiengkawnpang a Tipaimukh Road zulah singnou ahunkhop suan in fencing leng bawl uh a, singnou kisuante a neulai sungteng deptt te’n tui buakzel uh hi’n kigen a, singnoute piching in feet 10 val dingin sangta a, hileleng Chiengkawnpang a Post Office kong a singkung 2 abul ah phuk in om a, singkung 3 mah a kimkhat sattan in om a, kuate thilhih hiam chih bel kitheilou hi’n thusuak kiza hi.

Rayburn College ah Graduation,2014
Lamka, May-6: New Lamka a Rayburn College Chapel ah May 9, 2014(Friday) sunnung dak 1.00 akipan in Graduation ceremony,2014 om ding hi.Huai ah Rev Khen P. Tombing, Principal in degree a piakkhiak banah thugenna leh thumsakna hun zang ding a, ‘student of the year award’ piakkhiak hiding hi.Elder V. Langkhanpau Guite, Chairman, Governing Body in leng thugen ding hi.

UTLA in kimuhpih di’n theisak
Lamka, May-6: L. Minlun Singson @ Francky, Dy Defence cum Info & Public Relations Secy, UTLA akipan thusuakin a gendanin Thanlon sub-divn sunga Galkapkot leh Gamhui Part-I, Part-II, Part-III kikal a PHGSY, 9-phase nasepna neitu in May 15, 2014 ma in a P.K. Thomas, Project Incharge, UTLA kimuhpih dingin theisak a, hunchiam beinung in UTLA in bangmah mawh pawlou ding hi’n gen hi.

Thaukap hun ding behlap nawn
Lamka, May-6: Mission apan suahlam a om bannah Pearsonmun, Mualkoi leh Gangpimual apan sim-tum(south west) lama om STC BSF a Firing Range ah thauneu chituamtuam,long/short/grenad/51-mm MOR a kap uh May 1, 2014 akipan sunzom nawn uh a,thuthak om masiah May 15, 2014 daih ding hi. Huai hunsung in Firing Range kiangnai ah mihing kuamah vapailou dingin a theihsak ban uah ganvulh neite’n leng huai kima khah zanlou dingin DIG, STC/BSF in theisak hi.

Ni 3 sung electric meivak pailou
Lamka, May-6: 33/11-KV Khominthang a power sub station in Lailam lui apan Mata khua tan electric meivak supply a, hileleng May 4, 2014 apan electric meivak supply theilou in ni 3 sung electric meivak pailou hi. Huai tawh kisai sub-station construction division te’n tuni’n leng 132/33-KV Khengjang Power sub-station apan 33/11-KV Khominthang kikal a siatna mun zong uh a, electric meivak piaksawm mahle uh hitheilou hi’n kigen hi. Khengjang apan Singngat line leh IB line bel buaina omlou in electric meivak paithei a, hileleng Khengjang apan Khominthang power sub station kikal buai hi’n kigen hi. Akisaipih sub-station construction division te’n a siatna zong mahle uh tuni’n leng muzoulou uh hi’n thusuak kingah hi.

YWAM team in LFS veh uh
Lamka, May-6: Youth With a Mission (YWAM) a School leader Boboi Haokip makaih in YWAM apan mi 8 in tuni sunnung in Bungmual a Lalpuithluaii Foundation School veh uhi. Discipleship Training School course (5-6 months) zoute adin YWAM zop theih hi a, huainung in outreach programme nei uha, tuni a YWAM teamte’ leng outreach programme nei dinga school naupangte tawh Pathian phatna hun zangkhawm uh hi’n kigen hi. YWAM teamte Delhi a hong kipan hi uh a, May 7, 2014 in kiknawn ding uhi. YWAM nuaiah ministry tuamtuam - Mercy ministry, Frontier Mission leh Training ministry om hi.

Education tawh kisai tuni’n meeting
Lamka, May-6: KSO/Singngat block makaih in tuni zinglam dak 11:00 in Tuibuong a KIC office ah education tawh kisai meeting om a, huai ah KSO/Singngat block huamsung ah ZEO nuai a om school 5 leh Dist Council nuai a school 6 apan SMDC chairman, Headmaster/Headmistress leh Hausate tel uhi. Meeting ah school te’n haksatna tuamtuam a tuahte uh genkhawm uh a, school omte maban ah bangchidana student-te’ kingakna ding dinmun tana puah theih hiding hiam chih genkhawm uhi.

CDSU in ATSUM panlakna thuap
Lamka, May-6: CCpur Dist Students Union(CDSU) in All Tribal Students Union, Manipur(ATSUM) nasepna gupthu puang uh a, David Zamzathang, ZEO/Thoubal tunga Agriculture Minister Md. Abdul Nasir in kampau kilawmlou a neihte ziaka ATSUM in moral ground a Minister kitawp dia a phut kipahpih uh a, singtangmite lungtang nasaktu ahihman in Minister hihna apan akintheilam a kitawp dingin nawh uhi. CDSU thusuakin agenna ah tribal mite adia panlatu ATSUM ahihman in kuapeuh in support dingin chial uh a, tribal student-te’ adia MIL sik a Alternative English omna din ATSUM in pan alakna lawhching leng kipahthu gen uhi.

Damloute mobile gu mankhia
Lamka, May-6: Lunkhosat (25) s/o Seilen of Monglenphai in tuni nitak lam dak 5.00 in District Hospital’ Medicine Ward a damlou(patient) te mobile 1 gu a, aneitute’n theikhia in Hospital a duty Police-te’n mankhia in Police Station ah pekhia uhi. Huailou in Chiengkawnpang a Second-hand zuakna dukan ah pasal 2 in tuni nitaklam in puan-ak lei dingdan a kigen in valut uh a, akhat pen in alawmpa puan-ak etkal in T-shirt khat gu in taimang sawm a, dukan neite’n mun gamla sim a tun in matkhiak in om hi.

Suunna
Mrs Rolut m/o Sangzalun Buongpui of Rengkai tuni nitaklam dak 4.00 in damlou in si a, May 7, 2014 in Rengkai hanmual ah kivui ding hi.

Guv in Rotary Club-te panlakna
kipahpih mahmah ahihdan puang
Imphal, May-6: Rotary Club of Imphal te’n ‘Gift of life’ chih thupi zangin naupang hunkhop manbei a heart surgery a bawlte kipahpihna in tuni’n Raj Bhavan ah felicitation function(kipahpihna hun) zat hi a, huai hun Manipur Governor VK Duggal in uap in a Rotary Club-te nasep pahtak thu a gen banah Manipur ah tulelin lungtang natna nei(heart patient) 20,000 vel om hi’n gen hi. Manipur ah tukum sungin khawsakna haksa innkuan atel naupang 30 vel heart surgery bawl hidin gen a, himahleh heart surgery bawlna ding ginatak kitasam lai hi’n gen hi. Gift of Life nuaia NGO khat in kum 2002 akipan tutan naupang 2200 val heart surgery a bawlte uh lakah Northeast a naupang 131 tel a, huaite lakah Manipur akipan 106 tel hi’n gen hi.

CM in nasepna tuamtuam enkhia
Imphal, May-6:Chief Minister O. Ibobi in tuni’n Thoubal district sung mun tuamtuam a developmental project tuamtuam nasepnate abanban in enkhia hi. Chief Minister in Tangjeng Chingkhong mun ah antang 2500 matric tonne koihna ding FCS Godown kibawl dinmun enkhia a, huaizawh in Wangtal a Rice Research Centre complex a Govt Polytechnic bawlna mun ding leng enkhia hi.Huaimun apan CM in Khongjom War Memorial complex leh Wangjing Kodompokpi a Sports complex kibawl mun leng enkhia hi. CM in mun tuamtuam a phakna ah Education,CAF & PD Minister M. Okendro leh P. Brojen,MLA(Wangjing Tentha A/C) banah official hunkhop in zui uhi.

Class X & XII result suak dekta
Imphal, May-6: Board of Secondary Education Manipur(BSEM) saina in Feb 20-March 14, 2014 sung Class X/HSLC examination,2014 om May 15, 2014 velin a result puankhiak ahih gintak-huai chihthu om a,Council of Higher Secondary Education Manipur(COHSEM) saina in Feb 17-March 15, 2014 sung Class XII/Hr Secondary Examination,2014 leng May, 2014 kal nanung sungin a result puankhiak ahih lam-et huai chih ahi hi. Official thusuak kizadan in HSLC examination tawh kisai subject tenga mark evaluation leh tabulation zawhsiang hita a,a zekaipen in May 15, 2014 tana result suahsak sawm a panla uh hi’n gen hi.Class XII/HSE tawh kisai in subject khenkhat chihlouh evaluation leh tabulation zawhsiang phial hita a,Lok sabha election leh bandh/general strike ziakin subject khenkhat zawhsiang nailouh deuh hi’n kigen hi. Kumlui 2013 in Class X/HSLC result pen May 20 in suak a, Class XII/HSE pen May 22 in a result puankhiak in om hi.

Tui haksat lai in natna hii leng om
Imphal, May-6:Manipur gamsung mun tuamtuam ah mipi in tuisiang taksapna dinmun haksatak a tuahlai un tunai chin akipan in tuinek ziaka natna(water borne diseases) tuamtuam hii leng a, mipi pilvang poimawh mahmah chi’n Dr ToijamGambhir, Professor , Community Medicine department, RIMS in gen hi.Hibang natna hii len ziak hi a kigen bel tui haksat ziakin sum muhna dinga tui zuakte’n tui a muhna peuh uh pukhri(pond) leh a lemtanna muh khat peuh apan tui a lakte uh nek-le-dawn dinga a zuak ziak uh hiding a ginlelh hi a, huchibang tui siangthoulou

Teacher school kai ginaloute tungah
govt in action khauhtak laksawm
Imphal, May-6: State govt in Manipur a education dinmun lungjinhuai sak ziakin quality education taktak piankhiak theihna ding in govt school-te thunundan khauhzawsem patkhiak sawm a, govt school a sem teacher kuapeuh regular taka kailoute tungah action khauhtak lak hiding chihthu om hi.Adiakin hill district a posting a om teacher khenkhat regular taka school kailou leh student-te sinsakna lama ginalou(irregular)te tung ah govt in khauhtaka panlak sawm hi’n thusuak in gen hi. Huailou in regular a sem teacher khenkhat in amau sik-le-tanga sem ding( hiring substitute teachers) alak uh leng dal hiding chih ahi hi. Huai tawh kisai in H. Deleep Singh, Director of Education(S) in zan in Office memorandum suah chih ahi hi.

Naga Frontal organisation pawlin Naga Unity tangkoupih nawn uh
Imphal, May-6: Nagaland leh Manipur a Naga Frontal Organisation pawl tuamtuam in Naga mipite kipumkhat ding leh Naga cause adia khauhtaka pangchiat ding in Naga mipite theihthak sak uhi. Tuni’n Manipur-Ngaland gamgi a Mao Gate ah Manipur Security te’n May 6, 2014 a a kaplup uh Neli Chakho leh Dikho Lokhou sih champha zangkawm in Manipur leh Nagaland a kipan frontal organisation tuamtuam mipi leh student tamtak kikhawm uh a,huai ah Naga unity hatsak sem dinga panla din thupukna bawl uh chihthu om hi. NSCN-IM general secretary ThMuivah in Manipur a a tenna Ukhrul district a Somdal khua phaksawm Manipur govt in dal a, mipi leh security kinawktuahna kalah thautang leng in Neli Chakho leh Dikho Lokhou kha in si uh hi’n kigen hi.

TUNI THUPI:
“Huchi’n, noute, thutak thu, na hotdamna tanchinhoih uh ngaikhia a gin leng gingtate leng, amah ah chiamsa Khasiangthou a chiamtehin na om uhi”
–Ephesate 1:13

Missionary Day 2014
Manipur South District Churachandpur a teng te’n i district ua tanchinhoih (Pathian-thu) hong lut nung kum 104 chingta ahih chih lam I mangngilh hetlouh uh deihhuai a, huai kawmkawm in May 7, 2014 in ‘Missionary Day’ i zangding ua, i district in kum 104 sung vingveng Pathian thu i zakna tungtang uah kivelthaknang tamtak om ding in gingta hang. Huai kawmkawm in mialna apan vakna hon tun tanchin hoih hon pawlut, Watkin R Roberts, Savawma, Vanzika, Thangchhingpuia, Thangkai leh Lungpau kichite mangngilhtheih vualding hilou hi. Tualou in, ei tualsuak mahmah apan ‘missionary to Myanmar’ a sita H. Kamzathang mangngilh vualding in lawmlou hi.
India ading in South lamte ah Pathian thu ana lut baih mahmah in amaute eisang in ana changkang masa zaw ua, huai apan in Khasi-te gam Meghalaya bang, Mizoram, Nagaland, Manipur chih te ah Pathian thu hong lut tou dinden hi. Pathian thu lut masakna te ahihleh, laisiamna lam ban ah neih le lam ah leng ana changkang baihzaw deuh uh ade aw chih theih in om a, singtangmite Christian ihih khak zenzen ubang leng kipahhuai law mahmah ahi chih theih in om hi. A poimawh mahmah ahihleh, tuisuahgiat gal apan hong kipan, sapte’n Mission compound pen munpi ding in hon neikha zenzen ua, Paul Rostad te nupa hah katna ziak in, Mission Compound school apan in i mi masa lam teng lehkha siam khia in sepna hoih pi pi ngah lawh uhi.
Unaupa T Pumkhothang in a la phuah ah “Tuan a simthu sutleng maw, tual i niam simthu, theih phaklouh selung mawlte ihi, Tung Pathian itna vang in eidi’n khua ahong vaak, tu’n a tate hihang e…” chih la hoihtak, ihihna mahmah uh hon vutkha khat honphuak a, huai kawmkawm in laphuak siam tamtak te’n lungkhoih taktak la hon thawhkhia uh i chiding hi. Nidang hunin dawi le kau sing le suang leh adangdang i bia ua, kithoihna chi tuamtuam i nei uh chih haihvual ahikei. Pathian thu i zak khak a, Christian i kichih pen hamphathuai law mahmah a, Pathian vualzawlna mi chih, inn kuan chih leh i khawtang adong ihihman un, a taktak in Christian ihihna sem buching in, Pathian deihdan zui in khawsa leng, Pathian in Lamka khawpi nakzaw sem in hon vualzawl ding a, khawpi dang te tawh dinmun kikim in leng hon koih thei ding hi. Amah deihlam zong in, ei le ei leng athak in ki enchian leng ut huailua hi. Pathian thu izaknung kum 104 a chingta a, i lak ah Setan bia leh dawi nasep tuamtuam om i chih te uh hawlmang hun hitalou hia? chi ut lai leng ihi. Pathian mi zat mahmah Evan Lang Do Khup laphuah khat sa khawmni. Hiai anuai abangin: