Council(ADC) member te’n tuni’n sitting nei
Lamka, April-25: Tuibuong a District Council Hall ah tuni zinglam dak 11:30 in MDC te’n Council sitting/meeting nei uh a, member tamzaw tel uhi. Huai hun ah MDC/ADC member te’n genkhawm ding a CEO,ADC/CCpur kianga agenda tuamtuam a piakkhawmte genkhawm uhi. Khua (village) tuamtuam 16 recognition tungtang ah MDC te’ recommend poimawh a, khua 6 recommend uh a, adang khua 7 te maban ah detail study bawl ding in koihphot uhi. Manipur singtang gam ah 6th schedule nuai a kivaihawmna ding in panlak zelding in thupuk uhi. Finance deptt te’n ADC/CCpur in kum 2014-15 sunga Budget ding a proposal a bawl uh Rs. 62,94,96,000/- pompih uh a, huai lakah salary ding in Rs.58,05,49,000/- leh office expenditure dingin Rs.4,89,49,000/- tel hi.
LATSEA team in SP/CCpur kiangah memorandum pia
Lamka, April-25: Lamka Traders and Self-Employed Assn (LATSEA) a Chief Co-ordinator C.T.Lian Guite makaih in LATSEA makaite’n tuni sunnung in SP/CCpur kiang ah memorandum pia uhi.SP/CCpur in leng huai memorandum a point kitaklangte thu poimawh leh mipi adia thilhoih hi a taklang kawmin tuni mah in point khenkhate semzui pah hi’n LATSEA makaite apan kiza hi.
LATSEA makaite akipan thutut kingahdan in memorandum ah kha 6 paisa akipan khawpi sungah gari tuamtuam 60 vel gutate’n gumang uh a,huaite laka 10% lel muhkik ahihna ah police-te’n gutate apan mipite bitna dingin bangchi’n panla uhiam? Business community-te’n Gari(heavy verhicle) tungtawn in van poimawh hong puaklutte uh Tuibuong area ah gari 1 zel akipan Rs. 10,000/- lak in omsek a, huaite akipan business community-te bitna dingin police te’n bangchi’n panla uhiam? Khawpi sunga dukan neite laka sum ngetna(demand letter) hawm meltheihlouhte akipan dukan neite bitna dingin police te’n bangchi’n panla uhiam chih leh March 11, 2014 a SP kianga memorandum kipia tawh kisai in police te’n bang semkhia uhiam? chi’n dotna bawl uhi. Huaibanah mipi bitna din security te’n dakkal 24 sung mun 5- Khengjang area, Sielmat bridge area, Nehnu Marg junction, Salem Veng area leh New Bazar area ah checking bawl dingin ngen uhi.
SP/CCpur in gari mang tawh kisai in gari gute matkhiak ahih theihna dingin Torbung a BSF-te omna mun ah checking point khat koih sawm ding hi’n gen a,gari a tax khonte matkhiak theihna dingin dawrkai(business community) te’n demand letter leh phone a vauna a muh ualeh police ah report pepah le uh chiklai peuhin kithuahpih hiding chi’n gen hi.Khawpi sungah tu dinmun sanga mipite bitzawk theihna dingin tuni nitak akipan khawpi sungah police patrolling pai kipan ding in SP in gen chi’n LATSEA makaite apan kiza hi. SP in a gen bang ngeiin tuni nitak in Police-te patrolling pai uh a, mun khenkhat ah leng frisking bawl muh ding om a,SP in a gen banga pan alak ziakin SP pahtak thu gen uhi.
HSA GHQ in mawhpaih thu puang
Lamka, April-25: Info & Publicity deptt/Hmar Students’ Assn, Gen HQ in April 22, 2014 nitak in Tipaimukh sub divn. a Lungthulien khua ah Mizoram Armed Police (MAP) pawl in mi nautang (innocent ) a soisakna uh mawhpaihthu puang uhi. MAP te’ gamtatdan human rights bawhsiatna leh gam leitang dan tawh kituaklou hi’n taklang uhi. Hibang a security te gamtatna in Lungthulien area ah lemna leh muanna hihsethei hi’n taklang uh a, Manipur state sung ah state dangte’n buaina bawl nawnlou dingin theisak uhi.
DC in ‘3 days training’ hongkhe ding
Lamka, April-25: SSA-RTE/CCpur saina in April 28-30, 2014 sung zinglam dak 11:00 apan in IB Road a Synod Hall ah ‘3 days refresher training program for selected teachers/instructor of Residential and Non-Residential Training Centers’ om ding hi. April 28, 2014 zinglam dak 11:00 in PK Jha, IAS, DC/CCpur & Chairman, DBE-SSA/CCpur khuallian apang in training hong ding hi. Huai hun ah Guest of Honour in Mannuamching, MCS, CEO/ADC pang ding a, Functional President in Lalsanglien, ZEO/DPO, SSA-RTE/CCpur pang ding hi.
Singkung phuk dingte’n phalna lakngai
Lamka, April-25: Supreme Court in January 15, 2001 a order a suah dungzui in lampi dung, govt office/institution/ school campus a singkung omte public property ahihziak in hoihtaka kepbit a, phuktheih louh ding chih ahi. Himahleh transmission line, cable, lampi kekletna(expansion) telin alou theilou om hun ah akisaipih Forest deptt akipan No-objection certificate lak ngai a, singkung piching 1 phukna kim ah singnou (sapling) 5 suanthak ding chih ahi. Supreme Court thusuak zuilou a, singkung phukte tungah Indian Forest Act 1927 leh Manipur Forest Rules 1972 dungzui in action laktheih hi. Huailou in SP office campus ah security-te omna ding barrack mun ding JBC in lei a nawtmai hun ah singkung 1/2 phukkhak a om hi’n kigen hi.
B.Ed zil utte’n ngaihven theih
Lamka, April-25: CCpur district a Education deptt ah Graduate teacher kum 8 semkhin maban a B.Ed zil utte’n ZEO/CCpur office ah application form lak theih ding a, thuchian leng ZEO office mah ah kantheih ding hi.
An ngawla thumkhawmna
Lamka, April-25: Halleluyah Prayer Band, Town Area/CCpur pawlin May 1, 2014 zingsang dak 7.30 akipan in Hill Town a ECA Centre Church ah an ngawla khumkhawmna 227veina hun zang ding uhi. Huai ah Kimkhochong of Kipgen Veng in thumna in hun hong ding a,Upa Lunkhomang, Vice Chairman,HPB Town Area in thugen ding a, thumna item banah huntawp tan Evan Thenmang, Jt Secy/HPB in makai ding hi.
Lamka ah khawlumdan kiamzek
Lamka, April-25: Lamka khawpi ah ni tamkuamtak vuah a zuklouh banah khawlumdan uang deuhdeuh a,khawpi sung adia tui lakna mun Lanva-lui leh Khuga Dam a tui tanpha leng kiamdeuh hi’n kigen hi. Khawlumdan tuni zinglam dak 10.30 in 31.3 degree Celsius tung a, nitaklam dak 3.00 in 33.6 degree Celsius tung mahleh nitaklam in khua nim in vuah tamlou chik a zuk ziakin nitak sawtnung in khawlumdan kiamzek in nitak(zan kimlai) dak 12.00 in 28.6 degree celsius ah kiam hi.
Block Level Non-Residential SMDC
Lamka, April-25: Block Mission Co-ordinator, SSA-RTE/CCpur Block saina in April 29-May 2, 2014 sung zinglam dak 10:30 apan in Vimala Raina H/S campus a Block Resource Centre ah ‘3 days Block Level Non-Residential SMDC/PRI training 2013-14’ om ding a, Kaikhanlian Guite, Block Mission Co-ordinator, SSA-RTC/CCpur Block in hong ding hi. Training sungin Khupchinthang, Block Resource Person (BRP); Lienzagou Zou, Cruster Resource Person (CRP); Khamminlun, CRP; Thongminthang, BRP; Chinzakham, BRP; Chinlamthang, CRP leh Jammuanthang, CRP te’n sinsak ding uhi.
Suunna
Thangmuansang (25) s/o Upa T.Kamzalian of Vengnuam, New Lamka zan zinglam dak 7:00 velin Ngopa(Mizoram) ah hepatitise ziaka damlou in si a, aluang hong kipua in tuni’n YPA Hanmual, New Lamka ah kivui hi.
N.Thangzabiak (51) h/o Langzangai of Vengnuam, New Lamka zan hal nitak dak 7:00 velin Thangzam Road, New bazar a akzuakna inn sawngtung apan kia in Dist Hospital apan Imphal ah puak in om a, zan nitak in damzoulou in si a, tuni’n YPA Hanmual, New Lamka ah kivui hi. N.Thangzabiak in SDO/Thanlon office ah VLW sem ahi hi.
CM makaih in meeting om ding
Imphal, April-25 : Chief Minister O. Ibobi makaihna in April 26, 2014 in CM Secretariat ah Manipur a tui haksatna tawh kisai meeting om ding hi. Huai meeting ah tulai a tui haksatna tawh kisai nounel takin genkhawm ding uhi. Tulai a tui a haksatluat ziakin civil organizations tuamtuam banah North East Dialogue Forum (NEDF) pawlin state govt kiangah tui kining pe dingin ngen uhi. NEDF-te ngialin zan in Manipur Press Club ah press-te kimuhpih uh a, PHED te’n pan alak taktaklouh ziak un tui haksatna om hi’n gen hi.
Minister in Moreh PHC enkhia
Imphal, April-25: Health Minister PhunzathangTongsing in tuni’n Moreh pha in huai mun a Primary Health Centre(PHC) omdan va enkhia a, huai PHC a room 2 luah a om staff 2 apaisa December 2013 a kipan duty lou a absent mi 2te tungah FIR bulhkhum ding in OC, Moreh Police Station thupia chih ahi hi. Minister in Moreh Hospital leng pha in thil omdan enkhia hi’n kigen hi. Aman PHC mun a etkhiak madeuh in Tengnoupal a Primary Health Centre mun leng enkhia hi. Bialtu MLA D. Korungthang; Suhel Akhtar,IAS,Principal Secretary (Health); O. Ibomcha, DirectorNHRM; LunkhoseiZou, Chairman, ADC/Chandel leh State Health department a high ranking official tamkhop in Health Minister zui uhi.
IMC ten Bazar ah drive nei uh
Imphal, April-25 : Imphal Municipal Council (IMC) ten tuni’n police-te tawh pangkhawm in Imphal bazar ah drive nei uhi. Huai hun ah lampi kiang leh dawr kiang banah nin a paihlouhna ding mun a kipaite hoihtakin enkhia uhi. IMC Chairman A. Nimai leng drive ah tel a, rickshaw driver khat in Khwairamband bazar a lampi kiangah nin a paihlai mankhia uhi. A. Nimai in Lamdeng a Solid Waste Management Project kibawl May 2014 a zawhsiang hidin gen a, huai zawh hunhun in nin tawh kisai a buaina sukveng hiding, chi hi. Huaiziakin, kuapeuh in nin paihna dinga kibawlte a pai chiat dingin ngen hi.
Yaosang Rock Show om ding
Imphal, April-25 : Nokia company-te sponsored na nuai ah April 26, 2014 in Thangmeiband a THAU Ground ah Yaosang Rock Show kichi om ding hi. Huai hun ah Bangalore a om Pink Floyd-te tel ding uh a,Tarzan & Perverts, Sammi leh Grief Card te leng tel ding uhi. Huai ding tawh kisai in tuni’n Nokia a CEO RK Sanjoy in Imphal a Ananda Continental Conference Hall ah press-te kimuhpih hi. Aman organizations tuamtuamte kiangah bandh leh blockade bawllou dingin ngen a, Think Pink kichi Bangalore te’n Manipur khatvei a hongphakna ding uh hi a, a tamtheipen in huai Yaosang Rock Show uap dingin chial hi.
Bishnupur-Nungba Road kikhak
Imphal, April-25:Bishnupur-Nungba lampi a Zoujangtek village ah driver 2 kuatehiam in a vuakliam ziakun Bishnupur-Nungba Road khak(closed) in om hi. April 24, 2014 in James Kamei (28) s/o Kumar Kamei of New Checkon in Armada Grand (MN06L/2908) ah passenger 4 pua in Imphal apan Khoupum zuanlai zingl dak 8:30 velin Zoujangtek Kuki village ah kuate hiam in ana soisa uhi. Huai hun ah James suakta thei hi. Tuazawh in Philip Panmei in ahek Jeep (MN05/4012) zing dak 7:00 in Nungsai-Bishnupur kikal ah mipi hon in attack bawl uh chih ahi hi. Tuni in Nungsai V/A, Nungsai Youth Club leh Nungsai Students’ Union te’n Manipur Press Club ah press-te kimuhpih uh a, Old Cachar Road a Bishnupur- Nungba via Khoupum a pai gari driver soisate matkhiak ahih masiah bandh puang uhi. Amau hibang a gamtangte tung ah akituahpih bang gawtna pe dingin govt ngen uhi.
Permanent State Water Policy phut
Imphal, April-25:BJP Manipur Pradesh pawlin Manipur a tui haksatna liantak om tawh kisai in permanent State Water Policy bawlkhiak alou theilou a poimawh hi’n gen uhi. BJP Manipur Pradesh a General Secretary (Admn), M Ashnikumar in a gendan in India gama state dangte tawh tehin Manipur in vuahtui kiching ngah hi’n gen a, hileleng tui kholkhawmna ginatak omlouh ziakin tui taksapna om hizaw in gen a, huai tungtang ah state govt mawsakthu gen hi. Manipur in a tangpi in kum tengin vuahtui 2000 ml ngah a, Manipur gam 85% alian leng gammang(forest areas) hi’n gen hi. Lui(streams), dil(lakes) leh dop( wetland) liankhop omlai in tui taksapna om kichi thil omdia kilawmlou hidan in leng BJP Manipur Pradesh a Gen Secy(Admn) in gen hi.
