* ADC Churachandpur in District Hospital a damlou 99 panpihna pia.
* Langkhanpau Guite Chairman ADCC makaih in DRDA Official te'n IWMP tawh kisai genkhawm.
* Manipur Pradesh Trinamool Congress President Kim Gangte in Manipur Congress Govt. naktak in mohsa.
* Lamka Public Ground ah Trade Fair-Cum-Mela om ding.
* Silen khua ah World Malaria Day kizang ding.
* KSO Churachandpur a General Secretary ding in Robert Paoboi Haokip mohpuakna piak in om.
* Hornbill Electronics Show Room ah EDC Machine kizang.
Tanchin Kimzaw:
Department of Tribal Affairs in Autonomous District Council Churachandpur tungtawn in District Hospital a Schedule Tribe damlou omte panpihna ding in Sum pia hi. Tuni zingkal in Langkhanpau Guite Chairman ADCC makaih in Kamsuanlun Executive member, H Mangchinkhup Executive leh Mannuamching Chief Executive Officer ADCC in District hospital, ward tuamtuam a damlou 99 te panpihna pia uhi. Damlou a gimdeuh te sang 2 pia ua, a gimlou deuh te sang 1 pia uhi. Hiai hun Dr. N Paulginthang Medical Superintendent leh Dr. Kim Simte Deputy Medical Superintendent leh Dr. HL Liensang Chief Medical Officer in kithuahpih uhi.
Langkhanpau Guite Chairman ADCC makaih in tuni sun dak 12 in amah Office Chamber ah IWMP (Integrated Watershed Management Programme) tawh kisai in meeting nei uhi. Hiai hun ah Jacintha Lazarus IAS Executive Director DRDA in IWMP sepsuahna ding tawh kisai a, tulel dinmuna sepsuah theih te leh proposal omsa te tungtang taklang hi. Hiai meeting ah IWMP in akisaipih Forest department, Horticulture department, Fishery department leh DRDA nuai a Project Officer leh Engineer te tel uhi.
Kim Gangte President Manipur Pradesh Trinamool Congress in tuni sunnung dak 1 in M Songgel a Manipur Pradesh Trinamool Congress Churachandpur Office, Thangkhomang MDC tenna inn ah khaw hausa leh Media te kimuhpih hi. Kim Gangte in a thugenna ah, Manipur Congress Govt. in Law and Order, Development Scheme tuamtuam leh Health Care Facilities a ngaih poimohlouh dan gen in manipur Congress Govt. naktak in omsa hi. Law and Order hoihlouh ziak in, manipur mipi te lungsim buaithei ding in doctor simte'n gen uh chi a, zinglak Newspaper a misi kigelh kia inleng mipi lungsim hihbuai ahihdan gen hi. Niteng phial a misi om gige, tualthat te matkhiak a dan tawh kituah a gawtna piak om ngeilou chi a, misi om chiang in JAC kibawl tawm in Bandh leh Strike kibawl in mipi naktak in subuai a, Govt. in tualthatte ni bangzahhiam sung amatkhiak ding a thuchiam a bawl chiang in bandh khawl zel a huchihkal in misi dang khat in behlap nawn zel in JAC in bandh bawl nawn zel a, hiai bang a manipur a paitouh zelleh bangchik chiang a khantouhna om ding chi a, tulel a manipur Congress Solkar khekkhiak hun mahmah ta ahi chi'n leng genbeh hi. Manipur Chief Minister O Ibobi Singh kichi Manipur Chief Minister hilou in Thoubal Chief Minister ahi chi a, amah Constituency kia puah in building thupi taktak leh dawr lian taktak bawl a, himahleh a miding omlou chi hi. Manipur ah migenthei leh singtangmite hamphatna ding a hongpai Sum a Crore a sim te Singtangmite kiang tunglou in Thoubal ah Building hoih taktak lamna in kizang chi a, Manipur Congress Solkar in Singtangmite nuaisiah ahihdan kilang chiang mahmah chi a, State ah Congress in vaihawm a, District sung ah Congress MDC te'n vaihawm in amau te kinektuahna kal ah mipi ading omlou in, tukum sung lel inleng Henglep Constituency sung ah Khaw Hausa te Housing Scheme mu omlou chi in Manipur Hills District a singtangmite tanvou ding teng koilam tung hiam, a sum teng koi a om hiam chi'n Congress Govt. tung ah dotna bawl a, Congress Govt. leh Congress Party te mipi'n thuhilhna hoihtak piak hun ahita chi hi. Gam khangtou western country te'n Health Care facilities ngaih poimoh pen a, aneih lai un, Manipur Govt. in Health Care pelou in Death care pia chi hi. Khawsak haksa BPL innkuan te nekding PDS anntang teng leng Congress Solkar in Dimapur Bazar ah zuak gaivek ahihdan Sangai Express April 15, 2013 Issue ah kigelh chi hi. North-Eastern State teng puahphatna ding in Ministry teng in DoNER ah 20 percent sung khawm chiat pua, manipur puahna ding inleng a Crore a sang a sim honglut a himahleh a omna gam kitheilou chi ahi. Central in Sum honpiak ngal leh manipur lut ngei ding chih theisa himahleh a tunna ding tan a tung zawhlouh in ziak in Singtangmi te'n khopi kizuan chiat ta chi a, Singtang khua te ah School hoih leh Health care Facilities leh lampi hoihtak om hileh kuamah in haksa pipi in Lamka leh Imphal zuanlou chi'n leng genbeh hi. Aban agenzelna ah Central apan VVIP honghoh chiang in security khauhtak nuai ah Underground General Strike bawl ua, mi khenkhat damlouhna ziak a damdawi inn zuan dia pawtkhe te Police leh commando te'n bandh ahihlam theilou maw chi'n kizep huan ua, hiai in bandh bawl te leh govt. pangkhawm siamdan lang chiangsak mahmah chi a, Manipur ah Law and Order kichi Ui-te adia kibawl tawh a kibang chi'n leng genbeh hi. Tutung President hongzin ding inleng zan kal in Airport leh Raj Bhavan kikal, lampi ah pak-pakdim a, President kiknawn nung in a ngeina bang nawn hi. Hiai bang in Congress leader te amau leh amau thei gegu kawm a kikhem in, kisulungkim tuah maimai uh chi'n leng gen a, Congress Chief Sonai Gandhi leh Prime Minister hongzin chiang inleng Civil Society leh NGO te tawh kimuh ding phalsak hilou in State Govt. thu-im tamtak kepbit leh pholhsuahlouh in om gige chi a, Central apan Congress leader te'n leng Civil Society leh NGO te kimuhpih ding vai leng saisawm tuanlou in Congress makai te kimawlna sang mahmah ta chi hi. Abana genzelna ah, Union Home Secretary GK Pillai in Central Govt. in Manipur ah lemna leh muanna om ding deihlou in, thunun theih lel a buaina om ding deih chi a, Manipur govt. in ahihleh Central Govt. kichi bawng nawi bang in ngaihsun a, ut hunhun a sum ngetna ding in koih chi hi. Huaiban ah Suspension of Operation a om helpawl te tawh Govt.in political dialogue a neih hunta ahi chi a, Govt. in nam khat a hon ngaih leh kihouna hon neihpih hunta ahi chi hi.
Zingchiang sunnung dak 4 akipan nipi kal thum daih ding in Lamka Public ground ah Trade fair cum mela om ding hi. Hiai Mela ahihleh Churachandpur District Sports Association (CDSA), YPA lamka Unit leh North Eastern Trade Fare Association saina nuai ah neih hiding a, mela sung in van chi tuamtuam leh kisuklimna om ding hi.
Global Fund for AIDS, TB and Malaria Round 9 Intensive Malaria Control Project Phase-II nuai ah Caritas India leh Diocesan Social Service Society Imphal ban ah District Vector Borne Disease Control Programme saina in zingchiang zinglam dak 10:30 in Silen khua ah " Invest in the future, defeat malaria" chih pansan in World Malaria Day 2013 zang ding uhi. Hiai hun ah Dr. HL Liensang Chief Medical Officer, chief Guest in pang ding a, Functional President in Dr. F Thienkhogin District AIDS Control Officer pang ding hi. Hall Programme kipatma in Malaria doudalna tawh kisai in Mass Rally om ding hi.
Mihat leh Hangsan aphamsa Hauzasing theihgigena suangphuh honna April 26, 2013 sunnung dak 1 in Kangkap khua ah om ding hi. Huai hun ah Thanglianpau Guite President ZRO in han suang hong ding a, Pastor T Daikhankhup in Pathian kiang ah lan ding hi.
Kuki Students Organisation (KSO) Churachandpur a President Paokai Haokip in, thusuah a bawlna ah, KSO Churachandpur a, General Secretary Lamminlun S Gangte in Bank of Maharastra ah Probatory Officer a mun ziak in ahihna apan kitawp a, a kitawpna pomsak in amah munluah ding a Robert Paoboi Haokip mohpuakna piak ahihdan taklang a, Robert Paoboi Haokip in term omlai teng General Secretary hihna lending a, huaiban ah K Lunthang Kipgen in Secretary Relief and Rehabilitation hihna len ding hi.
Hornbill Electronics' Show Room Mission road, Hiangtam lamka ah gamdang a baihlam tak a vanlei theihna tawh kibang, tulai khovel tawh kituak EDC (Electronic Data Capture) machine kichi kizang ta hi. Hiai EDC machine tungtawn in tulai a bank tuamtuam a ATM card, debit card, visa card, master card, mastro card, credit card tungtawn in van leitheih hita hi. Sum tang a tawi sang in, card nei peuhmah in baihlam tak in van leitheihta ding hi.
GAMDANG THU
Tuzing lam dak 8:30 vel in Bangladesh a vanzuakna building khat kichim in mi 82 si uhi. Dhaka khawpi nawl Savar district bial a om puan bawlna factory dia kizang Rana Plaza kichi, sawng giat a saang kichip ziaka liamna tuak mi 700 val hospital tut ahih banah aza asim ninlom lakah kaihkhiak nailouh in omlai hin kigen hi.
China gam tumlam Xinjiang Bachu ah buaina nasatak piang in mi 21 si hi. Hiai gamsunga Uighurs kichi minam omten China solkal khutnuai apan amau kivaihawm theihna ding tanvou deiha kiphinna ah police 15 tel in mi 21 in sihlawh uhi. Hiai thu ziak mah in kum 2009 in mi 400 val mat ahih banah midang 26 si dia thutan khum in omta uhi.
World Health Organisation apan doctor ten China gam a bird flu natna kintaka mihing tungah kilawh sawn theih hin gen uhi. Hiai tawh kiton in China Scientist ten leng H7N9 virus omdan a suina nei lellel ua, tua bangkal ah hiai natna ziakin Shanghai leh a sehvel ah mi 17 in sihlawh ta ua, midang 100 val ten nat lawh uhin kinge hi.
South Africa khawpi nih Cape Town leh Pretoria ah South African Democratic Teachers Union ten strike nei uhi. Hiai hun ah school teacher tamtak in gamsung a siamsinna munte puahphat ding deihna leh khalawh punsak ding ngetna in strike pan mah le uh, Solkal in hiai kiphinna a telkha teng gawtna piak ding hin gen hi.
Syria gamsung buaina a kinlam a sukveng ding deihna in Qatar kumpi leh President Obama in kikupna nei uhi. Qatar kumpi Sheik Hamad Bin Khalifa AL Thani in tunin Obama tawh Washington DC a tutkhawmna hun ah tulel a Syria President Assad vaihawmna khengkhe zoute a kisapna bang a panpihna leh kithuahpihna piak ding ngaihdan genkhia uhi.
London apan fake bomb detector zuak a hausakhia mikhat Londong court in diktatlou ahih dan puang khia hi. British sumbawl hausa James McCormick in terrorism omna gam tuamtuam a diakin Iraq, Georgia leh Saudi Arabia gamte khem in, ama bawltawm bomb detector lem a zuakna apan million dollar 76 val neihlawh hin kigen hi. Court in hiai pa tungtang May ni 2 in ngaihtuah ding ahih banah sum tamtak senga hiai fake detector leikhia gamten amau sumsenzah lehkik ding dan ngaihtuah sawm uhin leng kigen hi.
European gamte apan amasapen dingin Germany in home-school neih ding phalnawn lou hi. Hiai tawh kiton in pianken a vualpha naupang teng in public ahih leh private school akai teitei ding chi hi. Himahleh school a sinsak sangin home school ah naupang sinsak hoih zaw ahih dan Nu-leh-Pa tamtak in gen mah leh solkal dan tawh kituaklou ahih ziakin dankalh leh jail tanpha tun theih hin kigen hi.
Tunin Colmbia Metro station CCTV apan kimu danin, Subway police khat in train hong tailai, mai a tawmlut sawm pasal khat kintak in kaikhe kik man hi. Hutkhik a om pa ahih leh lungkhamna mahmah nei a kithah sawm hidingin gintakna om hi.