* Education Minister M Okendro Singh in Gandhi Memorial High School, Golden Jubilee lopna uap.
* Education Minister M Okendro Singh in SSA Residential School hong.
* Vungzagin Valte Parliamentary Secretary in SSPP Residential School ah Free School Uniform pekhia.
* Dialkhai Govt. Junior High School baang kichim in naupang 12 delh liam.
* Zomi Council Annual Assembly om ding.
* T Chhungi Memorial Free Cancer Detection Cand and Seminar om ding.
* Vungzagin Valte Parliamentary Secretary Award lak lopna om ding.

Education Minister M Okendro Singh in Gandhi Memorial High School, Golden Jubilee lopna uap.
Molnom khua a Gandhi Memorial High School kum 50 chinna Golden Jubilee lopna tuni sunma dak 11 in School huangsung ah nei uhi. Hiai hun M Okendra Singh Education Minister in Chief Guest hihna tawh uap hi. Chief Host in TN Haokip MLA pang a, Guest of Honour in Phungzathang Tonsing Health and Family Welfare, GAD and CADA Minister, pang a, Special Guest of Honour in Vungzagin Valte Parliamentary Secretary Horticulture and CADA pang a, Special Guest in Jacintha Lazarus IAS DC Churachandpur leh L Mangkhogin Haokip IPS, SP Churachandpur pang uhi. Vungzagin Valte Parliamentary Secretary in Kangvai khua ah Education Minister M Okendro Singh va dawn in Gandhi Memorial High School huangsung lutton uhi. Education Minister M Okendro Singh in Golden Jubilee chiamtehna Suang hong a, huaizawh in puanlap kaipalh hi. Puanlap kaihpalhna neihzawh in teltuam mi 50 in Jubilee dak khen uhi. Hall sung ah, TN Haokip MLA in Jubilee Souvenir hong a, Holkhomang Haokip Chairman and Founder Headmaster in welcome address a gen laitak in vuah leh huihpi kithuah in hall teng puksia a, programme sutzop theih nawnlouh in om hi. Education Minister M Okendro Singh in, School Office sung a Media te kiang a gendan in, Hill District teng lak ah Senapati leh Churachandpur ah Model School om in, Manipur State sung ah Education lam tawh kisai in Churachandpur District khangtou pen in gamdang a College leh University hoih taktak ah, baihlam tak in seat muthei chi a, Manipur a High School te puahphat ding ki poimoh ngaih mahmah chi a, Prime Minister Package nuai ah Gandhi Memorial High School ah numei leh pasal Hostel a tuam tuak in kibawl ding a, tukum sung in nasep kipan ding chi hi. Huaiban ah Gandhi Memorial High School ah Class VI to Class X te ading in Model School omta a, maban ah Class I to V te kaina ding leng Model School kibawl ding a, tukum in school Building bawlna kipan ding chi hi. Manipur a Contract Lecturer te'n khaloh muhlouh ziak a Cease work Strike neih a sawm uh tawpsan ding in ngen a, Chief Minister tawh kihouna dungzui in, tukha sung a khaloh piak hiding chi'n leng gen hi. School Management Committee in Auditorium bawl sak dia ngetna a bawl uh tungtang a dawngna ah, Hostel leh Model School School Building te bawlzawh ahihchiang in Auditorium bawl dingdan ngaihtuah hiding inleng gen hi.

Education Minister M Okendro Singh in SSA Residential School hong
New-Lamka Khominthang a SSA Residential School Building dia kibawl zawhsiang ahihtawh kiton in tuni sunnung dak 1 in a honna nei uhi. Hiai hun ah Education Minister M Okendro Singh, Chief Guest apang in School Building hong a, Pastor Routhuam in Pathian kiang ah lan hi. Education Minister in a thugenna ah, hiai residential school ah naupang khawsak haksa deuh te a thon in siamsinna piak hiding chi a, School fencing bawlsak ding ahihdan gen hi. Chief Host apang Phungzathang Tonsing Health and Family Welfare Minister in a thugenna ah, Education Minister in School fencing kia hon bawlsak ding hilou in District sung a Polytechnic Institution leng koih sawm ahihdan gen a, tun a mun ding kizong lel a, mun nih ki-saikak lel chi hi. Hiai hun Vungzagin Valte Parliamentary Secretary leh MDC bangzahhiam in uap uhi. M Gouzamang Guite Executive Member ADCC in Programme zawhnung in Media te kimuhpih in, School building piching theihna dia kithuahpih Healh and Family Welfare Minister Phungzathang Tonsing leh District Council member, DC leh mipite tung ah kipahthu gen hi.

Vungzagin Valte Parliamentary Secretary in SSPP Residential School ah Free School Uniform pekhia.
Tuni zinglam dak 9 in Nghathal khua a Siamsinpawlpi Residential School in free school uniform hawmna nei uhi. Hiai hun Vungzagin Valte, MLA and Parliamentary Secrectary (Horticulture and CADA), in Chief Guest hihna tawh uap in uniform te hawmkhia hi. Hiai hun ah Siamsinpawlpi School Managing Committee te banah Siamsinpawlpi GHQ apan heututen leng uap uhi. Chief guest in a thugenna ah siamsin naupangte tunung a i gam heutu dingte na hi ua kuhkal tak a laisim a hong kisakhol ding in chialna bawl hi. Siamsinpawlpi School ahihleh 1998 kum a Ministry of Tribal Affairs, Govt. of India sponsor-na nuai ah pat hi a, tuni tan in ah lohching touzel in school mun, school building leh hostel building kiningchingtakin neita uhi. Tullel in Siamsinpawlpi School ah naupang 550 vel kai in class A apan 10 tan om hi. 2013 HSLC exam ah 1st batch matric candidate mi 16 nei hi.

Dialkhai Govt. Junior High School baang kichim in naupang 12 delh liam.
Thanlon Sub-Division sung a Dialkhai Govt. Junior High School Building baang kichim in naupang 12 liam uhi. Akigen dan in tuni sun dak 12 lak vel in Huihpi hattak in Dialkhai Govt. Junior High School building baang mutchim in class room a Class lalai naupang 12 delhkha hi. Naupang a liam te lak ah mi 2 a gimdeuh ziak un, BRO te'n amau gari a pua in Thanlon PHC ah koih uhi. School teacher te apan kiza dan in School Building a, a khuam te ah sik omlou hidan in gen ua, building kibawl lai a sik a tellouh ziak a tua kichim hiding in gen uhi.

Zomi Council Annual Assembly om ding.
Zomi council Annual Assembly April 23, 2013 sunma dak 10:30 in SYO Hall Sim Veng ah om ding hi. Huai hun ah Rev. Stephen Chinzathang Vice-Chairman ZPCS in thumna in hun hong ding a,Khamchinkhup Tresurer in Finance report peding a, KG Tungnung secretary in Annual report peding hi. Huaiban ah LB Sona Chairman Zomi Council in Chairman Address gending a, Thanglianpau President ZRO in Presidential Message gending hi. Sunnung in Business Session om ding a, huai ah KG Tungnung Secretary Zomi Council in Assembly Agenda pulak in kikumkhawm ding uhi.

T Chhungi Memorial Free Cancer Detection Cand and Seminar om ding.
New-Lamka Hebron Veng a Salem House ah April 18, 2013 sunma dak 10 akipan T Chhungi Memorial Free Cancer Detection Camp and Seminar om ding hi. Huai hun ah, Cancer natna veilou dia kisinsakna leh kam sung, nawi leh suul a Cancer om lel omlouh tungtang a thon in enchian ding ua, a lunglut peuhmah in registration bawl theih ding hi. Delhi apan Roko Cancer Charitable Trust apan Doctor team mi 4 hong paiding uhi.

Vungzagin Valte Parliamentary Secretary Award lak lopna om ding.
Vungzagin Valte Parliamentary Secretary Horticulture, Soil Conservation and CADA Govt. of Manipur in Delhi a National Level Award tuamtuam 3 a lak lopna leh amah vaidawnna zingchiang sunma dak 11:30 in Dorcas Veng New-Lamka a Niangzen Khualbuk ah om ding hi. Huai hun ah, Pastor K Thualkhothang Local Pastor EBCC Dorcas Veng in Award te Pathian kiang ah lan in Award dongtu Vungzagin Valte Parliamentary Secretary ading in vualzawlna ngetsak ding hi. Vungzagin Valte Parliamentary Secretary in apaita April 7, 2013 in New-Delhi ah Bharat Excellence Award, North Eastern Golden Personalities Award leh Rajiv Gandhi Arch for Excellence Award leh Gold Medal 2 ban ah Certificate va sang a zingchiang in Delhi apan Manipur hongtung ding hi.

GAMDANG THU
Zan a Venezuela President kiteelna tuni’n election result suak ta hi. Venezuela president thak ding in Nicolas Maduro telching in om mah leh ama kidempih Henrique Capriles in government kiangah vote simna neithak ding in ngetna bawl hi. Tutung election ah Thumb print ID technology tawh kithuah Electronic ballot machine siing khat leh saang thum val banah sepaih lakh khat leh siing nih val in venbitna enkai uhi.

North Korea gam in tuni’n Kim –iL-Sung birthday thupitak in lawm uhi. South Korea tawh hun haksatak dinmun ah om mah leh North Korea gamsung pumpi holiday puan ahih tawh kiton in North Korea gam a dia founding father Kim-iL-Sung pian champha Pyongyong khawpi ah zat in om hi. Tua bangkal ah North Korea in nuclear a kivaulauna tawpsan a pichin huaizaw omdan tawh kihouna pat theih ding dan lampi tawn zaw dingin John Kerry in Japan khawpi Tokyo ah puangkhia hi.

Lasa siam a minthang Justin Bieber in Anne Frank Museum sunga visitorbook ah a thugelh minsiat pih mahmah hi. Kum 19 a upa Bieber in hiai museum a phak lai in Hitler makaih Germany te gitlouh ziak a sihna tuak Jew nungak Anne Frank kichi leng damlai hileh Justin Bieber ngaisangtu ahih dan a gen khak ziak in minsiat lawh hi’n kigen hi.

Rajasthan khawpi Jaipur ah tuni’n sungkuan khat bike a tuanglai truck khat in phukha a, bike nunga tuang Nupi khat leh ata ngeklai amun a singal uhi. Hiai tuahsiatna CCTV apan kimudan in, bike tunga tuang sungkuante panpih ding bei in lampi ah sawtsimtak om uhi.