Hornbill News | 18th April, 2013
* Churachandpur Block Level Literary Meet kipan.
* T Chhungi Memorial Free Cancer Detection Camp neih in om
* Churachandpur Christian Women Fellowship leh Ladies Prayer Fellowship saina in thumkhawmna om ding.
* Singngat Sub-Division Biometrict lakna sutzop hiding.
* STC/BSF in thau leh bomb kapna sunzom ding.
* Khaw Hausa te'n MGNREGS tawh kisai in Meeting neiding.
* Zomi council Annual Assembly om ding.
TANCHIN KIMZAW
Churachandpur Block sung a Govt. leh Private School te'n tuni'a kipan in Synod Hall, IB road, YPA General Headquater Hall Hiangtam Lamka leh Sangaikot khua ah Block Level Literary Meet 2013 nei uhi. Hiai Block Level Literary Meet ah "Our Role in Nation Building" chih thupi pansan in Painting, Singing, Elocution, Choreography leh Skit in kidemna nei uhi. Synod Hall ah Painting leh Elocution competition nei ua, Painting ah School 22 apan Student 140 tel in Elocution ah Student 60 tel uhi. YPA General Headquater Hall ah, Singing leh Choreography Competition nei ua, Singing Competition Sub-Junior ah School 11 apan Student 21, Junior ah School 15 apan Student 50 leh Senior ah School 13 apan Student 37 tel ua, Choreography competition Junior ah School 7 leh Senior ah School 6 tel in Skit ah School 2 tel uhi. Tuni'a kidemna zawhlouh teng zingchiang in Synod Hall IB road ah sunzom ding uhi.
New-Lamka Hebron Veng a Salem House ah tuni zinglam dak 10 akipan T Chhungi Memorial Free Cancer Detection Camp and Cancer Awareness Camp neih in om hi. Hiai hun ah, Cancer natna veilou dia kisinsakna leh kam sung, nawi leh suul a Cancer om leh omlouh tungtang a thon in enchian uhi. Hiai hun ah Delhi apan Roko Cancer Charitable Trust apan Doctor team mi 4 in Cancer natna tawh kisai sinsak in Cancer natna zong ua, mi tamtak ki-ensak uhi.
Churachandpur Christian Women Fellowship leh Ladies Prayer Fellowship saina in April 20, 2013 zinglam dak 7 akipan sunnung dak 1 sung in Manipur Evengelical Lutheran Church Zomi Colony ah thumkhawmna om ding hi. Huai hun ah, Rev. SK Manlun Lamka Divisional Superintendent MELC in thumkhawmna Programme hong ding a, Chingngaihlun CBWS in biakna leh kipumpiakna makaih ding a, May Rose EFCI in Gamsung damna ding a thumna makaih ding a, Rev. JF Lalropuia, Presbyterian Church Lamka Bial Pastor in Pathian Kha vehna ngen a thumna hun makaih ding a, Upa Khamzathawng Local Chairman in thohlawm lan in thumkhawmna hunkhak ding hi. Hiai hun ah a lunglut peuhmah telding in Prayer Organising Committee in chialna bawl uhi.
Rachel N Guite SDO Singngat in thusuah a bawlna ah, Singngat Sub-Division sung a om peuhmah te ading in April 30,2013 tandaih ding in Bio Metric census lakna sutzop hiding hi. Zinglam dak 10 akipan nitaklam dak 4 sung in Zogal Memorial Hall Complex Zoveng ah hihtheih ding a, a kisaipih peuhmah in ngai poimoh ding in SDO in theisak hi.
Subsdiary Training Centre STC/BSF in Mission Compound suahlam leh Pearsonmun, Mualkawi leh Gangpimual simtum kikal ah zinglam dak 5 akipan zannung tanpha in thau-leh-bomb kapna April 30, 2013 tan sunzom ding uhi. Kim-le-kiang a omte pilvang a ganvulh te khahzanlou ding in ngetna leh theihsakna bawl uhi.
Churachandpur District sung a Block teng a Chief Association tuamtuam a makai leh khaw hausa teng in zingchiang sunma dak 10 in Tuibuang hausa pu tenna inn ah Joint Meeting neiding ua, MGNREGS tawh kisai a, thu leng tuamtuam omte tungtang genkhawm ding uhi.
Zomi council Annual Assembly April 23, 2013 sunma dak 10:30 in SYO Hall Sim Veng ah om ding hi. Huai hun ah Rev. Stephen Chinzathang Vice-Chairman ZPCS in thumna in hun hong ding a,Khamchinkhup Tresurer in Finance report peding a, KG Tungnung secretary in Annual report peding hi. Huaiban ah LB Sona Chairman Zomi Council in Chairman Address gending a, Thanglianpau President ZRO in Presidential Message gending hi. Sunnung in Business Session om ding a, huai ah KG Tungnung Secretary Zomi Council in Assembly Agenda pulak in kikumkhawm ding uhi.
Young Paite Association YPA General Headquater kum 2013 akipan 2016 sung vaipaw dia telching thak omte Central Cabinet ah President Chinngaihpau, Vice-President K Zamsiam, General Secretary Paukhanmawi Guite, Joint Secretary L Pumzanang leh K Thangkhogin, Finance Secretary V Chinkhenmung, Treasurer Upa D Kaizamang te hi ua, Central Executive Committee ah Chairman Upa V Vungzathang, Vice-Chairman L Thangkhochin Ngaihte, member ah Upa K Lianvel, Upa H Vungzamang, V Zenzathang, Thanga Tonsing, G Tuankhanlian leh L Thangkhanlal Ngaihte te hi uhi. Huaiban ah Chief Adviser Upa LT Juan Tonsing leh Senior Adviser in Rev. Khen P Tombing, Upa H Nengsong leh T Thawmkai te pang uhi.
GAMDANG THU
US gamsunga thau lei ding kuapeuh tungah background check neih kigen mah leh US Senate in pom zoulou hi. America gamsunga thau zatsiamlouh ziaka kithahna deih huailou tamveitak a om nung, hiai banga mipi ngaihdan hong piangkhe mahleh, US senate sungah atamzaw in lemsak pih lou uhi. Hiai thu US senate ah thupuuk zawhlouh ahih tawh kiton in President Obama in a lungkim louh thu genkhia hi. Huai banah thau leinuam mi kuapeuh hinkhua paisa sui masakna neih ding deihna in gun culture ziaka vangsiatna tuak sungkuante tawh Obama kithuahkhawm in campaign pan uhi.
Boston Marathon a bomb puak ziaka si leh liamte thuakpihna in Boston miten suunna hun zang uhi. Police leh FBI kithuah a tuahsiatna dan suizuina leng apai lellel ah bomb supuaktu hidia muanmawh limlak tamlou lahkhiakna nei ua, banah President Obama leh First Lady ten leng Boston a sisuunna hun zatna uap ding hi’n kigen hi.
Texas state sunga leihoihna vanzat bawlkhiakna puakzak in mi 5 leh 15 vel si dia gintakna a om banah, mi 140 val in liamna tuak hi’n kigen hi. Waco khawsung a om fertilizer plant a puakzak ziakin school leh nursing home tel in building tamtak siatlawh a, Waco khawpi sunga mite adia chemical lauhuai ammonic leh gas lauhuai tuamtuam te’n damlouhna a tut khak ding etchianna police ten nei lel uhi.
Pakistan court in Pervez Musharraf ngetna a nawlkhin sak tawh kiton in mat ding hi’n puan khum ngal hi. Kum 2007 a Pakistan President panmun aletlai a Pervez Musharraf in Judiciary sunga senior judge te ama thuzanga amat ziakin tuni’n Pakistan court apan hiai bang thusuak hong om hi’n kigen hi. Musharraff in ahih leh apaita kum 2007 in Pakistan senior judge te amat nunga gamsung ah emergency rule apuanna tungah thubuai a neih pen court tungah ngaihdam ngen mah leh nawlkhin sak in om ta hi.
Kum 10 sunga ahaksa pen hiding in Egypt gam in sumdinmun ah kiakniamna tuak hi. Foreign currency reserves aneih sateng uh percent 13 in a kiak ziakin kha 3 sung kia gamsunga zat ding nek leh taak leizou ding abat lai ua, Libya, Qatar tel in gamdang 4 apan kithuahpihna sum muh khawmte tawh kitungding zou nawn ding in kilang hi. Qatar in ahih leh billion dollar 8 in a kithuah pih banah Libya in billion dollar 2 pia hi’n kigen hi.
Tuni’n United Arab Emirates ah Al-Queda helpawl atel mi 7 mat in om uhi. Mat a om mi 7 te’n UAE gamsung ah buaina bawl sawm uhi’n kigen hi. UAE ahih leh Middle East gamte laka buaina leh helpawlte gamtatna chih ding a om luat louh na mun hi’n leng kigen hi.
Bahrain ah April ni 19 a kipan Formula One te’n Grand Prix ah kitaidemna neih sawm mah leh gamsung mite deihlouhna langsak uhi. Bahrain gamsunga human rights dinmun nelhsiah leh zuihlouh ziaka gamsung opposition party makaih in Formula One racing pen cancel dia ngetna leh tangkouna naktak in neih in om hi.