* Vungzagin Valte Parliamentary Secretary in National Level Award tuamtuam a lak lopna neih in om.
* Dahna khitui kipahna khitui a suakta chi'n Phungzathang Tonsing in gen.
* DC makaih in SDO/BDO te'n SSA leh MGNREGS tawh kisai genkhawm.
* Churachandpur Block a Literary Meet neih hunding kisuan.
* Chiengkonpang Community Hall ah 3 Days Children Programme with Educational Exhibition om ding.
Tanchin Kimzaw
Vungzagin Valte Parliamentary Secretary Horticulture, Soil Conservation and CADA Govt. of Manipur in Delhi a National Level Award tuamtuam 3 a lak lopna leh amah vaidawnna tuni sunma dak 11:30 in Dorcas Veng YPA Hall New-Lamka ah nei uhi. Hiai hun ah, Pastor K Thualkhothang Local Pastor EBCC Dorcas Veng in Award te Pathian kiang ah lan in Award dongtu Vungzagin Valte Parliamentary Secretary leh a innkuan te ading in vualzawlna ngetsak hi. Vungzagin valte Parliamentary Secretary in a thugenn ah, MLA hihziak a Award ngah hilou in SBI a seplai a Award tuamtuam a lakkhawm te ziak a tutung a hiai bang Award sang tak piak a om ahihdan gen hi. Hiai hun Thanlon Assembly Constituency sung a MDC Langkhanpau Guite, Lalhmangpui, M Ginzapau leh Jamkhanpau Simte in kipahpihna in puan silhsak in kel 1 pia uhi. Huaiban ah Mullum MDC Grace Zamnu inleng puan silhsak hi. Mipi tamtak paikhawm in nitaklam in annekhawm uhi. Hiai hun Vungzagin Valte Parliamentary Secretary in apaita April 7, 2013 in New-Delhi ah Bharat Excellence Award, North Eastern Golden Personalities Award leh Rajiv Gandhi Arch for Excellence Award leh Gold Medal 2 ban ah Certificate va ngah hi.
Manipur Health and Family welfare, GAD and CADA Minister Phungzathang Tonsing Zi aphamsa Pi Chhungi theihgigena suangphuh honna zingchiang sunma dak 10 in Salem House Hebron Veng New-Lamka ah om ding hi. Hiai ding tawh kisai in kisakkhawlna naktak in pailel a, mipi sing 1 tut theihna ding hall bawlzawh in omta hi. Tedim road khaktan in hall kibawl a, hiai lak pumpelhna ding in traffic police te'n road diversion bawl uhi. Zingchiang sunma dak 10 in programme kipan ding a, Rev. V Thangkhangin Director of Institution EBC in suangphuh hong in Pathian kiang ah lan ding hi. Rev. Dr. S Langzakham Divisional Superintendent Lamka South Division EBC in Pi Chhungi Tonsing tanchin kigelha laibu "Forever in our Hearts" kichi hong ding a, Rev. S Ginmalsawm Divisional Superintendent Imphal Division EBC in Pi Chhungi Tonsing CD Album hong in Pathian kiang ah lan ding hi. Huaizawh in O Ibobi Singh Chief Minister in thugen ding a, inntek lam ah Phungzathang Tonsing in thugen ding hi. Khanthang Tonsing in kipahthu gen ding a, Rev. Dr. B Luaichinthang in hunkhakna leh annkuang latna nei in mipi'n Sial 14, bawng 13, vok 22, kel 8, belam 9, nga kg 120 leh singtang ak 11 akigawm in gan 65 sa nekhawm ding uhi. Hiai suangphuh honna ding tawh kisai a Phungzathang Tonsing Health and Family Welfare Minister in Media te kiang a gendan in, suangphuh honna ding tungtang ah gen-le-sak tuamtuam om mahleh, kei leh ka innkuan te'n a Nu itna latsakna dia hiai bang a programme kibawl ahihdan gen a, Jacob in a zi a it mahmah bang a ken leng ka zi it mahmah ka hi chi a, ka zi a mintak inleng ka sam ngam ngeikei a, ka zi kia hilou in ka lawm hoihpen leng ahi chi a, amah theihgigena dia suangphuh honna ding a, kisakkhawlna ka gintak sang in a leh 3 in thupizaw chi hi. Kei kia hilou a mipi hon itpih a tam mahmah ziak in Pathian lemgel hizaw ding in ngaihtuahna ka nei chi a, amah damlai in meithai leh tagah te hehpihna nei in, meithai tagah te panpihna ding lungtup pipen in nei a himahleh amah damlai in meithai te ading in bangmah kihihsak manlou a, election a lohching zawh nung in a mah lungtup mualsuahna ding in meithai 500 te housing scheme kipia a, hiai in ka lungsim a nuamtuam sak mahmah chi'n leng genbeh hi. Aban a genzelna ah Chhungi in saptuam lam ngai poimoh mahmah in a damsung in Moirang ah meitei te biakinn ding leh Tuithapi ah EBC biakinn leh Orissa ah biakinn 2 dinkhia hi. Huaiban ah Faith Home Imphal ah amah min in Prayer hall khat leh Grace Bible College ah Dorcas Prayer hall khat bawlkhia chi a, aman hiai bang a pathian gamna a sepziak a kei vualzawlna tang hiding in ka kigingta chi hi. Tun zaw ka dahna khitui kipahna khitui a suakta chi hi. Aban a genna ah, ka zi tawh ka kiten nung uh kum 50 chin lop dingdan khong ka ngaihtuah lai un, kum 50 ching manlou in kum 46 sung hinkhua ka zang khawm uh chi'n leng genbeh hi.
Jacintha Lazarus IAS DC Churachandpur makaih in tuni sunnung dak 12:30 in Dc Office a BRGF resource centre ah SDO/BDO teng in Sarva Shiksha Abhiyan (SSA) tawh kisai in meeting nei ua, SSA free text book leh unifrom tawh kisai genkhawm uhi. Huaizawh in MGNREGS tawh kisai genkhawm nawn uhi.
Churachandpur Block sung a Govt. leh Private School te ading a April 17 akipan 19, 2013 sung a Synod Hall, IB road, YPA General Headquater Hall Hiangtam Lamka leh Sangaikot khua ah Block Level Literary Meet 2013 neih ding chih himahleh Health and Family Welfare Minister Phungzathang Zi Pi Chhungi Tonsing suangphuh honna ding programme tawh a kituahkhak ziak in April 18, 2013 apan neih ding in a hun suan thak uhi. Hiai Block Level Literary Meet ah "Our Role in Nation Building" chih thupi pansan in kidemna tuamtuam Painting, Singing, Elocution, Choreography leh Skit neih hiding hi.
Early Childhood Care Education SSA-RTE Churachandpur nuai ah April 18 akipan 20, 2013 sung in Chiengkonpang Community Hall ah 3 Days Children Programme with Educational Exhibition om ding hi. Huai hun ah Pre Primary leh Primary Children te lai hilhna a vanzat ding te display bawl ding ua, akisaipih te leh anganwadi worker leh helper te telding in P Bieklien District Intervention Coordinator ECCE in theisak hi.
GAMDANG THU
US gamsung Massachusetts khawpi Boston ah Bomb puakzak in mi 3 si hi. Boston khawpi sunga Marathon pailel lai thakhat in lamnawl a niinpaihna bawm sunga kiselgu hidia gintaak apan bomb puakzak in marathon a tel mi 140 val in liamna tuak uhi. Police leh FBI kithuah in suizuina apan tuhun tanin muanmawh leh mat kuamah om nailou hi’n kigen hi. Hiai thu a pian tawh kiton in US gamsung pumpi ah security sukhuah in om ngal hi.
North Korea in Kim-Li- Sung hun zatna a neih lel lai in President Obama in Korea gam nihte kilem louhna ngaikhawk a, khathak sungin South Korea phak sawm hi’n kigen hi. Korea gamte kalthu paitou zel ah North lam apan thutang om bangin Nuclear test neihnawn ding thu leh, bangmah genkholhna omlou a chiklai peuh in South Korea kapkhum theh hi’n leng kigen hi.
China gamsung a Bird Flu natna lauhuai ziaka sihlawh mi 14 chingta hi. Hiai tawh kiton in kum 4 a upa naupang khat tungah hiai vakhu apan hong kipan H7N9 virus muh khiak thak in om nawn hi’n kigen hi.
Humanitarian agency bangzah hiam in United Nations kiang ah Syria gambuaina ah thukzawsem a kigolh ding in ngetna bawl hi. Tulel a thauvui thautang zanga solkal leh helpawl kikaptuahna om lailai pen UN in a khouh daih dingdan ngaihtuah pih dingin humanitarian agecy in UN kiangah thuum hi.
Tunitaklam in Delhi leh Noida khawpi ah zinliing om hi’ng kigen hi. Hiai zinliing ahihleh hat lawlou ahihban ah bangmah suksiat neilou hi’n leng kigen hi.