* Churachandpur Block Literary Meet zawhsiang hita.
* Civil Officer Pensioners Society Limited in Annual General Body Meeting nei.
* Khaw Hausa te'n MGNREGS tawh kisai in Meeting neinawn.
* Churachandpur College leh Lamka College ah Candidate 1328 in Combined Graduate Level (Tier-I) Exam peding.
* Pumshong Hangshing Di of School Thanlon in Huihpi mutsiat Dialkhai Junior High School va enkhia.
* Churachandpur District Sports Association (CDSA) Election om ding.
TANCHIN KIMZAW
Churachandpur Block Level Literary Meet 2013 tuni'n Synod Hall ah sutzop in om nawn hi. Zan in YPA General Headquater Hall Hiangtam Lamka leh Synod hall ah Painting, Elocution, Choreography, Skit leh Singing Competition nei ua, zan a zawhsiang louh Singing Competition tuni'n sutzop in om hi. Singing Competition Sub-Junior ah School 11 apan Student 21, Junior ah School 15 apan Student 50 leh Senior ah School 13 apan Student 37 tel uhi.
Civil Officer Pensioners Society Limited in tuni sunma dak 10:30 in YPA General Headquater Hall Hiangtam Lamka ah, Annual General Body Meeting nei uhi. H Nengsong President Civil Officer Pensioners Society Limited in Meeting makaih in Account Audit Statement leh 2013-2014 sung a Society Budget ding leng luikhia hi. S Vungsing Secretary in Annual report pia hi. Dr. S Ngulzadal member in member phamsa 37 te suunna hun makaih hi. Society membe paikhawm te'n 2013-2014 sung a budget ding in lakh 6 leh sang 76 pomkip uhi. Hiai Civil Pensioners Society Limited ah member 114 omlel uhi.
Churachandpur District sung a, Block teng apan khaw hausa tamtak paikhawm in tuni sunma dak 10:30 in Tuibuang hausa pu tenna inn ah meeting nei uhi. Hiai hun ah khaw hausa tamtak paikhawm in, thupukna tuamtuam bawl uhi. 2012-2013 MGNREGS fund sanction order leh work order a kimuh masiah kuamah in Master roll submit louh ding leh 2012-2013 a fund omlai teng ahiding bang tak a zat ahihma teng gamsung a hausa teng tawh genkhawm thak ding in lemsa uhi. Huaiban ah district pumpi huap a kikhaikhawmna omlouh ziak in Chief Association on MGNREGS Churachandpur District kichi dinkhia uhi. Huai ah Chairman ding in Lunjapau Simte, Secretary in Th. Thangboi Baite, Joint Secretary in Benedict Hmar, Vice-Chairman in TK Hang Suantak leh Nungpao Tungnung, Adviser in Thangjang Haokip, Paominlen Mate leh Thangchinlian Guite leh Information Secretary in Khamkhohau Chief of Kangkap, Khaibong Haokip leh Helen Toljang te telching uhi.
Staff Selection Commission (SSC) saina in April 21, 2013 sunma dak 10 akipan sun dak 12 sung in Churachandpur College leh Lamka College ah Combined Graduate Level (Tier-I) Examination 2013 om ding hi. Hiai ding tawh kisai a Joseph Lalrothang Zonal Education Officer in agendan in, Invigilator leh Candidate te'n Exam Centre huangsung ah, mobile phone, calculator leh electronic device himhim tawilut theilou ding ua, gate pua ah frisking om ding chi a, huaiban ah invigilator ding te zinglam dak 8:30 a Exam Centre tungkim ding in theisak hi. Churachandpur College ah Candidate 864 Exam ding ua, Lamka College ah 464 Exam ding uhi. Akigawm in Candidate 1328 pha hi.
Thanlon Sub-Division sung a Dialkhia Govt. Junior High School, Apaisa April 15, 2013 a huihpi'n a mutsiat ziak a school naupang 12 in liamna a tuah thu tawh kisai a mun mahmah a enchian a, lemla ding in Pumshong Hangshing Deputy Inspector of School Thanlon in tuni'n Dialkhai khua zuan hi. Hiai Dialkhai Govt. Junior High School Building ahihleh a kibawl kum kitheikei mahleh MSDP tungtawn a kibawl hiding in kigen hi.
Churachandpur District Sports Association (CDSA) vaipaw ding kitelna Election May 11, 2013 in om ding a, hiai ding tawh kisai in CDSA nuai a Affiliated Club te'n CDSA Office Hiangtam lamka a representative proforma lading in Lhunchon Honarary Secretary CDSA in theihsakna bawl a, representative proforma fill-up khit nung in April 23, 2013 tan in piaklut theih ding hi.
GAMDANG THU
Boston Marathon finish-line a bomb supuaktu hidia muanmawh mi nih laka khat, thah ahihbanah a dang khat pen Police ten Watertown vengsung ah zonglel uhi. Massachusetts Institute of Technology ah Police nih kaplup in a om nung, Watertown lam zuanin migiloute taimang ngal ua, tusunnung in Watertown sungah om kuapeuh Police ten pawtkhe lou dia theihsak ahih ban uah, mat nailouh a om pen in galvan tawi ahihziaka doorbell hong gin leleng kuaman konghonlou dingin Police ten theisak uhi. US media apan thuthang danin hiai migilou nihte, Chechnya helpawl apan hi’n kigen hi.
Pakistan court thupiak zui in President lenlui Pervez Musharraf mat in om ta hi. Musharraf ahih leh anti-terrorism court ah dinsak ahih ma, ni 2 sung atenna inn apan koimah ah pawtkhe theilou dingin court in thusuah bawlkhum hi. Ex-president musharraf in kum 2007 a judiciary sunga senior judge te kalh a emergency rule a puan ziakin hiai bang case nei hi’n kigen hi.
US gamsung Texas state a fertilizer plant khat a puakzakna nung ah rescue team te’n hutkhiak nailouhte zonna nei lellel uhi. Hiai tuahsiatna mun apan mihing adia chemical lauhuai ammonium nitrate omte ziakin panpihna nasep haksa mahmah hi’n kigen hi.
Sudan sepaihten hospital a health worker 5 kaplum uhi. Kaplup a omte ahih leh Eastern Equatoria state sunga Lorema Hospital a sem vek hi ua, State governor guard a om sepaih giat te sihna thu ah thangpaih ziak a Sudan sepaihte hiai banga gamtaang hidi'n kigen hi.