* Pi Chhungi theihgigena suangphuh honna Manipur Chief Minister leh Cabinet Minister hunkhop in uap.
* Kuki student Organisation (KSO) Churachandpur in Dawr khat apan Dendrite tamtak musuah in haltum.
* T Chhungi Memorial Free Cancer Detection Camp and Seminar om ding.
* District sung a TD Block teng a Chief Association makai te'n Meeting nei.
* District Social welfare Office ah National Family Benefit Scheme apply theihna Application format laktheih.
Tanchin Kimzaw:
Manipur Health and Family welfare, GAD and CADA Minister Phungzathang Tonsing Zi aphamsa Pi Chhungi theihgigena suangphuh honna tuni sunma dak 10 in Salem House Hebron Veng New-Lamka ah neih in om hi. Hiai hun ah Rev. V Thangkhangin Director of Institution EBC in suangphuh hong in Pathian kiang ah lan hi. Rev. Dr. S Langzakham Divisional Superintendent Lamka South Division EBC in Pi Chhungi Tonsing tanchin kigelha laibu "Forever in our Hearts" kichi hong a, Rev. S Ginmalsawm Divisional Superintendent Imphal Division EBC in Pi Chhungi Tonsing CD Album hong in Pathian kiang ah lan hi. Huaizawh in O Ibobi Singh Chief Minister in Pi Chhungi suun thugen hi. Inntek lam ah Phungzathang Tonsing leh a tate'n thugen uhi. Phungzathang Tonsing Health and Family Welfare Minister in Media te kiang a gendan in, suangphuh honna ding tungtang ah gen-le-sak tuamtuam om mahleh, kei leh ka innkuan te'n a Nu itna latsakna dia hiai bang a programme kibawl ahihdan gen a, Jacob in a zi a it mahmah bang a ken leng ka zi it mahmah ka hi chi a, ka zi a mintak inleng ka sam ngam ngeikei a, ka zi kia hilou in ka lawm hoihpen leng ahi chi a, amah theihgigena dia suangphuh honna ding a, kisakkhawlna ka gintak sang in a leh 3 in thupizaw chi hi. Kei kia hilou a mipi hon itpih a tam mahmah ziak in Pathian lemgel hizaw ding in ngaihtuahna ka nei chi a, amah damlai in meithai leh tagah te hehpihna nei in, meithai tagah te panpihna ding lungtup pipen in nei a himahleh amah damlai in meithai te ading in bangmah kihihsak manlou a, election a lohching zawh nung in a mah lungtup mualsuahna ding in meithai 500 te housing scheme kipia a, hiai in ka lungsim a nuamtuam sak mahmah chi'n leng genbeh hi. Aban a genzelna ah Chhungi in saptuam lam ngai poimoh mahmah in a damsung in Moirang ah meitei te biakinn ding leh Tuithapi ah EBC biakinn leh Orissa ah biakinn 2 dinkhia hi. Huaiban ah Faith Home Imphal ah amah min in Prayer hall khat leh Grace Bible College ah Dorcas Prayer hall khat bawlkhia chi a, aman hiai bang a pathian gamna a sepziak a kei vualzawlna tang hiding in ka kigingta chi hi. Tun zaw ka dahna khitui kipahna khitui a suakta chi hi. Aban a genna ah, ka zi tawh ka kiten nung uh kum 50 chin lop dingdan khong ka ngaihtuah lai un, kum 50 ching manlou in kum 46 sung hinkhua ka zang khawm uh chi'n leng genbeh hi. Hiai hun Manipur Chief Minister leh a Zi ban ah Deputy Chief Minister leh Cabinet Minister leh MLA hunkhop ban ah District Level Officer leh Spatuam heutu tamtak tel uhi. Hiai hun ah mipi sing val paikhawm te'n Sial 14, bawng 13, vok 22, kel 8, belam 9, nga kg 120 leh singtang ak 11 akigawm in gan 65 sa nekhawm uhi.
Kuki Students Organisation (KSO) Churachandpur in tuni sunnung dak 1 vel in Tuibuang Bazar ah Motul SGG Variety Store ah Dendrite tamtak musuah in KIC Office ah Mei in haltum uhi. KSO makai te gendan in Motul SGG Variety Store neitu S Haopu in School naupang te kiang ah Dendrite zuak a, a bawm lian 30 man te 50 in zuak a, a neu 20 man te 30 in zuak a, a piak chiang a, a tuamna lakhe zel hi. Tuni Dendrite kihaltum teng box 7 hi a, box khat sung piece 35 zel om hi. Sum a tuat in sing 1 leh sang 2 val manding hi. KSO makai te'n a ban a agenzelna uah, KSO Churachandpur in April 13, 2013 akipan Student te ading in Special Drive bawl ua, Student te'n dendrite hip in gang group tuamtuam bawlkhia uhi. Tunitan in KSO in Student Dendrite hip a Gang group tuamtuam a tel kum 13-17 kikal miding 14 mankhia in a nu-le-pa te utawh kihou in, hiai bang hih nawnlou ding in kichiamna suai kikaisak a chih ban uah, tunung a, hiai bang a gamtat nawn ua leh KSO in thutanna a bawl bangbang ah lungkim ding in kilemna bawl uhi. KSO makai te'n Dendrite kai hilou in maban ah leng damdawi kham theih chi tuamtuam leng drive bawl sawm uhi. Tulai in Student te lak ah Gang group tuamtuam bawl in zannung a kihonsual thang mahmah a, hiai betdaihna ding in KSO in panla hi. KSO in tunitan a Student Gang group a matkhiak te ahihleh Tripple S (SSS) gangsta, Red hawk, Defensive Seven Dangerous, N20, Slam Dog, Bloody Devil leh Young Revolution hidan in kigen hi. Hiai Gang group member matkhiak ahih ua kipan a dendrite leina uh theih suah a om hidan inleng kigen hi.
New-Lamka Hebron Veng a Salem House ah zingchiang in T Chhungi Memorial Free Cancer Detection Camp and Seminar om ding hi. Huai hun ah, Cancer natna veilou dia kisinsakna leh kam sung, nawi leh suul a Cancer om lel omlouh tungtang a thon in enchian ding ua, a lunglut peuhmah in registration bawl theih ding hi. Hiai ding tawh kisai in Delhi apan Roko Cancer Charitable Trust apan Doctor team mi 4 hong ta ua, tuni sunnung dak 3:30 in rayburn College Conference Hall Media te kimuhpih in, Cancer natna tawh kisai in houlimna nei uhi.
Tuni'n Tuibuang Hausa Pu tenna inn ah Tuibuang TD Block, Thanlon TD block, Singngat TD Block, Sangaikot TD Block, Saikot TD Block, Samulamlan TD Block leh Henglep TD Block sung a Chief Association makai te'n Meeting nei uhi. Hiai hun ah khaw hausa pakhawm te'n Churachandpur District sung a Block teng a makai te leh Hausa teng April 19, 2013 sunma dak 10 a Tuibuang Hausa Pu tenna inn a Meeting neih nawn ding in lemsa ua, huaiban ah, hiai Meeting neihma leh kihoutuakna om ma a Block teng a Hausa te'n Master Roll leh Job Card piaklut nailouh ding inleng thupuk uhi.
District Social welfare Office ah National Family Benefit Scheme apply theihna Application format laktheih ding in om hi. Hiai National Family Benefit Scheme ahihleh BPL innkuan a nekzong pipen om nawnlou te'n apply theih ding a, huaiban ah misi pen kum 18 leh 64 kikal mi ahihngai ding hi. Application form ladia kuan peuhmah in death certificate tawi ngai ding a, fill-up khit nung in May 7, 2013 tan in piaklut theih ding hi.
H Dilip Singh Director Education (S) in April 6, 2013 a Order a suahna ah November 18, 2012 a State Level National Talent Search leh National Means Cum Merit Scholarship Examination result puangkhia hi. State Level National Talent Search examination ah Churachandpur District akipan Kimngaih Class-X of Don Bosco High School leh Vahboih Class-IX of St. Mary School in Consolation Prize la ua, National Means Cum Merit Scholarship Examination ah Rengkai Govt. Higher Secondary School leh Gandhi Memorial High School apan Student 33 in lohchinna ngah uhi.
GAMDANG THU
British numei laka Prime Minister masapen Margaret Thatcher vuina hun St. Paul’s Cathedral ah neih in om hi. Parliament sungah Margaret luang zankhovak a koih ahih zawh in Central London a St. Paul’s Cathedral sungah mipoimawh 2,300 tawh kikhopna nanungpen neih tawh kiton in sepaihte’n zahna sangpen piakna leng nei zui ngal uhi.
Bengaluru khawpi sung mun nih ah Bomb puak ziakin mi 2 si hi. Tusun a Karnataka BJP office konga bomb puak ah police 11 tel in mi 16 in liamna a tuak ua, a gei a om gari tamtak leng a kisiat banah IED bomb zanga helpawlte thilhih hidi’n police ten gen uhi. Bomb puak dangkhat pen ahih Benguluru Airport zotna lampi ah puak hi’n kigen hi.
Boston Marathon bomb puak thu ah FBI apan thuthak om bangin pressure cooker zanga bomb supuak hi’n kigen hi. Anhuanna dia kibawl pressure cooker sunga bomb supuaktu ding battery leh a kiselgukna Bag hidia gintak pholhsuah in om hi. Hiai marathon finish-line a bomb puah ziak in naupang kum 8 tel in mi 3 a sih lawh banah midang 140 val in liamna tuak uhi.
Syria gamsung Aleppo khawpi sungah siluang tamtak muhsuah in om nawn hi. UN humanitarian pawl tawh kithuah a zonsuah siluangte ahih leh hun sawtsimta a thah hiding in gintak thu kigen hi.
Pakistan Cricket captian lenlui Salman Butt in kum 10 sung kimawl theilou dia gaakkhum in a omna, Pakistan cricket board kiangah ngaihdam ngen mah leh pomsak hilou hi. Salman Butt ahih leh match fixing ziakin Ban in ana om ta hi.