* Hmuia Veng ah UCO Bank Churachandpur Branch honna neih in om.
* Tedim Road a BRO te Culvert bawlna a kinlam a zawhsiang poimoh.
* Pi Chhungi Suangphuh honni in Hebron Veng New-Lamka ah Tedim Road kikhaktan ding.
* Tuithaphai Presbytery Lamka Pastor Bial in Consultative Meeting nei.
* T Haukhansiam Tuitha Lui ah kelum.
* ZYA General Headquater in Meeting neiding.

Tuni sunma dak 11 in Hmuia Veng Central Lamka ah, UCO Bank Churachandpur Branch honna nei uhi. Hiai hun ah Rev. S Vungminthang General Secretary EBC in thumna in Bank thak lan a, BB Sahay Circle Head North Eastern leh hiai hun Chief Guest hihna tawh uap Jacintha Lazarus IAS DC Churachandpur in UCO Bank Churachandpur Branch hong uhi. DC in a thugenna ah, mahni sum lakhe ding a hunsawt taktak ding ngai nawnlou ding in District in ATM tamsem poimoh ahihdan gen a, huaiban ah Manipur pumpi a air condition Bank om sun UCO Bank Churachandpur ahihdan gen a, mipi te tung ah Service hoihtak peding inleng ngen a, Govt. in mipi ading in Scheme tamtak nei a, baihlam tak a sepsuahna ding in Bank te kizang ding chi a, a poimoh dungzui a district administration in kithuahpih ding ahihdan gen hi. BB Sahay Circle Circle Head North Eastern in a thugenna ah, Manipur ah UCO Bank in Branch 5 neita a, District 9 teng ah Branch neih suak ding kilunggulh mahmah a hiai ding inleng phalna kimu mahleh Bank Branch khat honna ding in Sum-le-pai kia hilou in a poimoh tam petmah chi hi. Tua pan kha 12 sung in Manipur ah UCO Bank Branch 12 om ding chi a, Churachandpur ah UCO Bank hoihtak a function ahihchiang in Branch dang leng kihong beh ding chi hi. Manipur State a khangtouh ziak a Bank te honglut ahihdan gen a, Bank a tam leh Society sung a Sum tam ahihdan kilang chi'n leng genbeh hi. UCO Bank in a baihlam theipen ding kingaihtuah in Internet Banking leh Mobile Banking leng kinei ding chi hi. Branch Head Nangkhogin Dousel in a gendan in, a niampen za 5 in Bank Account hon theih ding a, mimal account ah kum khat in 4 percent in pung ding a, dakkal 24 sung ATM kihong ding chi chi a, huaiban ah Bank in Housing loan, Vehicle loan leh Educational loan leng pethei ding chi'n leng genbeh a, ATM Machine ni 15 sung in hongtung ding chi hi. P Sen Gupta Zonal Head Agartala in a gendan in UCO Bank in mun tuamtuam ah Branch 2550 nei a Branch 3000 phaksak kisawm chi a, huaiban ah UCO Bank kum 1943 January 6 a kipankhia ahihdan gen hi. Hiai hun ah YMA Lamka Branch leh YPA Zenhang Lamka Unit in Cultural Dance lak uhi.

Tedim road Hmuia Veng a, BRO te Culvert bawlna a kinlam a zawhsiang poimoh ahihdan mi tamtak apan thutut kingah hi. Culvert kibawl ziak in huai area ah a vangkim in traffic jam gige a, hunsawt taktak gari dinkhawl zel hi.

Phungzathang Tonsing Health and Family Welfare, GAD and CADA Minister zi aphamsa Pi Chhungi theihgigena suangphuh honna April 17, 2013 a Salem House Hebron Veng New-lamka a neihna ding tawh kisai in kisakkhawlna naktak in pailel a, hiai thu tawh kisai in tuni'n L Paupi Ngaihte PRO to Phungzathang Tonsing in Media te kimuhpih in thil om dan taklang hi. L Paupi Ngaihte PRO in a gendan in niteng in gan thoh ding kibehlap a, kipahhuai mahmah chi a, tuni tan in gan goh ding mi kiphal te thohkhawm Sial 12, Bawng 12, Vok 19, Kel 7 leh Belam 9 a gawmkhawm in 59 phata chi a, huaiban ah mi thohkhawm mah Nga Kg. 120 leh Ak 11 phata chi a, Programme sung a Lapawl sading kitel tuam a, Blessed Choir, EBC Central Choir, Pethuel EBC, ECA leh Tuithaphai Presbyterian Choir te'n Lapawl sading chi a, mipi sing 1 tut theihna ding hall kibawl lel a, compound sung a hall ahihleh Imphal apan Arun Enterprise te'n Contract in bawl lel ua, compond pawlam ah Tedim road kikhaktan ding a, Suaknun and Sons Oil Pump tanpha ah Hall kibawl suak ding chi a, hiai ding in District Administration inleng phalna peta a tunung sawtlou in SP in Order suah ding chi hi. Tedim road tung a Hall bawlna ahihleh April 15, 2013 zinglam dak 9 kipan ding a, Tangnuam, Hebron Veng leh Dorcas Veng te'n Hall bawl ding chi hi. Suangphuh honni zinglam dak 6 akipan nitak lam dak 6 sung in New-Lamka College Road leh Ngathal lutsukna kikal tedim road kikhaktan ding chi hi. Aban agenzelna ah, Minister Pu deihna bang in mimal in chialna kibawllou a Saptuam om tengteng 140 kiang ah Chialna kibawl chi a, Minister Pu deihna bang in Bungpilon, Singngat leh Dailon khaw te Chialna kipia chi hi. Programme sunma dak 11 apat ding kichi leng sunma dak 10 a pat hiding in gen hi. Suangphuh honna Programme ahihleh Chief Minister, Deputy Chief Minister, Speaker leh Cabinet Minister ban ah MLA tamtak in uap ding chi a, meh leh buh huan ding in Veng 18 te mohpuakna piak in om ua, Pearsonmun, Bungmual, Dorcas Veng, Hebron Veng, Zion Veng, Vengnuam, Vengnuam (South), Khominthang, SYO Sim Veng, Zenhang Lamka, Hiangtam lamka, YMA-NKT, ZYA Gouchinkhup Veng, College Veng, Headquater Veng, Elim Veng, Rengkai leh Central lamka YPA in PT Sport Complex ah meh leh buh huai ding ua, Veng khat in anntang Quintal 2 zel huan ding uh chi a, Raybun College leh High School huangsung ah mipi'n anne ding chi hi. L Paupi Ngaihte PRO in aban a genbehna ah zingchiang sunnung dak 1 in Minister Pu in Lamka hongpha ding a, Organising Committee leh Inndongta te tawh Meeting kinei nawn ding chi hi.

Tuithaphai Presbytery Lamka Pastor Bial sung a department tuamtuam in tuni'n Lamka Presbytery Biakinn IB road ah Consultation Meeting nei uhi. Hiai hun ah Rev. Lallarmawia Executive Secretary Tuithaphai Presbytery in a gelh laibu Pathian Biakinn inkhawm chungchang kichi tawh kisai genkhawm uhi.

T Haukhansiam (12) s/o T Thangzalam of Headquater Veng tuni sun dak 12 vel in Tuitha lui Mualvaiphei ah kelum hi. Akigendan in T Haukhansiam leh a lawm te Tuitha lui ah kisil ding in kuan ua, a lawm te'n Haukhansiam a muhlouh tak un paisan uhi. Tuitha luipang a Gari sawp a om pasal 3 te'n mukha in, tuilak apan sisa in lakhia ua, Mualvaiphei a HYA makai te khut ah pekhia uhi. HYA te'n a mi a theihlouh ziak un, amau Office ah koih uhi. Haukhansiam lawm te'n a Nu kiang ah thil om dan theisak ua, huai apan a innkuanpih te'n HYA Office ah Haukhansiam luang vala in inn pawtung uhi. Haukhansiam luang ahihleh zingchiang in kivui ding hi. Aman Savior Public School Zellang Veng ah pawl-4 simlel hi. Haukhansiam naupa leng kum 2009 in a inn nung ua, pukhri neuchik khat ah kelum hi.

Zomi Youth Association (ZYA) General Hedquaters in April 16, 2013 zinglam dak 6:30 in Zomi Council Office Nehru Marg ah Meeting neiding uhi. Hiai hun ah ZYA Assembly neih ding tungtang leh ZYA Khuga Ring road Area Block hon ding thu ban ah thu poimoh tuamtuam genkhawm ua, ZYA General Headquater Cabinet, Ex-Officio leh Consultant Member teng telkim ding in H Khansuanlun General Secretary ZYA General Headquater in chilna bawl.

GAMDANG THU

Nekgukna leh mitamtak that hi a ngawhna ziakin Egyptian President lui Hosni Mubarak tuni’n Police Academy ah dinsak in om hi. Hiai hun ah Judge Mostafa Hassan Abdullah in Mubarak tungah thutanna piak ding a utlouh ziakin, a case pen appeal court ah suanphei sak in om mah leh, mitamtak in bel Mubarak tungah gawtna sangpen piakding deihna in court sungah tangkouna nei uhi. Hosni Mubarak in ahih leh kum 2011 a thuneihna alet lai in sepaih thahatna zanga ni 18 sung daih Egypt revolution hunah mi aza asim pimang leh that hi’n kingawh hi.

US secretary of state John Kerry in South Korea nusia in China vapha hi. John Kerry in ahih leh Beijing khawpi ah Chinese senior leader te tawh tukhawm a, Korea gam nihna kilemlouhna khouh dingdan ngaihtuah sawm hi’n kigen hi. Hiai hun ah China in North Korea bang chi’n a hehna apan hehnem thei ding chih thu banah nuclear galvan zat apan North Korea a kidek ding deihsak hi’n US secretary of state in gen hi.

America in Russia mi 18 US gamsung ah zinlut thei nawn lou dingin gaak khum hi. Hiai thu ahih leh kum 2009 a Sergy Magnitsky kichi Russia lawyer khat in Russia government nekgukdan a pholhkhiak ziaka Moscow jail sunga thah in a om apan gamnihte kikal ah kitheihsiam louhna hong om a, hun paisa in leng Russia sunga ta neilou ten America naupang himhim mahni ta dia laknawn louh ding chih tanpha om ta hi. Hiai banga human rights bawhsiatna tungah US in Sergy Magnitsky sihna dia panlatu Russia mi 16 tel in midang 2 tungah , damsunga US lut thei nawn lou dingin Obama in suaikaih khum hi.

Passenger 172 pua Indonesia lenna khat tuni’n airport runway ah atai lai in tuahse mahleh si leh liam uhi. Indonesia sunga Bali tuikulh ah tuni’n Lion Air passenger jet lenna airport bawh dia kisa mahleh runway apan metre 300 vel a om tuitungah kesuk a, vangphat huaitak in si leh liam omlou hi’n kigen hi.

Beizing khawpi ah numeinou khat in Bird Flu natna a vei nung in China gamsung ah vasa apan sihtheihna H7N9 a omlam theihkhiak pat in om hi. Mihingte a dia lauhuai mah leh vasate adin natna lauhuai ahih louh banah, H7N9 virus kichi ganhing apan kilawhsawn theih mah leh mi khat le khat a kilawhsawn dan sui khiak in omlai hi’n kigen hi. Tuni tan a China suahlam ah Bird Flu vei mi 11 in sihlawh ta uhi.

Zingchiang a Venezuela Presidential election neihna ding sukbuai sawm sepaih 2 galvan hunkhop tawh mat in om hi. Tutung election ah Thumb print ID technology tawh kithuah Electronic ballot machine siing khat leh saang thum val banah sepaih lakh khat leh siing nih val in venbitna enkai ding uhi.

India leh Sri Lanka kitanauna kise deuhdeuh dingin kilang hi. Sri Lanka a om Tamil mite tunga solkal tatsiatna thukikna di’n, tutung a Indian Premier League ah Sri Lanka cricketer te Chennai ah kimawl ding deihlouhna a om banah Chennai ah Sri Lanka apan hong kipan Sinhalese mite’n bawlsiatna in leng zui ngal hi.

Australian government in organ donate tu ding tamsem deihna in panla thak hi. Hiai thu tawh kisai in mihing pumpi sunga organ poimawh kidney transplant na dia donor taksapna hu dingin kidney petu leh dongtu dingte sisan leh upa dan kituak kha kei mah leh a kituahpih ding kidney petu dang khat kintaka muhsuah theih ding dan lampi sial thak uhi.

Thai mite adia kum thak tung nawn ta hi. Kumteng in kumthak vaidawnna in tui kithehna hun a zat ban uah, zu leh sa a vualnopna bawl ziakin tuahsia a sihlawh leng tam thei mahmah hi’n kigen hi. Tutung in ahih leh Thailand khawpi Bangkok ah Buddha lem tungah tui asun ban uah, vualzawl ngetna hun in leng nei uhi.

Congress makaih Rajasthan government in amau state sunga sportmen te RSS leh Jamat-i-Islami pawl tawh kizopna neihlou dia kichiamna bawlsak hi. A leh lam ah RSS thuneite hiai affidavit bawlna naktak in mawhpaih uhi.