* Evangelical College of Theology in Graduation and Commissioning Service zang.(include Vdo clip)
* Rengkai ah Meltheihlouh pasal khat in Jacob Malsawmlien tem in dawtlum.(include Vdo clip)
* Mahila Central Committee Churachandpur saina a Interactive Session, MLA leh Minister hunkhop in uap.(include Vdo clip)
* PTC General Headquaters in MLA ching thak te ziak in Pathian kiang ah kipahthugen.(include Vdo clip)
* Women Welfare Association Asia in Old Age Home hong in Widows Day zang ding.
Evangelical College of Theology in zan sunma dak 10:30 in Rev.Chawnga Memorial Chapel Sielmat ah "Serving God with Perseverance" chih thupi a nei in Graduation cum Commissioning Service zang uhi.Hiai hun ah Rev.Dr.Paotinthang Chongloi Secretary of Mission and Evangelism Kuki Baptist Convention in graduating student te ading in hasotna thugen a, Rev.Dr.Kh Khaizakham Principal Evangelical College of Theology in degree pekhia a, Rev Lalrosiem Songate General Director ECCI in degree namkipna nei hi.Evangelical College of Theology ah tutung in Master of Divinity Student 14, Master of Ministry student 2, Bachelor of Theology student 18, Bachelor of Ministry student 5 leh Diploma in Theology student 3 graduate uhi.
Zan nitak dak 9:30 vel in Rengkai Govt.Higher Secondary School khang ah Jacob Malsawmlien (18) S/o Lalhngaklien of Pherjawl tulel a Peace Lane SA Road a om, meltheihlouh pasal khat in tem in dawt a,RIMS Imphal ah etkol dia puak ahihnung in damzoulou in tuni zinglam dak 4 vel in si, a luang lamka damdawi inn morgue ah koih in om hi.Jacob Malsawmlien in a Sih ma a,a gen kiza sawn dan in,Jacob Malsawmlien in zan nitak dak 9:30 vel in Rengkai Govt.Higher Secondary school khang ah,a lawm te laibu khel ding in kuan a,lampi a mobile phone a, mitawh a kihou lai in,pasal khat in lusei pau siamlou chik in lighter na nei hia? va chi a,aman leng ka neikei a chih leh pasal pa'n temta in Jacob Malsawmlien nunglam apan a pang taklam pang dawtsak in, a mobile phone laksak in tai a,Jacob inleng a Gil a temta dokkhia in temta a dawt tupa delh a, delh phazoulou in temta in deng thoh mahleh dengkhalou in, amah chau gawp in kipuk hi. Khaw sung mipi'n a theihphet un, lamka
damdawi inn pawtung mahle uh, doctor gina omlouh ziak in RIMS Imphal ah pawsuk uhi. Sisan a pawt tamluat ziak in, tuni zinglam dak 4 vel in damzoulou in Si a, a luang Lamka damdawi inn morgue ah post mortem bawl in om hi. Jacob Malsawmlien in Vision Academy ah class 12 simlel hi. Jacob sihna thu tawh kisai a, mipi thangpai in Lamka khopi sung a sumbuk teng khaksak in, Jacob suunna dan in CDSU in School teng khaksak uhi. Hiai thu tawh kisai in Jacintha Lazarus IAS DC Churachandpur in poisak thu puang a, Jacob Malsawmlien galna in District Administration min in sum sang 5 pia a, tualthattu ni 3 sung a matkhiak hiding in gen hi. Ni 3 sung a tualthattu matkhiak ahihkei leh kiphinna om nawn ding hidan in kigen hi.DC Churachandpur in thuchiam a bawl tawh kiton in Jacob Malsawmlien luang Morgue apan a tenna khua Pherjawl khua zuan in pawkhia uhi.Jacob Malsawmlien sihna thu tawh kisai in Churachandpur District Private School Association in tualthattu mohpaihna thusuah bawl uhi. Thusuak in a gendan in tualthattu matkhiak a, dan tawh kituak a gawtna piak ding a chih ban uah Jacob suun mahmah uh ahihdan taklang uhi. Hiai thu tawh kisai mah in CDSU in Chief Minister ading Memorandum DC Churachandpur khut ah pengal ua, thil omdan a sousang ma ngei a tualthattu matkhiak a dan tawh kituak a gawtna piak ding leh Jacob Malsawmlien innkuan te Govt. kam piak ding ban ah compensation lakh 5 ngen uhi. DC churachandpur thuchiam dungzui a May 24, 2012 tan a tualthattu matkhiak ahihkeileh CDSU in kilawm a sak bang in panla ding a, CDSU in moh a paw keiding chi uhi.
Mahila Central committee Churachandpur saina in tuni sunma dak 11 in PT Sport Complex New-Lamka Vengnuam ah Churachandpur district sung a numei te dinmun dopsang na ding tawh kisai in Interactive session nei uhi. Hiai hun ah Jacintha Lazarus IAS DC Churachandpur in "Women and Administration" chih pansan in thugen a,Major Kiran 46 Assam Rifle in "Millitary Action Programme" tawh kisai gen hi. Huaiban ah AK Mirabai Devi Social Welfare Minister in Social Welfare Department nuai a numei te adia hamphatna om te gen a, O Landhoni Devi MLA Khangabok in "Decision making and Leadership role" tawh kisai gen a, Abdul Nasir Agriculture Minister in Agriculture department nuai a, hamphatna om te gen a, Phungzathang Tonsing Health and Family Welfare Minister in " Women Empowerment" tawh kisai gen in mipi tamtak paikhawm ua,nitaklam in annekhawm uhi.
Paite Tribe Council PTC General Headquaters a Central Working Committee (CWC) in tuni sunma dak 10:30 in PTC Head Office Conference hall ah Meeting 4 veina nei uhi. Hiai hun ah 54th PTC General Assembly thupukna enzui in constitution amendment leh Paite customary law enthak ua,Paite nam khawmpi 2 veina enkik in sum dinmun enkhawm uhi.Huaiban ah PTC Rising day June 27, 2012 a zat dingdan leng genkhawm in Vungzagin valte MLA Thanlon Central Working Committee member ding in lalut uhi. Sunnung dak 3 in MLA Chingthak Vungzagin Valte MLA leh Phungzathang Tonsing Health and Family Welfare Minister te ziak in Pathian tung ah kipahthu genna nei in annekhawm.
Widows Welfare Association Asia in May 27, 2012 sunnung dak 1 in Lajangphai khua ah Old Age Home honna tawh kithuah in Widows Day zang ding uhi.Hiai hun ah Ngamthang IFCD Minister Chief Guest apang in Old Age Home hong ding hi.
PUG kichi Uinu a puang,inn a zual mahmah khat May 20, 2012 nitak dak 7 apan a omna theihlouh in mang a, amukha te'n hehpihtak a ui neitu Niangno Haokip Blue Star Academy kiang a pekik ding ngetna bawl a,kipahman sang 1 piak chiam hi. A Ui om dan ahihleh a muk leh a nak lak eilam a Ui te tawh kibanglou in ton sese a, amit leng gol in lawt pian in kilang hi.