* Phungzathang Tonsing Health and Family Welfare Minister in District Level Athletic Meet Closing Ceremony Khuallian hihna tawh uap.
* Manipur Skill Development Society in One Day Awareness Programme nei.
* District Vetenary Office saina in Farmers Training Programme kipan.
* Langkhanpau Guite Chairman ADC Churachandpur in District Level Officer leh MDC teng a tuam in Meeting neihpih.
* T Pachhuaua IPS,IG (Zone-II) in CT Scan vanzat mang thu tawh kisai in Lamka hongpha.
* Lamka leh Imphal kikal a Passenger pua Gari te'n ngeina bang in service nawnta.
* Churachandpur Nurses Association leh District Hospital a sem Nurse te'n mohpaih thusuah.
District Administration leh District Board of education saina in May 9,2012 akipan Lamka Public Ground ah District Level Athletic Meet kipan a, tuni zinglam dak 10:00 in closing ceremony om hi. Huai ah Chief Guest in Phungzathang Tonsing, Health and Family welfare, GAD and CADA Minister pang a, Guest of Honour in H.Deleep Singh, IAS, Director,Youth Affairs and Sports leh Chief Host in Sumant Singh, IAS, State Project Director, SSA, RTE/RMSA pang uhi. Khuallian a pang Phungzathang Tonsing in agenna ah DC/CCpur in development, education leh Sports ah lunglutna nei ahihdan gen in chikmah a,district sung a om ngeilou District Level Athletic Meet a hon saikhiak, pahtak huaisak thugen hi. Manipur ah sports lam a minthang kimawlmi tamtak om a, Mary Kom leng khovel theihphak in minthang a, amah thakheng ding a khangthak te kisa ding in ngen hi. Kumlui in Churachandpur district ah Dengue natna om ziak in aman leng MLA fund apan lakh 10 thohkhia ahihdan gen a,
DC/CCpur leh Medical Department te panlakna ziak in dengue natna kidouzou chih leng genbeh hi. Minister in agenzelna ah Manipur Hills District a masapen ding in District Hospital ah CT Scan kikoih a, huai leng guta kuate hiam in vanzat khenkhat gumang ua, vanzat mangna tawh kisai a kigolhkha suikhiak hunhun in milian, milal leh mi neu himahleh ngaihdam hilou ding a, atung uah dan dungzui in action lak hiding in gen hi. CT Scan vanzat mang teng kithukhak khin ahihdan gen in tunung sawtlou a mipi te’n zangtheinawn ding ahihdan gen in mipite lungbuai lou ding in ngen hi.Huaiban ah Tuktui luan ma in Thanlon sub division, Singngat, Henglep leh Tipaimukh sub division ah Medical team tawh kithuah in joint tour programme neih hiding chi a, Free Medical camp leng nei in damdawi leng a tam theipen a thon a hawmkhiak hiding in gen hi. singtang area teng ah Free Medical Camp neihzawh ahihchiang in Lamka ah leng Free Medical Camp neih hiding in gen hi. Pearsonmun
leh Lanva te’n hanmual nei mahle uh Pucca patta amau khut ah omlou in STC/BSF te tawh buaiden uh ahihdan gen in May 12, 2012 in STC/BSF a Passing Out Parate hun ah khuallian a pangkawm a, STC/BSF te omna gei a amah gam Pacca Patta STC/BSF te khut ah pekhe ding ahihdan gen a, huaichiang in Lanva leh Pearsonmun te’n hanmual patta neita ding uh hi’n gen hi. District Level Athletic School Meet ah CCpur block pan school 27, Thanlon apan school 2, Henglep apan school 7, Samulamlan apan school 6, Singngat apan school 3 leh Tipaimukh block apan school 3 tel uhi.
Manipur Skill Development Society MSDS in tuni sunma dak 11:30 in Synod Hall, IB Road ah One Day Awareness Programme hong nei uhi. Huai hun ah C.Mang Kipgen, Project Director, Manipur skill development society in MSDS tungtawn a course tuamtuam training theih te sinsak a, High school leh College apan student 200 val tel uhi.
District Vetenary office/CCpur saina in B.Vengnuom Community Hall ah tuni sunma dak 11:30 in RKVY 2011-2012 nuai ah Farmers’Training Programme honna om a, huai ah Chief Guest in Ngamhao Touthang,MDC Tuibuang pang in Guest of Honour in S.Thatkhogin,Chief of B.Vengnuom pang hi. Technical session ah Dr Th Debendra kumar Singh, Joint Director(Vety) Ukhrul; Dr Shantimukar Singh, Project Officer(ICDP) Porompat; Dr O.Lokendro Singh, Vety Officer/Imphal; Dr Lalnghaklien Hirler, Vety Officer/CCpur; Dr Rosangzuol Khawlum, Vety Officer/CCpur; Dr S.Mahajit Singh, Vety Officer/CCpur leh Dr J.George Joute, Vety Officer/CCpur te’n sinsak ua, zingchiang in zou ding uhi.
Langkhanpau Guite Chairman,ADC/CCpur makaih in May 9, 2012 in a office chamber ah Vice Chairman, ADC/CCpur;CEO,ADC/CCpur leh District Level Officer te’kimukhawm in Manipur govt in District Council khut ah department tuamtuam 23 a piakkhiak tungtang genkhawm ua, huai ni a tellou District Level Officer te tawh tuni zinglam dak 11:00 in genkhawm nawn uhi.Huaiban ah tuni sunnung dak 2:00 in Chairman ADC/CCpur makaih in development works tawh kisai meeting om a, huai ah MDC te’n amau area chiat a development work te report na leh maban a nasep ding tel in thupoimawh tuamtuam kikum khawm uhi.
T.Pachhuaua, IPS, IG (Zone-II) in tuni zinglam dak 11:00 vel in Lamka hongpha a, SP office ah SP, SDPO/CCpur ban ah officer khenkhat kimuhpih hi. Huai hun ah District Hospital a CT Scan vanzat khenkhat kigumang tawh kisai a Police te’n bangtan suizui uh hiam chih thu ban ah thupoimawh tuamtuam genkhawm in Imphal ah kiknawn hi.
Lamka-Imphal kikal a passenger pua Tata-Winger neitu All Lamka Taxies Owners’Society(ALTOS) leh Imphal-CCpur Bus Owners and Workers Association(Down service) te kal a kitheihsiamlouhna ziak ban ah ALTOS te’n Imphal khawpi sung a parking mun ding a nget uh govt in a limsaklouh ziak in ALTOS pawl lungkimlou in April 29,2012 akipan Tedim Road ah passenger pua Gari ‘bandh’a puang uh tawh kisai in Transport Minister Dr Kh.Ratan Kumar makaih a kihoulemna om ziak in tuni akipan ngeina bang in line bus, direct bus (express te) leh Tata Winger te service in tainawnta uhi. Tedim Road bandh sung in Line bus te’n Imphal akipan Kangvai khua tan pha in kikzel ua, mipi’n haksatna liantak tuak hi. Passenger pua gari te’n ngeina bang a service nawn na ding in zannitak in CDSU makai te’n ALTOS makai te kimuhpih in Line bus (down service) makai te Mobile phone tungtawn a houpih ziak ua, tuni'a kipan Lamka leh Imphal kikal a passenger pua gari te’n service
nawn uh hi’n thutut kingah hi.
Churachandpur Nurses Association leh District Hospital a nasem Nurse te'n tuni'a thusuah a bawlna uah,apaisa may 9,2012 nitak dak 8 a Hospital sung a duty a om Bethesda school of Nursing Muolvaiphei a GNM student khat Thangginlien S/o Lalkhopao of Headquater veng in thangbawl a, a sual sawmna tung ah mohpaih thupuang in a kituahpih bang gawtna peding in thuneitu te kiang ah ngetna bawl uhi.