* Kuki State Demand Committee,General Strike beita. Economic Blockade leh Govt.Office banah Govt. Activities teng Bandh kipan.
* Tuibuang a Seikhomang Inn mei in kangtum.
* Hmar Martyrs Day Football Trophy, Closing Ceremony om ding.
* DC Churachandpur Chief Minister tawh Meeting ding in Imphal ah hohsuk.
* Nehru Marg Youth Union in Veng sung a Ui khahzan ding kham.
* Langkhanpau Guite Chairman ADC Churachandpur makaih in IWMP tawh kisai in Meeting om ding.
* TN Haokip Foundation Meritorious Award piakkhiakna om ding.
TUN TANCHIN KIMZAW IN :
Kuki State Demand Committee (KSDC) in Central Govt.kiang a Kuki State ngetna a May 12,2012 nitak dak 6 akipan Kuki te omna teng a General Strike a bawl uh tunitak dak 6 in beita hi.General Strike sung in buaina thupilua gending omkei mahleh,Govt.office leh institution teng kikhak in Lamka leh Imphal kikal ah Gari service omlou a,Lamka khopi sung ah Gari tai muhding vang mahmah in sumbuk tamzaw kikhak a,niteng ngeina naktak in hihbuai hi.General Strike sung in khopi sung in mun poimoh tuamtuam ah security hihkhauh in om a,Police leh IRB te sun-le-zan in duty uhi.Tusun in General Strike omlai mahleh bazar ah mehzuak a tu pawl om a,Diesel Auto bangzahhiam inleng service uhi.Tunitak dak 6 in General Strike bei mahleh Kuki state Demand Committee in kiphinna sunzom in tunitak dak 6 akipan May 19,2012 tan daih ding in Economic Blockade bawl ua,hiai sung in Govt.Office leh activities teng bandh puang uhi.
Zan nitak dak 7:30 vel in Tuibuong ah Seikhomang tenna inn mei in kang a,innsung vanzat tamzaw leh a inn leng kangtum a,Innsung a thautui omziak in khaw sung mipi'n deihbang in innkang phelh theilou uhi.Innkang phelhna ah inn neipa Seikhomang leh Seilal te a khut uleh a khe uh liamkha uhi.
Zingchiang sunnung dak 1:30 in Rengkai Playground ah Hmar Martyrs Day Football Trophy Closing Ceremony om ding hi.Hiai hun ah Dr.Chaltonlien Amo Chairman Hill Areas Committee Chief Guest in pang ding a,Final Match ah Langza leh Muolbem te kimawl ding uhi.
Jacintha Lazarus IAS DC Churachandpur tuni'n Office kai mahleh sunnung dak 1 vel in Imphal ah Chief Minister tawh Meeting ding a neih ziak in hohsuk hi.Kuki State Demand Committee General Strike ziak in Govt.Office Staff te kuamah Office kaigina omlou in DC Office Staff khenkhat Office kai sun-sun te leng Police te venbitna nuai ah om uhi.
Nehru Marg Youth Union in tuni'a thupuan a bawlna uah,veng sung siangthouna ding leh accident theihna lam tuamtuam apan kivengbit theihna ding in,zinglam dak 6 akipan nitak dak 8 sung a kuamah in Ui khahzanlou a,khih chiat ding in theihsakna bawl uhi.Hiai thupuan May 20,2012 akipan zatpat hiding a,thupuang zuilou te tung ah Nehru Marg Youth Union thutanna bangbang ah kuamah a khase theikei ding chi uhi.
Langkhanpau Guite chairman ADC Churachandpur makaih in May 18,2012 sunma dak 11 in Chairman ADCC Office Chamber ah Integrated Watershed management Programme tawh kisai in Meeting om ding a,hiai nimah sunnung dak 2 in MGNREGS tawh kisai in DC Lamka Office a BRGF Resource Centre ah Meeting omding hi.
Board of Secondary Education Manipur saina nuai a,tutung HSLC Examination a lohchinna ngah,59 Saikot Assembly Constituency sung a Student te a ding in TN Haokip MLA 59 Saikot Assembly Constituency in,kum teng a, a hihbang in tutung inleng TN Haokip Foundation Meritorious Award piak sawm a,Award piakkhiakna ahihleh May 30,2012 in Bijang Community Hall ah om ding hi.Hiai hun ah All round topper Award, sing 2,citation leh certificate hiding a,Math topper Award,sing 1 leh sang 5,citation leh certificate hiding a,Science topper Award,sing 1 leh sang 5, citation leh Certificate hiding a,school of the year award,sing 1, citation leh certificate hiding hi.Hiai Award te sang thei dia ki-lametna nei te'n Gebion Enterprises, Hmar veng leh Gebion Cassettee Store Tuibuong Bazar ah a manbei in application form laktheih ding a,May 21,2012 nitaklam dak 4 tan in piaklut theih ding hi.