* Phungzathang Tonsing Health and Family Welfare Minister in STC/BSF Passing Out Parade,Khuallian hihna tawh uap.
* DS Poonia IAS Chief Secretary in Circuit House lamna munding hong enkhia.
* Zomi Council makaih in Minister,MLA leh MDC te'n Get-Together neikawm in Socio-Political Discussion nei.
* Multi-lingual Monthly News Magazine "Zogam Today" Kum khat chinna kizang.
* Kuki State Demand Committee General Strike tunitak dak 6 in kipan.
* State Medical Board leh People Advance in Social Service saina in Disability Camp om ding.
* ZYA Constituent Unit a President leh Secretary ban ah Representative teng in Meeting neiding.
Subsidiary Training centre STC/BSF in tuni zinglam dak 8:30 in Parade ground ah Passing Out Parade nei uhi.Hiai hun ah Phungzathang Tonsing Health and Family Welfare Minister,GAD and CADA Minister in Chief guest hihna tawh uap in BSF Jawan batch 197 na a training zouthak 174 te inspection bawl in salute la hi.BS Kasana DIG,STC/BSF in Phungzathang Tonsing Health and Family Welfare Minister tanchin tomkim simkhia a,STC/BSF te adia a sepkhiak te leng taklang hi.Phungzathang Tonsing in Power Minister a puaklai in STC/BSF ading Power supply a tuam in pia hi.Phungzathang Tonsing Health and Family Welfare Minister in a thugenna ah North-Eastern state kia hilou a India pumpi adia training centre hoih leh suanhuai mahmah Churachandpur District in a neihkhak hamphathuai ahihdan gen a,tua training zouthak Jawan ten mun haksapen ah leng a mohpuakna uh semsuah zouding in muanhuai mahmah uh chi hi.Huaiban ah security personnel leh mipi te kal a kitheihsiamna a om
poimoh petmah a,mipi kithuahpihna tellou in helpawl te douna ah security force te lohching theilou chi'n leng genbeh hi.Training zouthak Jawan te kha 34 sung a training na uah,arms,drill,border security and surveillance,tactics,field craft,map reading,border management,field engineer,counter insurgency operation leh human rights tawh kisai sinsak in om uhi.Tuni'a Passing Out Parade hun DC Churachandpur tel in District Level Officer leh mipoimoh tamtak in uap uhi.Passing Out Parade programme neihzoh in Phungzathang Tonsing Health and Family Welfare Minister in STC/BSF te khut ah amah mimal gam pekhia a,STC/BSF te huangsung a omkha Pearsonmun leh Lanva te hanmual mun pucca patta leng khaw hausa te khut ah pekhia hi.Aman a thugenna ah Pearsonmun leh Lanva te hanmual mun STC/BSF te huangsung ah omkhak ziak in misi bang leng vui theihlouh a om hun leng omsek a,hiai tungtang kingai poimoh petmah in DC leh Minister level ah leng hihveng theihmai ahihlouh ziak
in hunsawttak kibuaipih a Union Home Minister theihpihna leh phalna a kimuh dungzui in ken ka gam Patta STC/BSF te khut ah ka piakkhiak ziak in Pearsonmun leh Lanva te'n hanmual mun kiptak nei ahita uh chi a,huaiban ah STC/BSF te leng a,kiangnai ua omte tawh kituahlouh ding utlou in a siam petmah ua,Pearsonmun te hanmual mun ding bang gam honhop beh uh chi hi.
DS Poonia IAS Chief Secretary Govt.of Manipur in tuni sunma dak 10:30 in Lamka hongpha a,Bijang tedim road a Circuit house building lui hihsiat a hihnung in,a thak a bawl dingdan hong enkhia hi.Chief secretary ahihleh Azi leh Official hunkhop in honzui ua,Lamka ah Jacintha Lazarus IAS DC Churachandpur in kithuahpih hi.Chief Secretary DS Poonia IAS ahihleh Azi te inn Zion Street ah khawl tawldam in anne a,sunnung in Imphal ah kiknawn hi.
Zomi Council General Headquaters saina in tuni sun dak 11 in Nehru Marg a Zomi Council Administrative Office ah,Minister,MLA leh Chairman ADCC leh MDC te'n Get-together neikawm in Socio-Political Discussion nei uhi.Hiai hun ah LB Sona Chairman Zomi Council in Keynote address gen a,Langkhanpau Guite Chairman ADC Churachandpur,Vungzagin Valte MLA Thanlon A/c,T Manga Vaiphei MLA Henglep A/c leh Phungzathang Tonsing Health and Family Welfare Minister te'n thugenna hunzang ua,MDC leh Zomi sung a frontal organisation tuamtuam a makai te tel in nitaklam in annekhawm uhi.
Multi-Lingual Monthly News Magazine Zogam Today kipatkhiak nung kum 1 chinna tuni sunma dak 11:30 in Zogal Memorial Hall Complex Zoveng ah kizang hi.Hiai hun ah Chief Guest dia chial a om Ginsuanhau MLA Singngat,hoh theilou in amah tang in Election lai a Election Chairman T Gouzalal,Chief guest in pang a,Zou pau a News Magazine neih a poimoh dan gen hi.Guest of Honour in M Sesei Zou,Chairman ADC Chandel pang a,functional president Th.Thangzalian President MHJU pang a,Host in Micheal Ginzasuan District Supply Officer,S Kaikhankap ARCS leh Mannuamching Chief Executive Officer ADC Churachandpur te pang uhi.Hiai hun Zou Literature Society makai te leh local artist hunkhop in uap uhi.
Kuki State Demand Committee (KSDC) a Spokesperson K Khongsai in apaisa May 10,2012 a B Vengnuam Community a Press Conference aneihna a Press Release a bawl in, a taklat dan in Kuki te tandia kilawm Kuki State, Central Govt.in a piak ding ngetna in tunitak dak 6 akipan May 15,2012 nitak dak 6 tan Kuki te omna teng ah General Strike om ding hi.General Strike in Press/Media leh Medical chihlouh huamkha vek ding hi.K Khongsai Spokesperson KSDC in Press Conference neihna hun a gendan in General Strike tan a Govt.in Kuki te ngetna a limsak keilai leh May 15,2012 nitak dak 6 akipan May 19,2012 nitak dak 6 tan Economic Blockade bawl hiding a,Govt.Office leh Activities teng bandh hiding chi hi.
State Medical board manipur leh People advance in social service (PASS) kithuah in May 16,2012 in Synod hall IB road ah Disability Camp neihsawm uhi.Hiai hun ah khanvual phalou te certificate,identity card leh pass book bawlna ding tawh kisai in etchetna om ding hi.Khanvual phalou lunglutna neite'n photo passport size copy 2 leh photo stamp size copy 2 tawi ngai ding hi.Huaiban ah date of birth,blood group leh identification mark theisa in kuan ngai ding hi.
Goukhomang President Zomi Youth Association ZYA General Headquaters deihna bang in zingchiang sunnung dak 1:30 in YPA General Headquaters Office Hiangtam Lamka ah ZYA Constituent Unit a President leh Secretary ban ah representative teng in Meeting neiding ua,ZYA Cabinet Expansion ding tawh kisai leh thu poimoh tuamtuam genkhawm ding uhi.
Churachandpur District Progressive Chess Association in May 17 akipan 19,2012 sung in YPA General headquater hall hiangtam lamka ah Chess Tournament saisawm uhi.Lunglutna neite'n Gogou Gas store Tipaimukh road opposite Lamka Community hall ah form laktheih ding a,entry fee 100 pia in may 15,2012 tan in piaklut theih ding hi.first prize sang 5 hiding a,second prize sang 3 leh third prize sang 2 hiding hi.