* Tuinuphai khaw sung a kitheihsiamlouhna ziak in mi 2 liam tenna inn hunkhop kisia.
* Kuki State Demand Committee General Strike ziak in khopi sung ah Security khauh.
* Churachandpur District Disabled Union tungding thak in om.
* State Medical Board leh People Advance in Social Service in Disability Camp saisawm.
* CDSA in The 1st Ngulchinlian District Open Football Tournament sai ding.
* Youth With a Mission Kolkata Outreach Team saina in Rengkai Community Hall ah Revival Crusade kipan.

Lamka apan Kilometre 5 vel a gamla Tuinuphai khaw sung ah kitheihsiamlouhna piang in apaisa April 14,2012 nitak dak 4 vel in pasal bangzahhiam in Khamchinlal @ Lalpu S/o Lunzakham of Tuinuphai tenna inn hihsiatsak ua,Khamchinlal in May 12,2012 in Police ah report bawl a,Police te'n thil omdan enkhia a,khaw sung a phak ziak un khaw sung mipi thangpai in "kua e police te hon tonpih" chi in May 12,2012 nitak dak 5 vel in Hoikholam W/o Khamzagin, Ginlianlal (12) S/o Thangzamang leh Semzakhup (66) S/o (L) Lunneh tenna inn hihsiatsak nawn uhi. Hiai thil tung ah Hoikholam a khut liam a, Ginlianlal (12) tulel a Rengkai Govt.High School a class 6 simlel a lu liam a,Semzakhup ahihleh a inn apan pasal 3 in kaikhia in vuaksawm mahle uh kitungkhe thei hidan in Semzakhup in Media te mai ah gen hi.Hiai thubuai tawh kisai in tuni sun dak 12 in United Zou Organisation General Headquater in amau Office Zoveng ah genkhawm uhi. Hiai thu ziak mah in Thangzamang Tungdim of Tuinuphai in zan in Lamka Police Station ah Haupu Baite (30) S/o Otsei Baite of Tuinuphai, Ginmang Vaiphei (24) S/o Paulun Vaiphei of Tuinuphai, Mangboi (21) S/o Seilal of Tuinuphai, Hegin Vaiphei (23) S/o (L) Bebem Vaiphei of Tuinuphai, Lelen Vaiphei (27) S/o (L) Bebem Vaiphei leh Manglun Vaiphei (37) S/o Manghem Vaiphei of Tuinuphai te tung ah complain bawl a, police te'n FIR chiamteh uhi.Hiai Tuinuphai ah tenna inn 40 vel om hidan in kigen hi.

Kuki state demand Committee (KSDC) in central Govt.kiang a Kuki state ngetna a May 12, 2012 nitak dak 6 akipan Kuki te omna teng a General Strike a bawl uh sunzom in, tuni'n bandh volunteer te'n lamlian lai ah gari tyre sia hal in, bandh pass neilou gari himhim taisuaksak lou uhi. Kangvai leh Torbung lak ah bandh volunteer te sousang sim mahle uh, buaina thupilua gending omlou hi. Khopi sung leh mun tuamtuam ah Police leh IRB te a sun-le-zan in duty ua, security te kigingsa in om uhi. New-bazar leh Zenhang bazar ban ah Tuibuang bazar leh Tedim road zul a sumbuk teng kikhak in gari tai muhding vang mahmah a, New-lamka leh Rengkai area ah bel ngeina bang in sumbuk te kihong a gari kivialleh leng tam mahmah hi. Hiai general strike ahihleh zingchiang nitak dak 6 in bei ding a,chuaizoh in Kuki State ngetna in May 15, 2012 nitak dak 6 akipan May 19, 2012 nitak dak 6 tan Economic blockade bawl ding ua,chuai sung in Govt. Office leh Govt.activities teng leng bandh ding uhi.

Churachandpur District Tribal Disabled Union (CDTDU) hunsawttak function lou a om nung in,ctunding thakna makai ding kitelna May 12, 2012 sunnung dak 1 in Centre for Community Initiative Office Singneng colony Zion Street, central lamka ah nei uhi. President ding in Sianmuanthang,Secretary in Nemboi Zou leh Finance Secretary cum treasurer ding in N Kailianthang te telching ua, amau hun lemtang masapen ah executive committee member ding guang ding ua, by-law ding leng draft ngal ding uhi. Churachandpur District tribal Diasabled Union leh khek in Churachandpur District Disabled Union chi uhi.

State Medical board manipur leh People advance in social service (PASS) kithuah in May 16, 2012 in Synod hall IB road ah Disability Camp neihsawm uhi. Hiai hun ah khanvual phalou te certificate, identity card leh pass book bawlna ding tawh kisai in etchetna om ding hi. Khanvual phalou lunglutna neite'n photo passport size copy 2 leh photo stamp size copy 2 tawi ngai ding hi. Huaiban ah date of birth, blood group leh identification mark theisa in kuan ngai ding hi.

Churachandpur District Sports Association CDSA in June 1, 2012 in Lamka Public ground ah 1st Ngulchinlian District Open Football Tournament saisawm a, lunglutna nei CDSA nuai a 2011-2012 a Affiliated Club te'n May 17 akipan may 30, 2012 tan in entry form laktheih ding a, winner team in cash prize sing 5 leh trophy sang ding a, runner up team in sing 2 leh sang 5 leh trophy sang ding a, golden boot in sang 2 leh trophy sang ding hi. Tournament tawh kisai a thuchian kimzaw theinuam te'n CDSA Office Lamka Community hall ah zinglam dak 7 akipan zinglam dak 9 sung in kantheih ding hi.

Discipleship Training School 2012 a Youth with a mission kolkata Outreach team in tunitak dak 6 akipan Rengkai Community Hall ah Churachandpur District sung a Zu leh Damdawi khamtheih ban ah numei leh pasal kal a thangtat te suahtakna ding in Revival Crusade nei uhi. Crusade sung in Rev.James Lalzarlien Joute Director South Asian Frontier Mission Youth with a mission in thugen ding a, May 16, 2012 in zouding ua, a lunglut peuhmah telding in chialna bawl uhi.