Gen Secy/EBC  in Missionary thakte commissioning pia

Lamka, March-30: EBC saptuam in Missionary a lakthak mi 10te tuni nitak dak 6:00 in New Lamka Dorcas Veng a EBC biakinn ah  Rev.S.Vungminthang, General Secretary, EBC in  na gotna(commissioning service) neikawm in thumsak a, Pathian thu leng gen hi. Missionary thakte  1)Evan Salam Johnson Singh of Kwakeithel; 2) H.Jamkhanmang of Langol; 3)Ginkhenmung of Bungmual; 4)Marina Manngaihlian of Zion Veng, New Lamka; 5)N.Nawl Khan Khup of Bethlehem, New Lamka; 6) B.Jemson Ngaihte of Moria, Pearsonmun; 7) Suanboy Vualnam of Diphu; 8) Manoj Rana Magar of Nepal; 9)Ran Kumar Sewa of Nepal leh 10) P.Lokeshwore Singh of Thamnapokpi hi uhi.
      
Rev L.Kham Kho Lun, Director of Missions/EBC in Missionary thakte  mipi ma ah pulak  a, EBCC Dorcas Veng Local Committee in Missionary thakte blanket thak 1 chiat pia uh a,Missions Committee in torch light 1 chiat pia uhi. Mipi kikhawm tengin  Missionary 10te adingin thumna nei uh a, Rev.K.Kamchinkhup, Director of Ministries in kipahthu gen hi. Programme huaizawh in Rev V.Thangkhangin, Director of Institution in vualzawlna in hunkhak hi.

Khawpi sungah nitak sawtnunga thauging in mipi patausak
A/R te’n khamtheih doudalna nasepna dal uh chi’n ZRO Gen HQ in mawhsak thu puang
Lamka, Mar-30: Apollo Veng lakah zan nitak dak 10.30 lak velin thauging zakin om a, nitak sawtnung in  khawpi sunga  thauging in mi tamtak hih patau a, huai thiltung mi tamtak lungsim thomhau leh giautau takin koih hi’n thutut kingah hi. Thiltung tawh kisai Zomi Re-unification Organisation(ZRO) Gen HQ nuaia  Ministry of Information & Public Relations thusuakin a taklatdanin Assam Rifles te’n khawpi sunga khamtheih zuakte humbit(protect)  uh chi’n mawsak thu puang uhi. ZRO thusuak in a gendan in  zan nitakin Apollo area lakah khamtheih zuaka kipei(drug trafficking) om chihthu zak ziakin ZRA a Anti-drug Cell cadre khenkhat thil omdan enkhe dinga kuante Assam Rifles te’n gen-le-sak bangmah omlou in ana kap uh a, huai ah cadre 2 liam uh a, aliam 2te laka 1 leh a liamlou 1 tu’n Assam Rifles-te custody a omlai uh  hi’n thusuak in gen hi.

ZRO thusuakin ataklatna ah SoO nuaia om ZRO/ZRA  tungah warning bangmah omlou banah mumal beia galvan zatkhum ‘Friends of  the North-East’ kichiAssam Rifles te’n a hihna uh langsak nawn uh hi’n taklang uh a,  khawpi sunga khamtheih zuakte A/R te’n bumbit nawnlou ding a theisak kawm in a gamtatdan un philanthropic organisation tuamtuam in khamtheih a doudalna tanpha uh kalh ahihdan taklang chi’n ZRO thusuak in gen hi.
Thusuak in a genzelna ah  ZRA cadre duty  te’n thilhoih deih ziaka panla hi uh a, huaiziak mahin ‘Friends of the North-East’ pawlte  kap thuklou uh hi’n ZRO in taklang hi.  Lamka leh a kimlak teng ah khamtheih hihbei tupna ziakin Nupite leh  mipi vantang in amau innlum nusia in khawlai ah duty mahle uh Assam Rifles pawlin  khamtheih zuakte humbit zawsop uh chi’n ZRO thusuakin taklang hi.

Tuni’n khawpi sunga Bank 6 kikhak  
Lamka, March-30: Manipur govt in Negotiable Instrument Act, 1881 nuai ah financial year 2014 beikuan ahih ziakin tuni  Pathianni(Sunday) himahleh  govt office teng ban ah bank leh leh financial institution teng working day hidin  puang a, huai dungzui in SBI/CCpur Branch , UBI/CCpur Branch leh Treasury office te’n nasem uhi. DC/CCpur office a Inspection Team te’n Town area a om Bank bangzah in nasem uhiam chih enkhia uh a, bank tuamtuam 6- ICICI ; HDFC; Vijaya Bank; UCO Bank; SBI Pearsonmun leh MRB in nasemlou in kikhak chihthu kiza hi.

Congress candidate adin campaign
Lamka, March-30: Outer Manipur Lok Sabha biala Congress candidate Thangso Baite adin Lamka khawpi ah March 31, 2014 in Public Campaign om ding a, huai ah Chief Minister O. Ibobi leh Dy CM banah MPCC President Gaikhangam leng tel ding uhi. Thutut kingah dan in Hiangtam Lamka a YPA Hall ah March 31,2014(Seppatni) sunnung dak 1.00  in programme kipan ding a,Dist Congress Committee President in vaidawnna thu a gen khit in Minister leh MLA te’n thugen ding uh a,huaizawh in Thangso Baite,MP in thugen ding hi.Huai banah CM leh Dy CM in Congress(I) candidate adia campaign  bawlin thugen ding uhi.

EVM 1st Randomization om
Lamka, March-30: DC/CCpur office ah tuni sunnung dak 1:00 apan Election deptt saina in Polling Station 296  a zatding EVM-te 1st Randomization om a, EVM ballot box unit leh control unit teng bulhtuah uhi. April 1, 2014 sunnung dak 1:00 in EVM strong room ah 2nd Randomization om ding a, huai ah Assembly Constituency 6 a EVM kizangding teng Polling Station wise in bulhtuah leh heikual vek nawn ding uhi.

Zomi Chief/Chairman Assn meeting  
Lamka, March-30: Nehru Marg a Zomi Council office ah April 2, 2014 zinglam dak 10:00 in Zomi Chiefs/Chairmen Assn a block tuamtuam- Lamka, Singngat, Thanlon, Sangaikot, Saikot, Munpi leh Vangaitang a Zomi Hausa tengin meeting neiding uhi.Block tuamtuam a Zomi hausa teng telchiat dingin theisak uh a, atellou te’n meeting thupukna nial theilou ding uh chi’n Chairman & Joint Secy, Zomi Chiefs/Chairmen Assn. te’n theihsakna bawl uhi.

II-Outer Manipur ah voter 9.56 lakh om
Lamka, March-30: Outer Manipur Lok Sabha seat ah April 9, 2014 a election om ding ah voter om teng 9,56,000 val zek  om hi’n kigen hi. Huai lak ah Naga vote 3,60,000 vel om a,  Non-Naga vote 3,30,000 banah Meitei & Pangal vote 2,66,000 om hi’n kigen hi.

Treasury staff khat pension
Lamka, March 30: Treasury office/CCpur a poen sem T.Khupthawn  of Bungmual a sepna apan a pension (retired) ziakin tuni sunnung dak 2:00 in Treasury Officer makaih in staff te’n khakna om hi. Huai ah staff te’n  pakkhi, thangsuah puan leh belpi 1 pia in singpi  dawnkhawmna hun leng neihpih  uhi.

BLO te’n I-card ading submit ngai
Lamka, March-30: Lok Sabha Election 2014 ding tawh kisai in Booth Level Officer te’ Identity Card ding passport 2 leh stamp size 1 akintheilam in  concern SDO-te kiang ah submit chiat dingin DC/CCpur in theihsakna bawl hi.

CREDO member 17 tawpsak sawm
Lamka, March-30: NRHM tungtawn in Community Research & Environmental Devt Orgn (CREDO) member 27 in Dec 17, 2013 apan Dec 16, 2016 tan kum 3 sung daihdin contract basis in Dist Hospital sianthouna enkai dinga guan hi uh a, hileleng member 27 lak ah Imphal lamte’n 17 tawpsak sawm uhi. Tuni sunnung in Imphal apan CREDO makaite’n Dist Hospital hongpha in CREDO makaite kimuhpih zual in h kiknawn pah uhi. Dist Hospital a CREDO member te’n kha 1 in Rs 3300/- lawh uh a, tawpsak a sawm uh mi 17 teng leng nasep nitan lawh pekim uh hi’n kigen hi.Mi  17 tawpsak ahih ualeh 10 kia in Dist Hospital a Ward teng enkol ding uh hi’n kigen hi.

SUUNNA
V.Vumpau f/o Dongkhanlal @ Stanley of Zoar veng, Bungmual damlouh ziakin tuni nitaklam in Dist. Hospital ah si a, March 31, 2014 in Bungmual hanmual ah kivui ding hi.

IMPHAL NEWS
Governor leh CM akipan message
Imphal, March-30: Manipur Governor VK Duggal leh Chief Minister O. Ibobi in March 31, 2014 a festival kizang ding Sajibu Nongmapanba(Cheiraoba) tawh kisai in Manipur mipite deihsakna thuchah(message) puang uhi. Governor in ngaihdan kibanglou atuamtuam omte koihkhia in Manipur khantouhna ding a kuapeuh in panla chiat ding leh kipumkhatna hoihsem omsak dingin mipite ngen a, pau-le-ham banah sahkhua tawh kisaia kideidanna omlou in dinga panla dingin leng ngetna bawl a,Cheiraoba festival in  Manipur ah muanna leh bitna a omsak deihthu puang hi. Chief Minister in leng hunthak kipat dungzui in Manipur ah lemna leh ki-it tuahna omna ding banah khantouhna omsak dingin mipi kuapeuh n kituak taka panla dingin ngetna thusuah bawl hi.

CPI in election manifesto suah
Imphal, March-30: CPI State Election Committee,Manipur  a Chairman N. Mangi in tuni’n Irabot Bhavan ah Lok Sabha election tawh kisai a Communist Party of India (CPI) manifesto hong(release) a, election ah CPI candidate telching ahihleh Manipur ah kikhenna(change) thupitak om ding hi’n gen hi. CPI manifesto ah sepkhiak ding point tuamtuam 27 taklat hi a, huaite lakah Indo-Myanmar border fencing a nawngkaina om hihfel ding,Manipur akipan Armed Forces Spl Power Act 1958 leh black law tuamtuam lakkhiak ding,helpawl tuamtuam tawh kihouna(peace talk) om theihna din India govt a panlak ding,Manipur-mi  leh Northeast mite India gama khawpi tuamtuama soisakna omsek beisakna din anti-racist law bawlkhiak ding, Manipur ah gamdangmi honglut ding dalna din Inner Line Permit zat ahihna dia panlak ding, Railway line in Imphal tan hong tun kinna dinga panlak ding, Trans-Asian Highway sepkhiak kin ding,Imphal-Dimapur lamlian leh Imphal-Jiribam lamlian ah Highway Protection Force koih ding,lounei mi kum 60 a upate pension sum kha 1 in Rs. 3000 zel piak ding, Manipur ah corruption beisak ding  chih leh adangdang hunkhop tel hi.

Mi 1 in candidate 2 adin campaign
Imphal, March-30: Thusuak khat in a gendan in 16th Lok Sabha election om ding ah mi khat in candidate 2 adingin mun khat mah ah  campaign bawl a,amun leng Senapati district a Saikul Public Ground hi’n kigen hi.  Thusuak in a gendan in Thangjang Khongsai(50) of Dongshum village( Saikul Sub-divn) tulelin Saikul bazar kianga Luidung Veng a om in  
March 17, 2014 in AITC candidate Kim Gangte adin campaign meeting sai a, March 28, 2018 in  NCP candidate  C Doungel ading in campaign meeting sai chih ahi hi. Aman candidate 2 adia campaign meeting a saina ah election a poimawhdan leh voter-te’ right tawh kisai hah gendeuh hi’n thusuak in gen hi.Amah khawtang(society) hoihna dinga panla peih gige hi’n kigen a, thugen asiam mahmah ziakin mi’n ngaina mahmah chih hi a,public meeting leh function tuamtuam ah  mi’n zang(hired) sek mahle uh aman sum la ut ngeilou hi’n gen in om hi.

Expenditure register enkhe ding
Imphal, March-30:Inner Manipur Lok Sabha biala Election Expenditure Observer Atul Handa in candidate-te’ Expenditure Registrar inspection bawl ding chi’n  Returning Officer K. Radhakumar Singh,IAS, DC/Imphal West in thupuan bawl hi. Huai dungzui in Expenditure Observer in April 4, 10 & 15, 2014 in zinglam dak 10.00 akipan nitaklam dak 5.00 tan Inner Manipur biala candidate-te’ Expenditure Registrar enkhe ding kigen hi.

JNMDA Diamond Jubilee zat hiding
Imphal, Mar-30:  Jawaharlal Nehru Manipur Dance Academy (JNMDA) Diamond Jubilee lopna kum 1 sung om ding hi’n kigen hi. Tuni’n JNMDA Director  L Upendro Sharma leh  Pradhan Guru A Tombinou Devi in Press-te kimuhpih in a genna uah  India Prime Minister masa Jawaharlal Nehru in April 1, 1954 a Manipur hongphak laiin patkhiak hi a, amah akipan grant Rs. 20,000 kimu zangin Manipur Dance Academy chih minvuah a kipankhia hi’n gen hi. Huai academy tungtawn in  teachers leh  students tamtak omkhia hi’n leng gen a, Jawaharlal Nehru sihnung kum 1964 in Jawaharlal Nehru Manipur Dance Academy chih a om hi’n leng gen hi.
     
Kum 1 sutzop ding Diamond Jubilee lopna India Vice President M Hamid Ansari in April 2, 2014 in hong ding chih hi a, huai hun ah gurus/dancers/scholars minthang mi 10 pahtawina in gold medal leh certificates piak hiding uhi. Diamon Jubilee lopna ah  Assam leh  Delhi akipan artiste-te banah Manipur a dance troupe tuamtuam hunkhop in cultural dance lahna leng nei dingn uh chi’n JNMDA Director  in gen hi.

Ukhrul journalist te’n boycott puang
Imphal, March-30: Ukhrul District Journalists’ Assn (UDJA) te’n tuni’n  emergency meeting nei uh a, S Selvan,SP/Ukhrul leh  singtangam a Manipur Police omte  boycott ding in thupukna bawl uhi. SP vengtu(escort party) police te’n Ukhrul a Mini-Secretariat ah zan nitaklam in mipi leh student rally a paite coverage bawl journalist-te  kilawmlou taka bawl in a camera uh a laksak ban uah limlakna paihkhiaksak(deleted) sak uh a,huai tungtang ah SP in ngaihdam ngen dingin theisak mahle uh tuni tan in SP apan thuzak omlouh ziakin SP leh police-te boycott puankhum uh hi’n thusuak in gen hi.

Gawtna piak phutin  sit-in-protest
Imphal, March-30 : ITI a electronics student L. Jhaljit  in a teacher uh numei khat kilawmloutaka abawl ziakin mat in om a, Sayang Konthoujam Leikai leh Sawang Kurao Makhong Women Development Organization a volunteer te’n L. Jhaljit  akituahpih bang gawtna piak ding deihna in tuni in Sayang Kurai Community Hall mun ah sit-in-protest nei uhi. L. Jhaljit in March 25, 2014 in a teacher  uh numei khat kilawmlou takin bawl a, mat a hih nungin Judicial Magistrate First Class, Imphal West in ni 15 sung custody a om ding in mawhpaih hi.

Congress in Thoubal &CCpur apan vote 3 lakh val  mu ding-CM
CM in Thangso Baite(Congress)’ adi’n campaign flag-off
 
Lamka, March-28: Outer Manipur Lok Sabha biala Congress candidate ding Thangso Baite adia campaign patna ding in tuni zinglam dak 10.30 in Hmar Veng a Thangso Baite’ tenna inn ah Chief Minister O.Ibobi  in khuallian apang in election campaign hongkhia (flag-off) hi. Huai hun ah Functional President in MPCC President banah Dy CM Gaikhangam pang a,Guests of Honour in Minister-te, MLA-te leh party leader-te pang uhi.  Program zatna ah Chairman ADC/CCpur makaih in MDC member-te leh official tamtak tel uhi. Khuallian-te ban ah Cabinet Minister hunkhop in leng thugen  uhi.
      Chief Minister agenna ah Outer Manipur Lok Sabha bial ading in mi tamtak in Congress I ticket ngen uh a, party high command in Thangso Baite pia hi’n gen hi. Party khenkhat communalism om mahleh Congress party in khentuam neilou, detdoutak leh principle hoihtak paipih hi’n gen hi. Central ah communalism pawlin vaihawmna hong len bang hile uh mipi’n haksatna thupitak tuak ding a, huai party-te’n Central a vaihawmna lenlou dingin mipi’n pan i lak ding uh ahi chi hi. Thoubal district sung ah Outer Manipur Lok Sabha seat atel Assembly Constituency 7 omte banah , CCpur district a Assembly Constituency   6 omte apan Congress candidate in vote 3 lakh val mu in ching ding hi’n CM in gen hi. Aman a gen behna ah  Rahul Gandhi in Manipur hongphak lai in Outer Manipur b ial ah Congress I candidate a ching dingsa ahihman in lungkhamna ding omlou ahihdan ana hilhkhin hi’n leng gen hi.
      Dy CM in a genna ah Congress party kichi election din ut ziaka mi 2/3 bawlkhiat hilou in party kumlui, detdou leh principle hoihtak nei hi’n gen hi. Nam kal hihbuai thei ding thute Congress party-te’n gen hetlouh ding chikawmin  Congress in kuamah khentuam neilou in khantouhna akibang a semsuah hi’n gen hi. Manipur a phaizang area sangin singtanggam ah development nasepna adi’n govt in sum tam zangzaw hi’n gen a, development thil ah govt in phaijang leh singtanggam  khentuamlou hi’n gen hi. O.Ibobi in kum hiaitan hon makaih in development tamtak hon sepkhiat pih a, maban a development tamsem hong omtheihna ding in pan kilalel chi’n gen hi. India thak bawlkhiatna dingin kuapeuh in panla a, mipi’n Inner & Outer Manipur a Congress I candidate-te  vote chiat dingin ngen hi.
      Health Minister Phungzathang Tonsing in a genna ah party khenkhat election ding kuankia in kithei lel a, hileleng Congress party bel huai tawh kibanglou in hoihtaka paitou hi’n gen hi. CCpur dist ah Congress party apan MLA 6 leh MDC apan 20 val om a, MDC te’n amau bial chiat ah nasep panpah ding uh hi’n gen hi. CCpur dist ah voter 1.7 lakh val omlak ah 90% val Congress in amuhna dingin  kuapeuh in panla chiat din ngen hi. Kum 10 paisa tawh teh in Manipur ah law & order hoih mahmahta  a, development work leng tamtak kisemkhia in khanthouhna thupitak om chi’n gen hi. Tipaimukh road ah Army check post 7 omte ah Army te’n Traffic Police-te mah bang in gate teng ah gari taituah teng check uh a, huai in passenger-te ban ah damlou kipuate naktaka hihbuai ahihman in MP te’n Parliament house ah huai thu gen ding in ngen hi.
      Dr Chaltonlien Amo, Chairman HAC in agenna ah singnou 1 isuan leh kum 5 in piching nailou a, a pichinna dingin kum 10 lut a, Thangso Baite in nasep laklawh tamtak aneihte sepzawhna ding in kum 5 dang mipi’n hun peding in ngen hi. India gam pumpi ah tulel in Narendra Modi wave nasa mahmah a, balloon leng i mutpuak chiangin limit nei a, huai khen a mutbeh hun ah a puahkek bangin election neihzawh hunhun in Narendra Modi leng balloon mutkek mah bangding hi’n gen hi. Inner leh Outer a Congress candidate-te lawhchinna din mipite’n Congress vote chiat dingin ngen hi.
      Thangso Baite in a genna ah Congress in mipi adia na asepkhiak te mipi in  a mangngilhlouh deihthu gen a, Central ah Congress in vaihawmna a letlouh hun in Manipur ah leng Congress hiloute’n vaihawmna len uh a, govt employee te’n kha 5/6 khalawh latheilou in mipi buaizak chi’n gen hi. Central ah Congress in vaihawmna honglet hun apan tunitan in Manipur a govt employee te’n ahunhun in lawh lathei hi’n gen a, maban ah leng central ah Congress in vaihawmna a letzom theihna dingin  mipi’n Inner leh Outer a Congress I candidate-te vote chiat dingin ngen hi.

AAP ading Flag Hoisting ceremony
Lamka, March-28: Outer Manipur Lok Sabha seat a Aam Aadmi Party(AAP) candidate Khamchinpau Zou @ K. Zou adia election campaign patna  ding in March 29, 2014 sunnung dak 1.00 in Zouveng, Zenhang Lamka ah flag hoisting ceremony om ding hi. Huai ah Chief Guest in Th.Manihar,Co-ordinator,AAP Manipur Unit pang ding a,a,aman campaign patna dingin hong ding hi. Huai hun ah Functional President in  H. Goswami,Campaigner AAP Manipur Unit pang ding hi.

Election ah gari 81 val zat hiding
Lamka, March-28: Dist Transport Officer leh Police-te pangkhawm in 16-Lok Sabha election 2014 hun ah  CCpur Dist ah gari 81 zat dingin requisition form piakkhiak hi’n kigen hi. Zan in gari 50 adin  requisition form pekhia uh a, tuni’n 31 pekhia uhi.Election hun a zattheih ding Gari 81 neite’n  RC book leng DTO a submit ding leh a driver ki-report dingin theihsak hi uhi.

Accident ziakin mi 6 liam
Lamka, Mar-28: Tuni zing dak 6.30 in Damkam Bazar ah Diesel Auto in Hauzen (60) m/o Zamminthang of Elim Veng, New Lamka  phukha in  a veilam kheguh kitan hi. Driver in a gendan in lampi nal luat ziakin kitaal a, brake kham zoulou in mehzuak ding pua a pailai phukha hi’n gen hi. Huailou in Nemneiching (1) d/o Paominlen of Vajing tuzing dak  7.30 in tuisa in  buakliam kha hi. Lhingngaihdei (1) d/o Paominthang of Tuinom tuni nitaklam dak 3.00 in singpi dia kisuang tuisa   in a awm leh khut buakliam a, Siamsuanmang (16) s/o Dongzahau of Vengnuam, New Lamka tuni nitaklam dak 4.00 in petrol kuangzak in  akhe langnih kangliam hi. Hausuanlian (1) s/o Thuampi of Bungmual tuzing dak 7.30 in feet 7 vel a sang inn-katau ah kia a, Biakthang (26) s/o (late) Thualzakhup of Gocinkhup Veng, bike a tailai Hmuia Veng ah car a pelhdek leh kipuk in amai liam a, amaute hospital ah admit hi uhi.

Tedim ah bomb puak
Lamka, Mar-28: Tedim town, Chin state a Chin National Front(CNF) liaison office kong ah zan nitak dak 8.30 in time-bomb khat puakzak a,  CNF office bang(wall) leh  tawhlet (window) kise mahleh mihing  aliam bel omlou hi. Nationwide census tawh kisai a nam khenkhat  kalah ngaihdan kibanglou om ziakin huai tawh kisai hiding a,gintak hi a, Police  leh intelligence teamte’n thiltung suizui lel uh chihthu kiza hi. Tedim a  Chin National Front Liaison office leng kum  2012 in dalna tuamtuam kala honkhiak hi’n kigen hi.

NCP candidate adia  Info  Centre
Lamka, March-28: Tedim Road a Adam & Eve dukan kianga Robert’ building  ah tuni sunnung dak 1:00 in L. Kaikam,Election Chief Agent in NCP candidate C.Doungel adia CCpur, Singngat & Thanlon Election Committee Information centre ding hongkhia a, Pastor Genlal Vaiphei in thumna in lan hi. L.Kaikam in a genna ah C.Doungel mi chitak, politician kumlui, na sem thei, sum-le-pai a minselou banah a tate IPS officer 2 om a, khawsakna background hoihtak nei hi’n gen hi. Lok Sabha election ah C.Doungel telching hileh Manipur a singtangmite adin khantouhna din tamtak semkhe ding hi a genkawm in kuapeuh in  amah vote chiat dingin ngen hi.

RMHS ah teachers training
Lamka, March-28: Rostard Memorial H/S Managing Board saina in tuni in huai school a teacher-te’ adingin   ‘One Day Teachers Training’  om a, Rev Lalbiaknunga, Board member in training hong hi. Huai ah Madam Hoihbetty leh Dr Pauchungnung te’n sinsak uh a, Rev R.Lalrinsanga, Board member in thumna in training hunkhak  hi.

CHV-te adi’n training kipan
Lamka, March-28: CMO’ Conference Hall ah tuni in Caritas India/DSSS Imphal leh Global Fund to Fight AIDS, TB & Malaria (GFATMR-9) saina in Intensified Malaria Control Project-II tungtawn in Community Health Volunteers Refreshers Training om a, H.L Khai, Male Health Superviser in  training hong hi. Aman a genna ah  lawhchinna ding leh  thil i zil te uh theihna din Pathian phawk poimawh a, Pathian lou in bangmah lawhchinna omlou hi’n gen hi. Training sungin Thangthianmuan, MTS/DPO, DVBDCP; H.L Khai, MHS; K.Jacob Panmei, DPO, DPMU/Imphal leh S.Zamkhanpau, DPMU/Imphal te’n sinsak uh a, March 29, tan sunzom ding uhi.

ZRF/UPF in hilhchetna thusuah
Lamka, March-28:PS Hangshing, C-in-C leh Cliff Zomi, Info & Publicity,ZRF/UPF in  Josh Guite,KNO/ZRF in March 27 a a thusuah hilhchetna bawl uh a,ZRF kichi kum 2005 akipan KNO armed wing a om himahleh gam-le-nam khualna in Dec 05, 2012 in New Delhi ah MHA tawh kihouna kichiantak  neih tawh kiton in tuni tan in UPF ah active member a omtou den  hi’n taklang uhi. ZRF orgn kichi SoO group atel  himahleh Songlianlal Hangsing @ Lalpu,ZRF a C-in-C gentaklouh  cadre list ah leng govt approved list enrolment a tellou hi’n taklang uh a,2005-2014 tan ah ZRF signatory PH Hangshing,C-in-C mah hitouden hi’n leng taklang uhi.  
     ZRF min zanga sum-le-pai zong in mipi subuai  uh chih leng za in poisa uh hi’n thusuak ah taklang uh a,tuban ZRF pawlpi min a dankalh a gamtang a om nawn leh ZRF in ngaidamlou ding chi’n taklang uhi.Sukbuai khaka om mipite kiangah ZRF sik in PS Hangshing,C-in-C, ZRF/UPF in ngaihdam ngen hi’n  taklang uhi.UPF hi’n KNO hitaleh nam pumpi in lam-etna liantak tawh bildawh gige ahihdan theikawm in unau khat le khat sutuahtu a panglou in lemna zong zaw dingin thusuak ah ngetna bawl uhi.

SUUNNA
Donzachiin (69) w/o T.Thangkhothawn of Dorcas road, New Lamka tuni zinglam dak 10:30 in kalna ziakin si a, tuni mah in YPA Hanmual, New Lamka ah kivui hi.
S Ginzakhawl d/o ((late) S. Chinkhogin tulela New Delhi a om March 27, 2014 zing dak 2.00 in RML Hospital ah si a, Dwarka a South West Delhi Christian Cemetry ah zan in kivui hi.
ECI Observer te’n  training enkhia    
Imphal, March-28 : Inner Manipur Lok Sabha seat adia Election Commission of India(ECI) in a guan General Observer Chandra Bhanu,IAS;  DP Yadav,IAS lehg Police Observer  Ashok Kumar Das, IPS in tuni’n  Bishnupur district a Polling Station 215 a duty ding   Polling Personnel training-te enkhia uhi. Polling personnel te’n Kiyamba Sanglen, SDO Office leh Awang Govt. Primary School ah training uh a, huai ah Presiding Officer 339, Polling Officer 325 leh  Polling Officer-I 325 vel training ah tel uhi.

Dakkal 12 sung Manipur bandh puang 
Imphal, March-28 : All Tribal Chiefs Forum, Manipur (ATCFM) pawlin March 24 in Hotel Imphal ah meeting nei uh a, Lok Sabha election om ding ah  Outer leh Inner a Congress candidate- te support lou dinga thukimna bawl kawm in state govt a demand 9 a neihte uh pichin ahih keileh April 3, 2014 in Manipur pumpi dakkal 12 sung bandh hiding in gen uhi. ATCFM pawlin state govt kiangah MGNREGS tawh kisai a job card tungtawn a ni tha bukim a piakkhiak ding, govt in Act tawh kiton District Council a financial power piak ding chihte tel hi.

Outer Manipur bial ah campaign  
Imphal, March-27: Outer Manipur Lok Sabha bial a candidate te’n tulaiin election campaign kisan mahmah uh a, Ms Kim Gangte,ex-MP(Trinamool Congress) in tuni’n Meitei Langol ah campaign patna dingin flag hoisting programme zangkawm in campaign meeing ah thugen hi.Thangso Baite(Congress) adia campaign patna dingin Hmar veng(Lamka) ah flag hoisting programme om a, Chief Minister O. Ibobi in campaign patna dingin flag-off hi. Huailou in Prof Gangmumei Kamei(BJP) in tuni’n Jiribam a election campaign meeting ah thugen hi.

EVM zatdan ding training  om  
Imphal, March-28 : Manipur phaijang bial ah April 17, 2014 a  Lok Sabha election om ding tawh kisai in tuni’n Lamphelpat a DC/Imphal West  office Conference Hall ah Electronic Voting Maching (EVM) zatdan kisinsakna(training)  om hi. Huai hun ah Lok Sabha Election chiang a Presiding Officer leh Polling Officer a pang dingte’n training nei uhi.

30-A/R ten helpawl 2 mankhia
Imphal, March-28 : 30-Assam Rifles te’n tuni’n  Sagolband bazar lak akipan  PREPAK  cadre 2 mankhia uhi. Matkhiak a omte  W. Suresh @ Protaji (42) s/o Somendro of Wahengbam Leikai leh Y. Helendro @ Dhiren (45) s/o (late) Ibochouba of Sagolband hi uhi. Assam Rifles te’n amau akipan in  9mm pistol 1 leh atang 5 banah demand letter leng mukhia uhi. Huailou in a  gari zat uh Honda Active (No. MN01-7744) leng mukhia uh a, amaute thudotna akipan in 2-wheeler 2 leng mukhia uh chih ahi hi.

DD leh AIR ah campaign ding    
Imphal, March-27: Lok Sabha election tawh kisai in Manipur a recognised National political party leh state level political party tuamtuam in Doordarshan leh All India Radio tungtawn in campaign bawl ding uhi. Election deptt thusuak in a gendan in April 1, 2014 in DD/AIR tungtawn a campaign kipan ding a, huai dingin tuni’n  Chief Electorcal Officer(CEO), Manipur makaihna in lottery draw om hi.Tunung sawtlou in party tuamtuam in campaign a thu a genni ding uleh ahun ding bikhiah hiding chihthu om hi.   

NAB te’n ganja hunkhop mukhia   
Imphal, March-27: Supdt of Police/NAB makaihna in NAB a sem police teamte’n Imphal East district sunga om Yaingangpokpi bazaar a Market shed kiang ah Auto rickshaw(No. MN OIRI-5843) akipan in ganja kg. 200 mukhia uh a,ganja pua  ChandamAmarjeet Singh @ Ten (30) S/o Manimohan Singh of Saijang Makha Leikai lwh Regent Tangkhul @ Rajen (52) Sio (late) AkhapTangkhul of Tuinem Village, Ukhrul District leng mankhia uh a, amau akipan mobile phone handset 1, RC Book 1 leh Auto Rickshaw 1 mukhia uh chi’n Police deptt a PRO thusuak in gen hi.

Tuni’n ‘Siege of Imphal’ zatna  om  
Imphal, March-27: Manipur Tourism Forum leh  2nd World War Imphal Campaign Foundation kigawm a saina in tuni’n Kangpokpi ah World War II hunlai a Imperial Japanese Army te’n Imphal lak a sawm hunlai uh “Battle of Imphal (WWII)”kichi anniversary zatna om hi.Tuni a thugen tamzaw in a genna uah Imperial Japanese Army a 15th division te’n Imphal-Kohima kikawmna lamlian Kangpokpi ah khaktan uh a, huaiziakin tuni;n Kangpokpi mun a  anniversary zat ahih amun tawh kituak mahmah hi’n gen uhi. Imphal-Kohima kikawmna khaktan ahih ziakin Imphal phaijang leh akimlaka Allied force omte Japanese army te’n umkual uh a,huai in kha 3 sung daih hi’n gen uhi. Tuni a function zatna ah  World War-II tawh kisai lemlak tuamtuam lahna(photo exhibition) leng om hi.  .

Combined team in galvan mukhia  
Imphal, March-28 :Thoubal Police Commando leh  22-Assam Rifles kithuah combined teamten tuni zingsang  baihtakin Kakching PS huamsung munkhat ah galvan  kiselgu om chihthu azak ziak un  operation bawl uh a, Kakching leh Hianglam kikal munkhat ah galvan kiselgu tamtak mukhia uhi. Galvan muhkhiakte bel, AK-56 rifles 1 leh atang 55, M-16 rifles 1 leh atang 12, lethod gun 1, SLR tang 107, detonator 4, RDK packet 9, gelatin 46 leh I-Com radio set 1 ahi hi. Huai ah kuamah  matkhiak omlou chih hi.

Transfer & Posting      
1.Konsam Binku, MFS, Treasury Officer/ Imphal as Treasury Officer/ Lamphel.
2.Ms Pangambam Mary Devi, MFS, Assistant Treasury Officer/ Imphal as incharge Treasury Officer/ Imphal