Lok Sabha seat 2 ah Congress a ching ding-O. Ibobi,CM
Outer Manipur adin 7 in nomination file
Imphal, March-21: Outer Manipur Lok Sabha constituency ah April 9, 2014 a election om dinga candidate dingin tuni tanin mi 7 in nomination paper file uhi. Outer Manipur Lok Sabha biala MP hilel lai Thangso Baite(Congress) in tuni’n Outer Manipur biala Returning Officer T. Ranjit Singh,DC/Thoubal office ah nomination paper file hi. Lien Gangte(Janata Dal United) leh Sosho Lorho(Naga People’s Front) in leng tuni mah in nomination paper file uhi. Zan in C.Doungel(NCP) leh Ms Kim Gangte(AITC) in nomination paper filed uh a, Mani Chrenamei(Independent) Prof Gangmumei Kamei(BJP) in zanhal in nomination paper filed khin uhi. Chief Minister O. Ibobi in a genna ah Manipur a Lok Sabha seat 2 ah Congress candidate 2te ching ding hi’n gen hi.

Thangso Baite,MP(Lok Sabha) in tuni’n Outer Manipur seat adia nomination a file hun ah Chief Minister O. Ibobi, MPCC President banah Dy Chief Minister Gaikhangam, Inner Manipur bial apan MP(Lok Sabha) Dr Th. Meinya, Education Minister M. Okendro, RD & PR Minister Francis Ngajokpa, Hills Area Committee Chairman Dr Chaltonlien Amo, MLA Victor Keishing leh MLA T. Manga Vaiphei in zui uhi. Francis Ngajokpa, M Okendro, Dr ChaltonlienAmo leh Victor Keishing in atuam chiat in Thangso Baite adin nomination paper filed uhi. Outer Manipur biala candidate nuamte adingin March 22, 2014 tan nomination file theih hiding hi.

Tuni’n Congress candidate adia nomination file khit in Chief Minister O. Ibobi in Outer Manipur Lok Sabha leh Inner Manipur Lok Sabha bial apan Congress candidate tuak lawhching ding hi’n gen a,Congress candidate 2te bana vote mutam ding candidate genchian theikei mahleh Congress candidate 2 bel ching ding uh hi a thei hi’n gen hi.Outer Manipur Lok Sabha bial adia candidate nuamte ading nomination paper file theih hilai ahihman in candidate bangzah om ding hiam chih bel theilou hi’n gen hi.

Chief Minister in reporter-te’ dotna a dawnna ah Manipur a muanna leh bitna(laws & order) dinmun a hoih phot leh Armed Forces Spl Powers Act(AFSPA) lakkhiak ding tawh kisai automatic in process pai ding hi’n gen a, Manipur State Congress Party(MSCP) pawl Congress a lut(merged) uhiam chih dotna a dawnna ah tu dinmun ah huchibang omlou hi’n gen a, tuning in thil omdan kichian thei pan phet ding chi’n gen hi.Thusuak dang khat kizadan in MSCP a MLA pawlin Congress zop ut mahle uh MSCP party makaite’n MSCP pen party danga belh tuanlou in a ngeina banga a om deihthu gen uhi.

Sitting MP banah tutunga Congress candidate Thangso Baite in a gendan in term beipah ding Lok Sabha hun a a nasep sutzop tuak tamtak omlai ziaka candidate ding hi’n gen hi. Tutung a Lok Sabha election ding ah Congress msakaihna UPA govt mah in vaihawmna len touzel lai ding in lam-et thu gen hi.

Flying Squard-te’n tuni’n gari hunkhop check uh
Lamka, March-21: Election Commission of India apan thupiak dungzui in CCpur district sunga a Lok Sabha Election om ding tawh kisai in voter-te sum a leikhiat ding sawma panla om theite dalna ding ngimna in Statistic Surveillance Team/Flying Squard(SST/FS) te’n chiklaipeuh in VIP/Political Person ban ah gari muanmawh huaite check thei gige uh chih ahih dungzui in tuni sunnung in leng Tuibuong Peace Ground ah SDC 1 makaih in Statistic Surveillance Team/Flying Squard te’ leh Police kithuah in gari hunkhop check uhi. Maban ah leng puankholh selou in Tuibuong Peace Ground, Lanva, Rengkai leh Kangvai khua ah check bawl zel ding uh hi’n kigen hi. Statistic Surveillance Team/Flying Squard te’n Police tawh pangkhawm in gari hunkhop a check-na uah sum (in cash) Rs.10 lakh pua contractor/businessmen matkhiak a om leh Nodal Officer, Income Taxt deptt ah theisak ding uh a, political party khatpeuh in election campaign material telin Rs.50,000/- nuailam apuak uh leh matkhiak hilou ding uh a, hileleng voter-te leikhiatna ding a mipi laka sum hawmkhiat ding chi a report a omleh Rs. 50,000/- sanga tawmzaw hileleng Statistic Surveillance Team/Flying Squard te’n matsak(seize) thei ding uhi.SST/FS te’n tuni’n Tuibuang Peace Ground kiang ah gari tamtak khawlsak in check mahle uh Gari a sum tampua matkhika omlou hidan in thutut kingah hi.
&&&&&&&&&&&&&&&&&&&&&&&&&&&&&&&&
LOCAL NEWS
Lamka ah SBI ATM 15 om ding
Lamka, Mar-21: N.Lhungdim,ex- IRS, Commissuioner of Income Tax(retd) (Retd) in tuni nitaklam dak 4.30 in SBI/CCpur Branch a kikoih thak ATM Booth 2 hongkhia hi. Tuni’n ATM booth 2 honkhiakte banah a omsa 2 tawh kigawm in SBI/CCpur Branch ah tuni apan ATM Booth 4 zat in om hi. Tulelin khawpi sunga 4 omte tawh sim in tunung sawtlou in Lamka khawpi sungah SBI ATM kigawm 15 pha ding hi. S. Kaikhanthang Ngaihte, Chief Manager, SBI/Ccpur in huai huna agenna ah tuni a 2 kihongkhiate Lamka adia a 5na leh 6na hi a, Ccpur Branch ah ATM 4 omta hi’n gen hi. Tuibuong leh STC/BSF ah leng 1 tuak om a, April 2014 vel a honkhiak theih dingin Lailam Veng ah 1, Hebron Veng a Dorcas Hall ah 1, Chapellane ah 1, Rengkai ah 1, New Bazar ah 2, Tuibuong Bazar ah 1, Light House ah 1 leh Old Bazar ah 1 hiding chi hi.

Paver machine zang in lampi bawl hiding
Lamka, March-21: North East Trading Corpn apan contractor Rajeshore in March 8, 2014 akipan in Lamka Police Station kong (zero point) apan Lanva lei (bridge) tan Tedim Road lampi bawl hoihna din repairing leh leveling nasep zouta a, tuni zinglam dak 9:00 akipan Lamka Police Station kong (zero point) apan nasep panding in ‘Paver machine’ 1, Road roller 2 om mahleh Tronglaobi a leingoi, suanghum leh alkatala mixed hongtun theihlouh ziakin nasep kipantheilou in nitaklam dak 5:00 in khawlsan phot uhi. March 22, 2014 in Tronglaobi apan lampi bawlna a zat dingte hongtun leh ‘Paver machine’ zangin Tedim Road bawl pan ding uh hi’n kigen hi.

BJP candidate in Lamka hongpha
Lamka, March-21: Outer Manipur Lok Sabha biala BJP candidate Prof. Gangmumei Kamei in tuni’n Lamka hongpha a, Tuibuong a M.Chungsei tenna inn ah BJP makai tuamtuamte tawh maban a panlakdan ding genkhawm uhi. Huai hun ah T.Hangkhanpau, Vice President BJP Manipur Pradesh i/c CCpur dist banah BJP makai hunkhop tel uhi.

Henglep-Tuibuong lampi bawlna pailel
Lamka, Mar-21: SEDO panlakna nuai ah Henglep akipan Tuibuong kizopna ding lampi kibawl ah nasepna paizel a, Henglep mipite leh Lamka area banah mun tuamtuam a phatuam ngaite’n sum a thawhkhawm uh zangin lampi bawl sunzom uhi. Mipite banah khaw hausate, MDC leh elected representative tuamtuam pangkhawm a, nasepna ah Koite akipan D. Vaison tan lampi Black topping zouta uh a, D.Vaison apan Hengjang manawh in JCB 2 leh Bulldozer 1 zangin nasep sunzom uhi.

Mi 41 election duty zoulou ding
Lamka, March-21: Zan in CMO office ah Medical Board member te’n April 9,2014 a Lok Sabha election om ding ah govt nasem damlou a duty theilou ding chi a kingetna pia mi 51 enchian uh a, mi 41 te duty dingin a damtheihna un a chitlouh (unfit) ziakin election duty loudin recommend uh a, hileleng mi 6te bel l Board member-te’n election duty zouding hi’n suikhia .

Electric post khat suankhia uh
Lamka, March-21: CCpur Division/Electricity deptt a semte’n Tedim Road-Nehru Marg junction a electric khuam(post) in lamlian a naihluat ziakin zan in lamlian nawllam deuh ah suankhia uh a, huai ah tuni tan leng nasep sunzom lai uhi. Deptt in huai mun laka om electric post dang 2 leng lamlian nawl deuh ah suankhia uh hi’n kigen hi.

ZFC Autumn 2nd Lucky Draw
Lamka, March-21: Zomi Football Club (ZFC) te’n panpihna dia a bawl uh ‘ZFC Autumn Lucky Draw’ kichi March 22, 2014 sunnung dak 1:00 in YPA Hall, New Lamka ah 2nd Lucky draw om ding hi. 2nd Lucky draw ah 5 lucky prize omding a, kipahman in Discovery bike-1; Washing Machine -1; Steel Almirah -1; Woofer set -1 leh Dinner set hiding hi.

Lam lai ah niin tamtak kipai
Lamka, March-21: Thangzam Road a CCpur Cinema Hall sak apan gamlalou Cine View Restaurant apan New Bazar sazuakna a lutpheina lampi lai ah n niin tamtak kipaikhawm a, huaite akim a bazar a tute adin damtheih huailou a, huai kim leh kiang a paivelte ading in leng lampi laitak a ninn tamtak kipai - polythine, zu bottle tela kipaikhawmte mit sip-huai mahmah hi’n kigen hi.

1st Hill Dist Premier League kisuan
Lamka, March-21: Hill District Sports Assn, Manipur (HIDSAM) saina in Lamka Public Ground ah March 24-29, 2014 sung ‘1st Hill District Premier League 2014’ om ding chih himahleh Lok Sabha Election ding ziakin Election Code of Conduct banah lemtanlouhna khenkhat ziakin April 21-26, 2014 sung a om din ahun suan uhi. .

ASHA Day leh HBNC training
Lamka, March-21: Singngat Community Hall ah March 22, 2014 zinglam dak 10:30 in Singngat block a ASHA te’n ASHA Day-cum- HBNC (Home Based Newborn Care) training kithuah neiding uh a, Singngat block nuai a ASHA member teng telding in Block Health Program Manager in theisak hi.

Mizoram Synod Choir- te’n uap; CKKP khawmpi kipan

Lamka, March-21: Mizoram Presbyterian Church Synod (MPCS), Manipur Area nuai a Central Kristian Khanglai Pawl (CKKP) General Conference 8veina tuni nitak in MPCS Church, New Lamka ah kipan a, March 23, 2014 tan om ding hi.Khawmpi sungin “Lal Jesu tawh” chih thupi a zang in Rev. Lalbiaknia, Adm Secy. Manipur Area; Rev. S Khaikholam, Co-ordinator, Manipur area te’n thugen ding uhi. Khawmpi uap dingin Mizoram apan in Mizoram Synod Choir- te’ tuni in Lamka hongtung ua, amau khawmpi sung in phatna lapawl sa ding uhi. Thugen ngaihkhiakna banah lapawl competition leh Variety Programme ah solo, duet, Trio, Drama leh adangdang leng om ding hi.

SUUNNA
M. Paulianmang @ Manga of Sugnu Lamhang tuzing dak 10.00 velin sinna ziakin si a, tuni in Sugnu ah kivui hi.

&&&&&&&&&&&&&&&&&&&&&&&&&&&&&&&&

IMPHAL NEWS
Inner bial ah mi 1 in nomination file
Imphal, March-20: Inner Manipur Lok Sabha Constituency a election ding tawh kisai in March 19, 2014 in Notification suak mahleh zan tan in candidate ding q nomination file omlou uh a, tuni in MDPF ticket a candidate dingin Dr. Gurumayum Tonsana Sharma in nomination paper file hi. Inner Manipur bial ah April 17, 2014 in election om ding a, huai a candidate nuamte ading in March 26, 2014 tan nomination paper file theih ding hi.

Battle of Imphal anniversary
Imphal, March-21: Manipur Tourism Forum leh 2nd World War Imphal Campaign Foundation in Manipur govt apan huhna zang in March 23, 2014 in Palace gate kianga MFDC Auditorium ah ‘70th anniversary of Battle of Imphal’ kichi zang ding uhi. Huai ah Guest of Honour in India a hong om Japan Ambassador Takeshi Yagi pang ding a, aman huai hun uap dingin March 22, 2014 in Imphal hongtung ding chihthu om hi. ‘70th anniversary of Battle of Imphal’kichi bel Kidoupi 2na(2nd World War) hunlai a Japanese Imperial Army leh British-India sepaihte Imphal opkhawm ding kituh a kihouna thupitak om kuim 70 chin zatna hun hiding hi’n kigen hi. Huai ah Japan akipan media teamte leng hongtel ding uh chih ahi hi.

Handgrenades 5 mukhia uh
Imphal, March-21: Imphal Police Station huamsung a om Dr. Nameirakpam Dwijamani of Uripok Yambem Leikai tenna inn ah zan zingsang in handgrenade 5 muhkhiak in om hi. Huai handgrenade-te bel a innvengpa uh Yambem Chaoba in polythene bag vom a kikoih a muhkhiak hi a, Imphal Police te’n huai thu a theih phet un valakhia in muntuam ah hihsia Bomb kikoih mawhpaihna in Uripok Yambem Leikai mipite’n tuni in public meeting nei uh a, handgrenade koihte mawhpaihthu taklang kawmin kipuang dingin phut uhi. Huai bomb muhkhiak hun in Yambem Leikai miten Yaosang tawh kisai a sports a neih laitak uh hi a, huai leng khawlsak pah uhi.

Admit card diklou hawmkhia om
Imphal, March-21: Central Board of Secondary Education (CBSE) saina in tuma a Class XII examna ah Ghari MakhaLeikai a om Ram Krishna Higher Secondary School thuneite’n student 86 adin admit card diklou(fake) pia uh hi a puangkawm in Manipur Students’ Federation(MSF) pawlin tuni sun dak 12:00 in huai school a furniture hunkhop leh building hihsia in school leng hunchiam omlou din khjak(banned) uh hi’n kigen hi.
CBSE saina a Class XII examna ah Ram Krishna Hr Sec School a student 237 vel Canchipur a Little Rose Higher Secondary School ah exam uh a, himahleh examna sai official te’n candidate 86-te’ attendance a laklouh ban uah invigilator te’n leng ngaihsaklou uh hi’n kigen hi. MSF pawlin internet tungtawn in Roll No. kipiate a check ua leh state danga candidate-te’ roll no. hi’n theikhia uhi. Huai thu ah MSF pawlin Ram Krishna Hr Sec School
thuneite muhsawm mahle uh mu theilou uh a,anung in thangpai in school furniture hunkhop leh building hihse zek uh hi’n kigen hi.

Delhi zinna lawhching in hongtung
Imphal,March-21: Miss Sougaijam Bidyalakshmi Leima of Jiribam in Northeast India mite Delhi leh khawpi tuamtuam a soisak mawhpaih latsakna kawmin March 7-16, 2014 sung Delhi khawpi ah cycle a tai kimvel in Northeast mite deidanna beisakna ding campaign a bawl zousiang in Imphal hong tungkik nawn chihthu om hi. Amah Delhi a a om sungin mun tamtak a public meeting ah thugen a, mi pomsawh tuamtuam tamtak leng a muh banah civil organization tuamtuam hunkhop leng kithuzakpih hi’n kigen hi.Aman Delhi University Park, Undergraduate Hostel, Delhi University, GTB Nagar Metro Station, Gyara Murti, Raj Ghat, Red Fort, Zakir Hussain College, Delhi Metro Station, New Delhi Railway Station, Old Delhi Railway station, SP Marg, Manipur Bhawan, JN University leh Delhi khawpi sunga lamlian poimawh deihte phasuak in a thiltup tangkoupih hi’n kigen hi. .

A/C No. submit dingin theisak
Imphal, March-21: Director of Education(S) in SSA nuai a Upper Primary Teachers thak 78 leh Lower Primary Teachers 287 te’n a lawh uh electronic transfer bawl theihna ding in March 22, 2014 tan in akisaipih ZEO/DI of Schools kiang ah a bank account number chiat uh submit ding in theisak hi. Director of Education(S) thusuak in a gendan in Lamphel a om Directorate office a sem teacher te’n leng a bank account number chiat uh Senior Research Officer/ DDO (Valley) kiang ah March 22, 2014 tana submit ding in theisak hi. Teacher te’n bank account/pass book a front page leng Xerox copy lakhia in huai submit khawm ding in theihsak hi uhi. Thuchian kimzaw department’s website www.manipureducation.gov.in. ah muhtheih ding chih ahi hi.