Tuni nitakin pasal 2 vuakliam in om
Lamka, Mar-27: Tunitak dak 7.00 velin Old Bazar a Tedim Road nawl a Pandit Hotel kong ah tuni nitak dak 7.00 velin pasal mi 7 velin mi 2 vawliam uh a, Thangboi (23) s/o K. Thiantinlam of Old Bazar leh alawmpa Liankhansiam (25) s/o T. Paupi of Zouveng tulel a Police Quarter khanga teng vuakliam in om uh chihthu om hi. Mi 2te khaw phawklou in hospital puaktung nungin admit in om a, huchi’n awlin khua phawk uh hi’n kigen hi. Mi 2te’n thiltung a gendan un Hotel a aktui nei dinga kisalai a sak uah kisual om mu in va phelh sawm in delh uh a, huchihlai in pasal 7 velin amau gel kivuak huan uhi. Mi vawtute’n 9mm Pistol zangin a lu uh khetliamsak uh hi’n gen uh a, sisan tamtak luang hi’n leng gen uhi.
Mi 2-te’ a lut(head) uleh a nungzang uh banah mun tuamtuam liam hi’n kigen hi. Police station apan naichik a thiltung ahihna ah Police te’n leng delhpah uh a, mi vawtute Pulsar Bike a taikhe deklai khamkhawl in, mi 2 mankha uh a, midangte bel kham zoulou in taisuak uhi. Thiltung a suizui nung un mi 4 vel matbeh uh a, Lock-up ah koih uhi. Police apan kizadan in mi vawtute ahihleh Motion Album shooting zou hi uh a, amau lakah leng aliam om uh hi’n gen uhi.
Loan Recovery Camp-2014 om
Lamka, March 27: Manipur State Co-operative Bank (MSCB) Ltd/ CCpur Branch saina in
tuni in Hmar Veng Community Hall ah ‘Loan Recovery Camp, 2014’ om a,huai ah Chief Guest in Kh. Khamba Singh, President, Board of Management, MSCB Ltd pang a, Functional President in Jangkhongam, President, HAPAM/CCpur pang hi.Chief Guest in Dist dangte tawh tehin CCpur district ah Loan Recovery lawhching mahmah hi’n gen hi.
MSCB Ltd CCpur Branch ah March 21, 2014 tan in sum deposit Rs 235.38 lakh om a, invest zah Rs 200.00 lakh ban ah loan kihawmkhia Rs.1288.02 lakh hi’n gen hi. Loan kihawmkhia lakah agriculture sector ah Rs 533.07 lakh, Industries ah Rs 667.48 lakh, transport ah Rs 23.10 lakh, L.T others ah Rs 16.95 lakh, MT others ah Rs 3.15 lakh, LT housing ah Rs 15.98 lakh leh others (normal ) ah Rs.28.29 lakh hi’n kigen hi. MSCB Ltd CCpur branch ah tunitan in loan recovery Rs 13 lakh pha a, tuni a Loan Recovery Camp ah Rs 3,04,500/- mukhia uhi.
AAP candidate K.Zou in Lamka hongpha
Lamka, March 27: Outer Manipur biala Aam Aadmi Party(AAP) candidate M.Khamchinpau @ K.Zou in tuni’n Lamka ah Press-te kimuhpih hi. Aman a genna ah Delhi ah Northeast mite’n bawlsiatna thupitak tuak uh a, Police te’n huaia kigolhte bail theih ngen IPC vuah hi’n gen hi.Parliament Member(MP) te mipi vengbit ting hi uh a, kum 70 tunglam te’n a poimawh hun in Police Station leh Hospital delhzou ding uh hiam? MP din tuailai lamte mah poimawh chi’n gen hi. CCpur dist ah beh-le-phung, pau-le-ham a ikikhen laiteng Politics ah kikhangtou ngeilou ding chi hi. Hills dist laka telkha leng hilou Thoubal dist a DC in Outer Manipur bial adia Returning Officer alet singtangmite adin sautak poiban ahihman in MP ching kei leleng huai issue take-up ding hi’n gen hi. MP telching ahihleh Manipur ah corruption hihbei ding, development scheme-te’ mipi theihding in Newspaper a suahkhiak hidin gen a, huai in corruption awlawla hihbei ding hi’n gen hi.
Central govt in Northeast bial teng hard region a a puanziak in central employee te’n Northeast a hong omkhak chiang un allowance tamtak ngah uh a, Northeast bial mite Delhi leh India gama khawpi tuamtuam phak hun ah lenna tuanman 30% discount hong bawlsak louh uleng panla ding hi’n gen hi. Delhi ah kum 22 sung mipi nasem in om a, MP-te nasep ding tamsak semkha mahleh MP te’n a nasep ding uh thei bunlou uh hi’n gen hi. Delhi ah singtangmi tamtak sepna nei a omte ST quota 7% val hileleng Sheila Dixshit govt in hihbei a, huai in singtangmi tamtak promotion ding hihbei chi’n gen hi. Aman a genbehna ah sum leh apai neiloute leng kuhkal taka a pan uleh Pathian in lawhchinna pia hi’n gen a, maban a MP election ah mipi’n vote chiat din ngen hi.
DC/DEO in AEO in guang
Lamka, March-27: PK Jha,IAS, DC/District Election Officer,CCpur in April 9, 2014 in Outer Manipur Lok Sabha bial CCpur district a election om ding ah Election Expenditure Observer dinga Election Commission of India(ECI) in a guan kithuahpih ding in Assistant Expenditure Observer(AEO) 2 guang hi. Huai dinga guan a om Ms S. Devalata,PGT(Maths), JNV/Tuinom in 55-Tipaimukh A/C, 56-Thanlon A/C leh 57-Henglep A/C enkai ding a,Th. Ajit Singh,TGT(Maths), JNV/Tuinom in 58-CCpur A/C; 59-Saikot A/C leh 60-Singngat A/C enkai ding hi’n DC in order suah hi.
Mawhpaihthu puang uh
Lamka, March-27: Mawnglenphai hanmual ah March 26, 2014 zankimlai in pawlkhat in (late) Dimneiting w/o Rev Kaikhosei Singson leh (late) Soikhotong Singson h/o Mrs Hatzen’ han umna guate phelkhia in (late) Themkhoting w/o(late) Liankhohao Singson’ han tungah mei in haltum uh a,kumlui Nov 2013 in huchibang mah thiltung om hi. Monglenphai V/A, Youth Club leh saptuam om tengin huchibang thilhihte mawhpaihna sangpen puankhum uh a,tunung in kuaman huchibang hih nawnlou ding in theisak uhi.
Biakinn thak honna leh latna
Lamka, March-27: Mata Lambulane khua ah March 28, 2014 zinglam dak 11.00 in KBC No. 9 CCpur bialsung a Mata Lambulane Baptist Church biakinn thak honna om ding hi. Huai ah Rev Tongmang, Canan Veng C/Church, Imphal in biakinn thak hong ding a, Pastor Henjalen Doungel, C/Church, B. Vengnom in Pathian thugen ding hi.
Election tawh kisai training kipan
Lamka, March 27: Outer Manipur Lok Sabha bial ah April 9, 2014 a election om ding tawh kisai in tuni in Presiding Officer leh Polling Officer No. 1&2 te ading in Tuibuong a Dist Training Centre ah training kipan hi. Huai ah Master Traineer 29 ban ah SDO/AERO te’n EVM operate dingdan leh EVM a data khumlut dingdan training pia uh a, April 3, 2014 tan training paitou ding hi.
Evangelistic Conference om ding
Lamka, Mar-27: Evangelical College of Theology(ECT) a Student Fellowship pawlin Nehru Marg a College campus ah March 29-30, 2014 sung zing dak 10.00 akipan nitaklam dak 3.00 tan Nepali, Hindu leh nam tuamtuamte adingin Evangelistic Conference sai ding uh a, huai a tel nuam peuhmah chial uhi. Conference sungin Punjab akipan Pastor Pt. Sumit Joshi in Pathian thugen ding a, Vaigam leh college a student lasiam tuamtuam in phatna lasa ding uhi.
CMO in training hong ding
Lamka, March 27: Dr. Thangchinkhup Guite, CMO/CCpur in March 28, 2014 zinglam dak 10:00 in CMO’s Conference Hall ah DSSS/Imphal leh Dist Malaria deptt/CCpur saina a Community Health Volunteers Refreshers Training omding hong ding hi. Training hunsung in Thangthianmuan, MTS/DPO, DVBDCP (Dist Vector Borne Diseases Control Program)/CCpur; H.L Khai, MHS; K.Jacob Panmei, DPO, DPMU/Imphal leh S.Zamkhanpau, DPMU/Imphal te’n sinsak ding uh a, March 29, 2014 in zou ding uhi.
CPI (ML) candidate in Press-te mu
Lamka, March 27: Outer Manipur Lok Sabha biala CPI-ML candidate Lamlalmoi @ Momoi Gangte in tuni’n Press-te kimuhpih a, maban a election om ding ah a party uh manifesto pulak hi. Manipur a Non-Naga singtangmi UPF & KNO te’n govt tawh political dialogue a neihding uh tunitan kipanlou a, Lok Sabha election hong omdek leh kigen ging pan hi’n gen hi. Kum 40 val Sadar hills & Jiriban full fledged dist apuan ding tunitan kipuanglou leng panlak hidin gen a, govt job leh law making ah numeite adin 50% reservation omna dia panla ding hi’n gen hi. Party sangin candidate-te poimawhzaw hi’n gen a, MP telching ahihleh mipi tawh semkhawm ding hi a gen in election ah mipi’n vote pechiat din ngen hi.
HSM/MHS te’n training om ding
Lamka, March 27: CMO’s Conference Hall ah March 29, 2014 zinglam dak 11:00 in CMO/CCpur nuai a Health Superviser Microscopist & Male/Female Health Superviser te’n National Vector Borne Diseases Control Program (RDT Bi-Valent, its application & uses) kichi training nei ding uhi. Huai hun ah State Malaria Officer/Imphal staff te’n sinsak ding uhi.
SUUNNA
Lalhluzuala (43) h/o (late) Lalthazuali of Thingkangphai tuni nitak dak 9.00 in District Hospital ah internal bleeding ziakin si a, March 28, 2014 in Thingkangphai hanmual ah kivui ding hi.
Ngaisangkim(29) d/o (late) Khamzathang of Elim Veng, New Lamka tuni nitak dak 8.00 velin sungna ziakin si a, March 28, 2014 in YPA New Lamka hanmual ah kivui ding hi.
Scrutiny ah candidate 8 paisuak
Imphal, Mar-27: Inner Manipur Lok Sabha biala candidate dinga nomination file teng tuni’n scrutiny ah paisuak uh a, Returning Officer K Radhakumar makaih in Lamphelpat a DC/Imphal West office scrutiny om hi. Amaute’ March 29 tan a ki-zukkik a omkei leh Inner Manipur Lok Sabha seat ah mi 8 kituh ding uhi. Candidate 8 laka numei omsun Oinam Indira (Independent) hi a, midangte bel MP hilellai Dr. Th. Meinya(Congress), RK Ranjan( BJP); Dr. M Nara(CPI), S. Manaobi(Trinamool Congress), G. Tonsana( MPDF),Dr Kh Ibomcha(AAP) leh Jotin Oinam(Jai Maha Bharat )hi uhi.
Inner Manipur a Observer hongtung
Imphal, March-27; Inner Manipur Lok Sabha bial adia General Observer dinga Election Commission of India(ECI) in a guan Chandra Bhanu leh DP Yadav banah Police observer Ashok Kumar Das tuni’n Imphal hongtung uh chi’n Inner Manipur Lok Sabha seat adia Returning Officer apang DC/Imphal West akipan thusuak in gen hi.
VDF te’n high ranking official-te guard ding
Imphal, Mar-27: Lok Sabha election ding ziakin department tuamtuam a high ranking official-te vengtu(guard) dingin Village Defence Force (VDF) personnel-te zat hiding uh a, amau Manipur Rifles khekkhe ding uh chih hi. State sunga Central Security personnel omte a tawm ziakun Manipur Rifles te’n amaute thuap ding uh a, election duty dinga VDF zat theihlouh ahihman in official lian deuhte guard in pang ding uhi. Manipur a election enkai dingin Central Security Force company 76 bikhiah om a, state dang apan company 40 hung tel ding uhi.
Th. Chaoba in BJP Manifesto hong
Imphal, March-27: BJP Manipur Pradesh President Th. Chaoba in tuni’n Nityaipat Chuthek a BJP office ah Lok Sabha election a BJP manifesto ding hong kawm in a genna ah
BJP in govt a bawl leh singtangmite’n haksatna a tuahte uh beisakna ding in panlak hiding chi hi.Aman a genzelna ah Manipur ah buaina omte India constituton tawh kituak kihouna leh kilemna bawl in gam leitang humbit teitei poimawh hi’n leng gen hi. Manipur ah tu dinmun in mipite’n tuisiang nek leh dawn ding kiching,electric meivak,lampi hoih leh adangdang poimawh a, huaite BJP in govt a bawlkhiak leh ngaih poimawh masak in nei ding chi’n gen hi.BJP manifesto ah sepkhiak ding point tuamtuam 29 tel hi.
AAO semdin mi 4 kaisang
Imphal, Mar-27: Comptroller and Auditor General(CAG) nuaia All India Subordinate Accounts Service Limited Departmental Exam ah Manipur AG office a Sr. Auditor semlel singtangmi 4 kaisang uh a, Assistant Audit Officer(AAO) sem ding uhi. Amaute bel G Letminlien Kipgen s/o (late) Mangkhosei Kipgen of Kangchup Chingkhong; Haopu Misao of Kulbung, Ccpur; Beiruolthang Sakum s/o Kapkhum Sakum of Rengkai leh Nguljalun Sitlhou s/o Lalsei Sitlhou of Bethel Veng, Motbung hi uhi. Manipur akipan akigawm in mi 6 lawhching uh a, singtangmi 4 leh Meitei 2 lawhching uhi.
Bandh ziakin NH 39 buai
Imphal, March 27: Ibosana thah tawh kisai in Baseruddin @ Shattar of Sora mat ahih lungkimlou a kibawlkhia JAC pawlin dakkal 48 sung bandh abawl ziakun Moreh, Chandel leh Kakching area apan Imphal zuan ding gari tamtak tuni’n buai uh a, gari khenkhat Mayai Lambi ah tai uhi. Zan nitaklam dak 6.00 akipan dakkal 48 sung bandh kipan hi. Thoubal police te’n tualthahna suizui kawm in muanmawh a om Baseruddin @ Shattar pikhia uh chih ahi hi.
CI in MC Mary Kom vau
Imphal, Mar-27: Election Commission of India(ECI) in Congress candidate a gum chih ziakin Boxing Queen MC Mary Kom vau uhi. ECI apan thusuak in a gendan in MC Mary Kom in youtube tungtawn in Congress candidate Ajay Maken gupthu puang a, Election commission of India adia national icon khat ahihna ah Marry Kom in dan palsat chi’n ECI in vau uhi.