Congress candidate ading in Lamka ah campaign om
Lamka, March-31: Outer Manipur Lok Sabha biala Congress candidate Thangso Baite adi’n tuni sunnung dak 1:00 apan in Hiangtam Lamka a YPA Gen HQ Hall ah Election Campaign meeting om a, huai ah Chief Minister O. Ibobi, Deputy Chief Minister Gaikhangam, Minister-te, MLA-te leh MDC hunkhop ban ah makai poimawh tamtak tel uhi. Lalnghet Hmar, President, Dist Congress Committee/CCpur in vaidawnna thugen a, huchi’n Minister leh MLA te’n thugen uhi. Huaikhit in Thangso Baite, MP; Dr.Th.Meinya, MP; Dy CM leh CM in Congress(I) candidate adin campaign bawlin thugen uhi.
Chief Minister in a genna ah kum 2009 a Lok Sabha election ah Congress (I) candidate mi 210 lawhching uh a, MP khat peuhpeuh in Parliament ah thu mawk gen theilou in seniority dungzui in thugentu ding om chi’n gen hi. CCpur district ah mipi’n Congress party adeih ziakin MLA 6 leh MDC 24 telching a om hi’n gen a, MP election ah leng mipi’n Congress party ah hehpihna pia a, Congress ( I) candidate vote chiat dingin ngen hi.
Dy CM in tutung a 16th Lok Sabha election ding hun paisa tawh kibanglou in gam leh nam it party leh itlou party kibeituah dia a omziak in huaisia (crucial) mahmah hi’n gen hi. Mipi’n khantouhna i deihleh Congress (I) candidate vote chiat ni chi’n ngen hi.
Thangso Baite,MP(Lok Sabha) tutunga Congress ticket a candidate nawn in agenna ah Congress party in mipi adia panlakna tuamtuam a neihte mipi’n mangngilhlou ding in ngen a, mimal kuahiam in nasep leh seplouh thu gen mailou in Congress (I) party nasepkhiak te gen zaw dingin ngen hi.
Health Minister Phungzathang in Manipur ah kum 20 val ADC ihmu bang a omlai hihhingtu Congress govt hi’n gen a, party dang banglou in Congress (I) in party manifesto- te 50% val semsuah hi’n gen hi. TN Haokip,MLA & ex-Minister in a genna ah UPA-II in flagship program tungtawn in mipi ading khantouhna tamtak semsuah a, Central ah UPA-III a dinkhiat nawn hunhun in antang mantawm chika leitheihna din Food Security Act leng Manipur ah zat hipah ding chi’n gen hi.
Police in numei raped hi a ngawh pasal 2 mankhia
Lamka, March-31:Police apan kizadan in March 28, 2014 nitakin pasal 2 in numei kum chinglou khat thagum in sual(rape) uh hi a ngawh ziakin Police in mankhia uh a, Junior Magistrate Ist Class court a dinsak nungin Court in April 8, 2014 tan police custody a om dingin remand bawl hi. Thu kizadan in sualluih a om Rosy(name changed) ahihleh kum 17 lela upa hi a, April 28, 2014 in a naunu NIOS exam atel vapi a, akiklam in pasal 2 in thagum in sual uh chih hi. Huai tungtang ah numei innkuante’ n Police station ah FIR pelut uhi.
Police- te’n thil omdan kintaka suizui in mi sualluih a ngawh a om mi 2 -Lalrousang (20) s/o Lalhmuoklien of Saikot leh El-Bethel (20) s/o (late) Gideon of Saikot mankhia uh a, tu in police custody ah omlel uhi.Police te’n numeinu statement leh huai mi 2te statement la uh a, April 1, 2014 in numei nu medical examination neih hiding chihthu kiza hi. Thiltung tawh kisai in Lamka Police te’n FIR No. 46(3) 2014 CCP-PS U/S 365/376/34 IPC & Chapter-II Sec 1-3 (a) (b) POCSA-2012 registered uhi.
ATCFM leh UCC in joint meeting nei
Lamka, March-31: All Tribal Chiefs Forum,Manipur (ATCFM) leh United Chief Committee (UCC) pawlin tuni in Chiengkonpang ah joint meeting nei uh a,huai tawh kisai Lalmalsawm, Spokeperson, ATCFM & UCC apan kizadan in Manipur ah Congress govt in MGNREGS tawh kisai 2013-14 in Job card holder te’n ni 100 sung nasep ding lak ah Financial Year bei tanin state govt in ni 17 sung nasepna kia mipi lak ah pekhia in adang teng nebei uhiam? chi hi. Aman a genbehna ah ATCFM leh UCC in state govt a demand tuamtuam a neihte pichinlouh ziak in April 3, 2014 zingsang dak 6:00 akipan nitak dak 6:00 tan Manipur pumpi dakkal 12 sung total bandh puang hi’n gen hi. Dakkal 12 sung total bandh puan sung in Electricity deptt, Water supply, Medical deptt leh Press/media- te kia khahkol (exempted) hiding in gen hi.
Manipur a Congress govt in singtanggam a hausa (chiefship) hihbeina dingin singtang gam a khua teng ah Village Development Committee phutkhia a, huai kia hilou in kum 2012 in singtanggam a khawthak 165 val govt in recognition bawl in gazetted order leng suahkhin mahleh Manipur CM in cancelled a, huai cancellation order zukkik(revoke) dinga nget himahleh tunitan govt in revoke tuanlou a, Manipur a Congress govt in singtangmite a muhsit ziak in ATCFM leh UCC in Manipur a Congress govt boycott puang hi’n gen hi.
Med Supdt in thupuan bawl
Lamka, March-31: Dr P. Shyamsunder Singh, Med Supdt/Dist Hospital apan thusuak kingah in a taklatdan in OPD registration room a Cash Counter ah tuban OPD ticket,admission ticket leh investigation challan issue hiding a, huailou in Wards, OT, Labour room, laboratories(pathology,biuochemistry,radiology) leh birth & death registration mun ah sum piak leh lak hinawnlou ding a, cash counter dakkal 24 sung kihong ding chi’n taklang hi.
St. Mary H/S Class-XII tan om ding
Lamka, Mar-31: DC/CCpur office akipan gamlalou Semol a St Mary’s High School, Semol ah Higher Secondary omsak dingin Socio-Economic Development Organisation(SEDO) pawlin Tuibuong Catholic Parish Priest ah ngen uh a, St. Mary’s High School Principal Mother Aloishia kiangah leng leng ngen uh a, huai ngetna Bishop in a pomsak ziakin academic session 2015 akipan St. Mary High School ah Class-XII tan omta ding hi’n kigen hi.
STC BSF a thaukap hun behlap
Lamka, March-31: Mission Compound suahlam banah Pearsonmun,Mualkoi leh Gangpimual apan sim-tum(south west)lampang a om thaukapna mun(Firing range) ahSTC BSF a training te’n tuni tan thau leh bomb chi tuamtuam a kap uh April 1, 2014 akipan April 15, 2014 tan sutzop hiding chihthu om a,huai hunsung in firing range ah kuamah valut lou ding leh ganvulh neite’n leng huai area ah khahzan lou ding in DIG, STC/BSF theisak hi.
HWA Gen HQ President din JL Sawmi
Lamka, March-31: Hmar Inpui, Gen HQ makaih in Rengkai Road a HSA campus ah tuni zinglam dak 11:00 in Hmar Women Assn(HWA) Gen HQ ah kum 2014-2017 sung vaipaw ding telna om a, President in J.L Sawmi ching hi. Vice President in Lalrothar of Rengkai; General Secy in Chawngtuozing of Rengkai; Asst Gen Secy in Sharonparmawi of Khawpuibung; Treasurer in Elizabeth of Saikot; Finance Secy in Lalrinpui of Saikot leh Inf Secy in Lalpienghmun of Sielmat tel uhi.Makai thak teng Pastor Lalrohlu in kichiamsak in Pathian kiang ah thumsak hi.
Kalkhat sungin gari 3 kigumang
Lamka, Mar-31: Hiangtam Lamka khawsung kia ah kalkhat sungin two-wheeler 3 kigu hi. March 21 nitakin Tedim Road a UBI kiangah Lalrammawia’ Activa gukmang hi a, March 24 nitakin Ms. Thanghuzam of Tipaimukh Road innkong varandah a kikoih Activa gukmang hi a, huai nitak mahin Tipaimukh Rd bula Dr. Kamkhenthang inn huangsung ah Activa khat gukmang in om hi.
Charenamei supporter-te’ mun ding honnna om
Lamka, Mar-31: Rengkai ah zan nitaklam dak 3.00 in Mani Charenamei, MP candidate(Independent) adia Working Place ZONE- I(Rengkai) kichi Pauzalal Hangshing, Chief Agent in hong hi. Tuni in leng ZONE-II (Zou Colony) leng honkhiak hi a, tunung mun tuamtuam ah leng Zone dang honkhiak hiding chih ahi hi.
Malaria positive 1 mukhia
Lamka, March-31: Dist Malaria deptt te’n March 2014 khasung in damlou mi 522 akipan sisan test uh a, huai lakah malaria positive 1 mukhia in huai pen malaria PV hi’n kigen a, March 2014 khasung in official record ah malaria ziaka si omlou hi.
Ukhrul SP gamtatna mawhpaih
Lamka, March-31: Zanhal March 29, 2014 in Ukhrul Journalist te’ laka member 3 te’ camera Ukhrul SP S Selvan IPS vengtu in Police personnel te’n a suhsak utawh kisai in MHJU in SP leh a nungzuite naktaka mawhpaih ahihdan tunitak in thusuah bawl a, Ukhrul Dist Journalists Assn (UDJA) te’ thuakna MHJU in thuakpih mahmah ahihthu MHJU Secretary in taklang hi.
NCS ah singtangmi 3 lawhching
Lamka, Mar-31: Nagaland Civil Service 2013 final result suakah singtangmi 3 lawhching uh a, amaute Chongpi Hangsing, NCS; Ngulkhojang Sitlhou, NPS leh Mangkholen Hanghal, NPS hi uhi. Nagaland ah kum 2011 in Kuki population tamkhop om hi’n kigen a, Nagaland apan Kuki mite UPSC leh NCS a lawhching mi 14 hita chihthu kiza hi.
GAS NEWS: SaS booking upto Jan.6-Jan 28. Stock 306
Kim Joe upto Dec 10- Jan 5. Stock 306
Nagaland CM in Manipur hongpha
Imphal, March-31: Nagaland Chief Minister Neiphiu Rio in Outer Manipur Lok Sabha bial a Naga People’s Front(NPF) candidate Soso Lorho adia campaign in tuni’n Manipur hongpha hi. Neiphiu Rio tuni zinglam n Kohima akipan Chandel district HQ tung a,Maha Union Ground a mipi kikhopna ah Soso Lorho adingin election campaign meeting ah thugen hi.Huaizawh sunnung dak 1.00 in Ukhrul a Tangkhul Naga Long Ground a mipi kikhopna ah NPF candidate Soso Lorho ading mah in campaign bawl hi. Nagaland CM in tuni a Manipur hongphak Lok Sabha election om ding ah NPF candidate Soso Lorho adia campaign bawl a hongzin 3veina hi a, tuni’n Nagaland Minister TR Zeliang leh mi poimawh hunkhop n hongzui uh chihthu om hi.
S. Gunija in Agri Director len
Imphal, March-31: G. Shamu Kabui, Director of Agriculture,Manipur apaisa Feb 28, 2014 in a sepna apan a pension ziakin S. Gunija, Deputy Director of Agriculture in Director of Agriculture mawhpuakna tawh lenkhawm ding in Deputy Secretary(DP), Govt of Manipur in order suah a, S. Gunija in ama’ grade pay mah la kawmin Director mawhpuakna len ding a,extre remuneration leng piak hituanlou in thuthak om masiah Director mawhpuakna lern ding chih ahi hi.
Japan Ambassador kiangah ngen
Imphal, March-31:India a Japan Ambassador Takashi Yagi in March 23, 2014 in ni 2 sung Manipur a om dia Imphal hongphak lai in Imphal a Japanese Hospital official te’n Classic Hotel ah vamu in Japanese Hospital tungtang thil omdan genpih uh a, Ambassador Takashi Yagi in Japanese Hospital building pichingtak khat bawlkhiak ahih theihna dingin Japanese govt kiang ah fund ngetsak ding hi’n ana genpih chihthu om hi. Japanese Hospital official te’n tumalam in leng East Asian gam tguamtuam akipan palaite kiangah panpihna ngetna memorandum pia uh hi’n leng gen uhi.
Imphal News-te suaklou ding
Imphal, March-31: Manipur adia festival poimawh Sajibu Nongmapanba(Cheiraoba) kichi tuni’n Manipur phaijang bial ah zat hi a,govt office-te adin leng Holiday himahleh financial year,2014 beini ahih ziakin office kai in nasem uhi. Imphal akipan Newspaper suakte leng tuni’n nasep khawl uh a,huaiziakin April 1, 2014 issue newspaper suaklou ding hi. Bank leh financial institution tuamtuamte tuni’n kihong in nasem uh a,April 1, 2014 in bel ‘Yearly closing of bank’s account’ ziakin suti(transaction omlou) ding hi.
JAC pawlin General strike puang
Imphal, March-31: Leimapokpam Ningol Moirangthem Ongbi Monica(18) w/o Thoubal Achouba Bamon Leirak apaisa March 18, 2014 in a pasal-te’ inn a bathroom ah kikhailumsa a kimukhia a sihdan ginlelhhuai sak ziakin huai tungtang a JAC kibawlkhia makaite’n March 26, 2014 in CM kianga memorandum pia in Monica sihdan thuchan suikhe ding leh huai a kigolhkha teng matkhiak a kituahpih bang gawtna piak dingin ngen uhi.Himahleh govt in a thilphut uh a tangtunlouh ziakin JAC pawlin April 1, 2014 zankim akipan dakkal 24 sung General Strike puang hi’n JAC convenor Moirangthem Devdas in gen hi.
SSPP Imphal Block Olympic 2014
Imphal , Mar-31: Siamsinpawlpi Imphal Block te’n May 5-10, 2014 sung ‘SSPP Imphal Block Olympic 2014’ kichi nei ding uh a, football (League), volleyball, spot painting, marathon, tug-of-war telin kimawlna tuamtuam nei ding uhi. Huai hunah SSPP-IB nuaia NGV Unit, Langol Unit, Lamphel Unit, Paite Veng Unit, Tribal Colony Unit a member-te tel ding uhi.
NE ah Tourism puahsawm
Imphal, March-31: North Eastern Council (NEC) in India malsuahbial ah tourism lam suk hatsawm in panlak kipan pahta ding uh chihthu om hi. NEC Secretary in tuni in India malsuahbial tawh kisai a seminar ah thugen a, aman ataklatna ah India malsuahbial a state 8 Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura te ah nasep patpah hiding a, gamdang akipan khualzinmite’n India malsuahbial a lunggulh theihna ding khop un panlak hiding chi hi. Huai tawh kisai in NEC in Master plan buaipih lel a, a sepkhiakna tawh kisai ahihleh Tata Consultancy Services mawhpuakna piak hiding a, amau tu in policy bawllel uh chi hi.