NPF candidate Soso Lorho adi’n election campaign kick-off
Nagaland CM Rio in Senapati ah vote campaign 
Imphal, March-26: Senapati dist HQ a Mini Stadium ground ah tuni zinglam dak 11:00 in 16th Lok Sabha election a II-Outer Manipur Parliamentary constituency a Naga Peoples’ Front (NPF) candidate Soso Lorho, ex-Minister adi’n election campaign pat(kick-off) in om hi. Huai ah Dr. Shurhozelie Liezietsu, President NPF in party flag kaipalh a, Election Manifesto leng hongkhia a, YK Yangding, Chief of Angkailongdi in thumsak hi. Huai hun ah Nagaland Chief Minister Neiphiu Rio ban ah Nagaland Cabinet Minister 2, Parliamentary Secretary 5, MLA 3 bnah Nagaland a MP candidate leh NPF leader hunkhop in uap uhi.
NPF Manifesto ah NPF ticket a MP candidate telching ahihleh Nagate’ buaina sukveng ding, singtangmite’ gam humbit ding, Naga-te kia hilou in Northeast a minority-te haksatna sukveng ding, AFSPA 1958 lakkhiakna dia panlak ding, Inner Line Permit (ILP) tawh kisai hoihtak a etzui ding, Indo-Myanmar gamgi buaina sukveng ding, Thoubal district pen Inner Parliamentary constituency a telsak ding, NE mite humbit ding chih leh adang tampi tel hi.
Nagaland CM Rio in a genna ah Manipur ah kum 2011 in NPF phuhkhiak hi a khatveina dingin Manipur ah NPF akipan MLA bangzahhiam ching in lawhching mahmah chi hi. Ama’n agenna ah, NPF in Naga-te’ haksatna kia buaipih lou in Northeast-te haksatna ban ah minority-te haksatna sukbeina dia panla ahihdan gen hi. Huai dungzui in NE Regional Party Forum leng kum 2013 in phuhkhiak hi a, huai ah amah Convenor a pang in Centre ah NE mite haksatna tamveitak tut hita chi hi. Delhi leh khawpi tuamtuam ah NE mite nelhsiahna leh deihdanna uang mahmah a, huaiziakin NE mite kikhentuamlou a pankhawm poimawh mahmah ahihdan gen hi.
Nagaland ah NPF leh a kizoppih te’n MLA seat 60 lakah 52 nei uh a, Nagaland ah NPF ahat mahmah ziak banah Naga mite haksatna genpih ding leh NE mite haksatna sukvengna panla din amah MP dia ki-candidate poimawh hi’n gen hi. Manipur ah Ibobi makaih in Congress in term 3 akizom in vaihawm a, huai hunsung in mipite sangin High Command-te kia lungkimsak in mipite haksatna ngaihsak hilou chi’n gen hi. Ibobi in nam tuamtuam khenzakna ding ngaihtuah in nam khenkhat zang chi hi. Nagaland ah nam neuzaw leh adiak in Kuki-te’n leng midang tawh hamphatna kibang ngah uha, govt in mituam dan ing enkol tuanlou chi’n gen hi.
Northeast ah Naga-te haksatna sukveng hileh pawl tuamtuamte aleng sukven theih hiding a, huaiziak in mipite na kasep theihna dingin NPF candidate-te chance ana pia un chi’n mipite kiangah chialna bawl hi.
CM in campaign flag-off ding
Lamka, March-26: Outer Manipur Lok Sabha biala Congress candidate ding Thangso Baite adia campaign patna ding in March 28, 2014 zinglam dak 10.30 in Hmar Veng a Thangso Baite’ tenna inn ah Chief Minister O.Ibobi in khuallian apang in election campaign hongkhia(flag-off) ding hi.Huai hun ah Functional President in MPCC President banah Dy CM Gaikhangam pangding a, Guests of Honour in Minister-te, MLA-te leh party leader-te pang ding uhi. Thangjakam Misao, Election Chief Agent in vaidawnna thugen ding a, huaizawh in Thangso Baite,Chief Minister leh Dy CM akipan abanban in thugenna om ding hi.
Biakinn building thak honna
Lamka, March-26: Chiengkonpang a Gangte Baptist Association(GBA) Centre Church ah biakinn building thak hoihtak a bawl uh March 29, 2014(Kiginni) zinglam dak 11.00 in honna leh Pathian kianga latna(inaugural function & dedication) programme om ding hi.
March 24, 2014 issue ah ‘biakinn thak lan in huai ah kisuan uh’ kichi khapen biakinn-lui khakna programme a zat uh gelhkhialhkhak hizaw hi.
Thangso Baite in Lamka pha
Lamka,March-26: Lok Sabha MP hilel leh 16th Lok Sabha Election 2014 a II-Outer Manipur (ST) Parliamentary Constituency a INC candidate Thangso Baite’ in tuni’n Lamka hongpha a, a sanggam pa Th. Baite, EE/PHED tanu Miss Caloryn Baite pasal neihna leh khakna hun uap hi.
Mun 2 ah meikang om
Lamka, Mar-26: Tuni’n nitakin Lamka khawpi sung mun 2 ah innkang om hi. Nitak dak 8.00 velin New Bazar’ Super Market nuaia Rame Hotel ah Gas-cylinder tungtawn in meikang om a, inn neite’n anhuan dinga gas a tawhkuang ualeh meikuang kipan hi’n gen uhi. Meikang ziakin innsung vanzat tuamtuam kangsia a, himahleh sawt kang manlou in dak 8.30 velin mipi paikhawmte’n innkang phelhmit thei uhi. Huailou in Hill Town,IB Road ah Hotel khat leng kang a, vanzat tuamtuam kangse mahleh sawtlou sung meikuang phelhmit theih hi’n kigen hi.
Loan Recovery Camp-2014
Lamka, March-26: Manipur State Co-operative Bank(MSCB) Ltd/ CCpur Branch saina in
March 27, 2014 zinglam dak 11.00 akipan in Hmar Veng Community Hall ah ‘Loan Recovery Camp,2014’ om ding hi.Huai ah Chief Guest in Kh. Khamba Singh,President, Board of Management, MSCB Ltd pang ding a, Functional President in Jangkhongam, President, HAPAM/CCpur pang ding hi.
Nguljalun Sitlhou kaisang
Lamka, Mar-25: Nguljalun Sitlhou s/o Lalsei Sitlhou of Bethel Veng, Motbung, Sadar Hills in tutunga departmental examna a lawhching in Asst. Audit Officer(AAO) dingin kaisang hi. Aman tulelin AG office, Imphal ah Sr. Auditor sem hi.
Pangmual ZYA Unit hon hiding
Lamka, March-26: T.Goukhomang, President, ZYA Gen HQ in March 27, 2014 zinglam dak 10:00 in Pangmual ZYA Unit thak hong ding a, vaipawthakte leng kichiamsak ding hi. March 27, 2014 zingsang in T.Goukhomang, President, ZYA Gen HQ makaih in Lianzalal, Secy; Niangdeihnuam, Secy Finance leh Inf Secy TKMang & Th Doumuan in Pangmual khua zuan in zinkhe ding uhi.
Mi tamtak in appoinment order la
Lamka, March-26: Lok Sabha Election hun a duty ding a seh ZEO/CCpur nuai a teacher 500 valte adin ZEO office ah appoinment order hawmkhiat hi a, duty list a telkhate’n appoinment order la uhi. ZEO nuai a election duty ding list lakah mi bangzah hiam pension khin leh double a min omkha leng om a, huaite tuni mah in DC office ah bawlthak uhi.
Nitak sawt pipi office ah nasem
Lamka, March-26: Lok Sabha election ding ziakin DC’s office a AC to DC/CCpur T.K Simte, S.Khaikhopau Ngaihte, BO/HQ ban ah election deptt te’n nitak tengin zankim dak 12.00 tan niteng phiala nasem in buai mahmah uh a, nitak-an leng mahni inn a ne man omlou in hotel ah an nek ding order in office mun mah ah nitak an nezel uh hi’n kigen hi.
PTC CWC meeting 13 veina om
Lamka, March-26: Hiangtam Lamka a PTC Conference Hall ah tuni in PTC Gen HQ a Central Working Committee (CWC) meeting 13veina om a, thu tuamtuam genkhawm uhi. Huai ah June 27, 2014 a PTC 65th Raising Day pen Nampi thumkhawmna hun a zat a, HQ, Block Level ban ah Unit level a thumkhawmna a zatdin thupuk uhi. Savaipaih khua tunding nawnna thu ah YPA Gen HQ leh CMO/CCpur panlakna kipahpihthu puang uh a, Bungmual khua hausa thubuai tawh kisai innsung thu ahihziakin innsung level a hihveng PTC gen ging ging nawnlouh dingin thupuk uhi.
Biometric lakna khawlphot ding
Lamka,March-26: Unique Identification Authority of India (UIDAI) nuaia Unique Identification Number ‘Aadhar’ project tungtawn in India mite leh gamdangte khenkakna dinga SDO/CCpur office ah Biometric photo lak himahleh a software upgrade a ngaih ziak in March 27, 2014 akipan Biometric photo lakna khawl phot ding uhi. Software upgrade zawh nung April 1st week apan ngeina bang in Biometric kilakna sutzop nawn hiding kigen hi.
Master trainer-te’n meeting nei
Lamka, March-26: DC office a BRGF Resource Centre ah tuni sunnung in AC to DC/CCpur makaih in Lok Sabha election a EVM tawh kisai a mawhpua Master Trainer-te leh SDO/AERO teng in joint meeting nei uhi. Huai zawhin AC to DC makaih in Dist Transport Officer, Election deptt leh Police te’n meeting nei uh a, Lok Sabha election hun ah CCpur Dist in Gari poimawh zah 216 kaihkhawp ding tungtang kikum uhi. Tunung sawtlou in Police-te panlakna in gari poimawh zah kaihkhawm sawm uhi.
ZRF in hilhchetna thusuah
Lamka, March-26: T. Josh Guite,Secy(Info & Pub),Zomi Revolutionary Front(ZRF) in March 23, 2014 issue Newspaper tuamtuama kisuahte hilhchetna bawlkawm in ZRF kichi KNO armed wing khat hi a,KNO/ZRF leng SoO atel ahihbanah diktaka ground rule zui hi’n taklang hi. KNO/ZRF a C-in-C Songlianlal Hangsing @ Lalpu mah hi a,himahleh KamsuanlianMantuang @ Michael Ginlalsiam Phiamphu @ Zonathan leh Mawirosang Guite ahihleh govt approved cadre list ah tellou uh a,Michael leng KNO/ZDV a Home Secretary hi’n taklang hi.
Matkhiak a om galvante kidnapping leh extortion adia zat kichi leng Michael a hi a,KNO/ZRF tawh kisaikhalou hi’n taklang hi. KNO/ZRF in leng Hmuia Veng a Neelamani Sharma pikhia UG outfit-te mawhpaih hi’n puang a,demand letter 10 kichi ah ZRF C-in-C suai leh Director(Fin) suaikaih hilou hi a genkawmin SoO ground rule theilou cadre khat thilhih hi’n gen hi.Ngawhna tuamtuamte phuahtom hi a gen in KNO/ZRF minsiatsak tupna hidan in taklang hi.
SUUNNA
T.Damlianthang (55) s/o (late) Ngulthuam of Mualveng, Hiangtam Lamka zan nitaklam dak 4:30 velin sinna in si a, tuni’n Lamka hanmual ah kivui hi.
Outer bial ah candidate10 paisuak
Imphal, March-26: Outer Manipur Parliamentary Constituency adia nomination file hileleng kizukkik nuamte adin tuni nikhiah himahleh candidate dinga nomination file mi 10te kuamah a kizukkik omlouh ziakin avek un paisuak uhi.Candidate-te bel 1)Thangso Baite(Congress), 2)Prof Gangmumei Kamei(BJP),3) C. Doungel(NCP), 4)Kim Gangte(AITC), 5)Mani Charenamei(Ind),6) Sosho Lorho(NPF),7) Lien Gangte(JD-U), 8) Khamkhanpau Zou(AAP), 9) Lamlalmoi Gangte(CPI-ML) leh 10) Amarson Samkhil(Ind) hi uhi. Outer Manipur bial ah April 9, 2014 in election om ding hi.
Tulelin TB vei mi 546 ki-enkol
Imphal, March-26: State TB Officer Dr Y. Gopal Krishna in a gendan in Manipur ah TB natna beisak tupna a panlak kipat tung akipan tuni tanin TB natna vei hi a ki-enkol 42,000 hi a, tulel dinmun ah TB natna ziaka etkol a om mi 546 om hi’n gen hi. Huaite lakah multi-drug resistant(MDR) a damlou ki-enkol 58 om hi’n leng gen hi.
Inner bial adin candidate 8 om
Imphal, March-25: Inner Manipur Parliamentary Constituency ah April 17, 2014 a election om ding a candidate nuamte adin tuni tan nomination paper file theih hi a, mi 7 in nomination a file khit ban uah tuni in Aam Aadmi Party(AAP) ticket a candidate dingin Dr Kh. Ibomcha in nomination file a, amah tawh kigawm in candidate ding mi 8 hi uhi. Nomination papar-te March 27 in scrutiny om ding a, kizukkik nuamte March 29 in kizukkik thei ding uhi. Candidate dinga nomination paper file mi 8te 1)Dr Th. Meinya(Congress), 2) RK Ranjan(BJP), 3)Dr M. Nara(CPI), 4) Ms Oinam Indira(Independen), 5) Dr Gurumayum Tonsana Sharma(MPDF), 6) IPS retd S. Manaobi(Trinamool Congress), 7) Oibam Jiten(Jai Mahabharat Party) leh 8) Dr Kh. Ibomcha (AAP) hi uhi.
B.Sc(1st Semester) result suak
Imphal, March-26: Manipur University(MU) nuaia B.Sc(1st Semester) examna result puankhiak hi a, candidate 11,140 om lak ah 7,082 lawhching(pass) uh a, pass zah 63.57% tung hi’n Controller of Examinations, Manipur University apan thusuak in gen hi.
Election tawh kisai training kipan
Imphal, March-26: Outer Manipur Parliamentary Constituency ah April 9, 2014 a election om ding tawh kisai in tuni in Presiding Officer leh Polling Officer No. 1 te ading in Thoubal Mini-Secretariat complex ah traning om hi. Returning Officer banah DC/Thoubal in tuni a training a tellou Presiding Officer leh Polling Officer No. 1 te March 27, 2014 office kaihun sung in Returning Officer kianga ki-report chiat ding in theisak a,aki-report loute tungah akituahpih bang action lak hiding chi’n theihsakna bawl uhi.
Mission Myanmar teamte hongtung kik uh
Imphal, March-26 : Mission Myanmar phase-III kichi Shija Hospital a doctor te’n March 17, 2014 a Myanmar gama vazin in damlou tamtak en in akul leh poimawh bangin operation leng bawl uh a,huaia tel member 14te tuni’n Manipur hongtung kiknawn uhi. Amau Myanmar a Monywa General Hospital ah key hole surgery 32, Cleft Lip leh Palate surgeries 27 a bawl uh lawhching mahmah hi’n kigen hi. Shija Hospital te’n maban ah Shija Overseas Training Program chih minvuah in Myanmar a surgeons leh nurses-te free in training pe ding uh hi’n kigen hi. Huai training sungin Myanmar a AMASI ten surgeons-te scholarship pe ding uhi. Mission Myanmar kichi lawhching mahmah a, phase I in 103 free cleft lip leh palate surgeries neih in om a, Phase-II in 197 neih in om hi.
MU ah interaction programme om
Imphal, March-26: Manipur University(MU) a National Service Scheme (NSS) Cell leh Nehru Yuva Kendra, Imphal West saina in tuni’n MU a Centenary Hall ah ‘One-day Mega Interaction Programme on Systematic Voters’ Education and Electoral Participation (SWEEP)’ om hi. Huai ah Chief Electoral Officer O. Nabakishore in kum 18 tana upa kuapeuh in election process a telthei dingin tanvou(rights) nei uh hi’n gen a, SoO atel UG tuamtuam a cadre-te’n leng vote khiaktheihna ding a hamphatna nei uh ahihdan genkawm in Election Commission of India(ECI) ah proposal thon hi a, huai dawnna ngak a omlai hi’n gen hi.
