Zu laka kihel ‘Tol’ tamtak mukhia    

Lamka, March-25: Election Commission of India thusuak dungzui in maban a Lok Sabha election om ding ah mipite’ vote suma leisawm a panla omtheite dalna dingin CCpur district ah Statistic Surveillance Team/Flying Squard (SST/FS) bawlkhiak hi a, huaite’n gari ginlelhhuai a sakte uh  chiklaipeuh in check thei uhi. Amau  tuni zinglam dak 11:30 velin Tuibuong Peace Ground ah SDC 1 makaih in Police tawh kithuah in gari hunkhop check uhi. Huai ah Imphal apan Lamka zuan Maruti Van (No. AS-O1V/8514) sunga kipua  zu huanna a kizang ‘Tol’ (yeast) kichi basket 3 leh bag 2 dim mukhia in a neitu Imphal West a Pheiyeng Chingkhunou khawmi ngen Ningthoujam Thoibi (28) w/o N.Ibomcha Singh leh Angom Ongbi Mema Devi (56) w/o A.Inao Singh mankhia   uhi. Excise deptt telin thil kimukhia teng Police Station ah mei in haltum uh a, sum atuat in Rs.4,000/-vel man hi’n kigen hi.

 

Meihol pua Tractor khat accident    

Lamka, March-25: Tuni sun dak 12:00 velin Tractor khat in meihol gab 100 pawkawm in Zou Veng akipan Tedim Road tailut lai  a vanpuak a gik banah ah tamluat ziakin  kisiklep in accident a, tractor mailam bel kileplou hi. Tedim Road ah meihol bag 100 laka atamzaw lampi lai ah tukkhia a, aliam bel kuamah omlou hi.

Nguljalun Sitlhou kaisang  

Lamka, Mar-25: Nguljalun Sitlhou s/o  Lalsei Sitlhou of Bethel Veng, Motbung, Sadar Hills in tutunga departmental examna a  lawhching in Asst. Audit Officer(AAO)  dingin kaisang hi. Aman tulelin AG office, Imphal ah Sr. Auditor sem hi.  

Activa gulai Police- te’n mankhia   
Lamka, March-25: Police te’n zan nitak dak 10:15 velin New Bazar area ah Thangminlen Suantak (26) s/o Thangchinmang of Leijang village in New Lamka(G) a Genneipau’ Honda Activa(grey colour) guksak in lampi ah a tawilai tuak in mankhia uhi. Thangminlen tuni’n  Police te’n CJM court ah dingsak uh a, CJM in April 1, 2014 tan Police custody a omdi’n pekhia a, Police-te’n FIR No. 43 (3) 2014 CCP-PS U/S 379 IPC registered uhi.
    Thudang kizadan in  Mrs Thanghuzami of Tipaimukh Road, Hiangtam Lamka in a varandah uah Activa (white colour) No. NM 02A-6611 a koihlai guta kuate hiamin gukmang sak uhi.

Student-te adi’n ‘Holiday with Jesus’ kipan   

Lamka, March-25: Evangelism deptt, RPCNEI saina in tuni zinglam in Rengkai a VTI Auditorium ah class X, XI leh XII exam zoute ading in ‘Holiday with Jesus’ kichi kipan a, Rev Lalkhumvel,D.S, PD, RPCNEI in thumna in hong hi. Program sung in Rev V.Lalnghakthang, Evangelism at Large, RPCNEI; Rev Lalkhumvel, D.S.P.D, RPCNEI leh Prof L.Rouivel Pangamte, Vice Principal, CCpur College te’n Pathian thu ban ah Career Guidance sinsak a, huai ah student 60 val tel uhi.  

Khaw tuamtuam 4 ah gan pul   
Lamka, March-25: Behiang area a khua 4- Tonzang, Lunzang, Behiang (T) leh Behiang (V) ah February & March 2014 sung in ganpuul hii leng a, lawi(buffalo) leng bawng (cow/oxen) 30 val si hi’n kigen hi. Khenkhat in ni salua ziaka gan pul hii leng kidia gintakthu gen uh a, gan pul kipatna ahihleh zoudawn a om Lungzang khua hi a,  khawkim leh kiang lawhsawn hi’n kigen hi. Ganvulhte a chinat nung uh ni 1/ 2 in si uh a, kin mahmah hi’n kigen hi. Behiang area a lawi leh bawng puul teng sum atuat in Rs.15 lakh val ding hi’n kigen hi. Ganpuul thu zak phet in Vety & AH/CCpur te’n vadelh uh a, amau leng a lawhdan ding thei tuanlou uh a, lawi leh bawng china nailoute damdoi in kap uh hi’n kigen hi.

Kongjanglok JB school huihpi in mutsia

Lamka, March-25: Henglep sub divn a Kongjanglok JB school buil ding zanhal masa  March 22, 2014 nitak dak 11:35 velin huihpi in mutsia a, room 2 zat theihlouh in kisia  a, school tung leh abang teng leng huihpi in mutdalh vek hi. Kongjanglok JB school building bawlthak ahihkei leh zattheih vual hilou ding chih hi.

Duty appointment order lak ngai
Lamka, March-25: Outer Manipur Lok Sabha bial ah April 9 a election omding tawh kisai a duty ding in ZEO/CCpur office a notice board ah teacher 530 kitakkhia a, akisaipih te’n ZEO office ah appoinment order lak ngai hi. Huailou in CEO/CCpur nuai a teacher 450 vel leng duty dingin amin uh CEO/CCpur office ah takkhiat hi a,huaia telkhate’n appoinment order lak ngai chih ahi hi.

Lounei mite adi’n sinsakna

Lamka, March-25: Dist Hort & Soil Conservation  saina in tuni zinglam dak 11:00 in Hiangtam Lamka a PTC Conference Hall ah lounei mite adia sinsakna‘One Day Farmers Training under National Mission on Micro Irrigation 2013-14’ om a, Micro Irrigation tungtawn a Drip/Sprinkler Irrigation beneficiaries te leh Micro Irrigation ngetna application pia mi 50 val tel uhi. Training ah S.Chinzalam, SCO/Thanlon; H.Bisheswor Singh, DHO/Henglep; S.Shyamjai Singh, DHO/ Parbung; Mrs Hoihnu Neihsial, DHO/HQ leh Jadumani Singh, Representative Wahengbam Irrigation Enterprises/Thoubal te’n sinsak uhi.

Master trainer-te’n meeting  ding
Lamka, March-25: DC office a BRGF Resource Centre ah March 26, 2014 sunnung dak 1:00 in Lok Sabha election adin EVM tawh kisai a mawhpua Master Trainer  29 leh SDO/AERO tengin joint meeting neiding uh a, DTC/Tuibuong ah Presiding Officer, Polling Officer leh Polling staff te EVM tawh kisai March 27-April 3 sung training piakdan ding genkhawm ding uhi. CCpur dist a Polling Station 296 ah EVM 341 zat hiding a, Master Trainers’te’n EVM 5% zang ding uhi.  Reserve ah 10% om ding a, adangteng Polling Station a zat hidin kigen hi.

SUUNNA   
Mrs. Hauthangpuii (80) w/o Tlangduha of Hmuia Veng zan nitak dak 8:20 velin awmna in si a, tuni’n Lamka hanmual ah kivui hi.

GAS NEWS
Haran Valley, Kwakta
Booking from; Jan 28-Feb 9, 2014. Stock 306
Date of Delivery: March 26, 2014 .Time 8:00am-10:30 am

 

IMPHAL NEWS:

Outer Manipur biala NCP candidate in UG apan vauna ngah
Imphal March- 25:  Outer Manipur Lok Sabha seat adia Nationalist Congress Party(NCP candidate Chungkhokai Doungel @ C. Doungel in zan nitakin helpawl khat(UG group) akipan phone tungtawn a vauna ngah chi’n NCP President L Ibomcha in gen hi. Tuni’n C. Doungel inn ah campaign patna ding a  flag hoisting function zatna ah NCP President in a gendan in zan nitaklam dak 5.30 velin meltheihlouhte akipan telephone tungtawn a vauna ngah a,huchibang vauna om mahleh  NCP in singtanggam mun kilkoi leh Jirtibam bial tanpha ah leng election campaign tawp tuanlou in massawn zel ding hi’n gen hi.

Political party tengin manifesto hoihtak leh policy nei mahle uh member khenkhat in amau mimal hamphatna dingin na a sep ziakun party adin minsiatna tunsek a,hun paisa a Parliament Member(MP) in Manipur tawh kisai issue himhim Parliament ah gen ngeilou hi’n leng NCP President L. Ibomcha in gen hi. Aman a genzelna ah hun masa a MP in kum khat sunga Locasl Area Dev Fund Rs. 5 crore lel ngak hi’n ngawh a, mipite khantouhna ding leh masawnna ding  a sepkhiak  theihtam hilou hi’n gen hi.  

Maharashtra akipan Centre party leader-te leh NCP spokesperson in Jiribam bial telin Thoubal district in a huamkhak Assembly Constituency 7 ah Outer Manipur biala NCP candidate adin election campaign hong nei ding uh chi’n L. Ibomcha in gen a, Congress Party candidate tawh kibeithei mahmah ding uh hi’n gen hi.  Left leh  Secular Alliance party in NCP candidate a support ua leh baihlam taka chingthei ding hi’n leng NCP President in gen hi. Left leh  Secular Alliance te’n Outer bial ah NCP a support ziakun  NCP in leng Inner bial ah political party 8 in candidate a guan Dr M. Nara support ding hi’n L. Ibomcha in gen hi.

C. Doungel in a genna ah April 9 a election omding ahihziakin campaign na ding ni 15 lel om a, NCP political stragery leng hatsak ngai hi’n gen hi.CCpur district a voter-te’n Congress ah muanna a taksap ban uah BJP leng kiakniam lam nawt hi a gen in voter omzah laka 80-85% in NCP mah support ding hi’n C. Doungel in gen hi. Sadar Hills area ah leng Congress hstlou hi’n gen a, Manipur mipite’n vote khiak hun ah sum a kizuak omlou ding a gintak thu leng gen hi.

Left and Secular alliance a Convenor Ksh. Santa in a genna ah mipi vaihawmna ah candidate-te vau kichi thil chin dia kilawm nawnlou hi’n gen a, election siangthoutak om theihna ding in kuapeuh in panlak hoihzaw chi’n gen hi.(UNA)

Inner bial ah tuni’n mi 2 in file
Imphal, March-25: Inner Manipur Lok Sabha seat ading April 17, 2014 a election om ding ah zan tanin candidate ding mi 5 in nomination paper file uh a, tuni in mi 2 in a file ziakun candidate din mi 7 in nomination paper file uhi. Tuni’n IPS retd S. Manaobi(Trinamool Congress)  leh Oibam Jiten(Jai Mahabharat Party) in nomination file uh a, huaima a nomination filed midang 5te 1)Dr Th. Meinya(Congress), 2)RK Ranjan(BJP), 3)Dr M. Nara(CPI) leh 4) Ms Oinam Indira(Independen) leh  Dr Gurumayum Tonsana Sharma(MPDF) hi uhi.  Inner Manipur bial ah March 29, 2014 tan nomination file theih ding hi.

Candidate ding zah kichian ding
Imphal, March-Outer Manipur Lok Sabha seat adia nomination file mi 10te laka kizukkik nuamte adin March 26, 2014 in kizukkik theih ding a, huai tawh kiton in  April 9,2014 in Outer Manipur Lok Sabha biala election om ding a candidate ding zah kichianta ding hi.  Zan a nomination paper-te scrutiny hun ah candidate dia nomination paper kipia teng paisuak a, huaite  1)Thangso Baite(Congress), 2)Prof Gangmumei Kamei(BJP),3) C. Doungel(NCP), 4)Kim Gangte(AITC), 5)Mani Charenamei(Ind),6) Sosho Lorho(NPF),7) Lien Gangte(JD-U), 8) Khamkhanpau Zou(AAP), 9) Lamlalmoi Gangte(CPI-ML) leh 10) Amarson Samkhil(Ind) hi uhi.

Manipur ah sepna zong 7 lakh val  
Imphal, March-25: Manipur a Employment Exchange tuamtuam ah tuni tan in sepna deih ziaka min pelut teng kigawm 7,00,602  om a, huaite lakah pasal 4,99,818 leh numei 2,00,784 tel uhi. Manipur  district tuamtuam a sepna deih a min pelut zah tulelin Imphal west ah 1,82,511;  Imphal East ah 1,11,327;  Thoubal ah 1,17,795; Bishnupur ah 68,181;   CCpur ah 70,400 ; Ukhrul ah 28,601;  Senapati ah 58,854; Tamenglong ah 24,811leh Chandel ah 29,695 hi  uhi.   

Charenamei in campaign pan ding
Imphal, Mar-25: Outer-Manipur Lok Sabha seat a candidate ding Mani Charenamei(Independent) adin March 26, 2014 nitaklam dak 3.00 in Imphal ah election campaign patna(kick-off programm) om  ding hi’n kigen hi.

SoO atel group-te meeting neihpih
 Imphal, March-25: Outer Manipur Lok Sabha bial ah April 9, 2014 a election om ding siangthoutak leh buaina bangmah omlou a sai ahih deihna ziakin Manipur govt in tuni’n 1st Manipur Rifles Banquet Hall ah SoO atel Kuki National Organisation (KNO) leh  United People’s Front (UPF) akipan representative-te meeting neihpih a, huai ah Principal Secretary(Home) Dr   J Suresh Babu in makai hi.
     Huai kikhopna ah SoO atel outfit a cadre-te Lok Sabha election hun ah kuamah kigolh omlou in designated camp a om chiat ding chih hi’n thusuak in gen hi. Assembly election omsa ah SoO atel group khenkhat a cadre-te ziakin thiltung khenkhat report a om ziakin Election Commission tanpha tung a, huaiziakin hibang thupukna bawl hidan in kigen hi.
    Hibang kalah  State Election department in SoO atel cadre-te’n Postal Ballot tungtawn a vote khiaksak ding in Election Commission of India ah thusun(proposal) bawl a, himahleh ECI akipan dawnna kichiantak ngah hinailou hi’n kigen hi

Apu in a tunu kum 4 mi vawlum
New Delhi, March- 25: South Delhi a Neb Sarai ah a pu in atunu kum 4 lel a upa khat vaw lum a, tuazawh in a pu taimang chih thu kiza hi. Thusuak kingahdanin, Vashti (29) kichi apasal tawh  akikhen ziakin a inn uah kiknawn a, zan nitakin a sanggampa Ravi tawh kiselkha ua, Ravi leng thangpai mahmah in Vashti a vuak ban ah atate 2 Kavita (4) leh Radha (3) te leng vua a, Kavita pe’n tu zingkal in AIIMS hospital ah si a, a sanggamnu leh kum 2 lel a upa Radha leh a nu Vashti te leng damdawi inn ah etkol in om lel ua, adinmun uh lauthawnghuai lou chi uhi. Tu in Ravi taimang a, police in suizuina neilel hi.

MPS Officer 2 kaisang
Imphal, March-25 : Selection Committee in  a recommend dungzui un MPS Grade-II Officer mi 2h MPS Grade-I (payscale Rs. 16,600-39,100 + grade pay Rs. 6,600) in  kaisang uhi.MPS Officer 2te leh tulela a posting mun uh anuai bang hi.   
1.Chittrarajan Singh,MPS,  AC 8th IRB
2.Langminlen Misao,MPS,  AC 1st IRB