NEICC 1st Biennial Session,2014 tuni’n zousiang uh
Lamka, May-18: North East India Christian Council (NEICC) 1st Biennial Session, 2014 (76th Session Overall) zanhal masa  May 15, 2014 nitak in EFCI inntekna in Sielmat a Rev Chawnga Memorial Chapel ah om kipan a, tuni nitak biakna kikhop zawh in zousiang uhi. 1st Biennial Session  ah kum 2014-06 sunga NEICC office bearer  ding telna om  hi.  President in Rev. Zosangliana Colney, Mizoram Synod telching uh a,Vice President in mi 2- Rev. W.C Khongwir, KJP Synod Sepngi leh Rev. Dr Solomon Rongpi, CEBNEI telding uh a, Secy in Rev R. Lalnunzira, Baptist Church of Mizoram leh Treasurer in Elder K.Lyngkhoi, KJP Synod Sepngi telching uhi. Makai  thak dinga telching teng tuni nitak in Rev. Dr. Huoplien Neitham, President NEICC in nagotna(commissioning service) nei hi. Biennial Session om sungin Rev. W.C Khongwir, KJP Synod Sepngi; Rev. Ch.Chhama, Sr Exe.Secy, ECM; Rev. Greater Burn Marak, Vice President  NEICC leh Rev. Dr. J.Huoplien Neitham, President NEICC te’n Pathian thu gen uh a, Choir tuamtuam akipan  phatna lapawl ngaikhiak in om  hi. Manipur pawlam state tuamtuam akipan Mizoram Baptist Choir, Khasi Synod Choir, Nagaland Baptist Choir leh Salvation Army Choir, Aizawl te’n leng uap in phatna lapawl sa uh a, Dr Chaltonlien Amo, Chairman, Hill Areas Committee inleng uap hi. Tuni nitak in Rev. Lalbiektluong, President,EFCI in thumna in NEICC 1st Biennial Session 2014 hunkhak hi.

KNF(P) leh KNF(Nehlun) in muntuam tuak ah Raising Day zang
Lamka, May-18: SoO nuaia om Kuki National Front(KNF-P) in tuni zinglam in Sadar Hills a Ebenezer Camp   ah 27th Raising day zang uh a, Chief Guest in Calvin H., Secretary (External Affairs)/ZRO pang  a, aman a thugenna hun ah  namsung a kipumkhatna a poimawhdan gen a,Nam makaite UPF hi in KNO hitaleh kipumkhatna ding ngaihtuah in pangkhawm lehang maban limchi ding chi’n gen hi.
    
ST Thangboi, President, KNF(P) telin makai tuamtuam in Raising Day lopna hun uap uh a, Special Guest in T.S. Haokip, Defence Secy, KNO pang hi. Huai hunah Kuki Inpi Manipur  banah Kuki Inpi, Sadar Hills a President leh Secretary  leng huai hun a tel in thugen uh  a, Gen Secretary, KNFmakaih in makai leh nam sepaih sisate suunna nei uhi. Taphou, Gangpijang, Twilang area-te apan cultural troupe tuamtuam in namlam lahna nei hi.
   
Tuabang kalah KNF(Nehlun) pawlin zan in Daitwi Camp Gen HQ ah  26th Anniversary Raising Day zang uh a, Kukiland adia hinna piate minute 1 sung dai dide in suunna leh zahna  pia uhi. Huai hunah Chief of Army staff James Kuki in May 18 a Raising Day zat ding himahleh buaina omthei ding chihthu zak ziakin May 17 a kizang hi’n gen a, cadre training zouthak mi 20 oath taking ceremony neisak in tulelin KNF(N) in cadre 150 nei uh hi’n leng gen a, Kuki mite laka kituahna a om ding KNF(N) in deih hi’n gen hi.

Lamka ah temperature 34.5 °C tung
Lamka, May-18: Lamka khawpi ah tuni zingkal nisuah akipan   khawlum dan uang mahmah a, sunnung dak 2.00 in khawlumdan 34.5° degree Celsius tung hi. May 2014 adia khawlum hunpen  May 1, 2014 in 34.8 °C tung a, khawvot hunpen  May 10, 2014 in 12.7 °C tungsuk hi. Tukum adia khawlum hunpen  April 26, 2014 in 36.1 °C tung a, khawvot hunpen January 4, 2014 in 5.5 °C tung hi. Kumdang sangin May 2014 lumzaw hi’n kigen a, kumteng in khawlumdan uang deuhdeuh hi’n kigen hi.

Meh nekhial mi 4 etkol in omlai
Lamka, May-18: K.Patlen khua ah zanhal nitak an nek hun ah Thanglen leh a innkuan pih  mi 8 in meh(curry) a nekkhelh ziakun buaisia uh a, Dist Hospital ah admit ahihnung un hoihlam nawt  zelin doctor te’n mi potsak uh a,mi 4 mah etkol in omlai uhi. Hospital a etkolte hoihlam nawtzel  halh hiaihiai uh hi. Zan issue a Henglep sub-divn kichi kha pen Tuibuong TD block nuai a om chihding hizaw hi.

Pressure cooker puakzak:mi 1 liam
Lamka, May-18: Kholzaman(46) w/o M.Chinzakham of Dorcas Veng, New Lamka in tuzing in gas stove ah Pressure Cooker(litre 5 capacity) zang in zingmeh ding ‘Manggan’ a huanlai gas stove apan suankhia, a koihkhiat leh puakzak in liam hi. Thu kizadan in Kholzaman’ gawl(throat) liam  a,  a awm(chest) leng mehneng in thehkha a, inntung leh inn bang teng ah leng kithehdalh vek hi.Pressure Cooker a puah hun in a gin ngaih mahmah hi’n kigen hi. Inn-neite gendan in ‘Manggan’ huanlai in Pressure Cooker hoihtaka kiphit theilou  hi’n gen uhi. Pressure cooker a puahzak nungin  zattheih nawnlouh ding khop  in kisia a, Kholzaman’ kintaka Dist Hospital tut nungin  doctor te’n mun 11 ah khui in innlam a kienkol thei ding hi a gen in paisak uhi.

MHJU in ngaihdam ngen din theisak
Lamka, May-18: Police Station kiang Tedim road ah May 12, 2014 nitak dak 8.30 in Lutminthang, Sub-Inspector makaih Police personnel mi 10 in Manipur Express a Sub-Editor banah MHJU a Finance Secretary tung ah kampau kipawmlou tak a zatkhum ban uah sawn(manhandled) ziakzal uh a, huai thu ah Manipur Hills Journalists’ Union(MHJU) in SI makaih police personnel-te gamtatna mawhpaih kawmin ngaihdam ngen ding in theisak uhi. MHJU thusuakin tuban Police-te’n mi nautang leh kuapeuh hihbuai tawpsan din theisak uh a,  zukham kawma duty nawnlou ding in leng theisak uhi. Police personnel kigolhte’ sik-le-tang in  Lutminthang, SI in athu theihsak ahih akipan dakkal 24 sung  a MHJU Executive member-te’ theihpih a ngaihdam ngen dingin zasak uh a, hunchiam sunga ngaihdam a ngetkei leh MHJU in maban ah panla ding chih ahi hi. MHJU in DC/CCpur, SP/CCpur leh AMWJU(Imphal) banah akisaipihte kiangah pia uhi.

5th EGF Conference nei uh
Lamka, May-18: Gangte community a  saptuamte’n kumkhat a khatvei a zatsek uh Evangelical Gangte Fellowship (EGF) tuni sunnung dak 1:30 in HT Gangte, IPS Quarter, Imphal ah zang uhi. Huai hunah Evan V Lienthuom Gangte in ‘Bang ati a DAN-te chuh kuongsung a umzing a hiu em’ chih  Vaihawmte 5:17 thupi a zangin Pathian thu gen a, New Lambulane ESC Church Choir,  GBA New Lambulane, Langol ESC Choir, SWS Lamphel, Game Village BYF  leh Gospel artist Ms Chochong of Waichei  te’n a vangkim in phatna la sa uhi. Naupang Sunday School Union’ Langol te’n Bible chang leh choreography lahna nei uhi.

ADC makaih in Trophy lop hiding
Lamka, May-18: Hill Districts Sports Assn Manipur saina in April 21-26, 2014 sung Lamka ah ‘Ist Hill District Premiere League 2014’  om hun ah  Dist Sports Assn./CCpur in champion hihna la uh a, Trophy a lak uh Dist Council khut ah pekhia uhi. May 20,2014 sunnung dak 1:00 in Council Conference Hall ah Trophy lop hiding a, Rev Dr.Lalhmuoklien, EAC, ECCI in DSA/CCpur player-te adin thumsak ding hi. Huai hun ah DC, SP, DYASO leh Chairman ADC/CCpur in thugen  ding uhi.

Environment Friends- te’n Guite kual veh
Lamka, May-18: Environement Friends(EF) pawlin May 12-17, 2014 sung Preliminary Tour in Guite kual(area) veh uh a, khaw tuamtuam  Muallum, Suangdoh, Mualnuam, Kaihlam, Songtal leh Sinzawl ah programme zang uh a, CMO akipan First-aid medicine a ngahte uh khawsung mite kiangah hawmkhia uhi.

Final Rehearsal-cum-flag off ceremony
Lamka, May-18; State Level Bharatyam Competition ah Chinkham Modern H/S student-te vatel ding uh a,huai tawh kisai in May 19, 2014 zinglam dak 9.00 in Zomi Colony a Chinkham Modern High School campus ah Final Rehearsal-cum-Flag-off ceremony om ding chih thutut kingah hi.

AICC meeting atel din Delhi ah CM  zin
Imphal, May-18 :All India Congress Committee(AICC) meeting poimawh tak May 19, 2014 in om ding a, huai a tel dingin Chief Minister O. Ibobi tuni’n New Delhi ah zin hi. Thusuak kizadan in tutung Lok Sabha election ah Congress nasataka a kiakniam ziakin Congress President Mrs Sonia Gandhi makaihna in AICC meeting ah  thil omdan genkhawm ding uh a, state tuamtuam a Pradesh Congress committee President leh Congress in govt a bawlna state a CM teng leng tel ding uhi.

Bomb puak: IRB personnel 1 liam
Imphal, May-18 :Wangoi PS bial a Wangoi Thounaojam Leikai a teng MPCC Vice-President S. Achouba Singh’ innkiang a nullah meltheihlouhte’n a koih uh IED bomb khat
tuni zingsang dak 5:40 velin puakzak a, huai ah 7th Bn IRB personnel khat in liam  hi. Thusuak kizadan in MPCC Vice-President inn a guard a om 7th IRB personnel  L. Herojit  s/o (late ) Chaoba of Oinam Thingel in nullah a plastic bag kikoih ginlelh huaisa in chiang (stick) zangin lakkhiak sawm a, huchih lai in  plastic bag sunga IED bomb  puakzak hi. Amah  kintak in RIMS tut hi a, huai apan in Shija hospital adia refer in om hi. Bomb puak in gate leh akimlak a GI Sheet omte leng hihsezou hi’n  kigen hi.

Beneficiaries-te lakah hawm hiding
Imphal, May-18: Directorate of Tribal Affairs & Hills ah wheel chair,tricycles, hearing aids leh lutches ngetna pia singtangmi Physically challenged-te laka beneficiaries dia telkhiakte lakah May 20, 2014 zinglam dak 11.00 in Kuki Inn,Imphal ah huchibang thilte hawmkhiak hiding a, huai hun ah beneficiaries-te amau taksa mah in huchibang panpihna thilte la ding in Director in theisak hi.

Nupi 1 muanmawhhuai takin si
Imphal, May-18 : Lilong Chajing Mamang Leikai a om Rajen’ zi Maibam Ongbi Bina Devi (50) tuni zingsang  dak 6:00 velin a lupna ah muanmawhhuaitak a sisa in muhkhiak in om hi. Amah  a pasal tawh tengkhawmlou in mundang ah om a, tuni zingsang in  omna inn a lupna tungah muanmawhhuaitak in sisa in kimukhia hi. A taksa tung ah liamna  mun bangzahhiam leng muhtheih dingin om chih ahi hi.

Jiribam ah news agency dinkhiak in om
Imphal, May-18 : Jiribam Sub-divn sungah tuni’n News  Agency khat pankhia uhi. Huai News Agency bel Jiri News Network (JNN) chih minvuah hi a, tua ah Jiribam, Manipur leh Cachar, Assam apan senior Journalists leh reporter-te tel uhi. Jiribam ah kum 2004 in  News Agency patkhiak himahleh kum bangzahhiam nungin defunct hi. Tuni a meeting ah  Senior Journalist F. Ahmed in makai a, Executive Committee ding guang uhi.  President dingin Sarat Thokchom, Vice-President din G.C. Mishra, Gen. Secretary din M. Romeo, Asst. Secy. Dingin S. Herajit Singh leh Treasurer dingin M. Haritombi Singh guang uhi. Member in F. Ahmed, A. Lukoi Singh, Md. Abdus Salam, Y. Sanjit guang uh a,  June 2014 kal masa sungin News masa suahkhe ding uh hi’n  kigen hi.

Candidate 18 laka 14 in deposit mansuah ding
Imphal, May-18; Manipur a Lok Sabha seat 2 adia election om ah Inner Manipur leh Outer Manpur biala candidate 18 omte laka  16 in deposit a sun uh mansuah(forfeit) thei ding in om uh chih ahi hi. Election Commission of India (ECI) guidelines dungzui in candidate in a tawmpen in vote kikhia seh 6 suah laka seh 1 amuh kei leh  a deposit mansuah ding a, a sum deposit pen govt account a tranfered hiding chih ahi hi.
 Lok Sabha election ah Inner Manipur bial ah candidate 8 om a, Outer Manipur ah 10 om hi. Inner Manipur ah NOTA vote 5298 sim tellouh in valid vote  6,35,573 om a,  Outer Manipur bial ah NOTA vote 2206 sim tellouh in valid vote  7,69,560 om hi. ECI guideline dan in Inner bial ah candidate 1 in a tawmpen in vote 1,05,928 muh ngai chihna hi a, huchi hileh Congress candidate Dr Th Meinya in vote  2,94,248 mu a,  CPI candidate Dr M Nara in vote 1,99,799 mu hi.

Outer Manipur ah candidate in deposit a muhkik theihna dingin a tawmpen in vote 1,28,260 muh ngai a, INC candidate  Thangso Baite in vote 2,96,770 mu a, NPF candidate  Soso Lorho in vote 2,81,133 mu a,  candidate midang 8 te’n vote 1 lakh sanga tawmzaw mu chiat uh hi’n kigen hi.

MPSC prelims result thu ah press-te kimuhpih
Imphal, May-18 : Manipur Public Service Commission(MPSC)  saina a Manipur Civil Services Combined Competitive(Prelim) Examination-2014 apaisa  May 13, 2014 in a result puankhiak hi a, huai ah thil diklou om hidan in Joint Students’ Co-ordination Committee te’n taklang uhi. Huai tawh kisai in tuni’n press-te kimuhpih uh a, amau a gendan un MPSC  saina a prelims result 2vei puankhiak  hi’n gen uh a, thil omdan kichiantak maban a main examination om ma  a puankhiak ahih kei aleh main examination ‘ban’ hiding in puang uhi. Amau a gendan un May 13, 2014 in result puankhiak hi a, huai ah candidate 467  lawhching uh a, tuazawh May 16, 2014 in prelims result puankhiak in om nawn zela, tua hun in answer key pen manipulate a om hi’n gen  uhi.

Inn kuan khat meh nekhial in buaizak
Lamka, May-17: Henglep sub divn. sunga K.Patlen khua ah zan nitak 6:30 velin  mi 8 in nitak an(dinner) nekhin phet meh(curry) nekkhelh ziakin buaisia uh a, khawsung mite’n Dist Hospital pawtung in admit in om uhi. Meh nekhial  mi 8 te’n hoihlam nawt  uh a, Doctor te’n natna min ding in ‘Dhatora poisoning’ chih gelh uhi.
    
Thanglen of K. Patlen inn gei ah a mintheih chiahlouh unau Hmar te’n ‘Totorot’ pak a chih uh  khaw mite’n leng amin  atheihlouh uh a gah (fruit) leh baal (colocasia) nitak mehdin huan uh a, annek zawh in meh nekha mi 8 teng zukham bang in om vengvung uh hi’n kigen hi. Meh nekhial a buaisiate-1) Hoihpha (65) m/o Thanglen; 2) Thanglen (36) s/o Haulam; 3) Kimkholhing (35) w/o Thanglen; 4)  Tinkholhing (35) w/o (late) Ngamgin; 5) Lamminlien (13) s/o Thanglen; 6) Chingnou (7) d/o Thanglen; 7) Lamminlen (4) s/o (late)  Thangzangam leh 8) Paumin Joel (2 ½ ) s/o Thanglen hi uhi. Kum bangzah hiam paisa in Thanglen leh a innkuante’n meh an ekkhelh uh midang in leng  nekhial kha in buai mahmah uh a, Dist Hospital ah admit a om uh hi’n kigen hi.

Vungzamuan Valte, IRS in abawl ‘Tanglai Lumsuang’ kichi  laibu tuzing 8.00 in Shillong ah Ginkhanchin, Adviser, NEC, Shillong in hong a, Pastor G. Khankham, EBCC Shillong in Pathian kiangah thumna in lan hi. Huai hunah laibu bawltu Vungzamuan Valte in thugen saulou nei a, Upa J. Kaikhanmang Guite in hunkhakna thumna nei hi.

Minister in Market Shed hong
Lamka, May-17: N.Nengzasuan in apa (late) E.Daizathang theihgigena dingin  Bungmual a Colony Veng ah ‘E.Daizathang Market Shed’ abawl tuni zinglam dak 11:00 in Health Minister Phungzathang Tonsing khuallian apang in hong a, Pastor M. Ginzatun, Local Pastor, EBCC Bungmual in thumna in lan hi. Minister in N.Nengzazuan chihtakna pahtak thu gen in apa theihgigena dia Market Shed abawl  kipahpih thu gen a, mipi tamtak huai market Shed tungtawn kitung ding dia deihsakthu gen hi.  Bungmual Hausa leh President, YPA Bungmual Unit in leng thugen uhi.  
       
E.Daizathang Market Shed ah room 48 om a, room 1 luahman ni 1 in Rs.10 hiding hi. Manipur Development Society-te’n tuni in N.Nengzasuan khut ah official in market shed pekhia uhi.

JE damdoi kikap saktheih ding     
Lamka, May-17: Dist.Immunisation office ah May 19, 2014 akipan in naupang kum 1-10 kikalte  Japanese Encephalities (JE) kichi khuak a khawsik lutding dalna damdoi manbei in kikap sak theih ding hi. JE damdoi dose 1 ah mi 5 kap ngai a, a kikap dingte naupang damsiang, TB damdoi nelou a hih uh ngai chih  hi.

Khumujamba ah thil tamtak hihsia
Lamka, May-17: Khumujamba Meitei Leikai ah zan nitak sawtnung in thauging zakin om a, huaima deuh in Rengkai akipan pawlkhat leh Khumujamba akipan pawlkhat kala kitheihsiamlouhna ziakin buaina piang hi’n kigen hi. Pawl 2te buaina ziakin Khumujamba a inn bangzah hiam hihsiat in om a, aliam bangzah hiam leng om hi’n kigen hi. Police-te’n thiltung a zak phet un zan nitak mahin vadelh uh a, mipi khouhdaihna dingin blank-fire tanpha bawl uh hi’n kigen hi.

KWHRO Foundation Day zat hiding
Lamka, May-17: Kuki Women Human Right Orgn (KWHRO) phuhkhiat  kum 1 chinna May 19, 2014 zinglam dak 11:00 in M.Songgel Community Hall ah zat hiding hi. Huai hun ah Dr Satkai Chongloi, Gen Secy, KOHR leh K.Zou, Advocate & Legal Adviser, KWHRO te’ resource persons hiding uhi. Foundation Day program zawh in Dr. Satkai Chongloi, makaih in Dist tuamtuam a Human Right Orgn tuamtuam  makaite’n Human Right Orgn khat a dinkhawm, pankhawm leh panlak khawmding dan houlim ding uhi.

Drawing & Painting ah 100 val  tel
Lamka, May-17: Divnl Forest Officer, Southern Divn/CCpur saina in tuni in Bungmual a Lalpuithluaii Foundation School ah ‘International Day of Biological Diversity’zatna in Drawing & Painting Competition om a, school 20 vel apan student 100 val tel uhi. Huai ah‘Biodiversity Conservation’ chih thupi a zangin Category-I ah Class I-V kikal student 61 tel uh a, Category-II ah Class VI- XII kikal student 57 tel uhi. Kipahmante May 22, 2014 zinglam dak 11:00 in IB Road a Synod Hall ah ‘International Day of Biological Diversity, 2014 zatna hun ah hawmkhiat hiding hi.

Electric tungtang joint meeting
Lamka, May-17: DC’ office a BRGF Resource Centre ah May 19, 2014 zinglam dak 11:00 in Dist Admn makaih in Electricity deptt leh Village Authority (V/A) 8 te’n joint meeting neiding uhi. Huai hun ah Sielmat  sub-block-105,106,107; Hmar Veng sub-block -99, 100; Headquater Veng sub-block-125,126, 127; New Zoveng sub-block -111; Elim Veng sub-block-167,168; Lailam Veng sub-block -169; Bungmual sub-block-134,135,136,137, 138 leh Kawnpui sub-block-231 tel dingas theihsak hi uhi.

KSO/CCpur in kipahpih
Lamka, May-17: Kuki Students Orn(KSO)/Ccpur in BSEM saina a Class X/HSLC examna a passed-te leh COHSEM saina a Class XII/HSE examna a passed-te kipahpihthu  puang uh a,maban a zilna sangzaw a sutzopn uah leng a lawhchin touhzel uh deihsakthu puang uhi. KSO thusuakin a taklatdan in  CCpur distict leh Manipur pawlam a zilna sangzaw sunzom dingte’n  KSO akipan Acknowledgement letter la dingin theisak uh a,huchi ahihkei leh buaina leh haksatna a tuah ua leleng mundanga om KSO branch te’n kithuahpih theilou ding uh hi’n thupuan bawl uhi.

Pastor’s & Spouse Marriage Retreat
Lamka, May-17: CCWF leh Elim Resource Centre(Gauhati) saina inMay 19 & 20, 2014 in EBC, Dorcas Veng,New Lamka ah ‘Pastor’s and Spouse Marriage Retreat’ om dung a, huai ah resource persons in Dr JM Paupu, Senior Consultant(DAI) leh Mrs Lucy Dimnu, Elim Resource Centre pang ding uhi.

KNF(Zogam) te’n thupuan bawl
Lamka, May-17:Sanga Kuki, Secretary/IPR, KNF(Z) akipan thusuak in a gendan in  Seilal @ Tony Haokip of Changpikot village/Ccpur district in Pawlpi adia fund khon dingin  KNF(Zogam) in chikmah in authorised lou hi’n taklang hi. Huaiziakin amah kithuahpihna pia himhim Orgn akipan akituahpih bang gawtna piak hiding chi’n puang hi.

IMPHAL NEWS:
July 2014 akipan NFSA zat hiding
Imphal, May-17: Congress makaihna Centre govt in  National Food Security Act zat a sawm Manipur ah July, 2014 kal masa akipan zat hiding chihthu om hi. Huai ding in state govt leng kisa khol a, huai dinga poimawh tuamtuamte buaipih lel hidan in leng kigen hi. National Food Security Act kichi  UPA govt in Parliament a a puaklut September 10, 2013 akipan zat theih dingin Dan(Act) a bawlkip hi a, huai dungzui in India gam pumpi ah rice leh a dangdang man niamtaka ngahtheih ding chih ahi hi. Huai Act dungzui in beneficiary in kha 1 sungin antang, wheat leh lentil kg 5 zel a ngah ding chih hi a, rice kg 1 Rs. 3 zel, wheat akg 1 ah Rs. 2 leh  lentils kg 1 Re 1 a leitheih ding chih ahi  hi.

Centre a BJP lawhchin patauh huailou
Imphal, May-17: Manipur Pradesh Congress Committee (MPCC) in tuni’n Congress Bhavan ah Lok Sabha election a Congress candidate lawhching  Thangso Baite(Outer Manipur)leh Th. Meinya(Inner Manipur) kipahpihna programme zatna ah Chief Minister O. Ibobi in : Centre ah BJP a hat banah govt thak ding leleng patauhna ding bangmah omlou hi’n gen hi. India kivaipuakdan a federal structure ahih dungzui in Manipur in funds leh  projects tuamtuam adia sum a ngah ding bangbang ngah ding hi’n gen a, Minister leh MLA te’n mipi tawh kizopna hoihtak nei kawmin a mawhpuakna chiat uh semkhe ding in CM in thuhilh hi.
    
Dy CM banah MPCC President  Gaikhangam in a genna ah Centre a govt kikhen ziakin state govt leng kikheng ding hi a ngaihdan omsek leng diklou hi’n gen a, Centre ah BJP in govt bawl leleng Manipur ah govt kikheng tuanglou ding hi’n gen hi.

Th. Chaoba tuni’n Delhi ah zin
Imphal, May-17 : Lok Sabha election a BJP te’n govt thak bawlthei dinga lawhchinna thupitak a ngah ziakun tunung sawtlou in Prime Minister din Narendra Modi kichiam ding hi’n kigen hi. Huai hun uap kawm dingin BJP Manipur Pradesh a President Th. Chaoba in tuni’n Imphal apan Delhi ah zin a, aman a zinkhiakma deuh in Press-te kimuhpih a, Manipur a Inner leh Outer ah Lok Sabha election paidan diklou hi’n gen hi.  Outer ah NPF te’n muscle power zang uh a, Inner leh Outer ah Congress ten ‘money power leh muscle power’ zang uh chi’n gen  hi. Kum  2009 a Lok Sabha election hunlai sang in BJP te’n tutung in vote tam mu zaw a, masawn mahmah ahihdan kilang chi’n gen  hi.

Minor Irrig adin Rs. 2 cr sanction
Imphal, May-17 : Parliamentary Secy K. Meghachandra in tuni’n Langthabal A/C  a developmental works tuamtuam enkhia a, press-te kiang ah Langthabal A/C  a developmental works adiakin Minor Irrigation  dingin Rs. 2 crore sanction a om hi’n gen hi. Imphal River a Haobijam area a River Lift Irrigation (RLI) a dingin Rs. 30 lakhs sanction hi a, huai mun leng enkhia hi. Huai hun ah  local MLA Karam Shyam, Chief Engineer MI Shyambabu leh Engineer hunkhop in zui uhi.

Stenography Speed Test om ding
Imphal, May-17: High Court of Manipur nuaia Stenographer grade-I leh Grade-II sem ding lakna ding in April 23, 2014 a Main Final Stenography Speed Test om hongtung ding May 31, 2014(Saturday) zinglam dak 9.30 in High Court premises ah om nawn ding chi’n Joint Registrar(Admn/PM & P), High Court of Manipur in thusuah bawl hi.

PLA cadre 2 matkhiak hi uh
Imphal, May-17:PIB(Defence Wing) thusuak in a taklatdan in  Red Shield Division a troop pawlkhat in zan in Bishnupur bazaar lak operation a bawln uah  PLA/ RPF cadre N Leirinjao @ Oken(38) of Tairenpokpi Awang Leikai matkhiak hi a, amah  civil vehicle in Bishnupur akipan Imphal zuanlai matkhiak hi’n thusuak in gen hi. Army te’n amah akipan 9mm pistol leh a tang round 3 mukhia uh a, Bishnupur PS ah pekhia uh chihthu om hi.

State govt  tungah khauh ding
Imphal, May-17; BJP Manipur Pradesh President Th. Chaoba in state govt in nekguk takgukna(corruption) a a kigolhnate Centre tungtawn in khauhtaka nasep hiding chi’n gen hi.
    
Chaoba in tuni’n Delhi a zotma in Party officr ah Press-te kimuhpih in a thugenna  ah Manipur a corruption tawh kisai in centre tawh kitatsat lou a kithuzakpih gige ding hi’n gen a,  huchih dungzui in Centre in state govt tung ah khauh mahmah ding hi’n gen hi. BJP Manipur Pradesh in  Loktak lak hahsiangna ding tawh kisai a nekgukna liantak(Scam) leng ngentel takin suizui ding a, mipi adia fund hongpai himhim paise khat lel leng lakkhen louh in a mu ding mipite’n kimtaka a muh ding uh ahi chi’n Th. Chaoba in gen hi.