CM in Sanjenthong lei,JNIMS leh Secretariat building enkhia
Imphal, May-12: Chief Minister O. Ibobi in tuni’n Sanjenthong lei(bridge) kibawl enkhia a, huaizawh in Porompat a JNIMS Hospital leh Mantripukhri a Secretariat building kibawl abanban in enkhia hi. Chief Minister in Sanjenthong lei bawl akizang Symplex Company-te kiang ah tukum November kha a Sangai Festival kipatma a nasep zousiang ding in theisak hi.
Chief Minister in tuni a mun tuamtuam a phakna ah Works Minister Dr Kh. Ratankumar, Chief Engineer Lokendro, Addl Chief Engineer Tenba leh official tamkhop in zui uhi.
Chief Minister leh a teamte’n Sanjenthong lei bawlna mun pha masa uh a,huai ah nasepna enkhia uhi. Chief Minister in a thugen Symplex official te’n a dawnna uah lei(bridge) bawlna nasepna lamzang touzel a, tu dinmun a bat leh lei lui(old bridge) pen phelsiat vek ahihma in lei thak bawlna nasep a kimkhat zouman ding uh hi’n gen hi. Lei a thuah dingsteel bar leh angles leng Kolkata mun a kibawl lel lai hi’n CM theisak uhi. CM in Sanjenthong akipan Porompat a JNIMS hospital mun pha a, lupna 150 om ding JNIMS Hospital a ‘A’ Block leh Auditorium kibawl dinmun leng enkhia hi. at Porompat and inspected the construction work of A Block and Auditorium of the hospital. CM in huai a nasem Symplex makaite kiang ah building bawlna nasep zoukin ding leh March 2015 ma a govt khut a pekhe ding in genpih a, Symplex official-te’n March 2015 ma in building zou man ding uh hi’n gen uh a, hileleng a building pumpi bel zou manlou ding uh hi’n genpih uhi. Hospital a auditorium leng January, 2015 a Medical Council of India team in JNIMS hong etkhiakma ngei ua zou ding in CM in theisak hi. CM in PDA in a bawl Boys’ Hostel a nasepna leng enkhia a, terraces tung ah green roofing koih dingin theisak hi. Porompat akipan CM in Mantripukhri pha in Secretariat building kibawl a nasepna leng enkhia a, hai a nasepda zekai sakthu genkhum a, huaia nasemte’n tuban ni 20 sungin landscaping nasep zou ding uh hi’n CM theisak hi. Reporter-te kuang ah CM in a gendan in building leh construction nasepna himhim zou ding a hunchiam sunga zawh teitei ngai hi’n gen hi.
Ni 6 sung tui litres 10000 pezel ding
Lamka, May-12: Dist Hospital ah PHED/CCpur te’n kalkhat sungin tui litres 10,000/- pezel mahle uh damloute leh ODP a zat ding kiching zoulou in sianthouna lam buaihuai mahmah a, Med Suptd/Dist Hospital in PHED office ah tui kiching peding in 4vei hial ngen hi. PHED te’n leng Dist Hospital awlmawh ziakin kalkhat (one week) a ni 6 sungin Dist Hospital a zat ding tui litres 10,000/- pe gige ding in Med Suptd theisak uh hi’n kigen hi.
MPC (M) makaite’n Aizawl pha uh
Lamka, May-12: Mizo Peoples’ Convention(M) a President Upa K.Vanlalrinliana makaih in MPC(M) Office Bearer mi 7 te’n tuni’n Mizoram state khawpi Aizawl pha uhi. MPC(M) makai te’n Mizoram a Organisation tuamtuam a makaite ban ah government a mi poimawh tuamtuam a hunkhop kimuhpih ding uh hi’n kigen a, May 17, 2014 velin Lamka hongtung kiknawn ding uh hi’n kigen hi.
DC/CCpur hongtung ding
Lamka, May-12: P.K.Jha, IAS, DC/CCpur a pa’ damlou a heart operation ziak in May 9, 2014 in Bihar state a a tenna khua uh zuan vapha hi. Aman apa’ operation result a ngak ziak in tuni’n Lamka hong tungkik ding chih himahleh hongtung manlou a, May 13, 2014 in hongtung ding hi’n kigen hi.
Vote counting tawh kisai training
Lamka, May-12: India gam pumpi ah May 16, 2014 in vote sim kipan ding a, huai ding ziak in May 13, 2014 sunnung dak 1:00 in DC’s office a BRGF Resource Centre ah Vote counting training om ding hi. Huai ah Counting Officer 20, Counting Assistante 20 leh Addl Counting Staff/ Micro observer 20 telding uhi. May 16, 2014 in CCpur dist a A/C 6 apan vote kikhia teng Tuibuong a Dist Training Centre ah sim hiding a, table 16 zat hiding hi. Table 16 lak ah DC’s table ding 1 leh Observer’ table ding 1 om ding a, table 14 ah vote sim hiding hi.
Brig Madan in K. Zou mudin officer khat sawl
Lamka, May-12: Muallum a om 1/11-Gorkha Rifles te’n May 9, 2014 in HDFC a Security Guard sem Assam Regt (retd) Chinzapau (48) s/o Tongzakham of Zo Veng, Singngat, tulela Kamdou Veng a om, sam in Muallum check post ah soisa uh a, huai thu ah Brig Advitya Madan, Commander 27-Sector Assam Rifles in 1/11-Gorkha Rifles a Officer l khat in K.Zou mu dingin sawl a, Maj (retd) Gangte tawh tuni zinglam in Zou Veng ah M.Khamchinpau Zou @ K.Zou kimuhpih uhi. K.Zou in singtangmite pu-pa tawndan in khut khialte’n vok gou in ngaihdam ngen masa uh ahihdan hilh kawmin huai zui dingin Army officer theisak chihthu om hi. K.Zou in Army te’n bang rights zanga civilian 1 bank a sum la dinga sawl thei uhiam? Army-te soisak Chinzapau’ nakguh kitan hial bangchidan a tutan vehlou uhiam? chi’n dotna bawlkhum chih hi. 1/11-Gorkha Rifles a Lt Col in K.Zou kiang ah amau sung inquiry bawl phot ding uh hi’n gen chih hi. Mualluam post a omlel 1/11-Gorkha Rifles a Captain Sawam leng Chinzapau’ soisak ziakin Imphal lam ah ki-transfered hi’n thu kiza hi.
Kabir Puraskar Award 2014
Lamka, May-12: Mi kuahiam si ding lai humbit mimal kuahiam adin Kabir Purasker Award 2014 apply theih a, thuchian kimzaw DC office ah kantheih ding hi. Award apply theiding a chitna te- namkal buaina (communal riots) kal ah midang hinna leh property humbit, nam leh nam kal kitheihsiamlouh hun ah mihing hinna leh property humbit, namkal buaina (ethnic clashes) hun a midang hinna leh property humbit hih ngai hi. Award ngah dinga chitna neite lakah armed forces, police forces,fire services leh govt servant-te leng hithei ding hi. Kipahman ahihleh Grade-I ah Rs.2 lakh; Grade-II ah Rs 1 lakh leh Grade-III ah Rs 50,000/- hiding hi.
Zillai Platinum Jubilee zang ding uh
Lamka, May 12: Zillai Delhi Branch te’n May 31, 2014 in Airforce Auditorium, Subroto Park, New Delhi ah Zillai (Vaiphei Students’ Association) kiphuhkhiak nung kum 75 chinna Platinum Jubille zang ding uh a, huai hun T. Manga Vaiphei, MLA & Chairman MTDC in Chief Guest hihna tawh uap dia, Prof. SK Sopory, Vice Chancellor JNU leh Lamkhogen Vaiphei, President Zillai GHQ te’n Guest of Honour leh Functional President hihna tawh uap ding uhi. Special Guest in Genneikhup, EM/ADC CCPur, Jangngam Baite, MDC, Ngamlal Baite, MDC, SK Vaiphei, EM/ADC Sadar Hills, Tongkai Baite, MDC leh S Minboi Vaiphei, MDC te pang ding uhi. Huai programme ah Zillai Documentary presentation (Maite to Delhi) chih leng om ding hi.
YPA Diphu Unit Sports Meet
Lamka, May-12: Assam a Karbi Anglong district a om Diphu ah May 20-24 sung YPA Diphu Unit in 9th Sports Meet nei ding uh a, Hebron Playground ah SSPP Jt. Hq Shillong telin Karbi Anglong District sung a khaw tuamtuam leh Nagaland state akipan Club leh Association tuamtuamte kidemna ah tel ding uh hi’n kigen hi.
Suunna
Niangngaihkim (25) d/o G Thongzamang of Kanan Veng, New Lamka tunitak lam dak 3 velin Diabetes in si a, May 13, 2014 in New Lamka YPA hanmual ah kivui ding hi.
Biakinn tunga cross kek in dengkhia
Imphal, May-12: Bishnupur a Believers’ Church-te biakinn tunga cross kikoih May 11, 2014 nitak dak 9:30 vela kek kia in dengkha in kia a, huai kima om mi bangzahhiam leng liam uh chihthu om hi. Akigendan in kek kia in cross a denkhiak phetin huai biakinn a Pastor’ zi leng liam a, kek ging a ngaihluat ziakin azi bil ngong hial hi’n kigen hi. Midang khat leng liam hi’n kigen hi. Thusuak kizadan in kekin cross a denkhiak phet in biakinn tung dengsuk in, a kek pen biakinn nunglam tu in feet 3 alian leh feet 2 athuk in lei ah tumsuk hi. Kek kiakna kimlak a buannoi kithehzak in feet 20 asang tanpha ah buannoi uh ding om hi’n kigen hi. Biakinn omna bel Pastor quarter apan feet 5 a gamla hi a, tuaziakin electric gui teng inches 5 vel a sau in kitan vek a, Pastor’ quarter a TV leng puakzak hi. Kek kia ziakin huai kimlak a om TV 6 vel leng kisia chih ahi hi.
Vote simna kimkot ah 144Cr PC
Imphal, May-12 : Lok Sabha election ah EVM tungtawn a vote kikhiate May 16, 2014 in DC/Imphal West office sim hiding hi. Huai tawh kisai in tuni’ n District Magistrate/Imphal West in May 15 nitak dak 6:00 akipan in DC/Imphal West office kimkot ah 144Cr PC koih hidinn puang hi. Huai in DC/Imphal West office mallam ah Lamphel Court complex (Family court/gate) tan huam ding a, sim lam ah Naoremthong Leirak leh Naoremthong Khullen Junction tan hiding a, suahlam ah MG College Leirak leh tumlam ah Naoremthong Thoudam Leirak leh football ground kianga Mohan Motors works leh Sub-registrar office tan huam ding hi.
Jiribam ah vanpua Gari 400 tang
Imphasl, May-12: Joint Forum for Transport Welfare,Tamenglong pawlin Tamenglong-Khongsang lamlian km 39.5 tulai hun tawh kituak a bawlhoih phutna ziakin National Highway No. 37(Imphal-Jiribam road) leh Imphal-Tamenglong road ah hunchiam omlou Chakka bandh a puan uh tuni’n ni 5 chingta a,huaiziakin NH No. 37 ah Gari tai muh ding omlou uhi. Van poimawh tuamtuam pua Truck 400 val in security escort hungaih kawm in tuni tan Jiribam ah tangden(stranded) lai uhi.
Accident aliam dam zoulou in si
Imphal, May-12: National Highway-2 in a totkhak Khonghampat area ah May 11, 2014 sunnung dak 2:00 in Santro Car in Laishram Mani (64) s/o L. Ibocha of Khonghampat Mantri Leikai phukha in kintak in Hospital puaktung himahleh dam zoulou in tuni’n si hi. A kigendan in Santro Car (No. MN01X/5351) bel M Sundar (28) s/o M. Ibomcha of Sayang Road Konthoujam Leikai in a hek hi a, Laishram a phut khak phet un CMC hospital pawtung mahle uh tuni zingsang in dam zoulou in si hi. Tu in Santro car driver leh a gari Sekmai Police te’ khut ah om uhi.
ECI in Re-poll dinga ngetna nial
Imphal, May-12: Inner Manipur Lok Sabha bial ah April 17, 2014 a election om ni in Congress candidate Dr Th. Meinya in Khonghampat Polling station ah booth capture a,Congress supporter te’n Thoubal district dunga Polling station 39 lakah 29 ah proxy voting thanghuaitak om chi’n CPI Candidate Dr M. Nara leh BJP Candidate Dr RK Ranjan in Election Commission ah thil omdan tun uh a, Polling Station 29 ah repoll om ding a ngen in huai a lem kei leleng huai PS 29 a vote kikhiate simtel louh ding in ngen uhi. Huai tawh kisai in Election Commission of India in repoll om theilou ding chi’n state Election deptt theisak hi. Dr. Nara leh Dr. Ranjan in election Commission kianga Polling station 39 laka 29 ah booth capture ahihban ah vote percent leng 90% val hi’n gen uh a, huaiziak in election commission in vote poll 90% tunglam teng repoll om dingin ngen uhi. Amau Polling station 29 ah election commission in repoll omsak dingin kinem mahmah uh a, himahleh election commission in state election apan report amuh pansan in repoll ngaisalou hi’n theisak hi.
Combined team in UNLF 2 mankhia
Imphal, May-12:PRO IG/AR(S) thusuak in a gendan in 9-Sector Assam Rifles nuai om 30-Assam Rifles leh Lamlai Police kigawm combined team in zan in Nongpok-Kakching akipan Leikoching road tan Gasri paite a banban in checking a bawlna uah UNLF cadre numei Lata(23) of Mayai Leikai Nongpok Kakching mankhia uh a, amah akipan .32 Pistol leh magazine khat, atang round 3 leh hand grenade 2 mukhia uhi.Lata leh amah taksa tunga muhkhiakte Porompat Police Station, ah pekhia uhi. informed PRO IGAR(S). Huailou in 26-Sector Assam Rifles nuaia 24-Assam Rifles pawl in zan in Tengnoupal Check Post ah UNLF cadre 1 mankhia uhi. Amah silver coloured Maruti Van a tuangin Moreh zuanlai hi a, A/R te’n gari khawlsak in mankhia uhi. Amah LaishramSanajaoba Singh(22) of Sekmaijing Mayai Leikai hi a, A/R te’n amah taksa tung apan 9mm Pistol leh magazine khat banah atang round 5 mukhia uhi. Amah leh a taksa tunga muhkhiak teng Imphal West Police Station ah A/R te’n pekhia uhi.
Vodafone in Assam leh Northeast ah 3G roaming pan
Imphal, May-12: India a leading telecommunication service provider khat Vodafone India, in apaisa Sintawpni in Assam leh Northeasr Circle a a customer-te un 3G roaming services enjoy thei ding uh chi’n offer uhi. Telecom Disputes Settlement and Appellate Tribunal(TDSAT) in kal paisa a ruling a bawl tawh kiton in circle ah 3G intra-circle(ICR) roaming in om thei nawn ding chih thu a om ziakin Vodafone in a customer te 3G roaming services offer hi’n kigen hi. Vodafone in pre leh postpaid 3G roaming facilities a offer ziakin Vodafone Assam & North East customer-te lunggulh multiple packages leng offer a, huai packages tuamtuam omte bel pre-paid customers leh low/medium/high usage plans for postpaid customer-te adin daily, weekly, monthly leh unlimited plans om ding chih hi.
