Nagaland ah polling booth 5 ah re-poll om ding
New Delhi, May-14: Election Commission of India (ECI) thusuakin agendanin Nagaland ah May 15, 2014 in polling stations 5 ah re-poll om ding hi. Re-poll omna dingte ahihleh Wokha district a om Sanis Assembly constituency sung ngen ahi chi uhi. Wokha District ah April 9, 2014 in election neih ahi hi. Returning Officer Temjen Toy in thusuah a bawlna ah Election Commission of India (ECI) deihna leh thutanna bangin Wokha district sunga 39-Sanis (ST) A/C sungah May 15, 2014 in polling booth 5 ah election neihthak hiding chi hi. Repoll omna ding polling station-te 39/10-Lakhuti-I; 39/11-Lakhuti-II; 39/13-Lakhuti-IV; 39/36-Lakhuti-VII leh 39/37-Lakhuti-VIII hiding a, zinglam dak 7 apan nitaklam dak 4 tan vote khiak hiding hi. NPF Secretary General K.G. Kenye in ECI thusuak naktaka mawhpaih ahihthu puang hi. Hibang kalah, thusuak khenkhat in a gendanin Nagaland Chief Minister Neiphiu Rio in tutung Lok Sabha election tuh a, amah tuhtu omlou bangtuk a ngaih hi a, tuaziak mahin AICC in Nagaland ah Congress candidate a kesa bangtuk in ngaihsun khin uh chih ahi.
Counting centre kim ah Cr PC 144
Lamka, May-14: May 16, 2014 zing dak 8:00 apan in Dist Training Centre, tuibuong ah Lok Sabha election a vote simna(counting) kipan ding a, huai ziakin May 15, 2014 nitaklam dak 3:00 apan vote sim zawh masiah Counting Centre kimkot km 1 huam sungah Dist Magistrate in Cr PC 144 puang hi. May 16, 2014 zing dak 7:00 in EVM koihna strong roomn hon hiding a, candidate-te hiam amau agent te DC office tungkim ding in DC in theisak hi.
Class-X/HSLC result suak ding
Lamka, May-14: Board of Secondary Education Manipur(BSEM) saina a Class-X/HSLC Examination 2014 result tuni(May 15, 2014) suak ding hi’n muanhuaitak apan kiza a, sunnung dak 1.00 akipan dak 2.30 pm kikalin Online tungtawn in NIC website http://manresults.nic.in ah et theih ding hi’n kigen hi.
Army-te leh helpawl-te kikap tuah
Lamka, May-14: Singngat sub-divn. sung Theigotang area a Salap gamsung India-Mynmar border pillar 44 area ah tuzing dak 5:15 vel apan RPF/PLA hidia gintak phaizang helpawl leh Indian army (1/11 Gorkha Rifles leh 25-Madras Regiment) pawl kikap uh a, Gorkha Rifles lam ah mi 2 leh Madras Regiment officer 2 liam hi’n kigen a, helpawl lam leng aliam om hi’n kigen hi. Aliam 4te lakah Madras Regt a JCO Maruganandan leh Naik Subedar R. Guruswami a khe tuak uh liam a, a liamte Army Helicopter in Leimakhong Military Hospital tun hi’n kigen hi. CCpur Dist a 1/11-Gorkha Rifles te’ post teng tuni apan 25-Madras Regiment te’n luah ding uh chih hi a, Theigotang area a 1/11-Gorkha Rifles te’ leh 25-Madras Regiment te’n gamgi zul lak enkhawm dia kuanlai Phaizang helpawlte tawh kituakkha phial in kikaptuah uh hi’n kigen a, dakkal 1 vel kikap uh hi’n kigen hi. Phaizang helpawlte’n rocket launcher (RPG) 5 kapkhia in huai lak ah 2 puakzak hi’n kigen a, Army te’n Theigotang post akipan 81mm mortar zangin helpawlte kap uh hi’n kigen hi. Army leh helpawlte kikaptuahna thu CCpur Police ah report om nailou hi’n kigen hi.
Assessment camp ah mi 56 ki ensak
Lamka, May-14: CCpur Dist Disabled Union; Jan Vikas, Samity, Liliane Foundation; FFC Sisters Imphal province/Catholic Church leh Mobility India-Kolkata saina in tuni zinglam in IB Road a Synod Hall ah kum 30 nuailamte adin Orthotic Assessment camp om a, DC/CCpur in honga hi.Assessment camp ah tuahsia leh pianphung a vualphalou mi 56 te ki-ensak uhi.
Car accident ziakin mi 1 si
Lamka, May-14: Tuni nitaklam dak 3.30 velin Moirang akipan Lamka zuan i20 car (red colour) khat Moirang pelh a culvert om masapen gei lamnawl a taikhia in 3vei kilep a, huai car driver Khaizakap @ Kakap (41) s/o Upa Henkholam Neihsial of Neihsial Veng si hi. Thu kizadanin gari ah mi 5 tuang uh a, midangte liamlou in driver si hi’n kigen a, gari leng kise nak sim hi’n gen uhi. Moirang Police-te’n accident-na mun delh in Moirang Hospital ah siluang koih uh a, tunitak dak 9.00 in RIMS morgue ah post mortem kibawl hi. Misi taksa tungah liamna ma omkei mahleh internal bleeding ziakin si hi’n kigen hi.
D. Khuala Vaiphei in sepna muthak
Lamka, May-14:D. Khuala Vaiphei s/o(late) Lalkhochin Vaiphei of Tualnuam village in North Eastern Region Community Resource Management Project for Upland Areas(NERCOMP),Shillong nuai ah Project Manager sepna muthak a, June 2014 kha in join ding chihthu om hi.D. Khuala Vaiphei in tulelin National Rural Health Mission (NRHM)/ CCpur ah kum 2006 akipan in District Programme Manager sem hi.NERCOMP kichi India govt nuaia Project bel Thangso Baite,MP panlakna ziakin January 8, 2014 in Imphal ah DoNER Minister Pawan Singh Ghatowar in CCpur leh Chandel district adingin official in launching bawl hi.
Drawing & Painting Competition
Lamka, May-14: Divisional Forest Officer,Southern Division/CCpur apan thusuak in a taklatdan in May 17, 2014(Saturday) a ‘International Day of Biological Diversity’ zatna kawm in huaini sunnung dak 1.00 in Bungmual a Lalpuithluaii Foundation School ah Drawing & Painting Competition om ding hi.Huai ah ‘Biodiversity Conservation’ chih thupi a zangin Category-1 ah Class I-Class V student-te tel ding uh a, Catefory-II ah Class VI-Class XII tel ding uhi. Huai a tel ding student-te sunnung dak 12.30 in aki-report uh ngai ding chihthu om hi.
Gul in pasal khat tuliam
Lamka, May-14: Henzalian (35) s/o Kaichinhau of V.Munhoih apaisa May 12, 2014 in Behiang khua a Tuivai luidung ah ngasa man dinga kisalai gul in tu a, tuni zinglam dak 11.30 velin District Hospital puaktung hi a, hospital ah gulgu thahna damdawi omlouh ziakin doctor te’n Imphal ah referred uhi. Aman agendanin May 12 nitakin Tuivai lui ah ngasa man dingin kisa a, tuikawm a ngasa a etkalin tuisungah ganhing khat a muh nga-gul sa in matsawm a, huaipen gul(snake) hi a, akhut veilam mun 2 ah tu hi. Gultuk ziakin khua phawklou in om a, a chipum teng nasa hi’n leng kigen hi.
LATSEA in Policy thak puang ding
Lamka, May-14: Lamka Traders & Self Employed Assn(LATSEA) in May 15, 2014 akipan policy thak zat dia a bikhiah uh member tengin a theihchiat uh deihna ziakin loud speaker zat theihna ding in CT Lian Guite, Chief Co-ordinator,LATSEA in DC/CCpur ah permit ngen a, huai dungzui in DC office a Executive Magistrate in May 15, 2014 sunnung dak 2.00 akipan nitaklam dak 3.00 tan loudspeaker zanga puangzak dingin phalna(permit) pia hi. LATSEA policy lakah kal 1(ni 7) sunga ni khat dukan khak ding chih leng tel a,huai dingin Pathianni(Sunday) ni tenga dukan khak ding hi’n leng thutut kingah hi.
CDTA emergency meeting om
Lamka, May-14: Vimala Raina H/S campus a Block Resource Centre ah tuni’n CCpur Dist Teachers’ Assn. (CDTA) pawlin emergency meeting nei uh a, ZEO/CCpur nuai a H/S leh Jr H/S a Headmaster/Headminstress-te tel uhi. Huai ah Principal Secretary (Education-S) in ZEO/CCpur nuai a school tuamtuam 41 a teacher 227 (Graduate teacher 40, Primary teacher 157, Matriculate teacher 25 leh Headmaster 5) vel kisuan dinga order a suah bangchi zukkik dinga panlakdan ding genkhawm uhi. Teacher 227 a post utawh suan hileh govt school function teng leng function thei nawnlou in student 10,000 val buai ding hi’n gen uhi.
CT Lian in OC 80-RCC BRTF mu
Lamka, May-14: CT Lian Guite, Social Activist in tuni’n OC 80-RCC BRTF kimuhpih in memorandum khat pia a, huai ah vuahzuk chiangin Lamka Community Hall kong a lamlian mun banah Chienkawnpang a BSNL building-lui kong leh Bungmual a Forest Beat Gate kong lak a lamlian ah vuahzuk hun tengin hawktui in lamlian tum(submerged) hi’n gen hi.
Lampi a siatluat ziakin hawktui luang in lamlian tum(submerged) mun mahmah hi a genkawm in CT Lian Guite in a khawpi sung tawn a pai Tipasimukh lamlian akinthei pen a bawlhoih dingin OC 80-RCC BRTF a theisak kawmin memorandum pia hi’n kigen hi.
Suunna
Pauminlian (37) s/o (late) Liankhanthang of V.Munhoih, New Lamka tuzing baihtak dak 1:00 vel in sungna in si a, YPA Hanmual, New Lamka ah kivui hi.
Governor in Ukhrul pha
Imphal, May-14: Manipur Governor VK Duggal in tuni’n Ukhrul district HQ vapha a, District Hospital building kibawl dinmun va enkhia hi. Huaizawh in Governor in Ukhrul Mini-Secretariat ah DC/Ukhrul leh district official-te kimuhpih in thil omdan tuamtuam genkhawmpih hi.Aman May 15, 2014 in kal 1 sung om ding Siroy Lily festival hong ding chihthu om hi.
Vote sim dinga kisakkholhna zou
Imphal, May-24: Outer Manipur leh Inner Manipur Lok Sabha election a vote simna May 16, 2014 zinglam dak 8.00 akipan in District HQ 9 banah Jiribam leh Kangpokpi telin Centre 11 a Counting Hall 18 ah vote sim hiding a, Counting Hall 18 ah Observer 1 chiat leng om ding uhi. Huai dingin kisakkholhna bangkim zawh hita chi’n Chief Electoral Officer(CEO) Manipur thusuak in gen hi.May 16, 2014 zingsang dak 7.00 in EVM koihna Strongroom hon hiding a, huai hun ah candidate-te hiam amau agent-te telchiat ding in District Election Officer te’n theisak uhi.
CM in mun tuamtuam 2 vapha
Imphal, May-14: Chief Minister O. Ibobi in tuni’n Bishnupur district sunga Naranseina vapha in 2nd IRB Battalion complex kibawl nasepna va enkhia hi.Manipur govt in kum 2006 in Naranseina ah 2nd IRB Bn HQ mun ding in gam acre 82 pia a, huai ah nasep zawh ahihnailouh ziakin 2nd IRB pawlin Bn HQ dan in Khuman Lampak zang uh chih ahi hi.Chief Minister in Naranseina akipan in Phubala a Mini-District Sports complex bawlna mun ding leng enkhia a,khawsung mite leng kimuhpih in thil omdan genkhawmpih hi’n kigen hi. CM in tuni a Bishnupur district a phakna ah Dy CM, Minister(Commerce & Indus) leh official tamtak in zui uhi.
Gov bungalow kiangah IED mukhia
Imphal, May-14 : Manipur Governor bungalow nunga lamlian jula Transformer kiang ah kg. 1 vel a gik IED khat muhkhiak a om hi’n kigen hi. Thusuak kizadan in tuni zingsang dak 8.15 velin Raj Bhavan nunga lamlian a patrolling pai CRPF te’n IED bomb kikoih mu uh a, bomb expert-te theihsak ahih dungzui in huaite’n kintaka vadelh in IED bomb lakhia uh a, muntuam ah hihsia(defused) uh chihthu om hi. IED bomb ah detonators 2 fitsa a om hi’n kigen hi.
Electoral System khen ngai-Dr Nara
Imphal, May-14: Election om hun chianga sum-le-pai leh power(thuneihna) diklou taka zat ahihsek bawlhoihna ding a poimawhpen thildang hilou in Electoral System khek lamdang ngai hi’n Inner Manipur Lok Sabha biala CPI candidate Dr M. Nara in gen hi.Aman a genzelna ah tutung Lok Sabha election ah Thoubal biala Polling station hunkhop ah vote khiakdan diklou tampi om ziakin Election Commission of India(ECI)ah vote khiakthak(repoll) dingin nget himahleh Chief Electoral Officer(CEO) Manipur in report diklou a thon ziakin ECI in repoll ding lem salou hi’n gen hi.
Innsung ah hand grenade kipailut
Imphal, May-14: Tuni sunnung dak 12.30 velin Imphal West a om Superintending Engineer Thokchom Kesho Singh(62) s/o (late) Gambhir Singh of Kwakeithel Heinou Khongnembi Thokchom Leikai tenna inn ah meltheihlouh pawl khat Honda Activa a taikawm in handgrenade khat pailut uh chihthu om hi. Hileleng handgrenade pen puakzak lou a, huai hun in a compound sung ua naupang 2 carrom kap a omte’n mu in police ah report uh a, police te’n handgrenade va lakhia uhi.
Thoubal Hospital ah room hongkhia
Imphal, May-14 : Thoubal District Hospital a ASHA workers 360 omte a dingin tuni in room khat honkhiak in om hi. Huai hun ah Chief Medical Officer S. Sharat Kumar in, Thoubal District Hospital ah NRHM nuai a ASHA workers ten room kiningchingtak omlouh ziakin haksatna lianpi nei ua, tuni a amau a ding mawng a room honkhiak theih a om ziakin kipahhuai sakthu gen hi. Tuni a ASHA te’ room ding honkhiak ahih tawh kiton in CMO in Born Stabilizing Unit leh Help Desk hongkhia hi.
Students lui 8 in panpih dingin puang
Imphal, May-14 : Lamphel a Kendriya Vidyala School mei a kang tungtang ah tuni in huai school a kailui mi 8 ten meeting nei uh a, school tunding thakna ding a panpihna pe ding uh hi’n puang uhi. Amau a taklatna uah school tunding kikna dinga sum le pai leh a poimawh bangkim panpihna pe ding a mansa hi gige chi’n puang uhi.
