Electric tungtang joint meeting om
Lamka, May-19: DC/CCpur makaihna in tuni’n DC office a BRGF Resource Centre ah Electric tawh kisai Joint meeting om a, Manipur State Power Distribution Company Ltd apan General Manager Thangjang Matan makaih in AE bangzah hiam tel uh a, Lamka apan Electricity deptt leh Village Authority (V/A) 8 apan palai hunkhop tel uhi. May 20, 2014 zing dak 7:00 apan V/A 8 huam sungah electric consumer list leh Socio-Economic data kituakna hiam? electric consumer bangzah pha hiam? chih enkhe ding uh a, V/A member te’n amau area chiat ah kithuahpih dingin DC in theisak hi. Khua/Veng 8 te Sielmat sub-block- 105, 106, 107; Hmar Veng sub-block-99, 100; Headquater Veng sub-block- 125, 126, 127; New Zoveng sub-block-111; Elim Veng sub-block-167,168; Lailam Veng sub-block-169; Bungmual sub-block-134, 135, 136, 137, 138 leh Kawnpui sub-block- 231 hi uhi.
UCO Ccpur Branch in Award 2 sang
Lamka, May-19: UCO Bank, Agartala Zone nuaia omte lakah Ccpur Branch in ‘Best Performing Branch’ ah 2nd prize leh New Savings Bank Account Opened ah leng 2nd prize sang uh a, Branch Manager Nangkhogin Dousel s/o Pauzathang of New Lane, Bungmual in Agartala ah May 13, 2014 in Award 2-te’ vasang hi. Northeast India ah UCO Bank in Guwahati, Jorhat leh Tripura Zone nei a, Zone 3te’ lakah Tripura Zone nuaia om Ccpur Branch hon ni akipan tunitan in Branch dangte sangin Account Opening leh Performance lamah hihhoih uh hi’n kigen hi.
DC/CCpur zinkhe nawn ding
Lamka, May-19: P.K.Jha, IAS, DC/CCpur in apa damlou a Hospital a om dinmun enkhe kawm dingin May 21, 2014 in Delhi ah zin ding a, apa dinmun a hoih zel aleh Hospital akipan Bihar state a a tenna khua uh tunpih ding hi. DC bel May 25, 2014 in Lamka hongtung nawn ding a, ama omlouh sung in Maniram Sharma, IAS, Addl DC/CCpur in mawhpuakna len ding hi.
Pastor-te’n Seminar nei
Lamka, May-19: EBCC Dorcas Veng ah tuni’n ‘Pastor’s and Spouse Marriage Retreat’ kichi Pastor leh a zite uh ading Seminar om a, Rev. Dr. J.M. Paupu, Senior Consultant (DAI) leh azi Mrs Lucy Dimnu, Elim Resource Centre in sinsak uhi. Seminar bel May 19-20, 2014 sung om ding a, zi-le-pasal a kineih tungtang a Pastor-te’ theih ding poimawh tuamtuam sinsak uhi. Tuni a session masa ah ‘Biblical Foundation of Christian Marriage’ chih thupi zangin sinsak uh a, 2nd Session ah ‘Stages of Marriage Life’ chih sinsak uhi. May 20 zinglam dak 9.00 in 3rd session kipan ding a, ‘How to increase your romance’ sinsak ding uh a, 4th session ah ‘Principles of Christian Marriage/Pastor and his family’ chih sinsak ding uhi. Pastor leh a zite adia seminar bel CCWF leh Elim Resource Centre(Gau) saina a om hi’n kigen hi.
President MZP(M) charge pia
Lamka, May-19: MZP Manipur Group in May 1, 2014 in YMA Manipur Group office ah kum 2014-16 sunga MZP Manipur HQ vaipaw ding tel uh a, tuni sunnung in Chiengkawnpang YMA office ah outgoing MZP (M) President P.Gouminlien in President thak Paul Lalchhanhima khut ah charge pia hi.
Foundation Day leh RTI awareness
Lamka, May-19: M.Songgel Community Hall ah tuni in Kuki Women Human Right Orgn (KWHRO) phuhkhiat kum 1 chinna Foundation Day leh Right to Information Act tawh kisai Awareness Program om hi. Huai ah T.N Haokip, MLA (Saikot A/C) leh pawl tuamtuam a makai hunkhop in uap uhi. T.N Haokip in a genna ah gamsung buaina ziaka KWHRO kiphutkhia hidia ginthu gen a, gamsung bawlna ding in Rights & duty akituaka paikhawm ding hi’n gen hi.Awareness hun ah K.Zou, Advocate & Legal Adviser, KWHRO leh Dr Saikai Chongloi, Gen Secy KOHR te’n sinsak uhi.
ADC Hall ah Trophy lop hiding
Lamka, May-19: ADC/CCpur makaih in May 20, 2014 sunnung dak 1:00 in Tuibuong a Council Hall ah ‘1st Hill Dist Primiere League 2014’ trophy lop hiding a, huai a telding DSA player-te, team official-te, CDSA official-te, Super Division & Ist Divn. Club a President & Secy teng May 20, 2014 sun dak 12:00 in Hiangtam Lamka a CDSA offica ah kingakkhawm ding uh a, huai apan kuankhe ding uhi.
Thau neite’n PS apan lak theih
Lamka, May-19: Dist Magistrate/CCpur in 16th Lok Sabha election ding ziakin license nei thau(gun) teng Police station naipen akoih(deposit) chiat ding in theihsakna bawl a,tu’n Lok Sabha election zawh ahihtak ziakin thau neite’n deposit-na receipt tawi in Police Station akipan thau lakhe ding in theihsakna bawl hi.
India a BJP te’ vualzawhna lawm uh
Lamka, May-19: 16th Lok Sabha Election 2014 ah BJP tevualzou in BJP makaih in DNA in Central ah govt bawl ding uh a, , huai kipahpihna in tuni sunnung in Tuibuong a Singngat Mandal, BJP makai Jamlet Haokip’ tenna inn ah BJP makaite’n lawm uhi. Huai hun ah Dist Level leh Block Levela BJP makaite tel uh a, Richard Tongminthang Lhungdim, MDC leh T.Hangkhanpau, BJP leader-te tel uhi.Tongminthang Lhungdim in agenna ah ADC leng full fledge leh power kiching piak ahihna ding in Central a panlak theihna chiteng ah state BJP makaite tawh panlak hidin gen hi.
Works Minister lei(bridges) 8 enkhia
Imphal, May-19 : Works Minister Dr. Kh Ratankumar in tuni’n mun tuamtuam a lei(bridges) kibawl 8 -Lamphel Sanakeithel Road, Heingang Bridge, Minuthong Bridge, Thoubal Keiranbi Bridge, Phoudel Keiranbi Bridge, Siphai Leikai Bridge, Toubul Bridge leh Shantipur Shamushang Bridge enkhia hi. Parliamentary Secretary (Information & Public Relations) K. Meghachandra Singh, Superintenting Engineer, Executive Engineer leh Assistant Engineer (PWD) hunkhop in Minister zui uhi. Works Minister in tuni a a etkhisak lei 8te bel a kibawl lel leh bawl ding a omte hi a, bangchibang akisia hiam chih enkhia hidan in kigen hi.
Rio leh TR Zeliang thugen soisel
Imphal, May-19: Outer Manipur Lok Sabha seat a BJP candidate Gangmumei Kamei in
outgoing Nagaland Chief Minister Neiphiu Rio in ‘Congress ziaka vuallel hilou in Naga-te mah ziaka vuallel’ chih a gen a soisel banah Nagaland Chief Minister thak ding T.R. Zeliang in Kohima apan Delhi a zinkhiak ding kuan in ‘Manipur Outer Lok Sabha constituency ah Naga 3 in Manipur a Naga-te vote khendalh uh’ chih a gen soisel hi. Outer Manipur Lok Sabha seat ah Naga mi 3-Soso Lorho(NPF), Prof Gangmumei Kamei(BJP) leh Mani Charenamei (Independent) candidate hi uhi. Prof Gangmumei in a gendan in a, kuapeuh in a theihsa bangin NSCN(IM) cadre te’n NPF candidate Soso Lorho afin Naga mite tenna district ah Polling station 120 capture uh himahleh NPF candidate chinzawhna ding vote mu zoulou uh hizaw in gen hi. Election a NPF candidate chinlouhna ziak thildang hilou in
NSCN-IM cadres te’n constituency tuamtuam a polling a thunun zawhlouh ziak uh hizaw in leng Prof Gangmumei in gen hi.
Students te adin motivation camp om
Imphal, May-19 : 6-Dogra Regiment-te saina in tuni’n Pallel a Sangai Auditorium mun ah student-te adin motivation camp om hi. Huai hun ah student te’n maban ah bang career tel sawm uhiam chih leh armed forces lunglutte leng lampi kawkmuh uhi. Hiai hun ah students tamtak leh nu-le-pa ten uap uh a, lawhching mahmah hi’n kigen hi. PRO thusuak in a gendan in Manipur Board a class X leh Council saina a class XII result suah tawh kiton in maban ah CBSE nuai a Class XI result suak nawn ding a, student-ten a career uh atel theihna ding ua hibang sai uh hi’n kigen hi.
Electoral reforms tawh kisai campaign
Imphal, May-19 : CPI ten India gam mipite’n electoral process tawh kisai a theihsiamna ding un maban ah nation wide campaign om chih ahi hi. CPI state Secretary Dr. M. Nara in tuni’n a gendan in 16th Lok Sabha election zawh tawh kiton in left leh secular alliance parties te’n electoral reforms tungtang mipi atamtheipen in a theihsim poimawhsa uh a, election chiang in Congress te’n a ut dandan un mipite khem uh a, huaimai hilou in EVM tanpha manipulate thei uh a, tua ziakn Congress-te ching gige uh hidan in Nara in gen hi. Aman a genna ah Congress in zanzek a Lok Sabha election ah leng election agents leh polling officials-te sum in golhgu uh chi’n gen hi. Tua ziakin polling booth 120 ah kum dang tawh kibang lou in vote kikhia 90% tungzou hidan in gen hi. Tuaziakin mipite electoral reforms tawh kisai theihsiamsak poimawh petmah hi’n gen hi.
Service particulars submit ngai
Imphal, May-19: Mariculate teacher 54 leh Primary teacher 271 te’ service particular tuamtuamte seniority list hihfel ma in verified leh confirmed a poimawh ziakin May 24, 2014 tan in Directorate of Education (S) ah submit ding in theihsak hi uhi.Directorate thusuak dungzui in official website www.manipureducation.gov.in a min upload a om teacher te’n
attested bawlsa document tuamtuam - Initial Regular Appointment Order, Latest Promotion Order (if any), Educational Certificates (from Matriculation onwards), Certificates of passing trainings (if any), Latest Posting Order and Caste Certificate (if any) a submit uh ngai a,
huai submit loute a min uh seniority list a tellou ding chihthu om hi.Seniority list a telloute graduate teacher din leng promote theih hilou ding uh chih ahi hi.
Writer N Kunjamohon damlou in si
Imphal, May-19:Manipuri writet minthang N. Kunjamohon(79) in natna tuamtuam neih ziaka Shija Hospital a ki-enkol tuni nitaklam dak 5.00 velni si a,aman azi banah tapa 3 leh tanu 1 nusia hi.N. Kunjamohon in Guahati University akipan MA(Economics) zou a, Manipur hong kiknawn in Manipur College ah teacher in pang a,Thoubal College leh CI College ah Principal in pang hi. Aman Board of Secondary Education Manipur a Secretary ahih banah and Council of Higher Secondary Education ah leng Secretary in pang ngei a, Manipur State Education Commission ah Secretary in leng pang ngei hi.
