Meritorious Award hawmna  om
Lamka, June-5: Ginsuanhau, MLA(Singngat A/C) in tuni zinglam in Lailam Veng  a a inn ah (late) Thangzalang Memorial Meritious Award 2014 hawmna om hi.Huai ah ZSF, Singngat block leh KSO, Singngat block & Sangaikot block saina in Award hawm hi  a, class XII ah Chingmuansang d/o DK Hau in 1st la a, 2nd ah Reena Deineinieng Mate d/o John Mate leh 3rd in Lunminthang Haokip s/o Letneo Haokip pang uh a, kipahman in memento ban ah Rs 5000/-, Rs 3000/- leh Rs.2000/- ngah uhi. Class X ah topper in Ngamkhogin Baite s/o Lunkhongam Baite of T.Lailoiphai H/S pang a, 2nd ah E.Tuanchinmang s/o E.Thiankholal of Hill Model H/S leh 3rd in Tikaram Guragai s/o Madhu Shudhangur of St Joseph H/S pang a , kipahman in Memento ban ah Rs. 10,000/-, Rs.7,000/- leh Rs.5,000/- ngah uhi. Class XII a 1st divisioner 150 leh Class X ah 1st divisioner 92 te’ kiang ah memento leh Rs.500 chiat piak hi uhi. Huailou in MPSC exam na ah Singngat A/C akipan  MCS ngah N.Shokhongam Baite leh Lawrence Kapkhenmang  kiang ah mememto piak hi uhi.

UTLA in Sub-division 2 leh A/C thak ngen
Lamka, May-5: SK Thadou makaih UTLA pawlin nam tuamtuam tuantual takte khawsakna nopzawkna ding gelna in  India govt leh  Manipur govt kiangah Tamenglong district akipan sub-division 2 leh Assembly constituency bawlkhiak dingin ngen  uhi. Nungba Sub-divn leh Tousem Sub-divn akipan eukhia a Vangaichungpao sub-divn ding a nget uah khua 49 om a, Longpi sub-divn ding a nget uah khua 33 om a, Ccpur dist. leh dist. dang khenkhat leng huamkha a, huaimunte tunitan tualtualtak a om in mipite’n govt. akipan development mulou uh a, mipi gentheite khawsuahna dinga UTLA(SK Thadou) in demand bawl ahihdan tuni sunnung in Press-te kimuhpih in gen hi. .
    SK Thadou in agenna ah Irang river a Inland water-way bawl ding leh Irang river lehdawh a Vantungbung leh Lenglong kawmtuah ding station khat chiat bawl dingin leng ngetna pia uh a, Barak river a Tuilongphai leh Kulbung mun a leng inland-water way bawl dingin ngen uh chi  hi. Old Kaiphundai village ah Water supply tank bawl dingin leng ngen uh a, thilngetna area ah mihing  8000 vel om mahle uh tuantual takin khawsa uh a, nam tuamtuam omte maban hoihzawkna dingin UTLA in Assembly Constituency leh Sub-division 2 a nget te kuapeuh in kithuahpih dingin ngen hi. UTLA/UTLF te’n  July 17, 2013 in  India govt leh  Manipur govt tawh MoU suaikai in Tamenglong dist. sungah Paniel designated Camp nei uhi.

Kha 1 sungin gari 221 kibehlap
Lamka, June-5: DTO/Ccpur office  May 2014 sungin gari 221 register thak in om a, huaite medium bus 3, medium truck 2, tractor 1, DI/pick up gari 5, 407 gari 3, taxi jeep 1,bolero 5, maxi cab 2, van 5, car 12, auto richshaw 12 leh bike/activa 170  tel a, huai sung mahin revenue Rs.11,83,943/- mukhia uhi. Huailou in DTO office  te’n April-May 2014 sungin revenue Rs.24,04,754/-mukhia in govt ah challan in submit uhi.

Lieutenant rank ah kipan
Lamka, June-1: Miss Thanglunkim Hangzo d/o H.Thawngkhanlian of Vengkhang, Pearsonmun in Command Air Force Hospital, Bangalore akipan Military Nursing zou in May 29, 2014 ni a commissioning service ah Lieutenant rank piak in om a,  Army Hospital, Dehradun ah tukha in join ding hi. Aman subject teng leh Practical paper teng ah Distinction mu in sangtak a zou hi’n kigen hi.  

Mipi pilvang dingin theisak
Lamka, June-5:Lamka khawpi sungah tulai a  van tuamtuam supply a pai Vai tamtakte’n plastic bawma kikoih mange leh chini/chikhum kihualkhawmte a bawm hoihtaka i et leh Rs. 60 kigelh mahleh kithaimang a,huchibang a kithaimang mukhate’n ana laksak ding leh  LATSEA #8974225922 a theisak dingin thutut kingah hi.

Mi 2 in Professor sepna muthak
Lamka, June-5: Dr. Elizabeth Hangsing d/o (late) L. Vumgin Ngaihte  of Gangpimuol leh
Dr. Hemkhothang Lhungdim in Deptt.of Education, Rajiv Gandhi University, Itanagar ah kum bangzahhiam  Associate Professor a sep nung un Professor din kaisang tuak uh chi’n thutut kingah hi. Prof. Dr. Elizabeth Hangsing  in NEHU, Shillong akipan MA & Ph. D zou a, Prof. Hemkhothang Lhungdim in JNU, New Delhi akipan  M.A.in Geography (1982), M.Phil, leh Ph.D.(1994) zou hi.

Dist Topper Award piak  hiding
Lamka, June-5: CCpur Dist Private Schools’ Assn.(CDPSA) saina in June 7, 2014 sun dak 12:00 in New Lamka a Dorcas’ Jubilee Hall ah tukum a HSLC leh HSE  examna sangpente  Dist Toppers Award piak hiding  hi. Huai ah Special Guest in DC/CCpur; ZEO/CCpur leh CJM/CCpur pang ding uhi.

Singpi man bikhiah thak
Lamka, June-5: CCpur Tea Hotel Assn.(CTHA) pawlin singpi man khansak a sawm ziakun  ADC/CCpur tawh joint meeting om nungin  CEO/ADC in singpi man bikhiah  hi.
Singpi san(red tea) nou 1 ah Rs.5/- ordinary  nou 1 ah Rs.7/-,special tea  nou 1 Rs.10 leh puri 1  Rs.5 hi a, CEO/ADC in singpi man abikhiah zuilo te section 49 of The Manipur (Hill area) Dist Council’s Act 1971 dungzui in action lak hiding hi.

Sangboi, MPS in City Police ah join
Lamka, June-5: Sangboi Gangte, MPS  probationer  in March 15, 2014 in SP/CCpur  office ah  joined  a, April 20, 2014 tan SP office a attach in April 21 apan zan tan Lamka Police Sation ah OC i/c len a, zan in Inspector Md Abdul Salam kiang ah charge pekhia in tuni’n City Police Imphal ah join hi. Sangboi Gangte in i/c OC/CCpur PS aletsung in Police Sation sung leh pua siangthoutak in koih  a, CCpur Police Station kichi signboard leng takkhe sak hi.
 
Trade licence check hi ding
Lamka, June-5: ADC/CCpur staff te’n June 7, 2014 zinglam dak 10:00 apan in khawpi sung ah group 4 kisuah in Commercial trade licence check ding uh a, group 1 ah mi 4 zel hiding uhi. Commercial trade licence check-na dingte- Tuibuong area, Zehang Bazar area, New Bazar area leh Damkam bazar area hiding hi.

Mun 2 ah World Environment Day
Lamka, June-5: Sielmat ah tuni zinglam in ‘One World-One Community’ chih thupi zang in World Environment Day kizang a, Ms Lalthazam, MCS; Ms Hevah Touthang, Lecturer Bethany Chr.College leh Ms Lalsiamliani. Jr Advocate te’n thugen  uhi. Huailou in CCpur Environment Society te’ saina in Beulahlane ah leng World Environment Day zatna om hi.

Education tawh kisai  meeting
Lamka, June-5: DC/CCpur makaih in tuni zinglam  in BRGF Resource Centre ah Education tawh kisai Dist Board of Education meeting om a, SDO teng leh  CEO ban ah SSA tawh kisai mi hunkhop tel uhi. Meeting ah SSA nuai a na kisemte, financial leh physical progress enkhawm uhi.

Army makaih in Environment Day
Lamka, June-5: 34-Assam Rifles-te saina in zan in Ainah a Army camp ah World Environment Day zat hi  a, tuni’n Thanlon khua ah zat in om  hi. Huai ah Environment Friends member 10 in uap in thugen  uh a, huai ah Village Authority leh student-te telin singnou tamtak suan uhi.

Ni 4 sung Manipur Express suaklou
Kumtenga kihih bangin Offset Printer minor repairing a kibawl banah News print khiakna dingin electric kizang thei ngeilou in Generator kia zat hi a, annual servicing  kibawl ni 2 sunga zawh kisawm himahleh kizou manlou in ni 4 sung hun lut a, huaiziakin June 2,3,4 & 5,2014 issue Manipur Express hong suah theihlouh ziakin poi kisa hi. Huchi ahihman in June 2014 fee leng Rs. 150 hilou in Rs. 130 hiding a bikhiah ahi hi.  

SUUNNA
Vungman (76) sister of Upa K.Nengkhan of Hebron Veng, New Lamka kalna in si a, tuni’n YPA Hanmual, New Lamka ah kivui hi.
Kaizagin (86) f/o (late) Nengzalian of Zion Veng, New Lamka lungtang na in si a, tuni’n YPA Hanmual, New Lamka ah kivui hi.

ADC-te dist HQ apan function din deih
Imphal, June-5: Tamei/Tousem Block Congress Committee te’n tuni’n Chingmeirong a  Tribal Research Institute (TRI) ah Tamenglong ADC a Chairman leh  Vice Chairman thak vaidawnna hun ah Dy Chief Minister Gaikhangam khuallian a pangkawm in a genna ah Manipur govt in ADC-te’ office teng district HQ chiat akipan function a nasem ding in deih  ahihdan gen hi.District tuamtuam a ADC Chairman leh Vice Chairman te’ banah member te’n koilailai hiam akipan vauna leh thil nuamlou taktak tuak in a nasepna uah nawngkaina tanpoha omthei mahleh scheme laka 50% tan bek semkhe teitei dingin hasuan hi.  Dy CM in ADC Tamenglong a Chairman thak  Humalibou leh Vice Chairman Jino Kamei kipahpihna thilpiak khenkhat leng pia hi.

PULF Army Chief-lui thah in om
Imphal, June-5 : People’s United Liberation Front (PULF) a Chief of Army-lui Md. Abdur (35) s/o (late) Jalil of Mayang Imphal Tirai Awang Leikai zan nitak dak 8:30 in meltheihlouh pawlkhat in a inn akipan samkhia in kap uh a, a gil ah thautang 2 lut in amun ah si chihthu om hi. Md. Abdur bel kum 2 paisa in  jail apan pawtkhia hi a, vengsung mipiten  khamtheih hih mi hidan in gen uhi. (UNA)

Khamtheih khakna din  Post office kizang
Imphal, June-5 : India gam mun tuamtuam akipan Manipur tungding damdoi khamtheih chi tuamtuam kikhakna dingin Post Office zat a omzel hi’n kigen a, zan in leng Imphal West Police te’n Post Office tungtawn a kikhak khamtheih Spasmo Proxivon (SP) tablets tamtak mukhia uhi. Thusuak in a gendan in Delhi akipan Chandel leh Pallel tung dinga kigelh  parcel box 4 dim  Post Office ah van  tung  a, huaite Post office staff te’n gari(Van) zanga thonkhiak a sawm uh Police te’n Lilong area  ah ana check uh a, huai ah parcel sung a khamtheih SP omte mukhia in mantang uhi. Huaite Gen Post Office ah hoihtaka etchet nungin asung ah SP tablets 15,000 om hi. Huai SP tangte Chandigarh akipan hong kikhak hi a, address kigelhte  bel diklou hi’n kigen a, tu’n  police te’n kemlel uhi. (UNA)

KSO ten govt. school-te inspection bawl
Imphal, June-5 : KSO Chandel district te’n Chandel district sunga govt school tuamtuam omte enkhia uh hi’n kigen a, June 3, 2014 in H. Kotlenphai village ahT. Seithang Haokip, Member/Tolbung Dist Council in inspection teamte flag-off hi. Huai ah KSO Chandel district President Doumang Haokip in Chandel district sunga govt school omte hoihtaka function leh function louh etkhiak hi’n gen a, qualify education sinsakna leng student-te piak hi uhiam chih suizui uh hi’n gen hi.Machi Block, Tengnoupal Block leh Moreh Block akipan member bangzahhiam in June 3, 4 & 5 in amau area chiat ah inspection pan uh hi’n leng gen hi.

Winger in mi 2 phulum
Imphal June 5: Kumbi P/S in a huamkhak Leikhong Mayai Leikai  zan nitaklam  dak 5.30 velin Tata Winger (No. MN05/2169) in lampi nawl apai mi 2 a phutkhak damzou loua si uh hi’n kigen hi. Phutkhak a om Koijam Tomba (60) s/o (late) Angou of Ithai Loukhong Mayai Leikai damdawi inn zuana puak ahihlai in lamkal ah si hi’n kigen a, Leishangthem Damu (50) s/o Leibak of Wangoo Napa Ching ahihleh a liamna thuak zoulou in tuni zingsang baihtak in RIMS ah si hi’n kigen hi.

NSCN(IM) te’ kiangah zukkik din  ngen
Imphal, June-5: All Manipur Fish & Egg Traders Assn (AMFAETA) leh Ema Keithel Shinpham Amadi Saktam Kanba Lup(EKSASKL) pawlin tuni’n  press conference nei uh a, EKSASKL pawlin kum tamtak paisa hun apan Mao akipan Imphal tan nga(fish) pua uh hi’n gen uh a, tuma deuh in NSCN(IM) leh business bawl khenkhat  kithuah te’n Dimapur a agent te’ apan nga leh aktui direct ala nawn lou dingin leh  amau kiang apan la ding in thupia uh hi’n gen uhi. Andhra Pradesh apan nga hong  kipuate’ Dimapur a agent-te’ tungtawn in Mao gate tan puaktung hi a, huai apan EKSASKL pawlte’n valasawn zel uh hi’n gen uhi. NSCN(IM) te’n gakna a bawl uh zukik dingin ngen uh a, AMFAETA in Union Home Minister, Manipur Dy CM banah  Anti-Corruption &Unabated Tax(ACUT) Nagaland te’ kiangah leng ngetna pe mahle uh tutan kilamdanna bangmah omlou hi’n gen uhi.

Zillai Day-cum-Felicitation programme tuni’n kizang
Lamka, May-31: IB Road a Synod Hall ah tuni zinglam dak 11:30 apan in Zillai CCpur Block saina in ‘75th Zillai Day-cum-Felicitation programme’ zat hi a, Chief Guest in LM Khaute, IPS, Addl DGP(Law & Order)/Manipur pang hi. Huai ah Guest of Honour in Soiminlian Lengen, MCS, SDO/Henglep leh Functional President in D.Khuala Vaiphei, Prog.Manager NRHM/CCpur pang hi. Tuni a programme zatna ah Zillai CCpur Block sunga 1st divn a passed Cl-X leh XII mi 100 valte kiang ah Certificate leh pakkhi piak hi uh a, Rev Yangkhongam Baite, Exe.Secy EMP in Pathian kiang ah thumsak hi.
LM Khaute in a genna ah nidang lai tawh teh in tuhun a siamsinte hampha mahmah in online, internet, TV, library tungtawn in thil tamtak zilthei uh a, hileleng online leh internet ahoihlou lam a zat khak ding kuapeuh pilvan poimawh hi’n gen hi. Class X & XII dinmun poimawh mahmah a 1st divn a passed teleng vangtah hile uh failed theih hi’n gen hi. Lawhchinna dingin tupguh, chitak leh kuhkalna poimawh hi’n gen hi. Class XII passed nungin stream(line) tuamtuam lakna ding ah nu-le-pate banah a theisa teacher leh officer-te dot poimawh hi’n gen a, tuhun a student-te tunung a gam leh nam makai banah saptuam makai dingte ahih ziakun mipi adia thilhoih sem thei dingin Pathian laukhawm in kuhkal, chihtak leh tupna hoihtak neikawm a laisim dingin student-te hasuan hi. Session-IIna ah Maniram Sharma, IAS, Addl DC/CCpur in ‘My life, my experience’ chih banah Alfred Jamlallun Khaute, MCS in’My struggle’ chih pansan in thugen hi.

HEADLINES
Class X & Class XII a topper 2te ’ Meritorious Award 2014 pia
Lamka, May-31: H. Mangchinkhup, EM, ADC/CCpur in anu-le-pa theihgigena ding leh a bialsung a siamsinte hanthawnna dinga Meritorious Award a patkhiak, ‘ (late) Pauzaching & (late) Lianzamang Hauzel Meritorious Award – 2014’ tuni’n Bungmual a a tenna inn ah piakkhiakna function om hi. Huai hun ah 16-New Lamka West ADCC bial apan position sangpen Ginsonmang s/o (late) N.Thonkhansuan of Lennuam veng, Bungmual in HSLC(Class-X) ah 79.4% mu in (late) Pauzaching Meritorious Award 2014 piak in om a, Doumangson s/o Thangzalian of Bethel Veng, New Lamka in HSSLC(Class-XII) ah 74.1% amuh ziakin (late ) H Lianzamang Guite Meritorious Award 2014 piak in om hi. H. Mangchinkhup in Meritorious Award ngah mi 2 te cash incentive Rs. 5000/- tuak banah Oxford Dictionary, Solar Light, leh Topper Certificate pia a, Rev. S. Vungminthang, General Secretary, EBC in Award ngah mi 2-te’ banah huai hun a student paikhawmte adingin vualzawlna ngetsak hi.
H. Mangchinkhup in student-te adia lawhchinna dinga poimawhpen laibu hahtak a sim ding hi’n gen a, Pathian phawk kawma tup-le-ngim kichiantak neih poimawh hi’n leng gen hi. Sinlai naupangte lawhchinna dinga lampi dik a pitu ding nu-le-pate’ hi’n gen hi. Laisiam a Ph.D i tam chiangin, ei tualsung thute gamdangte’n honthei ding uh hi’n leng gen hi.

Rev. S. Vungminthang tulai society paidan hoih lou in siamsinna lam ah kiakniamna nasa lua hi’n gen a, competitive mindset mangsaklou a,laisim hunta chi a, Society inleng education lam ngaih poimawh hunta chi hi. Tuni’n officer tamtak pension uh a, amaute thakheng ding omlou a, lawhchinna taktak koisan a om hiam chih zongkhe ni chi hi. Student-te’n leng naktak a laisim a, laisim mah nasep a nei ding a hasuan kawm in Pathian phawk kawm a laisim dingin hasuan hi.Haulianlal Guite, IAS, SDM/SDO, Mt. Abu in, siamsinna ah laisim kia hithei lou in laigelhsiam poimawh a, theihna lam ah laisiam mahlehang a gelhkhiak siamloute tuhun adingin laisiam in pom hilou a, anih a siam ngai hi’n gen hi.

Langkhanoau Guite, Chairman, ADC/Ccpur in siamsinna a poimawhdan gen in, amaute hanthawnna dinga a seppih in hibang Meritorious Award a hawmkhiakna tungah kipahpih ahihdan gen hi.Tuni a Meritorious Award hawmkhiakna ah saptuam makaite, khawtang makaite leh mi poimawh tuamtuam hunkhop tel uhi.

RKS Governing Body meeting om
Lamka, May-31:DC & Chairman, Rogi Kalyan Samiti (RKS) makaih in tuni’n Dist Hospital a Conference Hall ah Dist Level RKS Governing Body meeting om hi. Huai ah DC in Senior Citizen-te’ adin kalkhat in 2 vei OPD hon ding, Hospital campus ah mipi ading toilet bawl ding, Public Relation Officer 1 koihding leh Hospital gate kiang ah Police te’ duty-na mun ding bawl dingin lemsak pih hi. Meeting zawh in DC in Dist Hospital a ward teng banah casualty, blood bank, store room leh toilet omdan enkhia hi.

Singpi man khangsaklou din theisak
Lamka, May-31: CCpur Tea Hotel Assn pawlin June 1, 2014 apan singpi, puri-subji man khansak a sawm thu uah CEO/ADC in CCpur dist sung a singpi (tea) hotel neite’n singpi, puri-subji man himhim ADC/CCpur in revised a bawl masiah khangsaklou ding in theisak hi. ADC/CCpur huam singa hotel bawlte’n singpi, puri-subji man tulela kizang zah sanga tamzaw a khansak ualeh Manipur (Hill ares) Dist Council Act 1971 a Section 49na dungzui in action lak theih hi’n CEO/ADC in theisak hi.

Tedim-Chin nam makaite kimukhawm
Lamka, May-31: Tedim-Chin sunga saptuam, khaw hausa, TCYA, TCCC, ZoLS leh TCU makaite’n tuniin Lanva a Tedim Chin Cultural Club Hall ah ‘TCU Get Together’ nei uh a, Tedim-Chin namsung a siamsinna, khawtang leh thil tuamtuam a khanlawhna leh masawnna omtheihna ding genkhawm uhi. Session masa ah Rev. Dr. Enn Za Sian, MA, Ph.D; Rev. Dr. T.K. Muana, MA, PhD leh Khampu Hatzaw, Dy Manager, E/Dept in topic tuamtuam zangin thugen uhi. . Session 2na ah discussion hun om a, huai ah Tribe recognition, Tedim Chin Household Economic Census 2014, Zomi Literature Society / Tedim Chin Literature Society, Zolai Maw Tedim Lai Sinna, TCU Hqtrs office, TCCC Hall minzat ding, Khawdo, Sialsawm leh Zomi Nam Ni zatdan ding, Minam puan leh a zatdan, MIL Text Book for High & Higher Secondary telin thu tuamtuam genkhawm uhi.

SP office ah Police Control Room
Lamka, May-31: SP/CCpur office campus ah May 2014 khabul akipan Tower 1 kibawl a, tuni’n Police control room honna om in huai ah telephone No. 03874-233239 zat theih in om hi. Mimal leh pawl tuamtuamte’n Police tawh kithuzak theihna huai zat theih ding a, Police duty te’n apoimawhna mun delhzel ding uh hi’n kigen hi. Huailou in SP office ah Police deptt adia masa dingin ni 15 sungin Library hon hiding a, huai ah Law leh service matter laibu 50 vel koih masak hiding a, laibu behlap zel hidin SP in gen hi.

Tuni in Meithai Fellowship om
Lamka, May-31: Baptist Dorcas Fellowship, EBC Lamka South Divn saina in tuni zinglam in EBCC Dorcas Veng, New Lamka ah Meithai Fellowship om a, Rev Dr Sonna Langzakham, DS Lamka South Divn in hong hi. Huai ah EBC Lamka South Divn. huamsung a meithai tamtak tel in sharing hun ah mi ahunkhop in thugen uh a, Pastor K.Tualkhothang, Local Pastor, EBCC Dorcas Veng in thumna in hunkhak hi.

School kaitawp Bus in gawikha
Lamka, May-31: Tuni nitaklam dak 3.00 velin Kwakta a Anita Standard School a kai student khat school kaitawp a innlam zuanlai Lamka-Imphal kikal a Direct Bus service khat in a taklam khepek gawikha a, Ccpur Dist. hospital puaktung in om hi.

GSO’ Felicitation cum Inauguration
Lamka, May-31: Gangte Students Orgn in tuni zinglam dak 11:00 in Tuibuong ah GSO member Class-X leh XII lawhchingte kipahpihna nei uh a,huai ah Lambawi Gangte, MDC & Gen Secy, GTU Gen. Hq in GSO leh GTU office kithuah hongkhia hi.John Ganfte, Gen Secy GSO/CCpur in student-te’ kiangah certificate pekhia a, Upa Pauzalun Gangte in Class-XII lawhching 25 leh Class-X lawhching 16 te thumsaknei hi.

Training for Trainers nei uh
Lamka, May-31: ECA Office, Ccpur ah May 27 akipan zan tan in ‘Training for Trainers’ om a, Prabhat, Co-ordinator, Community Health Education, India & Aneng Haokip, YWAM te’n sinsak uh a, Rev. Dr. T.J. Haokip, Vice Chairman, ECA in hunkhakna nei hi.

KSO Singngat block in kipahpih
Lamka, May-31: KSO Singngat block te’n tutung a class X & XII passed- te kipahpihthu puang uh a, KSO Singngat block a 1st divisioner tengin June 3, 2014 tan in Jangpu Fin.Secy (8974465679) leh Letsei, Gen Secy (9436897634) kiang ah marksheet leh Admit card Xerox copy submit din theisak uhi. June 5, 2014 in Ginsuanhau , MLA (Singngat) tenna inn Lailam Veng a Felicitation program ah 1st divisioner te telchiat din theisak uhi.

SUUNNA
V.Siamthang (83) f/o Vungzamuan Valte, IRS of Zion Veng, New Lamka zanhal(May 29) nitak dak 11:10 in teknat in si a, zan in YPA Hanmual, New Lamka ah kivui hi.
Vungneiting (22) w/o Langminlian of Lanva zan nitak dak 10.30 in lungtangna in si a, tuni’n Lanva Hanmual ah tuni’n kivui hi.
Goihzavung (74) m/o B. Thangliankap of DHQ, Tuibuong tuzing dak 4.30 in kalna in si a, tuni mah in Tuibuong hanmual ah kivui hi.

IMPHAL NEWS
Tuni in CLP meeting om
Imphal, May-31 : CM Secretariat a Conference Hall ah tuni nitaklam dak 4.30 akipan in Congress Legislature Party (CLP) meeting om a, Lok Sabha election ah Congress puksia in BJP in govt bawl mahleh Manipur ah Congress MLA-te lung kelou ding leh MSCP akipan MLA 5 in Congress a zop uh thildik mah hi’n kigen pom uhi. Tuni a CLP meeting ah agenda genkhawm dinga gintak law & order tungtang genkhak hilou a, National Food Security tungtang leng genkhawm uh a,a lawhchinna ding MLA-te tungah kingah lian mahmah hi’n leng gen uhi. Tuni a CLP meeting dakkal 3 vel a sawt nei uh hi’n kigen hi. Manipur a Lok Sabha seat 2 ah Congress a lawhchin leng tuni a CLP meeting in lawhchinna thupitak hi a gen in CM tungah kipahthu gen uhi.

BJP ten power cut tawh kisai suizui deih
Imphal, May-31 :Narendra Modi in May 26, 2014 in nitaklam dak 6.00 a India Prime Minister dinga akichiam hun laitak in Imphal khawpi ah electric a mit ziakin mipi tamzaw in TV tungtawn in en theilou uh a, huaiziakin BJP Manipur Pradesh te’n ngaisiamlou uhi. BJP Manipur Pradesh makaite’n tuni in a office uah press-te kimuhpih uh a, thiltung hoihtak a suizui deihthu puang uhi. BJP President Th. Chaoba in Modi in kichiamna a neih ding kuan in electric mit a, kichiamna hun bei nungin mei painawn hi’n gen hi. Huai tawh kisai BJP Manipur Pradesh makaite lungkimlou in thil omdan suizui dingin Prime Minister kiang ah thutun uh chih ahi hi.

Health Minister in mun tuamtuam enkhia
Imphal, May-31: Health Minister Phungzathang Tonsing in tuni’n Lamlai leh Thongju Assembly Constituency sunga om Health Centre tuamtuam abanban in enkhia a, aman Yaingangpokpi Primary Health Centre ah Septic tank tellou toilet 4 mukhia hi’n thusuak in gen hi. Minister in Health Centre tuamtuam a phak hun ah Th. Biswajit,MLA(Thongju A/C), Ksh Biren,MLA(Lamlai A/C), Suher Akhtar,Principal Secretary(Health); Dr A. Bijoy, Director of Health Services leh CMO/Imphal East banah deptt a official tuamtuam hunkhop in zui uhi.

KSO Gen HQ makai thakte kichiam
Imphal, May-31: Kuki Inn, Imphal ah tuni’n kum 2014-2016 sung KSO Gen HQ vaipaw ding telna om hi, Huai ah President - Paotinthang Lupheng, Vice President - Sasang Vaiphei, General Secy - Seiboi Haokip, Finance Secy - Soilianlal Gangte, Education Secy - Thangminlen Suantak tel uh a, amaute’n kichiamna leng nei uhi.

BJP sungah buaina bangmah omlou –Th. Chaoba
Imphal, May-31: BJP party a leader khenkhat in Manipur Pradesh BJP President khenkhiakna ding in Delhi ah ki-camp uh chih tawh kisai Manipur Pradesh BJP President Th. Chaoba in a gendan in party lian leh pichingtak sung ah ngaihdan kibanglou om theimah hi a,himahleh tu dinmun in party sung ah kituahlouhna hi a gentham ching buaina thupi bangmah omlou hi’n gen hi.BJP in mi khat in mawhpuakna khat,mah a let ding chih chih thupi in nei a, tulela National President Rajnath Singh himahleh aman Minister dinmun a let ziakin tunung sawtlou party President hihna apan kitawp ding hi’n gen hi, Manipur a Lok Sabha election tawh kisai ah leng National Parliamentary Board in BJP candidate ding sehkhiak(select) hizaw in gen hi.

IRB te’n Slow loris hunkhia
Imphal, May-31: Senapati District HQ a DC security guard a om 4th IRB te’n May 29, 2014 in Senapati a ATM booth gei ah Slow loris (ganhing chi khat) om chihthu a zak ziakun va hunkhia uh a, Sanjenthong a Forest Head office ah vakoih uh chi’n People For Animal(PA) pawl in taklang uhi. Huai tawh kisai in PA te’n Zoo ah Slow loris koihlou ding leh gammang a khahzan zaw dingin ngen uhi.

Helpawl atel mi 2 mankhia
Imphal, May-31: PRO IGAR(S) thusuak in a gendan in 26-Sector nuai a 9-A/R te’n zan in Chandel a Pangal Basti mun a operation a bawlna uah PLA cadre khat mankhia uhi. Mat a om SS L/Cpl Sagolsem Kyau Se Uo@Pupu of Namphalan Seniya Kwe Village, Tamu hi a, amah apan .32 revolver leh atang 3 banah Chinese hand grenade mukhia uh a, Imphal West Police ah pekhia uhi.Huailou in 9-Sector nuai a 12- Bihar te’n Patsoi apan NNC cadre SS Sgt Acham Kamei @ Aghuangthai Kamei(20) of Oktan/Puichi, Tamenglong mankhia in Patsoi Police ah pekhia uh hi’n kigen hi.