ZC te’n Thangso Baite’ lawhchin kipahpihna hun zatpih uh
Lamka, May-29: Zomi Council Gen HQ makaite’n tuni zinglam in 16th Lok Sabha Election ah Outer Manipur bial apan MP a telching a om nawnThangso Baite’ inn Hmar Veng ah kipahpihna programme zatpih uh a, ZC Chairman LB Sona leh Speaker K.Willian in Mrs & Mr Baite ‘Zomi Puandum’ silhsak uh a, Re.v Dr. B.Luaichinthang, Chairman, ZOLLS in Thangso’ adia vualzawlna ngen in alutung ah khut nga in thumsak hi.
Thangso Baite in agenna ah term paisa ah 2.5 lakh val vote mu in telching himahleh tutung in akinaihpihpen sangin vote 15000 val zek a tamzaw mu in telching a a om ziakin manpha in value neizaw hi’n gen a, aziak bel tunung in CCpur dist ah ‘nou’ ‘kou’ chih omlou in mipi kituaktak a a pankhawmna in gen thupitak nei hi’n gen hi. Mipi adia hoih gen-le-sak ding omte ZC makaite’n thuzak zelding in ngen hi.
LB Sona in tutung MP election ah mipi’n theihtawp suahin panla a, huai dungzui a lawhchinna leng mipi’n kipahpih petmah hi’n gen hi. Mipite kithutuahna leh pankhawm ziak a Pathian in lawhchinna hong pia hi’n gen a, maban ah MP pa’n mipi, gam leh nam adia thilhoih tamsem semkhe ding leh Pathian lau leh zahtak kawma nasem din deihsakthu gen hi. Program zawh in Thangso Baite’ in ZC makaite an nekpih hi.
Mizoram Minister in MPC Sub-HQ Zone-I hongkhia
Lamka, May-29: Mizo People Convention(MPC) Sub-Hqtrs. Zone-I tuni zinglam in Chiengkonpang Community Hall ah R. Romawia, Minister(Higher & Technical Edn, Land Revenue, Art & Culture and Parliamentary Affairs) Mizoram in hongkhia a, Rev. R. Lalnunmawia, Sr. Executive Secretary, MPCS in Sub-HQ leh makaite adi’n thumsak hi.
Chief Guest in a genna ah Chief Minister Lal Thanhawla makaih Mizoram govt in lemna-muanna deih in,mun tuamtuam a Mizo mipite enkai a, Manipur a Mizo mite tunga helpawlte’n buaina a tutlouh uh deihthu gen hi. Aman pau-le-ham kibang kei mahleh social life leh tawndan apan namkhat ihihdan kilang chi hi. Mizoram ah MPC in nam kipumkhatna dinga panla in abikin unau Gangte namte’n kipumkhatna dia a panlakna ziakun kipahthu gen a, Mizoram Assembly thupukna bangin Mizo nam ah Gangte gelhlut a om in Mizo a simtel leh pom a om hi’n gen hi.
P.Kaizamang, Secretary(Interim Body), MPC Sub-HQ in report a piakna ah Oct 12, 2011 a thupukna dungzui in Manipur ah MPC dinkhiak hi a, huainung in mun tuamtuam ah meeting om in, tuni a kihongkhia MPC Sub-HQ Zone-I sungah milip 8000 vel om a, Unit dang honkhiak theihna ding munte ah leng milip 12,000 om hi’n gen hi. Tuni a hunzatna MPC Sub Hq Zone-I a President Thangpau telin makai 15 leh MPC Zone-I sunga mipi tamtak tel uh a, YMA Manipur Branch, Mizo Literature Society, MZP leh Mizo sunga pawl tuamtuam makaite’n uap uhi.
ATM Booth thak honkhiat in om
Lamka, May-29: H.Mangchinkhup, EM, ADC/CCpur in tuni zing dak 7:00 in New Lamka a Dorcas Hall kong ah SBI/CCpur nuai a omdin ATM Booth thak hong a, Rev S.Vungminthang, Gen Secy EBC in Pathian kiang ah thumna in laan hi. Huai hun ah H.Mangchinkhup, S.Kaikhanthang, Chief Manager, SBI/CCpur, Rev S.Vungminthang leh M.Luahkhanchin, Secy ,YPA New Lamka Block te’n thugen uhi.
H.Mangchinkhup in abial sungah khantouhna leh thilthak hong om kipahthu gen a, ATM booth kihong khethak SBI/CCpur te’ akia hilou in azangding mipi a hizaw a, kuapeuh in kembit chiat dingin ngen hi. S.Kaikhanthang in kum 30-40 paisa hunlai a thilte’ eilak ah muhtheih a omta hi’n gen a, baihlam taka sum draw khiat theihnang SBI/CCpur branch in ATM 7 mipi zatding a koihta hi’n gen hi. Maban ah leng mun bangzah hiam ah ATM booth koih hiding a,Lamkha khawpi ah akigawm in ATM 15 koih hiding in gen hi. Tunia ATM booth kihongthak, azangtu ding mipi, V/A leh YPA makaite’n enkai a, a phatuam theipen a zang ding in deihthu gen hi.
Rev S.Vungminthang in SBI/CCpur te’n Dorcas Hall mai zeka ATM booth a koih uh kipahthu gen a, kuaman hihse mailou in aphatuam theipen a zangchiat dingin mipi ngen hi. M.Luahkhanchin in agenna ah New Lamka sung ah ATM booth a kihonkhiat kipah thu gen a, mipi adia thilhoih ompen kuapeuh in kembit a, YPA New Lamka block in ahi theitan a ATM booth bitna din panla ding hi’n gen hi.
Topper 2 in Award ngah ding
Lamka, May-29: H. Mangchinkhup,Executive Member,ADC/CCur in anu leh apa(late Pauzaching leh late H. Lianzamang Guite) theihgigena dinga Meritorious Award a patkhiak sunzom zel a,16th New Lamka West ADCC bial sunga om BSEM saina a Classs X/HSLC examna a sangpen(topper) leh COHSEM saina a Class XII/HSE examna a sangpen kiang ah May 31, 2014(Kiginni) zinglam dak 11.00 in Bungmual a a inn ah Meritorious Award piakkhiakna leh amau adia thumsakna hun zatpih ding hi’n thutut kingah hi.
1 Day Dist Consultative Meeting
Lamka, May-29: Manipur Alliance for Child Right CCpur Chapter (MACR-CC) leh Red Shield Divn. saina in tuni in Tuibuong a Dist Training Centre ah‘1 Day Dist Consultative Meeting on Juvenile Justic (JJ) Act, POCSO Act, Substance Abuse Act and Role of the Media related with the existing Acts ’ kichi om hi. Huai hun ah K.Kabib, IPS, SP/CCpur in ‘Role of the Police in the Enforcement of JJ Act and POCSO Act’ chih pansan in sinsak a, Pishak Singh in ‘JJ Act and POCSO Act’; Rev Dr Nicky Thanga in ‘Substance Abuse Act’ leh Pradip Phanjoubam in ‘Role of Media Related with the Existing Act’ chih pansan in sinsak hi.
75th Zillai Day-cum- Felicitation prog
Lamka, May-29: Zillai CCpur Block saina in May 31, 2014 zinglam dak 11.00 in IB Rad a Synod Hall ah 75th Zillai Day-cum- Felicitation programme om ding a, huai ah LM Khaute, IPS, Addl DGP/Manipur; Soiminlian Lengen, MCS, SDO/Henglep leh D. Khuala Vaiphei, Prog. Manager NRHM/CCpur te’n Chief Guest, Guest of Honour leh Functional President hihna tawh uap ding uhi. Huai hun ah Maniram Sharma, IAS, Addl DC/CCpur leh Alfred Jamlallun Khaute, MCS in leng thugen ding uhi. Huai ah Zillai CCpur Block sunga Cl-X leh XII 1st divn a passed-te pahtawina leng om ding hi.
Office file tamtak lakhia: June 2 tan hunpia
Lamka, May-29: CCpur Dist Students’ Union (CDSU) volunteer te’n tuni sun dak 12:00 vel in ZEO office apan file leh document tamtak pawkhia uhi. Amau ZEO/CCpur nuai a school 41 a sem teacher 227 vel apost utawh mun tuam a kisuan dinga govt in order a suah June 2, 2014 tan a cancel ahih kei leh ZEO office leh school 10 apan file leh document poimawh tuamtuam a lakkhiakte uh haltum ahih ding banah kiphinna in zui ding hi’n taklang uhi.
SSPP Suangdoh Block Meet
Lamka, May-29: SSPP Suangdoh Block Meet 3veina leh Class X passed-te kipahpihna program May 30, 2014 in Suangdoh khua ah omding a, Haulianlal Guite, IAS, SDO/SDM Mt Abu(Gujarat) khuallian hiding hi. Huai ah Functional President in Dr G.Chinkholian, Chief of Suangdoh, Guest of Honour in Lalrobul Fimate, MCS, SDO/Singngat leh Chief Host in Lianzapau Samte, President, SSPP Gen HQ pang ding hi. Tutung a class X passed-te kipahpihna leh Award hawmna leng om ding hi.
TCU makaih in Get Together
Lamka, May-29: Tedim Chin Union, Gen HQ inntekna in May 31, 2014 in Lanva a Tedim Chin Cultural Club Hall ah TCSA, TCYA, TCCC, TCLS/ZoLS leh Unit makaite’n Get Together nei ding uhi. Huai ah Rev Dr.Enn Za Sian, MA Ph.D; Rev. Dr. TK Muan, MA Ph D; Khampu Hatzaw, Dy Manager Electricity deptt; L.Nang Lian Thang, MPS ban ah Hausa 6 apan thugenna om ding hi. 2nd Session ah TCSA, TCYA, TCCC, ZoLS, ZSF makaite akipan report om ding a, thu poimawh tuamtuam-Tribe Recognition; Tedim Chin Household Economic Census 2014; Zomi Literature Society/Tedim Chin Literature Society; Zolai maw Tedim Chin Lai sinna; TCU HQ Zumpi min phuah ding thu; TCCC Hall min ding leh puah ding thu; Khawdo, Sialsawm leh Zom Nam Ni zat ding thu; H/S leh Hr Sec School ah MIL Text thu genkhawm ding uhi.
250-KV Transformer kisia
Lamka, May-29: EBCC Pethuel, Vengnuam South, New Lamka khang zeka kizang 250-KV transformer zan in kisia a, tuzing in Vengsung mipi leh deptt-te pangkhawm in akisiatna bawlding in pawkhia uhi. 250-KV transformer kisiat ziakin huai in a supply khak electric meivak zangtu innkuan 300 valte’n electric meivak ngahlou in om uhi.
Bomb hihkhelh ziakin mi 1 liam
Lamka, May-29: India leh Myanmar gamgi zula Theigothang post a om 25-Madrass Regiment te’n tuni’n 81 mm Morter a kapna uah hihkhial kha in morter tang in Army personnel 1 a gawl(throat) kapkha hi’n kigen a, gim mahmah in Helicopter a puakkhiat ngai hi’n thu kiza hi.
Gospel Concert nei uh
Lamka, May-29: EBCC Bungmual nuaia Tualsung Baptist Youth Fellowship (TBYF) te’n July 2014 kha a ‘Tuailai Hotdamna Camp’ a neihsawma utawh kisai in tuni nitakin Bungmual EBCC Biakinn huangsungah fund drive na in Gospel Concert nei ua, huai ah Bungmual khawsunga lasiam tuamtuamte’n lasa ua, mipi leng tam mahmah in biakinn compound ah talou uhi. Tuailai hotdamna camp neih hunah K. Kamchinkhup Director of Ministries EBC leh T. Damkhothang Lecturer GBC te’n thugending uhi.
Felicitation-cum-Seminar om
Lamka, May-29: D. Vaison khua ah tuni’n Christ Ambassadors(Youth Deptt),North Eastern Dist(NED),Assemblies of God,East India(AGEI),Manipur-te makaihna nuai ah Class X & XII zouthak student-te adin ‘Felicitation-cum-Seminar on Career Guidance’ om a, huai ah Rev DH Haokip,Supdt.,NED,AGEI(M) in lawhchinna dingin Toupa laukawm a lampi dik zui dingin student-te hasuan a, Rev Ngamthang Haokip,Secretary,NED,AGEI(M) in student-te adia vualzawlna ngetsakna thumna hun zang hi.Career Guidance Seminar hun ah T. Lalboi Haokip,Dist Co-ordinator,CBDAP/DSSS; K. Haopu Gangte, Dist Project Officer,NYK/Ccpur; James J. Doungel, Secy, Lions Club(Great CCpur) in topic tuamtuam zangin sinsak uhi.
STC BSF 6te’n thaukap sunzom ding
Lamka, May-29: Subsidiary Training Centre(STC) a BSF jawan training lel laite’n Mission Compound suahlam banahPearsonmun, Mualkoi leh Gangpimoul apan sim-tum lama om Firing Range ah thau chituamtuam leh bomb a kap uh June 1, 2014 akipan June 15, 2014 tan sunzom ding uh hi’n thusuak om a, huai hunsung un Firing Range mun leh a kiangnai ah kuamah pailou ding leh ganvulh leng khahzanlou dingin DIG, STC BSF in theisak hi.
UKRA-KNO in suspend uh
Lamka, May-29: SBB Kom, Secretary(Info & Pub) UKRA-KNO in thusuah a bawl Press a kimu in a gendan in May 18, 2014 a KNO armed wing UKRA Cabinet meeting thupukna dungzui in UKRA a active cadre Pvt L. Khupneilun in @ Lulun Kom in UKRA-KNO kivbaipuakna dan(rules & regulation) a bawhsiat ziakin May 18, 2014 akipan a case phiat(liquidated) ahih masiah suspend a om hi’n puang hi.
Huchih dungzui in Pvt L. Khupneilun in @ Lulun Kom in suspend ahih sungin a gamtatna himhim amah mawh kipuak ding a,Pawlpi dan kalh a a gamtat leleng akituahpih bang action laktheih hiding chi’n thusuak in gen hi.
Manipur Express office kikhak ding
Manipur Express kiphuhkhiak nung kum 33 chinna(33rd Anniversary) ziakin May 30, 2014 in Manipur Express office kikhak ding hi.Huaiziakin May 31,2014 issue hong suaklou ding a, issue masa June 1, 2014 in hong suak ding hi.
IMPHAL NEWS
Battle of red hill kichi hun zatna om
Imphal, May-29 : Bishnupur disrict sung Nambol kianga Maibam Lotpa Ching ah tuni in Tourism Forum leh 2nd World War Imphal foundation-te saina ‘anniversary of the battle of Maibam Lotpa Ching’ zatna om a, huai ah Manipur Governor VK Duggal, Chief Minister O. Ibobi leh N. Loken,MLA( Nambol A/C) Chief Guest, Functional President leh Guest of Honour in pang uh a, May 1944 in huaimun a Japan sepaihte leh Allied Force-te kidouna a sepaih site zahna pia uhi. Huai kidcouna a tel Japan sepaih 500 lak ah 40 lel dama suakta uh hi’n kigen a, Allied force atel British sepaihte lakah India mi adiakin Gurkha sepaih tamkhop tel uh hi’n kigen hi. Huai Anniversity hun bel kha 3 paisa apan zat hi a, tuni’n a tawpni hunpi zatna om hi’n kigen hi.
Bomb puak ah mi 1 si; 15 liam
Imphal, May-29 : Singjamei Chinga Makhong Market shed ah tuni nitaklam dak 5:20 velin meltheihlouh helpawl hidia gintakte’n migrant worker(kilawh a nasem Non-Manipuri) te lakah bomb khat va pailut uh a, tua bomb puakzak ziakin nasem a om mi 2 si in midang 15 liam uh hi’n kigen hi. Bomb paihkhum hi a kipuang kuamah omlouh banah kuate thilhih hihiam chih leng theih hilou hi. Thutut kingah dungzui in Bihar a Muzaffarpur khawmi Arvind Rai (20) s/o Shankardip Rai leh Shyam Shankar Rai (32) s/o Sinahi Rai a liamna uh thuak zoulou in RIMS tut nungin si uhi. Sanjay Roy (20) s/o Jugindro Roy ofMuzaffarpur; Bhulinder Roy(32) s/o Jina Roy of Muzaffarpur; Papu Shah s/o of Gula Shah ofMuzaffarpur; Thongam Bimol (54) s/o late Samu ofSingjamei Waikhom Leikai; Chanam Bimol (23) s/o Iboyai of Ngairangbam; Maisnam ongbi Manisana (55) w/o of Bono of Chingamakha Maisnam Leikai leh Th Shyamkanhai (51) s/o late Babu of Chingamakha Oinam Leirak tu’n RIMS hospital a etkol hi uh a, midang 8te ahihleh a liamna uh a serious louh ziakin JNIMS, Advance Hospital leh Iboyaima Hospital a 1st aid piak zawh in paisak hi uhi.
Director General A/R in hongzin
Imphal, May-29 : Lt General RK Rana, Director General of Assam Rifles in ni 2 sung om dingin zan in Manipur hongpha hi. Aman Mantripukhri a Assam Rifles-te HQ pha a, security dinmun tawh enkhia hi. DG A/R in Assam Rifles ten civic action tawh kisai a developmental projects a neihte kipahpih mahmah ahihdan gen hi.Lt General Rana in huaima deuh in Manipur Governor VK Duggal leh Chief Minister O. Ibobi atuam tuakin kimuhpih a, Manipur a om Assam Rifles-te panlakdan leh civic action programme tungtawn a mun tuamtuam a nasep khiakte tawh kisai leng genkhawm uhi.
Th. Chaoba khenkhiak dia panla om
Imphal, May-29: BJP Manipur Pradesh a President Th. Chaoba in dictatorial taka a om ziakin tutung Lok Sabha election ah BJP candidate 2te minsiat-huai taka vuallel uh chi a Central leader-te laka thu tut banah amah khenkhiak ding deih in BJP Manipur Pradesh a Prersident-lui mi 3 - M Bhorot, H Borbabu leh Sh Santikumar tulelin Delhi a om in panla uh chihthu om hi.
Alehlam ah BJP Manipur Pradesh President Th Chaoba, General Secretaries Ashwinikumar leh L Basanta in Prime Minister Modi kichiam hun a tel kawm dia Delhi a zin leng tuni tan in omlai uh a, tuni nitaklam in Union Home Minister Rajnath Singh kimuhpih in Manipur akipan Armed Forces Special Power Act lakkhiak ding in genpih uh chihthu om hi.Amau zan in Union Transport Minister Nitin Gadkari mu in National Highway 2 leh 37siat ziaka Manipur mipite’n haksat lianpi tuak ahihdan genpih uh a, Union Minister in lamlian omdan enzui ding hi’n ana genpih chihthu om hi.
Elective subject ah NSS tel ding
Imphal, May-29: National Service Scheme(NSS) poimawhdan khawtang(society) leh student te’n a theihsiam sem uh deihna ziakin India gama University tuamtuam ah tunung sawtlou in Elective Subject khat hiding chih ahi hi.New Delhi a Vigza Bhawan ah state leh Union Territories(UT) teng akipan Secretaries/Ministers of State/In charge-Sports leh Youth Secretaries tengin Annual Conference a neih hun uah huai thu genkhawm uh a,huai sutzopna in India gama Zone tuamtuam 5 omte ah a banban in Workshop om a, a nanungpen June 6-7, 2014 in Chandigarh,Allahabad leh Mumbai a Bombay University ah om ding hi.Zonal workshop zawh in Assn of Indian Universities pawlin University Grants Commission(UGC) phalna a piak dingin ngen ding uh a,huai lawhching din lam-et ahi chi’n Dr Ch. Ibohal Singh,Programme Co-ordinator,NSS cell, Manipur University in Press Release suah hi.
