Thutak gumchiat di’n K. Zou in ngen
Lamka, May-28: K.Zou, Jt Convenor, AAP Manipur in CCpur mipi kuapeuh in thutak gum a pangchiat dingin ngen a, thutak, thudik gumtu omlou in na kisemtheilou hi’n gen hi. K.Zou in Lamka khawpi a petrol pump thu DC ah report abawl ziakin Petrol pump a thautui leitheih dingzah DC in bikhiah a, huai ziakin thautui (petrol/diesel) omta a, mipi’ laksatna dang LPG thu leng DC kiangah genkhin a, agency-te’n home delivery bawl dinga sum kipia himahleh tutan home delivery bawl nailou uh hi a gen in K.Zou in amah panlakna thudik kuaeuh in gum a thuap chiat dingin ngen hi. Gam bawlhoih i ut leh thutak gup ngam ngai hi’n leng gen hi.
DHS 1st Governing Body Meeting om
Lamka, May-28: DC/CCpur makaih in tuni’n DC’s office a BRGF Resource Centre ah kum 2014-15 adia Dist Health Society Governing Body Meeting masa om hi. Huai ah tuma a Governing Body meeting resolution etkhawmna,NRHM/DHS block 5 a nasepte report-na om hi. Meeting ah Dist Hospital, CHC, PHC leh PHSC teng ah Mother & Child Protection Card zat ding, CMO kiangah staff tengin kalmasa tengin attendance report ding,Block tengah leng Village Health Nutrition Day zatdin thupuk uhi. Work Plan & budget 2014-15 thu ah central govt in approval a bawl nailouh ziakin tunung in awla genkhawm dingin thupuk uhi.
Doc. submit loute’ pay held-up ding
Lamka, May-28: Addl Director of Education (S) Hills in order a suah dungzui in Seniority list adingin educational certificate leh appoinment letter telin document poimawh tuamtuam May 2014 kha sunga submit lou Hills district asem teacher-te’ khalawh(pay/salary) hentang (held-up) hiding chih hi. CCpur dist ah document kimlou teacher 35 telkha uh a, document poimawh teng submit masiah a lawh uh hentang(held-up) hidin kigen hi.
Sinkha sungah suang tamtak lakhia
Lamka, May-28: Surgeon Dr Seanbawi leh Nandamani Singh in zan in Dist Hospital ah Damngaihvung @ Vungnu (45) w/o N. Khamsuan of Medical Compound hun sawttak damlou operation bawl uh a, sinkha(gallbladder) abelh suang liansim 7 leh avui tamtak lakhia uhi. Vungnu’ in a sinkha ah huai zah suang om a, tutan a damlai lamdang sakthu gen a, a theikha leh mukhate’n leng mihing sinkha ah huai zah suang om lamdang sakthu gen uhi.
DC makaihna in Bank tawh kisai meeting omding
Lamka, May-28: DC/CCpur makaihna in May 30, 2014 zinglam dak 11:00 akipan in DC’s office a BRGF Resource Centre ah Bank tawh kisai Dist Consultative Committee (DCC)/Dist Level Review Committee (DLRC) quarter meeting omding hi. Huai ah CCpur dist a Bank tuamtuamte’ nasepdan, govt’ sponsored program tuamtuam March 31, 2014 tan a genkhawmna, social benefit scheme tuamtuam a bank account hon thu , RBI adopted village thu, BSETI nasepdan, CCpur Dist a bank branch tuamtuam ah population 2000 tan pahzoulou te tungtang, March 31, 2014 tan a CCpur Dist ACP 2013-14 achievement etkhawmna, bank tuamtuam ah kum 2014-15 a Annual Credit Plan/Dist Credit Plan ding leh adangdang genkhawm ding uhi. Huai hun ah CGM (RPCD) BRI, Guwahati; Lead Bank Manager, CCpur; Lead Bank Manger UBI, Imphal; DDM, NABARD; CCpur Dist a bank tuamtuam apan Branch Manager-te; CEO; SBO/BDO te, Line Deptt tuamtuam-Agri, Horti, Seri, Forest, Fishery, Vetry, Co-op, DIC, KVK; RBI Adopted Village a officer-te leh MP, MLA te’representative telding uhi.
Association 2 in joint meeting nei
Lamka, May-28: Hill Town a Tipaimukh Road Area Transport Development Assn. (TRATDA) office ah tuni sunnung TRATDA makaite leh Tipaimukh Transport Co-op Society, Hmar Biel makaite’n joint meeting nei uhi. Huai ah Tipaimukh line a gari tuahsia leh buaite kihilhtuah a pangkhawm din thupuk uhi. Tununga joint meeting om hun ah Assn 1 a kigawm ding thu genkhawm ding uhi. TRATDA nuai ah Tipaimukh Road a service Bukpi khua tan a pai ni 1 in passenger pua Mini-Bus, DI gari, Tata Sumo leh 407 kigawm 13-15 kikal taituah gige uh hi’n kigen hi.
CIPET form laktheih
Lamka, May-28: Central Institute of Plastics Engineering & Technology (CIPET) in academic session 2014-15 ading training course adia application a sap utawh kisai form tamlou hongtung a, adeihte’n Manipur Express office ah zinglam dak 10.00 akipan nitaklam dak 6.00 kikal in laktheih ding hi.
Staff 3 khakna neih hiding
Lamka, May-28: NRHM/DHS asem mi 3-D.Khuala Vaiphei, DPM; Thongkhenmung Hanghal, BFM, Senvon PHC leh Ngamminthang Haokip, BDM, Samulamlan block te’n sepna hoihzaw a muhziak un NRHM/DHA tawpsan ding uh hi’n kigen hi.CMO office a Mini-Conference Hall ah May 29, 2014 sun dak 12:00 in a seppihte un mi 3te khakna kawm in ankuang pumpih ding uh hi’n kigen hi.
Ui a pelhna lam in accident
Lamka, May-28: Biakmawi(25) d/o Kamkhozam of Hebron Veng, New Lamka in tuni sunnung dak 1.30 in D.Phailien ah Activa a tailai accident hi. Biakmawi leh alawmnu Traffic Police hi uh a,duty zou Tipaimukh road tawn a innlam zuanlai ui khat lampi kantan dia kisa a pelhna lam uah accident in Biakmawi amai leh a veilam khut naktakin liam a, helmet a khuk leng kisia a, alawmnu liamkei mahleh a tuanna uh gari leng kisia chih ahi hi.
Suunna
Suanlunthang (7) s/o Songzaphung of Bethel veng, Bukpi village(Thanlon sub-divn) May 18, 2014 zingsang in school kaidia kuanlai Bike in phukha a, Lamka tut nungin Imphal ah referred hi a, May 21, 2014 in Shija Hospital a operation kibawl in ICU a etkol a om dam zoulou in tuni suunnung dak 1:00 velin si hi.Aluang tuni nidak 7.00 velin Bukpi a vuidi’n kipua a bialtu MLA Vungzagin Valte, Parliamentary Secy in siluang puandum in tuam a, Bukpi tan siluang puakna din gari ngaihtuahsak hi.
IMPHAL NEWS:
BJP Manipur Pradesh makaite’n Central a Minister tuamtuam mu
Imphal May-28: Th. Chaoba makaihna BJP Manipur Pradesh team in Central a Minister tuamtuam mu in Manipur akipan Armed Forces Spl Powers Act(AFSPA) lakkhiak ding tawh kisai genkhawm in panla uh ahihdan BJP Manipur Pradesh a Gen Secretary Ashinikumar akipan phone tungtawn in thutut kingah hi. BJP team in DoNER incharge VK Singh kimuhpih in dakkal 1 vel development tawh kisai genkhawm uh a,huaizawh in Minister of State(Home Affairs)Rajiju tawh Manipur dinmun tungtang genkhawm uh a, aman Union Home Minister Rajnath Singh tawh leng genkhawm ding in hasuan hi. BJP Manipur Pradesh teami tulela Delhi a omte bel President Th. Chaoba, General Secretary (Media Affairs) Bashanta Laimayum leh General Secretary(Adm) Ashinikumar hi uhi.(UNA)
Tedim Road ah eviction kipan
Imphal, May-28: Imphal khawpi sunga Keishampat leh Malom kikal Tedim road keklet(widening) ding tawh kisai in District administration in kihemkhe ding a hunchiam a piak uh a beitawh kiton in tuni’n Tedim Road a Imphal Airport Road kimlak eviction bawl in om hi. District Administration in May 26, 2014 tan in lamlian naihlua a om inn leh structure tuamtuam neitute’n hemkhe dingin theisak a, hun bikhiah sunga kihemkhe loute bulldozer zang in eviction bawl uhi. Huaiziakin lampi kekletna ding in a huamkhakna sunga inn leh van omte leng phuse vek uhi.
Mela ah mi 480 valin Passport ngen
Imphal, May-28 : Imphal a 1st M/R Banquet Hall ah 2veina ding in May 26 akipan tuni tan Passport Mela om a, huai hunsung in passport deih mi mi 480 in application khia uhi. Huai ma February,2014 kha in passport mela om a, huai ah mi 524 in application khia uhi. Tutung a Passport Mela hun ah Guwahati a Regional Passport Officer in leng uap a, aman a gendan in passport application 480 te hoihtak a police verification bawl zawh in Guwahati a thon hiding a, huai apan Kolkatatung ding hi’n gen hi.
Students orgn-te’n exam thak ahih deih
Imphal, May-28 : MPSC saina a Manipur Civil Services Combined Competitive(Prelims) examination, 2014 ah thil diklou om ziakin nawngkaina lianpi om hi a taklang kawmin huaiziak in examna a om thak deih thu puang uhi. Manipur a students organisation tuamtuam ATSUM, AMSU, DESAM, KSA leh MSF ten AMSU HQ ah press-te kimuhpih in amau MPSC heutute kiangah maban a Mains exam om ding form hawmkhe nawnlou phot ding in theisak uh a, a thilphut uh pichin ma form hawmkhiak phal hinawnlou, chi uhi. MPSC Secretary Shyam Lal Poonia in print-na dia printer kizang a buai ziak hidan in gen a, huai pen blacklist a om ahihdan genkawm in maban ah hibang thil tun sak nawnlouh hiding in gen hi. Students pawl tuamtuam in bel Prelims exam thak ding mah deih in phut uhi.
All Manipur Engineering Deptt Union Council pawlin panlak sunzom zel
–AMEDUC
Imphal, May-28: Electricity, PWD, IFCD, PHED, MI kigawm All Manipur Engineering Departments Unions’ Council(AMEDUC) akipan thusuak in Manipur government nuaia Engineering deptt tuamtuam a workcharged,muster roll leh casual a kum 20 sung sem tamtak omte’n hamphatna a ngah ding bang uh a ngah theihna ding un AMEDUC in tawplou in panlak sunzom zel hi’n puangh hi. AMEDUC in kum 20 sung workcharged,muster roll leh casual a semte a sepna uh regularised ahih thil kilawm leh ahiding mah ahi a, huai lawhchin masiah AMEDUC in tawpsan mailou in maban ah leng panlak sunzom zel ding uh hi’n leng thusuak in taklang hi.
