DC in LPG tungtang enzui ding
Lamka, May-26: PK Jha,IAS, DC/CCpur in CCpur dist sunga LPG Agency 2 te akipan mipi’n LPG cylinder a ngahdan tunung sawtlou in enzui ding hi’n gen hi. LPG guideline dungzui in LPG Agency te’n consumer-te’ doorstep ah cylinder piak ding chih hi a, Manipur singtanggam a dist dangte ah kizang theikei mahleh CCpur dist ah LPG Agency te’n inn-mun ava pethei uh hi’n gen hi.
India gam pumpi ah subsidized rate in innkuan 1 in kum 1 sungin LPG cylinder 9 ngah ding chihthu leng CCpur dist ah bang dinmun hihiam; gas lakzawh nung booking hun, ahawmkhiat hun (timing) chih telin tunung sawtlou in Agency 2 te tawh kihoukhawm ding uh hi’n DC in gen hi. DC khualzin tuni’n hongtung a, office leng tuni mahin kai hi.
Kolkata High Court judge hongzin
Lamka, May-26: Kolkota High Court a Judge semlel Justice AK Dasadhikari in azi leh a ta hong Manipur hongpha in tuni zinglam dak 11:00 in Imphal apan Lamka hongpha uh a, Khuga Dam tan vapha in Khuga IB ah tawldam uh a, sunnung in Imphal ah kiknawn uhi.
LATSEA ten tehna diklou zanga vanzuak mankhia
Lamka, May-26: LATSEA pawlin tuni zing dak 7.00 velin Apollo Veng lutsukna bul Tedim road ah tehna diklou zanga antang (rice) zuak om chihthu report zak ziakin va enkhia uh a, huai ah antang zuak nupi khat in van zuak theihna ding trade licence a neihlouh banah tehna diklou zangin antang zuak a, gram 700 lel kg. 1 (gram 1000) dan in zuak chih mukhia uh a, tuban licence neilou a vanzuak nawnlou dinga theisakin khahkhia uhi. Huai tungtang ah akisaipih local govt (ADC) in hibang a licence neilou leh ser diklou zanga vanzuakte enzui dingin leng ngen uhi. Matkhiak a om nupi in antang kg 1 ah Rs. 32 in zuak zel a, aleidek te’n a dek (bargain) chiang un kiman zawdeuh in pesek mahleh huchih chiangin ser (scale) diklou zangin khemzel chi uhi.
Mani Charenamei in kipahthu gen
Lamka, May-26: Lok Sabha election laia Independent candidate Mani Charenamei in singtangmite’ dinmun bawlhoih lunggulh ziaka pan alakna kithuahpihte tungah kipahthu gen in haksatna tuamtuamte kala amah adia pang ngamte leh amah vote-te tungah kipak petmah ahihdan thusuah bawlin taklang hi.
SP in anuai a semte thuhilh
Lamka, May-26: K. Kabib, IPS, SP/CCpur in tuni sun dak 12:00 apan Police officer teng monthly meeting neihpih kawm in thuhilh hi. Police leh VDF te’ gamtatdan mi khenkhat akipan complaint om ziakin SP in Police leh VDF personnel te’n hoihtaka discipline maintain ding, duty hun sungin uniform silh ding, Police station tuamtuamte’n hoihtaka discipline maintain ban ah mipi tawh ki-deal hun ah kamsiam zanga houpih dingin thuhilh a, officer tengin anuai ua Police leh VDF personel teng thuhilh sawn ding in theisak hi.
Women QRT 1 patkhiat hiding
Lamka, May-26: Lamka khua leh CCpur district ah muanna leh bitna (law&order) dinmun in hoihlam a nawt zel deihna ziakin SP/CCpur nuaia Quick Respond Team (QRT) 4 leh Statistic team 2 in niteng in nitak inleng khawpi sungah patrolling paizel uh a, amaute behlap dingin Women Quick Respond Team (QRT) 1 tunung sawtlou in patkhiat hiding chi’n SP in gen hi. QRT 4, Statistic team 2 leh Women QRT te’n sun-le-zan a poimawh bang in khawpi sung ah patrolling paizel ding uhi.
DHS 1st Governing Body Meeting
Lamka, May-26: DC/CCpur makaih in May 28, 2014 zinglam dak 11:00 in DC’s office a BRGF Resource Centre ah Dist Health Society Governing Body Meeting om ding hi. Huai ah Governing Body meeting nanung a resolution etna, NRHM/DHS block 5 a nasepte report-na banah Work Plan & budget 2014-15 telin thu tuamtuam genkhawm ding uhi.
Mi 70 in document submit
Imphal, May-26 : Home department saina in a 2veina dingin Imphal a 1st Manipur Rifle Banquet Hall ah tuni in passport camp kipan hi. Tuni’n mi 70 in passport tawh kisai document submit uh hi’n kigen hi.
Huai passport camp ah Guwahati akipan Regional Passport Officer Ajungla Jamir leh officials 3 tel uh a, tuni nitaklam in media-te kimuhpih sawm mahle uh document tawh kisai check ding atamluat ziakin kimuhpih manlou uhi. Tuni a document submit a omte Guwahati ah thon hiding a, huai akipan in Kolkata ah khak sawn ding uh hidan in kigen hi.
Handgrenade khat kimukhia
Imphal, May-26 : Singjamei PS huamsung Tedim Ground kianga Regular English School campus ah zan in handgrenade khat muhkhiak in om hi. Imphal West Police Commando te’n thil omdan a theih phet un huaimun kintaka delh in handgrenade va lakhia uh a, muntuam ah hihsia(defused) hi’n kigen hi. Huai handgrenade kuate koih hihiam chih a kipuang omlou hi’n kigen hi.
Sanjenthong lei pelhna bawldin ngen
Imphal, May-26 : Sanjenthong Bridge Diversion Demand Committee (SBDDC) pawlin zan in CC Higher Sec. School ah meeting nei uh a, Sanjenthong lei (bridge) kibawl lel pen a pelhna ding (diversion) bawl din govt phut uhi.Meeting ah civil society organisation leh student pawl tuamtuam hunkhop tel uh a, school leh college kai naupangte adingin nawngkaina lianpi a om banah damlou gim RIMS leh JNIMS zuante adingin buaina lianpi om ziakin lei bawlzawhma a zat ding diversion poimawh hi’n gen uh a, state govt ah memorandum piak lemsa uhi. SBDDC Chairman L. Bijoy in a gendan in state govt in a limsak kei leh maban panlak dingdan genkhawm thak hidin gen hi.
Candle Light Event zang uh
Imphal, May-26: Nityaipat Chuthek a Manipur Pradesh BJP office ah tuni nitaklam dak 6.00 in Narendra Modi in India Prime Minister 15na dinga a kichiam hun tawh kituak in ‘Candle Light Event’ zang uh a, huai ah volunteer mi 10,000 sanga tamzaw paikhawm uh chihthu om hi.
Huai Candle Light Event ahihleh MODI-fied North East India kichi pawlte panlakna tungtawn in BJP Manipur Pradesh te’n a sai uh hi’n kigen hi. Delhi, Mumbai leh state tuamtuam a khawpi (state capital-te) ah tuni nitaklam dak 6.00 in huchibang Candle Light Event thupitak in zang uhi.
SO apan Under Secy in kaisang
DPC meeting in a recommend dungzui in Manipur Secretariat Service (MSS) sem Section Officer (Category-5) semlel mi 9te Under Secretary(Category-4) payscale Rs. 9,300+Rs.34,800+grade pay Rs. 5,400 n kaisang uhi. Amaute leh a sepna uh deptt anuai bang hi.
1. Smt Nengkhokim Lhangum, GAD (W)
2. Paotinlien Gangte, Finance
3. Smt Kh. Nganbi Deve, PHED
4. Smt Yaoreila Luikham, GAD
5. T.C. Liena Gangte, DP
6. Kaikhosat Kipgen, Forest & Environment
7. Smt S. Ngulzaniang, TA & Hills
8. Smt Marin Jolly, IPR
9. Longyao Kumrah, Horticulture
Counselling form ladin theisak
Imphal, May-26: Directorate of Agriculture thusuak in a gendan in AIEEA-UG-2014 admission a state nominee telkhiakna dingin ICAR’ saina a 19th All India Entrance Examination atel candidate te’n Central Agricultural University, Iroisemba ah academic session, 2014-15 akipan B.Sc (Agri) leh allied course tuamtuam zilna dinga admission tawh kisai in June 9, 2014 akipan in Directorate of Agriculture, Sanjenthong ah Rs. 200 pia in prescribed proforma ngahtheih ding a,huai kimtaka fill-up zawh in June 20, 2014 tan submit theih ding chihthu om hi.
