Vungzamuan Valte, IRS kaisang
Lamka, June-9: Vungzamuan Valte,IRS in Additional Commissioner sem in kum bangzahhiam Shillong a om nungin tuma deuhin Commissioner in kaisang a,Uttar Pradesh state khawpi Lucknow ah kisuan ding hi.Aman Sept 19, 1991 in Central service a IRS joined in Asst Commissioner ah kipan a, huai apan Deputy Commissioner,Joint Commissioner leh Additional Commissioner in kaisang hi. Tu’n Commissioner ahih tawh kiton in tax tawh kisai a thubuai omte thukhentu hihna lam len ding hi.Vungzamuan Valte,IRS s/o (late) V. Siamthang bel Singngat khua a piang hi a, tu in Zion Veng, New Lamka ah a innkuante khawsa lel uhi. Vungzamuan Valte in khawtang, saptuam leh politics tawh kisai, thu tamtak gelh a, huaite newspaper leh website tuamtuam ah suahkhiat in om hi.

Police te’n mi 10 mankhia
Lamka, June-9: K Kabib, IPS, SP/CCpur in Lamka khawpi ah security khauhsak nungin tuni nitakin mun tuamtuam apan mi 10 matkhiakin om uhi. Thu kizadan in PK Jha, IAS, DC/CCpur in tuni’in Imphal vapha a, hong kiklam nitak dak 7 velin Tedim Road in a totkhak Boljawl kim lakah pasal 4 velin DC’ gari lampi ah ana dang(dal) uh chihthu om a, huaite amaute mat a om police station tut hi uhi. New Bazar leh Zenhang Bazar area ah leng police duty hihkhauh hi a, tuni nitakin huai area 2te akipan mi 6 mat hi uh a, tu’n police custody ah mi 10 koihin om uh chihthu kiza hi. Huchi kalah tuni nitak in Lamka police station campus ah police officer tamzaw kimin Lamka khawpi a Law & Order dinmun ngentel zawsem in enkai uh hi’n kigen hi.

Sielmat Chr Hospital ah Ultrasound
Lamka, June-9: Sielmat Christian Hospital ah Ultrasound thak nei uh a, tuni’n Dr Rochunga Pudaite, former President, Bibles for the World in Pathian kiangah thumna in lan hi. Aman a genna ah kuapeuh in pan alak ziaka Ultrasound neih a om hi’n gen hi. John Pudaite in tunia Ultrasound kihong CCpur dist adia 1na leh Manipur adia 3na hi’n gen a, Rs 15 lakh vel man hi’n gen hi. Huai operator dingin Imphal apan Sonologist 1 hong kuan ding a, Ultrasound back-up ding in UPS ah 2KVA kizang hi’n gen hi.

FIFA World Cup 2014 Fixture
FIFA World Cup,2014 fixture hoihtak Guwahati a ki-print tuni issue Manipur Express tawh hong kihawm a,Manipur Express late lakah manbei(free) a hawmkhiak ahi hi. Agent/hawker-te area a news la omzah adia copy kiching agent-te khut a piakkhiak hi a, a mulou zenzen a om leh amau area a news hawmtu(hawker) kiangah a copy la dinga theihsak hi uhi.

Truck accident ziakin mi 2 liam
Lamka, June-9: Tuni zinglam in Pearsonmun khawsak ah Truck khat accident in lamkhang ah kilep khesuk a, huaiah Jameer(30) of Kwakta leh Amir Khan(40) of Kwakta liam in District Hospital ah puaktung hi uhi. Doctor-te’n first aid a piakzawh un Hospital akipan pawtsak uhi.

Khua 32 ah DDT 1st round kap uh
Lamka, June-9: Malaria deptt apan mi 5 in May 27-June 6, 2014 sung Guite kual a DDT 1st round kap(spay) uh a, khua 32 zou in DDT bag 25 zangbei uhi. Amau Guite Road zui in Maukot khua ah pan uh a, PHSC tuamtuam-Tuikuimuallum, Suangdoh, G.Bualzang, Mualnuam, Songtal, Aibulon leh Santing PHSC nuai ah khua kigawm 32 ah kap uhi. Tutung in policy thak dungzui in innsung kia ah DDT kap uhi.

Henglep bial ah ganpul hii leng: lawi 50 val si
Lamka, June-9: Henglep Sub-divn sung a Mongken leh Dahtum Phaicham khua ah May 29, 2014 akipan in gan pul hii leng a, tutan in lawi 50 val si chihthu kiza hi. Mongken khua ah tuni tan in lawi 33 si a, huai lawi site ahihleh tuilou pari 15 vel bawlna nasepna a kizang hi a, gan pulh ziak in nasem theilou in om uhi.
Thusuak kizadan in Dahtum khua a om Pa T. Thanglet Haokip lawi api 2 leh avual 3 si a, maban a tuilou nasep ding buai hi’n kigen hi. Huaibanah, gahpul hii beilou in paizom zel a, hoihtak a panlak ahihkeileh tampi sihbeh theilai hi’n kigen uhi. Huai tawh kisai in, Mongken V/A leh Thanglet Haokip of Dahtum khua te’n MLA/MDC banah Govt leh gamsung a makaite’n pan alak kin uh deihthu Press ah hongtun uhi.

MP thak lopna leh kipahpihna
Lamka, June-9: Dorcas Veng, New Lamka a Cemetary Hall (YPA Hanmual) ah June 14, 2014 in MP chingthak Thangso Baite kipahpihna leh 10-Tuivai ADC bial sunga class X & XII examna a lawhchingte kipahpihna banah lawhsamte siatbatna program omding hi. Rev Mangthianlal, President &CEO, Glocal Volunteer in student te hasotna, thumsakna leh Thangso Baite ading in thumsak ding hi. Langkhanpau Guite, Chairman ADC/CCpur in 10-Tuivai ADC bial a class X & XII passed-te thilpiak peding hi. Huai ah Kham Suanmung Tawmbing,DFO/CCpur in ‘Awareness campaign on Nature Education & Kaihlam Santuary’ chih pansan in thu gen ding hi.

W.Kumar, EE/Electricity kisuan ding
Lamka, June-9: Manipur State Power Distribution Company Ltd in June 2, 2014 a order suah dungzui in Electricity deptt/CCpur a EE (Dy General Manager) W.Kumar Singh tunung sawtlou in Dy Gen Manager (Revenue-II) lending in Imphal ah kisuan ding a, Khampu Hatzaw, tulela AE( Manager) in i/c EE (Dy Gen.Manager)/CCpur lending hi.

Hospital ah Diet supply om nawnlou
Lamka, June-9: Dist. Hospital a om damloute nekding petu(Diet supplier) in govt. akipan sum(bill) a muhlouh ziakin March 2014 akipan khawlsan a, huainung in hospital a damlou omte’n amau leh amau kingaihtuah uhi. Medical Suptd Dr Shyamsunder in a gendan in govt. apan Diet adin fund omkei mahleh OPD leh a tuamtuam akipan sum muhte zangin July 2013 apan damloute an(diet) piak hi uh a, sum lam a haksatna om ziakin tuni tanin Rs. 75,000 bat hi a, tua ziakin sunzom zou nawnlou in Diet supply-tu leng kitawp hi’n gen hi. Tu’n Medical Directorate in diet supplier dang zong din nget hi’n Med Supdt in gen hi. Diet supplier omlouh ziakin hospital a ki-ensak, adiakin mundang a hong kipante’n haksatna liantak tuak uh hi’n kigen hi.

Khua/Veng 10 ah GPS zousiang
Lamka, June-9: Electricity deptt/CCpur leh Hausa/Village Authority pangkhawm in khua/veng 10-Bungmual, Kawnpui, Elim Veng-New Lamka, College Veng-New Lamka, Hebron Veng-New Lamka, Lailam Veng, Headquater Veng, Hmar Veng, Sielmat leh New Zou Veng ah Economic census data tungtawn in electric consumer omzah leh phalna bei a electric late GSP zangin suizui uh a, zousiang uhi. Tunung sawtlou in New Lamka (G), Hmuia Veng, Salem Veng, Chiengkonpang, Hill Town leh Hiangtam Lamka ah sunzom ding uhi. Electricity deptt te’n thil omdan a suizui ziakun June 2-9, 2014 sungin mi 60 val in permit lathak uhi.

BRTF camp apan van mang
Lamka, June-9: Lamka Police station apan tumlam km 1 leh akim a gamla Bungmual khua a BRO/BRTF camp ah ni tamlou paisa a panin van(material) poimawh hunkhop guk mang hi a, thiltung tawh kisai Bungmual V/A kiangah report om hi. BRTF 80-RCC munpi sunga wheel barrow kichi 19 lakmang hi a, tualou in Tata (1613) a spring leh ‘rod’ te leng guk in om chi’n Jr Engineer (E&M) SB Doja in Bungmual V/A ah report bawl a, Bungmual V/A in June 10, 2014 zing dak 6:30 in thiltung enzui ding uhi.

250-KV Transformer bawlzou uh
Lamka, June-9: EBCC Pethuel,Vengnuam South, New Lamka area a kizang 250-KV transformer apaisa May 29, 2014 in Vengsung mipi leh deptt pangkhawm in asiatna bawlding in pawkhia uh a, a siatna teng bawlhoih nawn in tuni’n fit uh ,zangthei nawnta uhi. Transformer kisia bawlhoihna dingin vengsung mipi in inn lusi ah sum kithawhkawm uhi.

ITI/Saikot ah Trade tuamtuam ziltheih
Lamka, June-9: Industrial Training Institute(ITI)/Saikot ah academic session 2014 akipan Trade tuamtuam ziltheih ding a, huai dingin June 27, 2014 in Entrance Test om ding hi.Kum 2 course Wireman zilthei dingin Class VIII passed hih ngai a,kum 2 sung mah zil ngai ding Draughtsman zilthei dingin Class X passed ngai hi.Kum 1 sung zil ding course tuamtuam 4 om a,huaite Stenography-English(Class X passed), Dress Making(Class X passed), Carpentry(Class VIII passed) leh Welder(Class VIII passed) ahi hi.
ITI/Saikot ah June 23, 2014 tan Rs. 30 pia in prescribed application form ngahtheih ding a,kimtaka fill-up zawh in passport lemlak 2(1 pen attested) telin June 23, 2014 tan mah in submit ngai ding hi.

UKLF in KNLF-te’ ngawhna hilhchian
Lamka, June-9: Meltheihlouh galvan tawite’n zanhal nitak in Tuibuong ah Chungjalien (42) s/o Ngamkhojang of Sugnu Thingkangphai, tulela Tuibuong HQ a om a kapliam thu uah, Kolphe Kuki, Info & Pub. Secy, KNLF in UKLF cadre te’ gamtatna hi a agen tungtang ah MP Haokip, Jt Secy UKLF in belhchian dawllou leh huai thiltung ah UKLF in bangmah theikha lou hi’n hilhchian hi. MP Haokip in a gendan in tulelin UKLF cadre-te SoO ground rule dungzui in Chandel a designated camp ah om vek uh a, CCpur dist ah UKLF cadre kuamah omlou hi’n gen hi. KNLF in KNO bel kawma thil suichianlou pia a UKLF a ngawh ngaisiamlou hi’n gen a, maban ah thil suina himhim ah pilvang dingin theisak hi.

IMPHAL NEWS:
CM in SPA leh ACA behlap din ngen
Imphal, June-9: Union Finance Minister Arun Jaitley makaihna in state leh UT teng akipan Finance Minister te’n Hotel Ashoka a Conference Hall ah Union Budget(Pre-Budget Consuiltation) tawh kisai meeting a neihna ua tel Manipur Chief Minister O. Ibobi in Special Plan Assistance(SPA) fund zanga lamlian, lei,healthcare, agriculture,IFCD leh project tuamtuam nasepna pailel laite zawh ahih theihna ding leh project thak sep theihna ding in Manipur adin SPA fund Rs. 450 crore bikhiah a om pen Rs. 600 hisak ding in Union Finance Minister kiang ah ngen hi.Huailou in Additional Centre Assistance(ACA) tulela Rs. 800 crore lel bikhiah a om leng Rs. 1000 crore hisak dingin ngen a,huchi ahihkeileh Centrally Sponsored Scheme tuamtuam leh flagship programme tuamtuam sepkhiakna ding in Manipur govt in state share pekhe zoulou ding a,huchi hileh nasep sutzop haksa ding chi’n leng gen hi.

NAB te’n storehouse luh uh
Imphal, June-9: Narcotics Affairs and Borders (NAB) a Food Safety and Enforcement Wing, Imphal East te’n Mantripukhri a M/s Traders te’ storehouse in food safety dan a kalh chih information amuh dungzui un tuni’n valuh uh a, storehouse a nasemte’n mustard oil(ankam thau) leh Tagore, Neeraj, Shivam, Ruchi-te’ helkhawm in container hoihtak a athun lai uh banah sathau leilak a buate’ leng container a a thun laitak uh vatuak uh hi’n kigen hi. NAB team te’n nasemte’ mankhawm in storehouse neitu Mulchand Pawar of Rajasthan tulel a Thangal Keithel a om mankhia in hibang thilchiin hoihlou kum 2 paisa a pan uh ahihdan theikhia uh a, whole sale price in state sunga mun tuamtuam ah zuak uh hi’n leng gen uhi. Storehouse a room dang khat a check na uah betel nuts(kuva tang), rice, corn, glycerine leh gari tyre kikoih khom in food safety norm a kalh banah kuva tang hoih leh hoihlou mix khawm a wholesale a zuak uh ahihdan leng mukhia uhi. Hibang a food safety norms dankalhte’ Rs. 5 lakhs liausak theih banah kum 5 sung jail a khumtheih hi a, tuni a mustard oil muhkhiakte market value in Rs. 10 lakhs man a, van dangte’ sum a tuat in Rs. 15 lakhs man hi’n kigen hi. NAB team in Thangal Keithel a M/s Trader te’ dawr leng valuh uh a, storehouse neitu tungah case file ding uh hi’n kigen hi.

Sintex leh langva hawmkhiak in om
Imphal, June-9: Keishamthong Kabui village a Development Committee-te makaihna in RK Imo Singh,MLA(Sagolband A/C) tungtawn in beneficiaries 13 kiangah Tribal dev deptt akipan in sintex ( litres 300 capacity) piak hi a, midang 10 langva iak in om uhi. Huai hun ah RK Imo Singh khuallian in pang a, Guest of Honour in Khunbu Karong Golmei pang a, Functional President in Khullakpa Lungpuiga pang hi. Chief Guest in Dy CM Gaikhangam panlakna ziakin mi 23 in hibang hamphatna tang thei ahihdan gen a, ama constituency sunga tribal village 3 in hibang hamphatna tang uh hi’n gen hi. Tuni in Keishamthong Kabui village a innkuan 13 kiangah Sintek piak hi uh a, midang 10 kiangah langva piak a om hi’n kigen hi.

Student-te panpih ding
Imphal, June-9 : North East Students’ Organization (NESO) leh Dr. YSR Educational & Welfare Foundation, Hyderabad pangkhawm in Northeast bial apan students maban sunzom nuam hileleng sum-le-pai a haksatna tuakte panpih ding uh hi’n NESO Gen. Secretary Sinam Prakash Singh in gen hi. NESO leh Dr. YSR Foundation te’n June 6, 2014 in MoU ah suaikai ua, NE students kuapeuh engineering leh Para-Medical course sin nuam ahihziaka sum leh pai haksatna neite panpih hiding in gen hi. Huai dingin a innkuante annual income Rs. 3.5 lakhs nuailam ahih ngai ding a, exam nanungpen ah 45% aggregate marks muh poimawh ding a, SC/ST/OBC/Minority/BC Community hibang a siamna neite a thawn in sinsak hiding uhi. NE students-te adin seat 1000 reserve hi a, tua lakah Manipur state adin tu academic session 2014-15 adin seat 300 bikhiah uhi.

Dev nasepna khawldin theisak
Imphal, June-9: Imphal East district sung Keirao Bitra Sub-divn a Angou Rok Hill a Eco-Park mun ah development nasepna pailel lai Nongpok Ningthou Panthoibi Development Committee leh Meira Paibi te’n khawlsak dingin UNACCO kiangah theisak uhi. Huai tawh kisai tuni’n Manipur Press Club ah press-te kimuhpih uh a, tua hun in UNACCO te nasepna in kim leh kianga village omte kal ah kitheihsiamlouhna omsak thei ding dinmun a om hidan in gen ua, khaw hausate theihpihna tellou in lampi keklet hidan in Development Committee President Takkhellembam Joy in gen hi. Awareness program on Bio-diversity Imphal, June-9 : Forest deptt leh Manipur Bio-Diversity Board (MBB) saina in tuni in Moirang ah ‘Awareness programme on bio-diversity for students’ kichi om hi. Huai hun ah Addl. Principal Chief Conservator of Forest leh Member Secy. MBB Dr. Khaizalian in Chief Guest hihna tawh uap a, Guest of Honour in DM College of Science Lecturer Dr. Kh Shamungou pang hi.

Natna hii leng omphut thei
Moreh, June-9: Indo-Myanmar border a Namphalong market gei ah mihing’ tenna hilou mun khat a niin paih gige ahih ziakin natna hii leng kilawhsawm theih (epidemic) om thei dinmun hi’n kigen uhi. Govt. official te’n inspection a bawl ding uh poimawh hi’n huai kiim a khua omte’n gen uh a, gam 2te’ pangkhawm a niin paihna mun hahsiang in niin paihna ding mundang ah suan poimawh a, thuneite’n leng a nasep ding uh ngai poimawh in hoihtak a sem dingin leng ngetna bawl uh hi’n kigen hi.

Seven-Boys-Soccer Tournament
Mualkoi a om Vuallungtuak Society-te’ saina in June 14, 2014 akipan in Mualkoi Playground ah ‘the 1st (late) T. Khupzachin Memorial Tournament, 2014’ om ding a, huai ah team khat ah kum 14 nuailam player 7 zel tel ding chih hi.Huai a telnuam teams/club te’n Rs. 50 pia in 1)Hebron Hair Cutting Saloon, Hebron Veng, New Lamka; 2)JK Xerox, Tedim Road, 3)Gofico office, Tuibuong Bazar, 4) Nu Hat’ pan dukan,near Covenant School, Mualkoi; 5)V. Pauzamuan,Laiveng, Bungmual leh 6)Thangkhanchin Guite, Vengsak, Pearsonmun akipan entry form ngahtheih ding hi.
June 12, 2014 tan entry form submit theih ding a,huai hun ah entry fee Rs. 500/- leh security Rs. 100/- zel sun ngai ding hi.Huai Tournament ah winner team in cash prize Rs. 5,000/- ngah ding uh a, runner-up team in Rs. 3,000/-, best player Rs. 500/- leh top scorer in Rs. 500/- ngah ding uhi. Thuchian kimzaw theinuamte’n #9856119644/9612350436 tungtawn in Secretary, Vuallungtuak Society contact theih ding hi.

Bungmual trophy kipan ding
Bungmual Youth Club saina in Bungmual playground ah June 10, 2014 nitaklam dak 2:00 in ‘The 2nd Bungmual Trophy-2014’ kipan ding hi. Hiai hun H. Mangchinkhup, EM/ADCC in Chief Guest hihna tawh uap ding a, Guest of Honour in S. Khaikhopau, Jr. MCS, BO/DC leh Lunchon, Secy. CDSA te pang ding uhi. Tuni a opening match ah match nih kimawlna om ding a, match masa ah Bungmual FC leh VENUS te kimawl ding ua, tua zawh in Nitaklam FC leh Zotal FC te kimawl ding uhi.