Ganpul hiileng: ganvulh tampi damlou
Leijangphai bial ah lawi(buffalo) 30 val sita
Lamka, May-25: Lamka akipan km 121 vela gamla Thanlon Sub-divn sunga Leijangphai, Sainoujang khua leh huai kim a khuate ah May 5, 2014 akipan natna ziak theihlouh hii leng ziakin lawi (buffalo) 30 vel sita a, tampi damlou in om chihthu kiza hi. Sainoujang V/A member Daiminthang in agendan in lawi site a kam(mouth) ua kipan chilpuan pawt in, chi(salt) leh tui piak theihlouh in om uh a, khenkhat a tuap(lungs) vang in khenkhat a gilpi uh dup hi’n gen hi.
Aman a genzelna ah Leijangphai leh Sainoujang khua a tuilou neite’n lou bawlna ding in lawi ah kinga pen uh a, loukaih hun a hibang thil om lungkhamhuai leh patauh huai sakthu gen in, nasem thei nawnlou a om uh hi’n gen hi. Tuni tan in Leijangphia khua ah lawi 10 leh Sainoujang ah 15 vel sita a, gamlak a si muhlouh leng a hunkhop om ding hi’n gen hi. Sainoujang ah tuilou pari 10 leh Leijangphai ah pari 20 vel ah kum tengin lawi zang in lou bawl uh a, tutung in lawite’ sih ziakin kuama’n nasem thei nawnlou uh hi’n gen hi. Leijangphai ah inn 200 val om uh a, Sainoujang ah inn 35 val omte laka atamzaw tuilou a kinga hi uhi. Hiai tawh kisai in akisaipih deptt ten panla di’n bial mipite’n News tungtawn in ngetna bawl uhi.
Khawsung makai telin mi 14 mat in om:buaina sousang
Selam khaw mipite leh Police kinawktuah
Lamka, May-25: Mizoram’ Champhai district sunga Selam village ah May 16, 2014 sunnung dak 2.00 in mipi kipunkhawm te’n Champhai E&F Dept. motor 709 mei in hal uh a, huainung in Police leh IRB te’n V/C member 5 leh YMA makaite telin mi 14 man uh a, mipi tawh naktaka kinawktuahna kal ah mi 5 vel liam uh a, Police-te’n tear gas zangin mipi hawldalh mahle uh tunitan in Selam khua sousang mahmah hi’n kigen hi.
Khawsung mite gendanin Mizoram govt. in kum 1999 akipan huaibial ah Lengteng Wildlife Sanctuary bawlkhiak sawm in panla a, Selam mipite lemsakna tellou in kum 2005 a Final Notification kisuah ah 120 Sq. km huamsung bikhiah a omte lakah Selam gam 45 Sq.km telsak hi a, huai thu ziakin Selam khua leh Forest Deptt. kalah kum 2010 in kilemna bawl uh a, innlusi(household) a Rs. 10 lakhs piak ding leh khawsung mite a utna peuh ua khawsa thei dia phalna piak ding chih hi a, kum 2 sunga hihfel dia thukimna om tunitan hih buchin louh ziakin buaina puangzak hi’n kigen hi. Huchihlai in khawsung mite lou bawl leh nektawm zonga khawsa hi uh a, sing-at a kilawh zel ahunkhop omte lakah mi bangzahhiam May 16, 2014 in Wildlife Protection Force te’n man uh a, huaithu ziakin buaina kipan in sousang mahmah hi’n kigen hi.
Buaina nung sawtlou May 22, 2014 sun dak 12.00 in Aizawl akipan Police leh security force 100 velin Selam khua umkual uh a, MSU Gen. Hqrs makaite leh Champhai MSU inleng thubuai enkai in buaipih uhi. Selam khua ah inn 227 om a, khawsungmi 1,300 val hi uh a, Myanmar leh Manipur tawh Mizoram kigamgitna ahihbanah Lengteng Wildlife Sanctuary tawh kizom hi’n kigen hi.Tuabang kalah Mizoram Forest Drivers' Association pawlin thusuah bawlin, a nasep khawmpih uh E&F gari kihalsia a driver H Lalzawmlian soisak leh a gari halsiate mawhpaih uh a, amah soisatute matkhiak a om ahihman in action khauhtak lak khum din ngen uhi.
Lamka Candle Works Ltd hongkhia
Lamka, May-25: Langkhanpau Guite, Chairman ADC/CCpur in tuni sunnung in Beulahlane a Upa K.Songkhotuan’ tenna inn ah ‘Lamka Candle Works Ltd’ hongkhia a, Pastor K.Pumsuanthang, EBCC Kolkota in Pathian kiang ah thumna in laan hi. Chairman/ADC in a genna ah Lamka Candle Works Ltd mipi’n hamphatpih dia a deih ban ah abawltute adia leng sum-le- pai muhna leh kitoudelhna ahih deihsakthu gen hi. Huai hun ah Vungzagin Valte, Parliamentary Secy; Mrs & Mr. T.Roumuan, IRS; Mrs & Rev Dr JM Paupu ban ah mi poimawh hunkhop in uap uhi. Lamka Candle Works Ltd proprietor Shelly Vungsuanching in agenna ah candle bawlna ding vanzat(raw material) Parafin wax kichi Guwahati akipan lei in bawl zel a, zawhsate wholesale in pekhia a, candle aliante 1 ah Rs.12 zelin pekhia a, bazar ah Rs.15 in kizuak hi’n gen hi. Candle medium-te packet 1 ah Rs.15 in pia in bazar ah Rs.20 in kizuak a, candle aliante packet ah Rs.25 in pekhia in bazar ah Rs.30 a kizuak hi’n gen hi. Candle deih tamluatziak in supply senglou hi’n gen a, adeihte’n Mobile No. +918974276072 ah contact theih hi’n hi’n gen hi.
Phalna beia electric late zonkhiat hiding
Lamka, May-25: Electricity deptt kichi Corporation a kipuak nungin Manipur State Power Distribution Company Ltd (MSPDCL) in enkol a, meivak kiningching sem deihna ziakin CCpur district sung a khua 8 ah Village Authority(V/A) tawh pangkhawm in consumer omzah suizui uh a, huaizawh in Security tawh pangkhawm in phalna beia electric late disconnect sak ding uhi. Electric fee tampi bat neite’n 40% pia in adang teng instalment in piaktheih ding a, deptt te’n consumer omzah a etkhiak hun un leng phalna neilou a meivak late’n amun(spot) a sum pia in permit neih theih ding hi’n kigen hi. Kumdang in permit ngahna din in Imphal ah buaipih ngai a, tukum apan Electricity office/CCpur ah form la in leh sum pia in Lamka mun ah permit ngahtheih hi. Electric phalna beia lagu matkhiat omte ‘The Electricity Act 2003’ dungzui in Jail tanpha lut theih a, phalna neilou a electric lagute’n akinlam a permit ngaihtuah poimawh hi.
YPA Cultural Troupe-te’ vaidawn
Lamka, May-25: Young Paite Assn(YPA) Bungmual Unit in Rajasthan a Mt. Abu Summer Festival 2014 a vatel in namlam 4 lahna nei uhi. Tuni sunnung in YPA Gen HQ Hall, Hiangtam Lamka ah YPA Gen HQ in vaidawnna nei in ankuang umpih uhi. Huai hun ah S. Chin Ngaih Pau, President, YPA Gen HQ telin YPA makaite leh Cultural Troupe member mi 19 tel uh a, Haulianlal Guite, IAS, SDO/Mt. Abu in leng huai hun uap hi. YPA Gen HQ President in a genna ah namlam tawisang a kalsuan YPA Bungmual Unit kipahpih kawm in, huai ding a panlatu Haulianlal Guite, IAS, SDO/Mt. Abu tungah leng kipahthu gen hi.
Tipaimukh area leh Guite kual ah DDP kap ding
Lamka, May-25: Dr Thangchinkhup Guite, CMO & Dist Malaria Officer panlakna in Tuilaphai area ah DDT kapna 1st round pailel a, khua 18 lak ah khenkhat zouta uhi. May 26, 2014 in Pherjawl PHSC nuai a khua 6 leh Senvon PHSC nuai a khua 10 ah DDT kap pan ding uh a, May 27, 2014 apan in Guite kual Maukot-Khajang kikal a khua 33 ah kipan ding hi.
DFO/CCpur in leave la ding
Lamka, May-25: Kham Suanmung Tawmbing, IFS, DFO/Southern Divn. CCpur in May 25 akipan June 16, 2014 sung suti(leave) lading a, June 17, 2014 in join nawn ding hi. Huai hun sungin T. Thangchinlian, ACF/Southern, CCpur in DFO incharge len ding hi.
suunna
Mrs Ningniang(86) m/o H. Chinkhopau of Amzathang Road, Vengnuam, New Lamka tuni zinglam dak 8:45 velin teknat in si a, YPA Hanmual, New Lamka ah kivui hi.
IMPHAL NEWS:
Sonia in Congress Parliamentary
Party Chairperson hihna len ding
New Delhi, May-25: Congress Parliamentary Party(CPP) meeting apaisa May 24, 2014 nitak in New Delhi ah om a, Chairperson ding in Mrs Sonia Gandhi mah telching in om nawn hi. Mallikarjun Kharge in Sonia’ min proposed a, senior leader Mohsina Kidwai in seconded hi. Sonia Gandhi in huai meeting ah Congress hih hatna ding leh tulel dinmun a panlak dia poimawh hi a theihte MP te’n amah kiang tun dingin ngen hi.Aman a genzelna tu dinmun in party hatsemna ding a panlak dingdan gelkhawm poimawhpen ahih leng gen hi. Tutung Lok Sabha election a Congress kiakniamna akipan sinlai hoihtak om thei bangbang hihiam, huaite apan kitunding thak nawnna dinga panlak ding bangbang hiam suikham chiat ni chi’n gen hi.
AIR ah ‘Live’ in kikhah ding
Imphal, May-25: Prime Minister thak ding Narendra Modi in May 26, 2014 nitaklam dak 6.00 in Rashtrapati Bhawan kongtual(forecourt) ah India President in a kichiamsakna hun May 26, 214 nitaklam dak 5.30 akipan in All India Radio(AIR) in ‘Live’ in khah ding a,AIR Imphal Station ah Hmar, Paite, Kabui, Thadou, Mao leh Tangkhul programme leng minute 15 chiat a hihtom in nitaklam dak 4.00 akipan dak 5.30 tan in bei ding a, PM kichiamna hun beikhit phet in Manipuri News in zui ding hi.PM kichiamna hun Kangla leh Sangai channel ah khah hituak ding hi.
Candidate te’n senna pelut din theisak
Imphal, May-25: Inner Manipur Lok Sabha seat a candidate tengin expenditure true copy 1 chiat District Election Officer kianga piaklut(submit) ngai hi’n thusuak in gen hi. District Election Officer/Imphal West thusuak in a gendan in Lok Sabha election result puankhiak zawh kha 1 sungin expenditure true copy 1 chiat piaklut ngai hi’n a kisaipih candidate-te theisak hi. Thusuak in a genzeldan in candidate leh agent teng ading in June 9, 2014 in DC/Imphal West office ah training om ding chih ahi hi.
Mahni kitoudelh theihna ding sepna
Imphal, May-26: Manipur ah tulel in sepna deih a Employment Exchange a min pelut teng kigawm 7,01,987 pha hi.Huaite lakah pasal 5,00,660 leh numei 2,01,327 om uh a, sepna deih ziaka min pelut tam deuhdeuh lai ding hi’n kigen hi. Sepna deih ziaka min pelut tengteng govt in sepna pe senglou ding a,huai ziakin sepna deihteng adin govt a sepna leng om senglou ding hi. Huchi ahihman in laisiam tuailai sepna neite’n mahni kitoudelh theihna ding leh khawsakna adia phatuam self-employment mah hoihpen in phatuam ding hi’n tamtak in gen hi.
Security feature tellou HSRP
Imphal, May-25: Supreme Court thusuak in gari tengah High Security Registration Plate(HSRP) thuah dinga order a suah dungzui in Manipur govt in 2-wheeler, 3-wheeler leh 4-wheeler teng a HSRP thuah ding in huai dingin M/s Shimnit Utsch India Private Ltd zang uhi. Himahleh HSRP ah security feature himhim tel tuanlou chih hi a, mi tamzaw in duhthusam ching zoulou sa mahle uh dan(legal) zanga action lakkhum a om khak ding lauhna ziak lelin HSRP thuahsak uh hizaw in thutut kingah hi.
Office Asst-cum-Computer Operator
Imphal, May-25: Manipur Government nuaia General Administration Department (GAD) in kum 1 sug contract basis a sem ding Office Assistant-cum-Computer Operator 20 laksawm a, consolidated pay Rs. 7,200 per month hiding hi. Huai dingin seat reservation ST 6, OBC-Meitei 3 leh unreserved 11 hiding hi. Candidate hithei ding in graduate banah govt/govt recognised Institute akipan a tompen in kha 6 course Computer Qualification neih ngai ding a, English leh Manipuri siam deih hideuh hi. Kum 21-38 kikal mi hih ngai a, ST/SC candidate-te bel kum 43 tan hithei ding hi. Candidate dinga lunglutte’n plain paper a application gelh in apply theih ding a, tunai china kilakna attestted passport size lemlak 2 leng application form ah belh ngai ding hi.Applicant te’n June 10, 2014 tan in Under Secretary(GAD), Govt of Manipur, Manipur Secretariat(South Block) ah June 10, 20124 tan in submit theih ding hi.
