KSDC in General Strike leh Blockade puang
Lamka, July 7: Kuki State Demand Committee (KSDC) pawlin  Ministry of Home Affairs, Govt of India leh Manipur govt tawh  Suspension of Operations (SoO) a suaikai KNO leh  UPF tawh political dialogue(peace talk)  pan kin dingin tamveitak  ngetna a piak uh  India govt in limsaklou chi a  lungkimlouh latsakna leh govt nawhna in July 8, 2013 zingsang dak 5.00 akipan July 9, 2013 nitaklam dak 5.00 tan General Strike puang uh a,General Strike bei tawh kiton in July 11, 2013 nitaklam dak 5.00 kikal Economic Blockade om ding in puang uhi.Blockade sungin Imphal tawh singtanggam kikawmna Highway tuamtuam 7 khaktan hidin  puang uh a,General Strike leh Blockade sung in Press/Media leh Medical kia khahkol (exempted) hiding chi’n KSDC thusuak in gen hi.

KSDC thusuakin a genna ah Kuki mite’n lemna leh muanna deih in innvengte tawh khawsakhawm uh a, Kuki khang masate gam leitang Indian Union ah gawmkhawm hilou in mahni kivaihawm in om uh chi uhi. Tuabang a Kuki mite lungmuang taka hun a zatlai un thagum zangin mipite dikna leh kivaihawmna (constitutional rights) laksak in om uh a, Kuki mipite ai-oh KSDC in hibang thiltungte theisiamlou chi uhi.KSDC thusuakin a genzelna ah KNO leh UPF tawh Political dialogue nei dinga Ministry of Home Affairs in a thuchiamte tuan muhtheih  gahsuah a omlouh ziakin KSDC in Blockade a khawlsak uh zukkik in  General strike leh Blockade om nawn ding chi’n gen uhi.

Blockade sungin National Highway 7-Imphal-Ukhrul road; Imphal-Tamenglong road; Imphal-Moreh road; Imphal-Chandel road; Imphal-Senapati road; Imphal-Ccpur road leh Imphal-Jiribam road te Imphal tawh kikawm theilou dingin khaktan hiding chi uhi.

Rayburn ah Gospel Music Nite zang uh
Lamka, July 7: New Lamka a Rayburn PCI (R) biakinn ah tui nitak dak 6:30 apan “Gospel Misic Nite with Randy Mayfield” kichi om hi. Rev Khen P.Tombing, Chief Coordinator, PCI (R) in vaidawn thugen kawmin  lasa dingte mipi ma ah mellahna nei hi. Gospel Misuc Nite hun ah Randy Mayfield’s Team; H.Biakson; Jenny; Grace Hoihching Paite; T.Thangginsang; Grace Siamte; Nemmuankim; Khaw-khawl; Lalhnuntluangi; Rayburn PYF Choir leh Mualkoi PYF Choir-te apan Pathian phatna la ngaihkhiat in om a, mipi tam mahmah in biakinn ah tazoulou hi. Grace Hoihching Paite kichi  English-mi  himahleh Paite la in Pathian phatna lasa a, a entu mipite’n kipahpih mahmah uhi..

Songpi ah Kuki Nampi Taokhomna 2013 om
Lamka, July-7: Kuki Nampi Kipumkhatna Maicham kum 2 chinna leh Nampi Taokhomna 2013 tuni sunnung dak 1.00 akipan Songpi khua ah  om hi. Huai ah Nampi kipumkhatna ding,  KNO tawh UPF ading, KIM, KSDC, KWU, COPTAM, KSO, KKL, KUMHUR, KCLF, Saptuam nasemte, MP, MLA, MDC, Officer, khaw hausa, siamsin student, meithai-tagahte leh mipite adin thumna hun zang uhi.

KNO President P.S. Haokip in agenna ah Nu Parchi mengmuhna tungtawn a Kuki tate adia thumkhawmna mun ding bawlkhiak a om hi’n gen a, mipi 3000 tat theihna ding hall bawlkhiak hidin leng gen hi. Aman KNO leh UPF in kal suankhawm a, kigawmna omtheihna ding deihin  makaite tawh lampi zong mahleh lemthei nailou hi’n gen a, huchihlai in KNO in ZORO tawh kinaih zawkna nei in state tuamtuam 7 a mipite kipumkhat theihna ding a pan alak laitak ahihdan gen hi. Kachin mite’n KNO tawh kalsuan khawm theihna dingin pan honla uh chi’n leng gen  a, lungsim khat pu a kigawmna om chiang in Independent tanpha omthei ding ahihdan gen hi.

Nampi thumkhawmna  hun ah  Rev. Lunkhongam Haokip, Maicham Chairman in thugen nei Totong Haokip, President, KIC telin makai tuamtuamte’n leng thugen uhi. Nu Parchi in, kum 2006 akipan  Kuki namte adinga khitui kai kawm a thum in nasem ahihdan gen hi. Aman tunitan in Moreh a Elija maicham telin mun tuamtuam ah maicham 7 velah Pathian thugen in nasem hi’n leng gen hi.Tuni a thumkhawmna hun ah pitek putek upa pipi leh mipi tamtak paikhawm in thumna nei uh a, lasiam tuamtuamte’n avangkim in phatna la sa uhi.

Electric High Tension in Mangliankhup man
Lamka, July-7: Singngat sub divn a Muallum khua ah tuni zinglam dak 9.00 velin Muallum JB School Building kibawl tunga electric High Tension gui in Mangliankhup Zou(10) s/o Lianpau Zou of Muallum man a, a awm(chest), taklam khe leh a taklam lenuai liam hi. Tuni in Dist Hospital tut himahleh doctor te’n RIMS ah refered uh a, Muallum MDC Grace Zamnu in  Imphal varun hi. Thu kizadan in Mangliankhup leh alawmte tuni zinglam dak 9:00 vel in Sunday School kaidin kuan uh a, Sunday School heutute om nailouh ziakin akiang zeka School kim ah kimawl uh a, huchih lai in school building kibawl ah Mangliankhup a kaltouh aleh electric in man hi’n kigen hi. Amah Muallum a ZPCS Jr H/S ah class III simlel hi’n kigen hi.

Muallum JB School March,2013  khabul in huihpi in mutsia a, bialtu MDC Zamnu panlakna ziak in MTDC fund tungtawn in school building bawl hi mahleh school building bawlna tung ah Electric High Tension gui(wire) paiziak in nasemtute’n sumzom  theilou in dinkhawl uhi. High Tension  gui lakhe ding in Grace Zamnu in Imphal a electricity head office  7 vei pha in genpih mahleh tunitan lakkhiat ahihlouh ziakin tuni’n electric in  mi 1 man petmah hi.

Grace Zamnu in tuni nitakin Imphal a Electricity deptt ah thil omdan theisak in nawh  a, Electricity deptt ten RIMS a om Mangliankhup veh in ki-et ki-etkolna ding Rs 5000/- pia uh a, maban ah leng damdoi leh ki-etkolmante piaksak zel ding uh hi’n gen uhi.  July 9, 2013 in Muallum a Electric high tension gui lakkhiat hidin Zamnu theisak uh hi’n thusuak kingah hi.

Haobem Changsan in Silver Medal  ngah  
Lamka, July-7:Guwahati a Tarun Ram Phukan Indoor Stadium ah tuma zekin  State Level Karate-Do Championship, 2013 kichi om a,  huai ah Haobem Changsan (6) s/o Pu Seithang Changsan of  Molhoi, Karbi-Anglong in Siver Medal  ngah  hi. Haobem  in Sub-Junior category leh Individual karate ah leng Bronze medal ngah a,   NSKF(I) saina nuaia “7th National Karate-Do Championship 2012-2013”  kichi R.G Stadium, Naharlagun, Arunachal Pradesh ah leng Silver medal  sang ngeita  hi.

US ah tuikia in si
Lamka, July-7: Pau Khan Thang @ Thangteu (29)  of  Tedim, tulel a Kansas City, USA a om zanhal masa  July July 4, 2013  tuikia in si hi. Thangteu ahihleh lasiam Kimpi leh Sangi-i (Family Gopsel) te tawh omkhawm hi uh a, Kansas Zomi-te’n siluang buaipih uh chihthu om hi.

SUUNNA
Mrs. Ningman(81) w/o Ngulzam of Songtal  tuni zinglam dak 8:00 velin teknat  in si a, tuni mah in Songtal hanmual ah kivui hi.

&&&&&&&&&&&&&&&&&&&&&&&&&&&&&&&&&&&&&&&

IMPHAL NEWS
Imphal-Jiribam lamliam ah tuni’n Gari paithei nawnta
Imphal, July-7:Imphal-Jiribam lamliam(National Highway No. 37) a Nungdalal area ah Nilaini paisa July 3, 2013 in menchim thupitak a om ziakin Gari paithei vuallou in Jiribam ah tamtak tangden(stranded) uhi. BRO/BRTF te’n menchipna mun ah nasem in lamlian khaktan a om  leisaite ni 5 sung a hah nung un tuni nitaklam dak 3.00 velin  zou uh a, tuni nitaklam in 4-wheeler neuter hunkhop in huaimun kan in Imphal zuan paisuak pan nawnta uhi. Huailou in van poimawh tuamtuam pua Truck 200 vel Jiribam mun a tang(stranded)te leng tuni nitaklam dak 4.00 velin Jiribam apan Imphal zuanin kuankhia uhi.

BJP in Food Security Bill lung himawh
Imphal, July-7: BJP National General Secretary &  Manipur  incharge Tapir Gao in tuni’n Nityaipat a BJP office ah a gendan in BJP in Parliament Monsoon Session ah Food Security Bill pass ding tungtang bangmah nial kei mahleh huai Bill a clause khenkhat amendment bawl poimawhsa chi’n gen hi. Huai zat hun ah sum crores tamtak sen hiding a, huai phattuam pih ding mijawng leh a genthei tungtuante’n hamphatpih taktak ding uh gintak huailou hi’n gen hi.

Numei naupang khat apu in sual
Imphal, July-7 : Lamlai PS huamsung Phaknung Mayai Leikai mun a om numei naupang kum 11 ding mi apu (uncle) in sual(rape) hi’n kigen hi. Thusuak in  a gendan in Kangujam Loken Singh s/o (late) Iboyai Singh in July 5, 2013 in huai numei naupang tonpih in  numei-naupang’ sanggampa loukuan pi dingin kuan ua,Loken in  hun lemtang ala in numei naupang pen sual hidan in kigen hi. Numei in kuamah kianga genlou din vau himahleh inn a tun phet in apa kiangah thil omdan gen hi. Tu in Loken a omna theihlouh in kibu a, police-ten case file uhi.Numei naupang pen July 8, 2013 in medical test neih hiding hi. Amah  LP School a class V sinlel hi’n kigen hi.

AR te’n galvan tawh mankhia    
Imphal, July-7: 10- Sector nuaia om 16-Assam Rifles pawlin Pangei  kianga Yumnam Khunuo village   ah helpawl khenkhat kivialleh uh chihthu a zak ziakun operation bawl uh a,

Prepak(PRO) pawla tel hidia gintak mi 2  galvan tawh mankhia uhi. Matkhiak a om mi 2te  Mrs M Victoria Devi @ Jamdupati (40) w/o Loken Singh of Top kongpal Naoriya, Imphal East District leh Miss Th Pep Devi (36) d/o Shangai of Wabagai Keirak, Thoubal dist apan Chinese hand-gGrenades 3 mukhia uhi.  Amaute thudotna apan galvan koihna mun theikhia uh a, Carbines 2 leh magazine, 9mm Pistol 2 leh magazine 2, 9mm Pistol tang 9, Lethode Shell 3,  Chinese hand-grenades 7 ,  Detonator 6 leh DAC43W-II live round 1 mukhia uhi.  

Numei pawl in kiphinna patsawm
Imphal, July-7 : Yairipok numei college nungak khat sualluih a om tawh kisai in tuni in numei pawl tuamtuam 5 ten Manipur Press Club ah press-te kimuhpih uh a,  govt in pan alak kei leh kiphinna khauhtak pat sawm uhi. Thusuak kizadan in  sualluih a om numeinu’n a sualtu leng thei a, SP/Thoubal in ama office ah koih mahleh case bangmah file hilou chi uhi.. Huaiziakin numei pawl lungkimlou in kintak a man a gawtna pe dingin phut uhi. Mi sualtu gawtna kilawm hunchiang piak ahihkeileh numei pawlte’n kiphinna tuamtuam pan ding uh hi’n gen uhi.

Police te’n mobile check uh
Imphal, July-7:  Police-te’n tuni’n bazaar area leh mun tuamtuam ah bazaar leh khawlai a pawt mipite  khawlsak in a mobile etsak uh a, porn video leh limlak thanghuai koihte kiangah huchibang milem thanghuai koih nawnlou dingin theisak uh a,  khenkhat a mobile uh laksak uh chihthu om hi.

Blood Donation Camp om
Imphal, July-7 : Kangla Facebook Group leh Blooming Manipur ten Association of Voluntary Blood Donor Manipur  tawh pangkhawm in tuni in Khwairamband Ima Keithel mun ah Blood Donation Camp bawl uh a, huai hun ah phatuamngai mi tuamtuam 32 velin sisa pia uhi. Huai sisan thawhkhawm a omte damlou leh sisan piak ngaite khualna a a thawhkhawm uh hi’n kigen hi.

Student-te kipahpihna & pahtawina
Imphal, July-7 : Okram Sagei Apokpa Trust, Thoubal-te saina in tuni in Lamyanba Shanglen mun ah ‘12th Annual Prize distribution’ om hi. Huai hun a Education Minister M. Okendra khuallian in pang a, Functional President in M. Prithviraj, Parliamentary Secretary(Youth Affairs & Sports) pang hi. Huai hun ah student tuamtuam lawhching tungtuante kiangah kipahman piak ahih ban ah amaute pahtawina leng om a, thilpiak(gift) tuamtuam leng piak hi uhi.

CDSU in DC/CCpur kiangah point 3 tel ngetna pia, Kapliam a om Lunminsiam dam zoulou in si
Lamka, July-6: Khuga Dam a om IRB te’n huai kimlaka kithuahlai numei leh pasal mankhia in kilawmlou taka akoih ban uah vuaktang a omlai lemlak Social Networking ah khahkhia uh chih ziakin June 30, 2013 in Police te’n IRB personnel 4 mankhia uh a,numei pawlte makaihna in mipi tamtak in Police station kidelhhuan in IRB personnel 4te mipi khut a pekhe ding in nawh uhi.Mipi leh police kinawktuahna kal ah Lunminsiam Guite (20) s/o Lunkhopau Guite of Zenhang Lamka thau a kapliam khak in om a, Shija hospital a ICU ah ni 7 sung etkol dam zoulou in tuni zingsang dak 2.30 in si hi. Huai sihna tawh kisai in CCpur District Students’ Union(CDSU) pawlin DC/CCpur tungtawn in Chief Minister kiang ah memorandum pia uh a, misi innkuante ex-gratia Rs. 5 lakhs piak ding leh a innkuante khat sepna piak ding; aliam 23te panpihna Rs 1 lakh chiat piak ding banah thau a mi kapliam Police-te suikhiak a akituahpih bang gawtna piak ding chi’n point 3 tel ngetna pia uhi.

Lunminsiam Guite lasiam leh actor khat hi a, tunung a khahkhiak(release) hiding Kuki R&B HIPHOP album thak ‘SOUAWK BOYS’ ah tel hi’n kigen hi. Azi Ms. Nengneilhing tawh December 2012 vel a kiteng hi uh a, azi in naupai lel lai hi’n kigen hi. Amah it leh ngaina tamtakin tuni’n Shija Hospital apan Lamka ah aluang puak ding a paipih ahihlai in vadawn uh a, YPA Imphal Block inntekna tawh hong kipua hi. Imphal apan siluang khakkhiatna hun saulou zat in om a, Health Minister Phungzathang Tonsing, Parliamentary Secy Vungzagin Valte leh makai tuamtuam tamtak tel uh a,Ginsuanhau,MLA a damlouh ziakin azi’ in puandum in siluang tuam hi. Lunminsiam’ luang tuni nitaklam dak 3:00 vel in Lamka puaktun in om a, tuni mah in Zenhang Lamka hanmual ah kivui hi.

CDSU pawlin DC tungtawn in CM ading memorandum a piak uh tuni sunning dak 2.00 tan in govt in a buchinsak kei leh hunchiam omlou nuakna(indefinite agitation) pan ding uh chih a taklat ziakun DC/CCpur in govt apan a zak dungzui in dawnna pepah a, nitaklam dak 3:30 in CDSU office ah CDSU, ZSF leh YPA Gen HQ makaite’n genkhawm uhi. DC apan dawnna lunglun huailou sakziak in DC/CCpur kimuhpih uh a, govt side apan DC in CDSU te ngetna dawnna pethak hi. DC/CCpur in govt apan thupukna omte a gendan in Lunminsiam Guite innkuante kiang ah July 20, 2013 tan in govt in a phaltan(permissible limit) ex-gratia piak ding, aliam mi 23te panpihna (financial assistance) piakding, sum-le-pai tamzaw piak a ngaih leh Manipur Cabinet in thupukna abawl ding, misi innkuante sepna piak ding tungtang leng Cabinet a puaklut ding banah June 30, 2013 nitaka Police-te’ thaukapna thu enquiry bawl a, Police personnel gamtang khial (guilty) muhkhiat a om leh dan(law) dungzui a action lakding chi in dawnna pia hi.

Lunminsiam Guite it leh ngainatute’n ‘internet social networking site’ tuamtuam a display picture (profile) dingin tuni akipan ni 1 sung Lunminsiam Guite’ lim zang uh a, suunthu leh itna thu internet ah khak souhsouh uhi.

Police in remand ni 3 lakbeh
Lamka, July-6: Khuga Dam area ah numei leh pasal kilawmlou taka bawlse kawma lem kila social media tungtawn a khahkhiak tawh kisai in Police te’n June 30, 2013 in IRB personnel 4 mankhia uh a, July 1 in CJM court ah pawkhia(produced) uhi. CJM in July 6, 2013 tan Police khut a om din phalsak a, tuni’n Police te’n ni 3 sung hun lakbeh uh a, July 8, 2013 in CJM court ah dingsak ding uhi. Mi 4 te tungah Police te’n FIR No.51 (6) 2013 CCP- PS U/S 354/341/34 IPC & 67 (A) I.T Act (Information Technology Act) registered uhi.

DC office a meeting 3 ahun kisuan
Lamka, July-6: Langkhanpau Guite, Chairman DRDA &ADC/CCpur makaih in tuni zinglam in DC’s office a BRGF Resource Centre ah BRGF tawh kisai Dist Planning & Implementation Committee meeting a, huai zawh in DRDA Governing Boby meeting leh DC makaih in Dist Level Disaster Management Authority Committee meeting om ding chih himahleh meeting om hun ding suan uhi.

Facebook ngai serious
Lamka, July-6: Kuki Women Human Rights Orgn (KWHRO) makaite’n tuni in meeting nei uh a, tuailai tamtak in face book “I Love Lamka” kichi ah namkal buai theihna ding kichounna agelh uh ngai serious mahmah uhi. ‘I Love Lamka’ kichi group 2 in kikhen a, group 2 te’n mimal kichounna, nam kal buaitheihna ding tanpha a kichouna gelhgelh uh a, huai thu ah pawl tuamtuam leh nu-le-pa te’n panla ding in ngen uh a, user te’n leng tawpsan ding in ngen uhi. Hibang a kichouna hoihlou leh namkal buaisak theiding user-te tung ah legal tak (dan tawh kituak) a sui leh action lak hidin Ngaineikim, President KWHRO apan kiza hi.

IMA ah GFI pawl affiliate ding
Lamka, July-6: Gospel for India(GFI) kichi pawlte Indian Mission Association(IMA) ah affiliate sawm uh chihthu om hi. Huai tawh kisai in IMA akipan Rev Zohmingthanga in July 12,2013 in Hyderabad akipan Manipur hongpha ding a, July 14,2013(Sunday) sunnung dak 1.00 in GFI pawlte biakna kikhopna mun Gerizim building upper floor, Hill Town(opp CCpur Govt College) ah amah tawh special programme zangkhawm ding uhi. Huai hun ah Bro T.Johnsing Kom leh Lalminlien tanvou gotna(installation programme) leng om ding chi’n GFI thusuak in gen hi.

Album thak hongkhia
Lamka, July-6: Ms Ruthy Nianglunting in asak “Khangdawng lai ni” kichi Gospel video album honna tuni zinglam dak 11:00 in IB Road a Synod Hall ah om a, Mrs Phalbawi Vaiphei w/o T. Manga Vaiphei, MLA khuallian hikawm in Album hong a, Rev. T Manga in thumna in lan hi. Huai hun ah Saipum hausa Khamliankap in Intekpa hihna tawh uap a, lasiam tuamtuam – LL Muona, Joycee, Francis Mimin, Rex Pauboi ban ah Saipum KKP Choir te’n lasa uhi.

Division Naupang khawmpi kipan
Lamka, July-6: EBC saptuam a Divn Baptist Children deptt (Lamka North Divn) pawlin tuni apan Hiangtam Lamka EBC biakinn ah khawmpi zang uh a, Rev Paukhanmang Guite, Advisor/ DS Lamka North Divn in hongkhia hi. Tuni’n kidemna tuamtuam om a, July 7, zinglam dak 10.00 a biakna kikhopna ah Rev Paukhanmang Guite in thugen ding a, nitak kikhopna ah kipahman tuamtuam hawmna om ding a, Pastor D.Kamchinmang, Local Pastor EBCC Hiangtam Lamka in khawmpi khakding hi.

Traffic rule bawhsi mi 10 mankhia
Lamka, July-6: Lamka khawpi sunga ‘One way traffic rule’ leh ‘Gari parking’ dan Police, VDF leh traffic Police te’n enzui zel uh a, July 2-6, 2013 sung in traffic rule bawhsia mi 10 mankhia in TR-5 receipt cut in liausak uhi.

Kikhop lai in Generator guksak
Lamka, July-6: Tuni nitak dak 7.00 velin Mission Road a Church of Christ Congregation kikhop lai in biakinn kong verandah a Generator(Yamaha) kikoih, guta hidinga gintak te’n gumang uh chihthu kiza hi.

IMPHAL NEWS
Cheques leh Laptop hawmkhe ding
Imphal, July-6: Director of Commerce & Industries leh Director of Sericulture kigawmna saina in July 8, 2013 zinglam dak 11.00 in Palace gate,Imphal a MFDC Auditorium Hall ah HEDA,CLUSTER leh CDP nuai ah entrepreunuer,weaver leh farmer-te kikhopkhawmna ah Chques leh Laptop hawmkhiakna function om ding hi. Huai ah Chief Minister O. Ibobi khuallian a pang in cheques leh Laptop hawmkhe ding a,Functional President in Govindas Konthoujam,Minister(Commerce & Industries/Sericulture) pang ding hi.

BJP phutkhetu pian champha zang

Imphal, July-6: BJP, Manipur Pradesh in party phutkhetu Dr. Shyama Prasad Mookerjee pian champha 112veina tuni’n Nityaipat Chuthek, Imphal a BJP head office ah zang uhi. Huai hunah Tapir Gao, National general secretary & Manipur incharge khuallian in pang a, Guest of Honour in Rameswar Chaorasia, National Secretary BJP leh Functional President in Th.Chaoba Singh, President, BJP Manipur Pradesh pang hi.

KSDC Gen. Strike support puang
Kanggui, July-6:Kuki State Demand Committee(KSDC) in July 8, 2013 zinglam dak 5.00 akipan July 9, 2013 nitaklam dak 5.00 sung General Strike puang uh a, July 11, 2013 nitaklam dak 5.00 tan economic blockade a puan uh Sadar Hills ah khauhtak a paipih hiding chihthu kiza hi. Kuki mipite maban ding etna tawh Govt. naktak a nawh theihna dingin Sadar Hills huamsung a NH 2te ah khauhtakin support hiding chi’n Chonkam Kipgen, Convenor, KSDC Sadar Hills in gen a, media/press leh medical tawh kisai ahihkeileh strike sungin NH 2 te ah paisak hilou ding chi hi.

Dukan 4 mei in kang
Imphal, July-6 : Thangal Bazar ah tuni in dukan 4 mei in kang a, fire brigad-te Fire Tender 8 velin sawtkuamtak a phelh nung un meikuang phelhmit thei uh chihthu om hi. Akigendan in huai dukan 4te laka khat bel Samsung company van zuakna hi’n kigen hi.

Tipaimukh Dam in sq km 227 tuum ding

Imphal, July-6: Tipaimukh sub-division sunga Barak-lui ah Dam bawlkhiak hileh gammang (forest) 227 sq km hihsiat hiding a, hihsiat a om dingte forest advisory committee (FAC) meeting ah Union Environment Ministry in ngaihtuah ding hi. Thusuakin a gendanin FAC in leitang 300sq km tungthu a genkhawm dingte lakah thubuai omna Tipaimukh hydroelectric Dam in gam 227 sq km ah singkung 82.47 lakh hihse ding hi. Govt. thusuakin a gendanin Tipaimukh dam bawlna ding mun ah haichi leh ganhing manpha mangthang thei ‘flora and fauna’ tamna mun ahi hi.

Inn huang ah Bomb mukhia
Imphal, July-6 : Khagempalli Pankha mun a om Potsangbam Devendra s/o (late) P. Manichand tenna inn ah Chinese handgrenade khat muhkhiak in om hi. Huai tawh kisai in vengsung mipite’n kuate gamtatna hiam chih kipuang ding a phutna leh mawhpaihna in tuni’n sit- in protest nei uhi. Devendra bel USA a Merchant Navy a om ahi hi.

KNLF pawlin hilhchetna thu suah
Imphal,July-6:Tuni issue Newspaper tuamtuam ah 9-Assam Rfles-te lakah KNLF pawl 19 galvan tawh kipekhia chih thusuah tawh kisai KNLF a Info & Publicity Secy Kolphe Kuki in hilhchetna thusuah bawlkawm in a taklatdan in KLNF pawlin India govt tawh peace talk process(SoO) adin kalsuan lel uh a,kipekhia(surrender) himhimlou uh chi’n taklang hi.

Thusuakin a taklatzel dan in Mangcha @ Mapui leng Sept 5, 2012 in Myanmar citizenship cards a process banah numei tawh kisai ah pawlpi dan a kalh ziakin tawpsak(terminated) hi’n taklang a,pawlpi thuneitute kithuzakpih masalou a media te’n thudiklou a suah uh mawhsa uh chi’n leng Kholphe Kuki in taklang hi.

July 8 in BSc Agri. course kipan ding
Imphal, July-6: Indian Council of Agricultural Research(ICAR) saina a 18th All India Entrance Examination atel candidate-te kiangah State Agri Deptt in a theihsak dan in state nominees a B.Sc (Agri) leh adangdangte Agricutural University, Iroishemba, a ziltheihna dingin prescribed counseling proforma la din theisak hi. G Shamu Kabui, Director, State Agriculture deptt apan thusuakin a genna ah Rs. 100 pia in Directorate of agriculture office, Sanjenthong ah July 8, 2013 apan laktheih ding a, July 12, 2013 tan in submit ngai ding hi.

Voluntary blood donation ah Manipur niam
Imphal, July-6: India a state 28 leh UT 7 omte lakah Voluntary Blood Donors (VBD) tawh kisai Manipur ah niam mahmah lai a, mipite laka awareness taksap ziak ahih gintak huai chi uhi. Manipur Press Club ah tuni’n media-te adi’n VBD tawh kisai one-day workshop om a, huai ah mi 30 vel tel uhi. Blood bank leh blood tawh kisai a nasem govt agency tuamtuam te’n VBDs tamsem omna dia kimuhkhawmna hunah state sunga mihing 27 lakhs omte’n sisan unit 27,000 poimawh ahihdan, Dr SK Chourasia, Project Director, Manipur State AIDS Control Society (MACS) in gen hi. Tulelin RIMS, JNIMS, Ccpur dist. hospital leh Shija hospital ah akigawm in blood bank 4 om a, Thoubal, Senapati leh Chandel (Moreh) ah tunung in blood bank 3 honkhiak hiding hi.

HSLC a lawhchingte pahtawina
Imphal, July-6 : Ruangmei Literature Society-te saina in tuni’n Manipur Press Club ah HSLC-2013 a lawhchingte pahtawina om a, huai ah Deputy CM Gaikhangam khuallian in pang hi. Huai hun ah Functional President in Janghemlung Panmei,MLA(Tamenglong A/C) pang a, Guests of Honour in Chairman ADC Tamenglong G. Soibem Haomei, Chairman, ADC Tamenglong; L.P. Gonmei, IAS, Norbert Derinong,IAS leh Hucham Gonmei, IAS pang uhi. Gaikhangam in huai hun ah student tamtak hasotnathu gen a, khaw hausa kuapeuh in hibang program atam theilam neih poimawh chi hi.