Assam Rifles te’n ZRO President inn a luh uh mipi’n mawhpaih, Govt in UPF leh KNO tawh political talks pan di’n ngen
Lamka, July-5: Zomi Students’ Federation (ZSF) leh Hmar Students’ Association (HSA) inntekna in tuni in Lamka khawpi sungah Peaceful Rally om a, huai ah student-te, nulepa banah pitek-putek tanpha telin mipi 20,000 velding in lamlian zui uh a, Lamka public ground apan khe apai in DC/CCpur office ah memorandum pia uhi. Rally apai mipite’n placard tuamtuam tawi-in, SoO nuaia om UPA leh KNO tawh government in political talks kintak in nei hen chi uh a, huai kawmin Assam Rifles te’n ZRO President banah UPF General Secretary lenlel Thanglianpau Guite @ Sia Pau tenna inn a luh(raid) uh naktaka mawhpaih uh ahihdan taklang uhi.
Tuni zinglam dak 10:45 velin mipi tamtak Lamka public ground apan kipankhia ua, amaute thumna tawh Pastor D Kamchinmang Local Pastor EBC/Hiangtam Lamka in khakhia a, Zomi Council Chairman LB Sona in thugenna hun saulou zangin, UPF in Manipur singtangmite’ suahtakna ding ngaihsutna a political demand a neihlai a UPF leader khat hibanga khoihsawmna(target) leh a inn tanpha nasataka luh ahih theihsiam vual hilou a, numei-naupang patautaka koihtu Assam Rifles te mawhpaihna sangpen pia uhi.
Mipi 20,000 val dingte ZSF leh HSA leader te’ banah civil society leader tuamtuam heutute’n makaih uh a, huai hunah ADC/CCpur Chairman Langkhanpau Guite telin Executive Member-te leh ADC member-te atamzaw muh in om uhi. Mipi’n placard atawite uah thu tuamtuam kigelh a, Assam Rifles te’n ‘friend of the hill people’ a chih uh singtangmite khemna lel hiam, bangchidan a tuni dong UPF leh KNO te tawh govt in political talks pan nailou hiam, lemna leh muanna piching govt in deih taktak ahihleh kihouna panta uhen chih leh thugelh tuamtuam takkhia uhi.
ZSF in Prime Minister leh DC/CCpur kiang ah Union Home Secretary kiang tung ding memorandum khat pia uh a, tua zawhin mipi kizui in ADCC Chairman kiangah leng copy pia uhi. DC/CCpur omlouh ziakin Addl DC Maniram Sharma in memorandum sang a, Prime Minister leh Union Home Secy kiangah memorandum pesawn ding ahihdan gen hi. ADC Chairman Langkhanpau Guite in agenna ah MDC te’n UPF leh KNO in govt tawh political talks apat theihna ding un pan naktakin kila chi hi. Tuibuong a ADC office apan in rally paite kikhen uhi.
ZSF in Prime Minister leh Home Minister kiangah atuamtuak a memorandum a piaklutna uah, mipite’n UPA govt ah muanna liantak a neih lai un SoO nuaia om UPF leh KNO tawh tuni dong govt in political talks aneih nailouh uh mipite’n lamdangsa mahmah a, kum 5 paisa a SoO suai kikai tuni dong agah bangmah muh ahihnai louh ziakin kintakin govt in UPF leh KNO tawh political talks pan hen chi’n ngen uhi. Security force te’n ground rules palsat mun mahmah uh a, govt in lemna leh muanna detdoutak a tundingna dingin asep ding uh om chi uhi. UPF in Manipur singtangmite’ suahtakna dinga khentuam omlou a political demand abawl uh “Autonomous Hill State” sepkhiak kin hihen chi uhi. ZSF’ memorandum in a genbehna ah July 3, 2013 zingsang in 30-Assam Rifles pawlin UPF General Secy tenna inn a luh guih mawk uh mipi leh civil society tuamtuamte’n naktakin mawhpaih chi uhi. Hibangkalah, tuni a rally a tel student-te, nupi-papi leh kuapeuh tungah ZSF Gen HQ in kipahthu puang uhi.
MDC te’n Rs 1 lakh in damlou vehding
Lamka, July-5: Chairman ADC/CCpur makaih in ama’ office chamber ah tuni in MDC member te tawh informal meeting om a, DRDA nuai a nasepna genkhawm uhi. June 30, 2013 nitak in mipi leh Police kinawktuahna a liamte mimal leh MDC te’n amau hihtheih danchiat a vehna tung ah Chairman in kipahthu gen hi. Shija Hospital a om Lunminsiam Guite (20) s/o Lunkhopau of Zenhang Lamka etkolna din a innkuante’n Rs 1 lakh deposit uh a,a senna uh tunitan in Rs 2 lakh tungta a, bill omte a kimkhat bek piak ahihkeileh Doctor te’n treatment pezou nawnlou ding chih thu MDC te’n kikum uh a, Doctor te’n treatment piakzom theihna ding un MDC te’n kithawhkhawm in Rs 1 lakh ngah uh huai in Lunminsiam veh sawm uhi. Mimal leh orgn tuamtuam in leng pahpihna pethei a, kuapeuh in thumna a phawk ding in Chairman ADC/CCpur in mipite ngen hi.
ZC in CM kiang ah ngetna pia
Lamka, July-5:Zomi Council in Manipur Chief Minister lekha pia in SoO ground rules bawhsia security force-te tunga action la ding in ngen uhi. Koirengei a om 30-Assam Rifles ‘E’ coy Commander Capt Malik Chauha makaihna in July 3,2013 zingsang baihtakin ZRO President leh UPF Gen Secretary Thang Lian Pau tenna inn luh ahih lamdangsak thu CM theisak kawm in ZRO kichi SoO agreement atel UPF nuai a om hi’n taklang uh a,ZRO/ZRA leng mahni kivenna dia galvan tawi, hileleng govt leh security kalh ngeilou hi’n taklang uhi. Hibang kalah security te’n SoO ground rule bawhse sek uh hi a taklang kawmin tutung a Assam Rifles-te thilhih govt in a kituahpih action la teitei dingin zasak uhi.
Kuki Nampi Kipumkhatna Maicham Taokhawmna-2013
Lamka, July-6: Maicham Committee,Songpi CCpur-te inntekna in July 7, 2013 sunnung dak 1.00 in Songpi a Maocham mun ah ‘Kuki Nampi Kipumkhatna(kum 2 lhinna) Taokhomna-2013’ om ding a, huai ah Maicham Chairman Rev Lunkhongam Haokip in thugen ding hi.Huai hun ah Kuki nam sunga makai tuamtuamte ading in thumsak ding uhi.
NEC inspection team in enkhe ding
Lamka, July-5: NEC tungtawn in CCpur dist a school 18 te’n Computer set a ngah uh hoihtaka zang hina uhiam chih enkhe ding in NEC inspection teamte’n July 9 in Lamka hongpha ding uh a, school 18 teng inspection bawl ding uhi. NEC inspection team in school a etkhiat dingte- Rayburn H/S; Blue Star Academy; Hoihkholhing Memorial English H/S; Young Leaners’ School; L.Foundation School; Hermon English School; Children’s Training Hr Sec School; Mount Carmel School; Rengkai Hr Sec School; Douglas Memorial H/S; St. Mary School; Don Bosco Hr Sec School; Sielmat Christian Hr Sec School; St. Pauls’ Institute; AG H/S; Bethany Christian College; Sagang H/S leh Royal Academy School hi’n kigen hi.
YPA Gen HQ in aliamte veh
Lamka, July-5: June 30, 2013 nitakin Police Station ah mipi leh Police kinawktuahna ziaka liamte YPA Gen HQ a President S.Chin Ngaih Pau makaihna in YPA Gen HQ in veh uhi, Tu zing in YPA Zenhang Lamka Unit office ah YPA Zenhang Lamka member a liam khate - Obed Thangtansang ; V.Hangthianmuang; Tuanlalmuan ; T.S.Khaipu; Biaksang leh Chinkhanmang Guite Rs 1500/- chiat in veh uhi. S.Chin Ngaih Pau in agenna ah Lamka khua sattu Zenhang Valte leh Phungkhothang Guite hi uh a, Lamka khua nei taktak Zenghang Lamka leh Hiangtam Lamka mipi ahihziak mah in Zenhang Lamka a YPA mi leh sa tam liampen hi’n gen hi. Police Station ah buai huna hangsan taka pangte YPA Gen HQ in a hangsanna uh pakta in aliamte thuakpih hi’n gen hi. Dist Hospital a ki-enkol a liam mi 3- Robert Lalchungnung Kipgen @ Lalboi (21) s/o Paulun of Zenhang Lamka; Lalramthar @ Thara (35) s/o (late) Thlamuon of Zenhang Lamka leh Thangnunmuang (26) s/o G. Khanthong of Zenhang Lamka zan nitakin YPA Gen HQ makai te’n veh in Rs. 5,000/-chiat pia uhi.
Vajing ah training sunzom uh
Lamka, July-5: Tuni zinglam dak 8.00 in Vajing village ah khawsung mite adingin Farmers Training programme om a, haichi tuamtuam zatdan leh loubawldan sinsakna om hi. Huai hunah Agri office in haichi tang(seed) tuamtuam leng hawmkhia uhi. Tuni a training ah R.K. Dorenchand, DAO/CCpur ; M. Ginzalian, AAO/CCpur; ST. Paulienvung, EO/CCpur; Tunzagin Tungnung, EO/CCpur; Kh. Ajit Singh, EO/CCpur leh mipi tamkhop tel uhi.
ZHRF in ‘Press Statement’ suah
Lamka, July-5: Zomi Human Rights Foundation (ZHRF) in thusuah a bawlna uah ni tamlou paisa apan Lamka khawpi leh a pua a thiltungte nuamlou a sakdan uh taklang ua, IRB pawlin numei leh pasal vuaktang lemlak a khahkhiak uh thil kilawmlou a, ZHRF in naktakin mawhpaih chi uh a, kilawmlou taka numei-pasal va gamtangte leng mawhpaih huai mahmah chi uhi. ZHRF in CCpur District Joint Women Organisations leh social activist tungah kipahthu puang uhi. Assam Rifles te’n July 3 zingsang in New Lamka’ Dorcas veng a G. Khatkhanthang tenna inn a luh uh thil haihuai mahmah ahi a, ZHRF in ngaikhawk mahmah chi uhi. Civil Police tellou a mi inn valuh pomtheih vual hilou a, security force te’n Supreme Court in nautang bitna dinga thuneihna a piak ‘human rights’ bawhsia uh ahi chi uhi.
Division Naupang khawmpi
Lamka, July-5:Evangelical Baptist Convention(EBC) saptuam a Divn Baptist Children Deptt(Lamka North Divn) pawlin July 6-7,2013 sung Hiangtam Lamka EBC biakinn ah khawmpi nei ding uhi. July 6 in Contest deptt saina in kidemna tuamtuam om ding a, July 7,2013(Pathianni) zinglam dak 10.00 a biakna kikhopna ah Rev Paukhanmang Guite,Advisor/DS Lamka North Divn in thugen ding a, nitak kikhopna ah kipahman tuamtuam hawmna om ding hi.
Accident ziakin liam uh
Lamka, July-5: Tuni zinglam dak 11.00 velin Old Bazar ah Pulsar bike in lampi a pailai Jampau (50) s/o Chunghau of Kananphai phukha in liam a, Ramhmangaih (14) d/o Pauminthang of Ngurte leng tuni nitaklam dak 3.00 velin a nungzang lak tuisa in buakkha hi. Paosei (18) s/o Holkhopao of Matejang, tuni in taksa hatlouh ziakin kipuk a, amaute hospital ah etkol in om uhi.
Disaster Management meeting
Lamka, July-5: DC/CCpur makaih in July 6, 2013 sunnung dak 2:00 in DC/CCpur office ah Dist Level Disaster Management Authority Committee meeting om ding a, huai ah SDO te’n case report a bawlthakte uh genkhawm ding uhi. Dist Level Disaster Management Authority Committee a member-te- Addl DC; SP; CMO; EE/PWD; EE/IFCD; Dist Supply Officer leh SDO te hi uhi.
Summer Vacation hun hihsau
Lamka, July-6:New Lamka a Ebenezer Academy ah Summer Vacation zawh a school lutnawn hun ding July 8,2013 chih himahleh school building puahthakna nasep zawh nailouh ziakin July 15,2013 in school lutnawn ding uh chi’n Principal apan thusuak in gen hi.
Chinkhopau omna kitheilou
Lamka, July-5: Chinkhopau of Bungmual tuma zekin Takvom gam a saphu beng a kuan tuni tan a omna theihlouh in mang a, a innkuante’ leh phatuamngai pawl tuamtuam in zong uhi. Amah mi lianlou, mivom leh lungsim lam leng fel chiahlou hi a, a mukha leh a omna theite’n YPA Bungmual unit # 9862733016 / 9862020445 theisak dingin ngen uhi.
News 2 sung News hawm theilou
Lanva, Gangpimual,Mualkoi,Tangnuam leh Pangzawl area a news hawmtu(agent/hawker) H.Tuangousiam(Identity Card No. 51) a nasepna ah aliam khak ziakin apaisa ni 2 sung News hong hawm theikei a,huai area a News late’n nana theihsiam uh kon ngetsak uhi.
-Circulation incharge
GAS NEWS
SAS booking upto May 11 Delivery July 6 stock 306
Kim-Joe booking upto May 9 Delivery July 6 stock 306
IMPHAL NEWS
HAC Vice-Chairman din Kikhonbou Newmai
Imphal, July-5 : Chingmeirong a Assembly Hall ah tuni zinglam dak 11:00 in Hill Areas Committee (HAC) Vice-Chairman ding telna om a, Kikhonbou Newmai,MLA(Chingai A/C) kia in candidate dinga nomination a file ziakin tuhtu omlou in kituak taka telching in om hi. HAC Chairman Dr. Chaltonlien Amo leh Dy. Speaker MK Preshow telin MLA bangzahhiam in Newmai adin motion move uh a, tuazawh in MLA dangte’n seconded uhi. HAC Chairman Dr. Chaltonlien Amo in hun sawt tak Vice-Chairman mun awng ziaka nasep nawngkaitak a ompen tu’n Vice-Chairman a omtak ziakin nasep zangkhai tuan mahmah ding hi’n gen hi.
Phubala mun ah lu guh kimukhia
Imphal, July-5 : Bishnupur district sung Phubala ah tuni sunnung dak 2:00 in Kidoupi 2na hunlai a Japan sepaihte a hidia gintak mihing luguh muhkhiak in om hi. Huai tawh kisai in upa lamte gendan in tuni a luguh muhkhiakna mun Kidoupi 2na hunlai a Japan te’n camp mun a zang uh hi’n in gen uhi. Huai mun ah bomb leng muhkhiak hi a, himahleh hiaithu gelh ahihtan in police te’n leng thuchian bangmah thei nailou uhi.
NH-53 a menchim hahlai uh
Imphal, July-5: National Highway-53 in a totkhak Imphal-Jiribam lamlian a Nungdalal area ah menchim thupitak om zan akipan order Road Task Force (BRTF) pawlin hahsiang sawm in hahtak in nasem uh a, menchim hahsiang zawh nailouh ziakin Imphal zuan ding Truck 200 val paisuak theilou in Jiribam ah tang(stranded) lai uhi. Jiribam-Imphal kikal Jiribam akipan km 70 vela gamla Nungdalal kianga menchim in National Highway buai sakin tuni tan nawngkai lai hi’n thusuakin gen hi.
Education ‘free zone’ hihsak deih
Imphal, July-5: Manipur phaizang bial district 4 ah educational institution himhim kuaman hihbuailou in ‘free zone’ hihsak deihna in tuni’n DESAM) pawlte makaihna nuaiah zinglamakipan Imphal khawpi sungah rally pai uh a, Director of Education(S) H. Dilip Singh inTHAU ground apan Thangmeiband kikal a rally pai dingte khahkhia hi. Rally paite’n Khoyathong, North AOC leh Chingmeirong Khongnang Karak tawn in Khuman Lampak Main Stadium ah lut uh a, huai ah public meeting om hi. Huai hunah student tamtakin placards tuamtuam ‘politics apan education koihtuam hihen’ , ‘bandh, blockade leh boycott in siamsinna innte huamkei hen’ chih kigelhna tawi uhi. Thusuakin agendanin Thoubal ah leng hibang rally om a,DC T. Ranjit Singh in Rally khahkhia a, Bishnupur ah leng Dist. HQ a Mini Stadium apan SLO Ground tan lampi zui uhi.
Helpawlte’n numei khat kaplum
Imphal, July-5: Indo-Myanmar border a om Moreh ah numei khat kaplup ahihman in bouruak sang mahmah a, buaina om ding venna in mun tuamtuam ah Police-te’n venbitna pia uhi. Thusuakin a gendan in helpawl tuamtuam in mipite kianga sum demand a bawlte uh tawh kisai genkhawm dingin public meeting neihsawm uh a, huchihlai in meeting a tel dia kisa, Moreh Ward No. 4 ah Shamu Darai (38) kaplup in om hi. Thusuak dungzui in Sunrise Club kiangah tuni sunning dak 2.00 in motorcycle a tuang pasal 2 in Shamu Darai a kaplup zawh un kihemmang uh chih ahi hi.
KNLF cadre 19 kipekhia
Imphal, July-5: Kuki National Liberation Front(KNLF) a 2nd-in-Command Lunminthang makaihna in cadre 19 in galvan tuamtuam tawh Moreh a om 9- Assam Rifles ah kipekhia uh chihthu om hi. Thusuak kizadan in KNLF pawlte Indo-Myanmar gamgi pansan a om hi uh a, gamgi veng a om Assam Rifles-te kiang ah zan in kipekhia uhi. Amau pawl M-16 rifles 3 leh atang 50, AK-22 rifles 2 tawh atang 50, US carbine 1 tawh a tang 38, banah .32 pistol 1 leh 60mm mortar tawh kipekhia uhi.
Mipi in galvan tawia mivau mankhia
Imphal, July-5: North AOC ah tuni nitaklam in Opendro of Langol Game village in 9-mm pistol tawikawm in lampi apai, mi nautang khenkhat vau a, khawsung mite’n thautawi om ahih dan a theihkhiak un kidelh huan uhi. Opendro kiangah pistol koihkhe din mipite’n a ngetna uh limsaklou a, mipite lam ah thau khahsawm in vau zawmah chi uhi. Tuabang thu omlai in khawsung mite pangkhawm in pummat uh a, Imphal West Police commando khut ah pekhia uhi. Police- te’n thiltung suizui uh a, security force personnel ahihdan theikhia uh chihthu om hi.
PHED engineer inn ah grenade
Imphal, July-5: Meltheihlouh pawlkhat in Keishamthong Top leirak, Imphal West a Public Health Engineering department a Executive Engineer M Ibomcha Singh (55) tenna inn huangsung ah tuni zinglam dak 11.30 in hand grenade pailut uh a, engineer’ tanute laka khat in gate a khak ging za in leitual a bomb om mu hi. Police te’n thiltunna mun delhpah in bomb puak nailou lakhia uhi. Executive Engineer in tuni a thiltung tawh kisai agenna ah, helpawl kuamah tawh mimal takin kisiatna neilou a, himahleh official’ sum-le-pai thil tawh kisai in helpawl khenkhat tawh kilem thei nailou uh ahihdan gen hi.