June 10 akipan Assembly Session om tuni’n zou uh, Manipur Assembly in Bill poimawhtak pass
Imphal, July-04:Manipur Assembly term 10na adia session 5veina ‘Manipur Assembly Monsoon Session’ kichi apaisa June 10, 2013 akipan tuni tan om a, session om sungin ni 17 sung sitting om hi. Session beini tuni in Chief Minister O. Ibobi in July 1, 2013 in House ah a luikhiak ‘the Manipur Public Servant’s Personal Liability(Amendment) Bill, 2013’ tuni in genkhawmna om a, huai ah Dr I. Ibohalbi,MLA leh L. Ibomcha in huai Bill tawh kisai leh amendment tawh kisai thusun leh ngaihdan tuamtuam a gente uh Chief Minister in dawnna leh hilhchetna a bawl nungin House in kituaktak in pass uh a, Assembly Session leng tuni zinglam dak 11.20 velin Speaker Th. Lokeshwar in hunchiam omlou dingin khawlsak (adjourned sine-die) hi.
Tuni’n Assembly session ah ‘the Manipur Public Servant’s Personal Liability (Amendment) Bill, 2013’ genkhawmna hun ah Chief Minister in huai Act pen kum 2006 akipan kizang hi’n gen a, huaima in corruption/fund misappropriation case 42 om a, major deptt tamtak ah sum-lepai zat thelthangna leh zatna diklou tamtak om ahihdan gen hi.Chief Minister in huai Act kizat nungin case 28 om a, tulelin case 17 pailel hi’n gen hi.Sum zat thelthangna a kigolh govt nasemte a lawh uakipan ditsak in om uh a, pension-sate ahihleh a pension khasum uh sehthum suah suahkhat(1/3) a ditsak in om uh chi’n CM in gen hi.
Huai Act kizatma kum 4 paisate ate huamtelsak theihna ding in Section 4na ah section 4A behlap hi a,huai anuai abang ahi hi:- “4A. Liability for past irregular actions:- Notwithstanding anything contained in the Act, any irregular actions committed by a public servant four years before commencement of the Act, shall be deemed to be irregular actions committed under this Act” chih ahi hi.
Speaker Th. Lokeshwar in Assembly session hunkhakna kawmin a thugenna ah session om sungin obituary reference(member sisa suunna) 2 om a, March 2013 kha a session omlai a Governor thugen kipahpihna thusun pom ahih banah Starred questions 102,Unstarred questions 12 leh Short notice 2 genkhawm a om hi’n gen hi.Session sung in table a luikhiak paper tuamtuam 18, Committee report 5, Calling attention 13,Short duration discussion 1 om hi. Cut motion tuamtuam i)Token Cut 13, ii)Economy Cut 9 leh iii) Policy Cut 38 om a,Discussion on a matter of public interest 1, Privilege motion 1, banah Financial Committee 3 leh Dy Speaker telna om a, govt bill tuamtuam 6 luikhiak ahihbanah passed a om hi’n Speaker in gen hi.
Tutung a assembly session sung in deptt tuamtuam 50 in March 31, 2014 tana a sum zat ding uh ‘Demands for Grants, 2013-14’ nuai ah kigawm in Rs. 88,08,76,53,000 passed hi a, huaibanah Demands for Excess Grants,2007-08 nuai ah deptt tuamtuam 7 adin Rs. 31,21,78,968 passed hi a, Demands for Excess Grants, 2008-09 nuai ah deptt 14 adin Rs. 1,02,86,57,117 passed ahih banah Demands for Excess Grants, 2009-10 nuai ah deptt 9 adin Rs.25,63,87,146 passed uhi.
Blockade sungin Imphal tawh kikawmna lampi 7 khaktan ding, KSDC in dakkal 48 sung General Strike leh Blockade puang
Lamka, July-4: Kuki State Demand Committee (KSDC) pawlin India govt a Ministry of Home Affairs ah Suspension of Operations(SoO) atel Kuki armed group tuamtuamte tawh kihouna pan ding in tamveitak ngetna a piak uh India govt in limsaklou hi a thei in lungkimlouh latsakna leh govt nawhna in July 8, 2013 zingsang dak 5.00 akipan July 9, 2013 nitaklam dak 5.00 tan dakkal 24 sung General Strike puang uh a, General Strike bei tawh kiton in July 10, 2013 zingsang dak 5.00 akipan July 11, 2013 nitaklam dak 5.00 kikal Economic Blockade om ding in puang uhi. Blockade sungin Imphal tawh singtanggam kikawmna Highway tuamtuam 7 khaktan hiding in puang uh a, General Strike leh Blockade sung in Press/Media leh Medical kia khahkol(exempted) hiding chi’n KSDC thusuak in gen hi.
KSDC thusuakin a genna ah pupa hunlai akipan Kuki mite’n lemna leh muanna deih in innvengte tawh khawsakhawm uh a, Indian Union ah Kuki khang masate gam leitang gawmkhawm hilou in mahni kivaihawm in om uh chi uhi. Tuabang a Kuki mite lungmuang taka hun a zatlai un thagum zangin mipite dikna leh kivaihawmna (constitutional rights) laksuh in om a, Kuki mipite ai-oh KSDC in hibang thiltungte theisiamlou hi’n gen uhi. KSDC thusuakin agenzelna ah KNO leh UPF tawh Political Dialogue nei dinga GoI/MHA in thuchiam a neihte tunitan melmuh dinga gah kilawm omlou a, ut-le-utlouh thu hilou in hibang thilte’n General strike leh Blockade omsak ding hi’n gen uhi.
Blockade sung in National Highway 7 - Imphal-Ukhrul road, Imphal-Tamenglong road; Imphal-Moreh road; Imphal- Chandel road; Imphal- Senapati road; Imphal-Ccpur road leh Imphal- Jiribam road khaktan hiding chi uhi. Huai tawh kisai in Tuibuong a KIC office ah tuni nitaklam in KSDC makaih in Hausa leh Civil Orgn tuamtuam te’n joint meeting nei in General strike leh economic blockade sunga panlakdan ding genkhawm uhi.
ZSF leh HSA makaihna in Peace Rally om ding
Lamka, July-4: Zomi Students’ Federation (ZSF) Gen HQ leh Hmar Students’ Association (HSA) Gen HQ makaite’n tuni nitaklam dak 4:00 in Nehru Marg a Zomi Council Office ah Press/Media te kimuhpih uh a, zan zingsang baihtak in Koirengei a om 30- Assam Rifles te’n SoO atel United Peoples’Front (UPF) a General Secretary & ZRO President Thang Lian Pau Guite tenna inn(Dorcas Veng, New Lamka) a luh uh mawhpaihna leh govt in SoO nuai a om UPF leh KNO-te akintheilam a political talk a neihpih ding phutna in July 5, 2013 in mipi tamtheipen Peace Rally paiding hi’n gen uhi. ZSF leh HSA makaite’n a genna uah zinglam dak 10:00 in Lamka Pulic Ground ah mipi kingakkhawm ding a, zinglam dak 10:30 in Lamka Public Ground apan mipi’n Tipaimukh Road zui in Police Station kong ah Tedim Road zui ding ah a, Mary Kom Ringroad zui in DC/CCpur kiang ah India Prime Minister tel in Central govt ading memorandum piak hiding in gen uhi. Peace Rally hun ah kuaman buaina bawllou ding leh mipi tamtheipen telding in HSA leh ZSF makaite’n ngen uhi.
Addl DC in school 2 enkhe nawn
Lamka, July-4: Maniram Sharma, IAS, Addl DC & Project Director DRDA/CCpur in tuni zinglam in Thangkhai govt H/S leh Lanva Model H/S enkhia hi. Aman a gendan in Thangkhai govt H/S a Headmaster in ZEO ahihkeileh DC/CCpur kiang ah theihsakna bangmah pelou in holiday extend a bawl ziakin show-cause pia ahihdan gen hi. Lanva Model H/S ah teacher 5 kai uh a,teacher dang 5 te BLO duty dia duty in akuanziak un absent hituanlou uh a, hileleng Mid-day meal tawh kisai leh SSA tawh kisai govt apan van poimawh tuamtuam school in a muhte record a bawllouh ziak uh hilhchian di’n show-cause notice pia ahihdan gen hi.
Ginneihching Simte in Ph.D ngah
Lamka, July-4: Ms. Ginneihching Simte @Ching Simte d/o (late) Hellam Simte in Manipur University nuaia History Dept. ah June 29, 2013 in Doctorate Degree (Ph. D) ngah hi. Aman Professor Salam Irene, Head of Department, Department of History, Manipur University guide-na nuaiah “The History and Culture of the Simte Tribe in Manipur” chih thesis tungtawn in Ph. D piak a om hi’n kigen hi.
46-A/R te’n KNLF 1 mankhia
Lamka, July-4: Police apan kizadan in July 2, 2013 nitak dak 11:40 vel in 46-Assam Rifles te’n Jolzam khua ah KNLF cadre Thangminlun Singson @ Lallun (26) s/o Lutkhomang Singson of Gampiphai, Motbung mankhia in 9mm pistol (country made) 1 leh magazine 1 mukhia uh a, Moirang Police ah pekhia uhi. CCpur Police te’n case lasawn in CJM court ah dingsak uh a, CJM in July 8, 2013 tan Police custody a omdin phalsak a, Police te’n FIR No. 58 (7) 2013 CCP-PS U/S 400 IPC & 25(1-C) A.Act registered uhi.
YPA GHQ in vanzat thak hunkhop lei
Lamka, July-4: YPA Gen HQ in Hall sung a zatding plastic chair 200 (Rs. 82000 man) ban ah VIP chair set 1 (bench 2, chair 2, side table 2, table 1) tutna teng Dunlop akituam Rs 34,000 vel man ding leithak uhi. YPA Gen HQ vanzat leithak teng tuzing in Hiangtam Lamka a YPA Gen HQ office ah Pastor Kamchinmang, Local Pastor EBCC Hiangtam Lamka in Pathian kiang ah thumna in lan hi. S. Chin Ngaih Pau, President YPA Gen HQ in agenna ah tulela YPA Gen HQ in a zatlel plastic chair 300 val leh bench 80te a kidaihlouh ziak in plastic chair kileithak a, VIP te tutna ding omlouh ziakin VIP Chair set 1 kileithak hi’n gen a, vanzat thak teng YPA Gen HQ Hall zangtute’n zangthei ding hi’n gen hi.
Police te’n Jail ah guta 3 koih
Lamka, July-4: HQ Veng a om 46-Assam Rifles camp’ fencing a kizang sikdai (iron wire) gu mi 3- Ginlamthang (34) s/o Kamthang of Sim Veng, Gouminlun (32) s/o Kapboi of Lanva leh Boylianthang (30) s/o (late) Zamchinlam zan in Army te’n mankhia in Police khut ah pekhia uhi. CJM court in mi 3 te Police custody ah ni 3 omdia a phalsak nung tuni’n Police te’n CJM court ah dingsak nawn uh a, CJM in jail a omdia a thutankhum ziakin Police te’n mi 3te Jail ah koih uh a, FIR No. 57 (7) 2013 CCP-PS U/S 379/34 IPC registered uhi.
Gari 2 accident: mi 1 si
Lamka, July-4: Thanlon sub-division sung Suangpehmun leh Thanlon kikalah zanhal nitak dak 12.00 velin BRTF truck khat lamkhang ah kia a, gari handyman Ginminlun Zou(20) s/o Haukhanmang of Milongmun Village amun ah si hi. Truck driver S. Lianzapao (20) s/o S.Daiminthang of Sainoujang liamzek mahleh serious lou hi.
Tuni zing dak 7.30 velin Suangpehmun leh Tallian kikalah sing-at cubic 400 pua a Lamka zuan Tata TC (No. MN02A/9443) tuahsia in lampi nawlah kipuk a, passenger 10 lakah Kaikhanmang (30) s//o L. Chingenpau of Chimtung veng in alu leh awm nasa a, Khupzalam (25) s/o Langzakham of Bungmual, akhe liam in amau gel hospital ah om uhi. Langgin (50) of Vengnuam, Tuanzamang (35) of New Bazar, Niangkhanngai (25) of Bethel Veng leh Mangzalal of Zion Veng liamzek mahle uh serious lou hi’n kigen hi.
Khaw 3 ah Farmers-te sinsak
Lamka, July-4: Dist Agri Office/Ccpur saina in Yaiphakol, Tuaitengphai leh Molnom a ‘Farmers Awareness Programme’ om zousiang uh a, khawmite leh huaikim a khaw omte’n haichi leh loubawldan chituamtuam sinsakna ngah uhi. Tuni zinglam in Molnom khua ah R.K. Dorenchand, DAO/Ccpur in Package & Protection of Rice cultivation leh Integrated Pest Management tawh kisai sinsak a, khawsung mi tuamtuam kihelin haksatna aneihte uh genkhawm uhi.
SUUNNA
Mrs Dimkhanchiin(56) w/o V.Tualzachin @ Tualpi of Singngat tuni zing dak 8:30 vel in blood cancer in si a, tuni’n Singngat hanmual ah kivui hi.
Jangminlun Haokip b/o Mangkholen Haokip (GOFICO) of Tuibuong Bazar, tuni nitak dak 10.30 in New Delhi ah sisa in kimukhia a, KSO-Delhi leh KWS-Delhi in buaipih uh a, Lamka lama hong kipaw ding in kigen hi.
IMPHAL NEWS
NH-37 ah Truck 300 val tang(stranded)
Imphal, July-4: Imphal apan km 115 vela gamla Imphal-Jiribam lamlian(NH No. 37) a Nungdalal area ah menchim om ziakin van poimawh tuamtuam pua Truck 400 vel Jiribam ah tutan kol(stranded) uhi. Thusuakin agendanin Jiribam apan km. 75 vela gamla Nungdalal ah Seppatni nitaklam a memchim ziakin tuni tan paisuak theilou uh hi’n kigen hi. BRO worker te’n menchin hahsiang ding in tuni in Nungdalal mun tung mahle uh menchim hahsiangna ding in ni 3 vel hunla lai ding hi’n kigen hi.
HIV/AIDS tungtang genkhawm
Imphal, July-4: ‘Manipur State Legislators’ Forum on HIV/AIDS’ pawlin Manipur state sunga HIV/AIDS doudalna dinga panlak sunzom dingin Assembly Secretariat complex kibawl thak ah tuni’n meeting uh a, huaiah Chief Minister O Ibobi Singh khuallian in pang a, Speaker Th. Lokeshore in programme makaih hi. Member 20 om executive committee kitelna ah Chairman in Speaker Th. Lokeshore pang a, Vice Chairman in Dr. Ng. Bijoy pang a, Secretary in Dr. I Ibohalbi pang hi. Executive committee member dangte Deputy Speaker MK Preshow Shimray; Dr. Chaltonlien Amo, Nemcha Kipgen, Karam Thamarjit Singh, Dikho, RK Imo, Y Surchandra Singh, Th Bishwajit Singh, Elangbam Chand Singh, T Mangibabu Singh, ST Nunglung Victor, Md. Fazur Rahim, L Ibomcha, DK Korungthang, Ginsuanhau leh Z. Kikhonhou Newmai hi uhi.
Hr Sec Improvement/Compartment
Imphal, July-4: Council of Hr Sec Education Manipur(COHSEM) saina in July 8, 2013 akipan July 15, 2013 tan Hr Sec Improvement/Compartmental Examination, 2013 om ding chi’n Controller of Examinations S. Kiran Singh in thupua bawlkawm in exam programme suah hi.Huai examna a tel ding candidate te’n amau kaina College chiat ah Admit Card laktheihta chih thutut leng kingah hi.
Kuki Inn ah kipahpihna om
Imphal, July-4: Tuni zinglam in Kuki Inn ah Kipgen Khangthah Kiloikhom leh Haokip Students’ Organisation saina in ‘Thanksgiving- cum-Career Guidance ’ zang uh a, Ngamthang Haokip, IFCD Minister in Chief Guest hihna tawh uap in Functional President in Nemcha Kipgen, MLA/Kangpokpi pang a, Guests of Honour in T.N. Haokip, MLA leh Yamthang Haokip, MLA pang uhi. Huai hunah BSEM nuaia Class-X leh 70% tunglam leh CBSE nuaia XII 80% tunglam mu a lawhching student 62 kiangah kipahman piak hi uhi. Cl-X ah Noel Haokip in CBSE Tamil Nadu region nuai a 98% mu in Kodaikanal District adi’n topper hihna la a, lawhchinna ngah kipahpih a omte lakah sangpen hi.
Moreh lampi ah blockade kipan
Imphal, July-4: Manipur singtang gam a student 7,000 val Class-X exam dinga phalsak dia ngetna in tuni nitaklam akipan Imphal leh Moreh kikalah ah Indefinite economic blockade puan in om a, Naga Students Union, Chandel district leh Kuki Students' organisation pawlin joint statement a suahna uah BSEM saina a Class-X exam thei dingin kum 2 paisa sungin student 7,000 val nawlkhin a om uh chi uhi. Student pawlnihte’n a gendan un BSEM in amaute apan enrolement fee la mahle uh admit card pelou uh a, student-te maban khualna ziaka blockade puan a om hi’n gen uhi.
NSCN(K) cadre kaplup ziakin bandh puang
Imphal, July-4: Assam Rifles te’n kihou dia a chial uh NSCN(K) cadre-te sisa a muhkhiak tungtang lungkimlou in Zeliangrong pawlpi te’n July 8, 2013 zankim akipan dakkal 24 sung bandh puang uhi. Tuni in Noney bazar ah ZSU, ZYF leh ZSUM makaite’n public meeting nei ua, Zeliangrong area apan Assam Rifles omteng lakkhiak dingin panlak sawm uhi. Thusuakin a gendanin 10-A/R pawlin Noney ah June 22, 2013 in NSCN(K) cadre 6 kaplum uh a, UNC telin pawl tuamtuam in fake encounter tungtawn a thah ahihdan taklang ua, Indo-Naga peace process hatsak semna din Naga mite luahna bial apan A/R lakkhiak ding ahi, chi uhi. Tuni a meeting ah Dec 31, 2012 a Zeliangrong United Front (ZUF) cadre lui thahna tawh kisai, leng genkhawm uh a, fake encounter tungtawn a thah ahihlai in suizuina ze-ol lua chi’n govt nawh uhi.