ZRO leh civil society tuamtuam in A/R-te gamtatdan mawhpaih, Assam Rifles te’n ZRO President tenna inn luh
Lamka, July-3: Suspension of Operation (SoO) atel Zomi Re-Unification Organisation (ZRO) a President banah United Peoples’ Front (UPF) a General Secretary Thang Lian Pau Guite tenna inn Dorcas Veng, New Lamka a om tuzing baihtak dak 2:30 vel apan dak 4:00 kikal sung Assam Rifles te’n luh uh a, Computer set 1 ahihsiat banuah inn sunga van om teng ban pheklek vek uh chihthu kiza hi. Thiltung tawh kisai ZRO in naktakin mawhpaih uh a, Assam Rifles te’n lemna leh muanna deih taktak uhiam chih mipi’ theihdinga puangkhe dingin zasak uh a, tualou in pawl tuamtuam -Zomi Council(ZC),Zomi Youth Association(ZYA), Zomi Students’ Federation(ZSF) leh CCpur District Students’ Union (CDSU) te’n Assam Rifles-te gamtatna mawhpaih thu puang uhi.

Thusuak kingahdanin thakhat thu a ZRO President tenna inn luhte bel Imphal’ Koirenggei apan 30-Assam Rifles te hi un kigen a, India govt leh Manipur govt tawh SoO a kithukimna suaikaite laka khat ZRO President’ tenna inn bangziaka luh a om hiam chih official taka puankhiak ahihlam zak lou hi. Security force te’n innsunga om computer set 1 a hihsiat ban uah innsung a van tuamtuam omteng phekzak vek uh chih ahi hi. Inn neitute apan kizadan in tuzing baihtak dak 2:30 vel in Army-te inn nunglam a fencing apan lut in Thang Lian Pau’ tapa naupangzaw Neng Lam Tuang ihmu lai phawng in inn hong sak uh a, huai zawh in inn nunglam a gate hongsak nawn in Army-te mi 10-20 kikal vel, mi bangzahhiam mai kituamte innsung a lutin room 10 omteng pheklek uh a, mobile phone omteng laksak uh hi’n gen uhi. Inn luh a a om hun in
Thang Lian Pau’pa kum 84 a upa Khat Khan Thang leh naungek 1 telin innkuan mi 11 inn sungah giak uh chih ahi hi.

Thang Lian Pau’ tapa upapen Thang Khan Khup @ Khu Khup in agenna ah Army-te’ kiangah a innsung uh luh(raid/search) theihna ding in search warrant tawi uhiam? chi’n dotna bawl a, army te’n search warrant tawilou uh hi a gen in adeih uleh peding chi’n petuanlou uh chi’n gen hi. Khu Khup in student ahihdan leh College akaina mun gen a, Army te’n student na hihleh na College kaina mun ah om in chih tanpha in genkhum uh hi’n gen hi. Khukhup in a genbehna ah Army te’n lupna tanpha khuplet in almirah sunga van tuamtuam omteng pheklek mahle uh bangmah mukhe lou uh hi’n gen a, army-te’n inn a pawtkhiatsan dek hun un mobile phone teng a ngetkik leh suai(signature) a bawlsak zawh un mobile phone-te pekhe pan uh hi’n Khu Khup in gen hi.

ZRO in thiltung ngai serious mahmah in ZRO kichi gin-omtak a SoO nuaia om hi a, ZRO in a chik a chikin Ground Rules abawhse ngeikei a, SoO tungtawnin lemna leh muanna piching a om ka kinem gige uh chi uhi. ZRO’ MIP a Secy Kenneth in a taklatna ah, lemna leh muanna omna dingin ZRO in pan naktakin la a, huchih lai a 30- A/R pawlin ZRO President tenna inn tuni zingkal baihtaka aluh pen uh pom haksa mahmah chi uhi. Lemna leh muanna Assam Rifles te’n deih taktak uhiam chih dotna liantak hi a, tuaziakin, a gamtatna utawh kisai in 30- A/R te’n ZRO kiangah ngaihdam a nget ding uh ahi chi ua, huchi ahihkeileh thiltung tawh kisai in ZRO a dai maimai kei ding chi uhi.
ZRO President tenna inn luhna tungtang Zomi Council (ZC) in mawhpaihna sangtawp puang a, ZC in SoO tungtawn a Manipur singtangmite’ lakah lemna piching leh khantouhna thupitak om ding chi a lametna aneihlai in SoO nuai a om ZRO President tenna inn luh a om pomsiam haksa mahmah chi uhi. Peace process pailel hihbuai sawmna a 30- Assam Rifles te gamtang uh hi a taklang kawm in security force kuapeuh in maban ah hibang gamtatna sunzom nawnkei uhen chi uhi. Zomi Youth Association (ZYA) thusuakin a genna ah, 30-A/R te’n ZRO President tenna inn a luh uh ngaihsiam haksa mahmah a, security force te’n SoO kimawlpih uhiam chi’n dotna bawl uhi. Galvantawi helpawlte’n SoO zahtak taka ground rules a bawhsiat louh lai ua, security force lamte’n bawhsia kichi pe’n ZYA in theisiam lou a, tua ziakin Assam Rifles te’n ZRO President tenna inn a luhna ziakuh mipite’ theihdingin puangkhia uhen chi uhi.

CDSU in UPF a General Secretary tenna inn Assam Rifles te’n ut-le-dah a a luhna un ‘Friends of the Hills Peoples’ chih paipih hi a a kigen uh zuau hihiam chih dotna bawl ua, UPF Gen Secy inn thakhat thu aluh a om pe’n lemna leh muanna hihsiat utman ahi chi ua, mawhpaihna sangpen pia uhi. Maban ah hibang thil tungnawn kei hen chi’n leng CDSU thusuakin gen hi. Zomi Students’ Federation (ZSF) in leng ZRO President tenna inn luh a om pen theisiamlou uh ahihdan puang ua, security force-te mah in SoO Ground rules bawhse ding uhiam chih dotna bawl uhi. SoO nuai a suaikai tengteng in Ground rules zahtak vek dingin CDSU in ngen a, huai kawm in 30-Assam Rifles te’ gamtatna mawhpaihna sangpen puankhum uh ahihdan puang uhi.

DC in Pucca side drain leh Footpath kibawl enkhia
Lamka, July-3: Tuibuong apan Lanva lei (bridge) kikal Tedim ah MGNREGS 2012-13 a nitha 25 zangin khua leh veng tuamtuam in Job Card tungtawn inTedim Road lampi nawl ah pucca side drain leh footpath bawl uh a, tuni nitaklam dak 3:00 apan Ms Jacintha Lazarus, IAS, DC/CCur in enkhia a,SDO/CCpur leh a staff-te ban ah DRDA staff te’n zui uhi. DC in Lanva lei (bridge) apan Tuibuong tan pucca side drain leh footpath kibawl enkhia a, EBCC Central Lamka kimlak Tedim Road tumlampang pucca side drain leh foothpath bawlna ding telkha lou hi. Huai area lak a pucca side drain leh footpath omsate zattak nawnlou a, Salem Veng Village Authority te’n work allotment bawlsak ding leh pucca side drain & footpath bawl sakding in DC ah ngen uh a, DC in leng pucca side drain leh footpath omsate zattak nawnlou ding ahih ziakin Salem Veng V/A te’n na asep theihna ding un enkai ding hi’n theisak hi.

MGNREGS nasepna genkhawm ding
Lamka, July-3: Ms Jacintha Lazarus, IAS, DC/CCpur & Executive Director, DRDA/CCpur makaih in July 4, 2013 zinglam dak 10:00 in DC’s office ah MGNREGS 2012-13 nasepna tawh kisai genkhawm ding uh a, SDO/BDO-te banah , SO leh DRDA staff-te telding uhi.

Addl DC in school 2 enkhia
Lamka, July-3: Maniram Sharma, IAS, Addl DC & Project Director DRDA/CCpur in tuni zinglam dak 10:00 in Rengkai Hr Sec School enkhia a, teacher 6 absent mukhia hi. Aman teacher 6 absent-te Show- Cause Notice pia a, a khalawh (pay/salary) hentangsak hiding in gen hi. Huai zawh zinglam dak 10:30 in Saikot govt H/S enkhe mahleh staff a kai omlouh ziakin school kikhak (closed) hi’n kigen hi. Huai thu ah Saikot govt H/S staff teng Show- cause Notice pia a, a khalawh (pay/salary) uh hentang sak hiding in Addl DC in gen hi.

Disaster Management meeting
Lamka, July-3:DC/CCpur makaihna in July 6, 2013 sunnung dak 2:00 in DC/CCpur office ah Dist Level Disaster Management Authority Committee meeting om ding a, huai ah SDO te’n case report a bawlthakte uh genkhawm ding uhi. Dist Level Disaster Management Authority Committee a telte -Addl DC; SP; CMO; EE/PWD; EE/IFCD; Dist Supply Officer ban ah SDO te hi uhi.

Graduation leh kipahpihna
Lamka, July-3: Gangpimual a Covenant Children Home ah July 8, 2013 zinglam dak 11:00 in class XII zouthak student-te khakkhiatna (Graduation Day) 7veina leh class X zouthakte kipahpihna om ding hi. Huai ah Rev Randy Mayfield, Secretary, PMI in graduation ngah student te’ capping leh thumsakna neiding hi. Rev K.Thongzagou, Chairman, Convenant School Managing Board makaih in HSLC exam 2013 a lawhching student te’ pahtawina omding hi.

A/R te’n Police khut ah pekhia
Lamka, July-3: HQ Veng a om 46-Assam Rifles camp’ fencing a kizang sikdai (iron wire) guta 3- Ginlamthang (34) s/o Kamthang of Sim Veng, Gouminlun (32) s/o Kapboi of Lanva leh Boylianthang (30) s/o (late) Zamchinlam te’n zan sun dak 12:00 velin gu uh a, Army te’n mankhia in sunnung dak 1:30 in Lamka Police ah pekhia uhi. Police te’n guta 3 te zan in Court ah pawkhia uh a, Court in Police khut ah July 4, 2013 tan omdin phalsak a, Police te’n FIR No. 57( 7) 2013 CCP-PS U/S 379/34 IPC registered uhi.

EBC in Missionary din mi 7 la ding
Lamka, July-3: Evangelical Baptist Convention(EBC) in Missionary sem ding mi 7 lak sawm a,huai dingin New Lamka a om EBC HQ ‘Dorcas Hall’ ah Aug 13, 2013 in interview om ding hi.Candidate dinga lunglutte’n Aug 9, 2013 nitaklam dak 3.00 tan in Director of Missions,EBC HQ(Dorcas Hall), New Lamka kiang tung dingin application piaktheih ding a, thuchian kimzaw leng office kaihun sungin kantheih ding hi.

Judith Pudaite kum 20 suangkulh tang ding
Lamka, July-3: Judith Pudaite (30) in Cambodia capital Phnom Penh a Siem Reap International Airport ah khamtheih chikhat methamphetamine kichi kg 3 val apuaklut ziakin police-te’n airport ah mankhia uh a, huai gam dan dungzui in kum 20 suangkulh tang ding hi’n thusuakin gen hi. Siem Reap Provincial Anti-Drug Police’s chief, Major Oum Sa Ath in a genna ah police-te’n June 30, 2013 zinglam dak 9:40 in Judith mankhia uh a, India akipan Siem Reap tawn a Singapore zotsawm hi’n gen hi. Pudaite in kum 20 sung suangkulh a tan sungin leng Rs. 15 lakhs($25,000) liausak hidin kigen hi. Cambodia national newspaper khat in Judith Pudaite tawh kisai a gendan in India mi chi mahleh ahihna chiantak pulaklou hi. Asia gambup adia kivaipuakna khauh mahmah Cambodia ah kal 2 paisa in Thailand numei 4 khamtheih zuak matkhiak hi uh a, damsung suangkulh tang dingin govt. in thutan khum hi.

Hiaithu bawl ahih tan in Cambodia a India Embassy ah bangmah thu zaksak om nailou a, Judith Pudaite Lamka lam mi ahihleh hihlouh tanpha thuchian zak hinailou hi.

IMPHAL NEWS
Assembly Session kipan nawn ding
Imphal, July-3: Manipur Assembly Monsoon session zan leh tuni(July 2 & 3,2013) khawl a, July 4, 2013 zinglam dak 11.00 in sitting kipan nawn ding a,huai ah ‘the Manipur Personal Liability(Amendment) Bill,2013’ tungtang a genkhawm nung un passed hiding chi’n Assembly Secretariat thusuak om a,July 4, 2013 pen session beini hiding chih ahi hi.

International Township bawlsawm
Imphal, July-3: India in suahlam gamte tawh kitanauna hoihsem a lunggulh ziakin ‘Look East Policy’ chih thupi pansan in panlak kipan a, Manipur in huai lemtanga la in Myanmar tawh gamgi jula om Moreh khua ah ‘Industrial leh Trading Township’ bawlkhiak sawm a, huai dingin Manipur govt in gam acres 3,000 leisawm chihthu om hi.Huai dingin Commerce & Industries deptt in Revenue deptt ah lehkha pekhinta uh a, akul leh poimawh bangin state govt in compensation pe ding hi’n leng Chief Minister O. Ibobi in gen chihthu om hi.

Manipur govt in ‘Industrial leh Trading Township’bawlkhiak a sawm ‘International Township’ chi’n leng minvuah hiding a, Moreh akipan km. 5 vela gamla hiding chihthu om hi.Huai township ah Trade & Commerce kia hilou in Health care, Education, IT, Banking leh Service Sector Industries tuamtuam leng om ding chih ahi hi.

CS makaihna in official 4 zinkhiak
Imphal, July-3: Chief Secretary DS Poonia,IAS makaihna in Manipur apan official 4 in tuni’n Bali leh Jakarta gam pha dingin zinkhia uhi. Amau huai gam nihte ah July 3-8, 2013 sung ‘Workshop/Exposure on Bamboo playform for green Industry’ kichi ah vatel ding uh hi’n kigen hi. Amaute PC Lawmkunga,IAS, Addl. Chief Secretary(Forest Environment); Arvind Kumar Rana,IFS, Principal Chief Conservator of Forest; H Brajamani Sharma, Member -Secy. NDM Manipur leh N Somorendra Singh, Asst. Member -Secy. NDM, Manipur hi uhi.

NSCN(K) leh CRPF kikaptuah
Noney, July-3: NSCN(K) cadre-te leh Noney a om CRPF- te tuni nitaklam in Noney area ah kikaptuah uh uh chihthu om hi. Police thusuakin agendanin nitaklam dak 4.25 velin NSCN-K cadre 4 in CRPF teamte kap masa ua, a si-le-liam bel omlou hi. Tuabang kalah Longmai Bazar Board, Longmai Youth Club, Longmai Area Villages Council, Villages Authority leh Zaliangrong Students’ Union Longmai Area te’n mawhpaih in Noney area a helpawlte kiangah thiltung hilhchian ding a ngetna bawlin tunung a sunzom nawnlou dingin theisak uhi. Mipi patau taka koih ahihman in Zeliangrong Union Manipur leh Zeliangrong Youth Front makaihna in July 4,2013 in Longmai bazaar ah public meeting om ding hi.

Police te’n student 3 hunkhia
Imphal, July-3:Tengnoupal Police te’n tuni in Hiyabglam a Grace Academy student - Ngangbam Boris @ Venus alias Birus (14) of Lamshang Awang Leikai; Kangujam Denis (13) s/o K. Nimai of Sagolband Sapam Leirak leh Laishram Tyson of Upokpokpi Ningthoukhong hunkhia uhi.Amaute hostel apan pawtkhia himahle uh muanmawh huai dinmun in Sinam Khul leh Bongyang kikalah Tengnoupal Police te’n mukhia in hunkhia uhi. Police thusuakin agendanin student 3-te tuni zingsang baihtak a pawtkhia, a sulnung uh theilouh ahihman in hostel leh school authority banah a innkuante uh patau gawp ua, police a report bawl nungin suizuina kipan a, khaw tuamtuam dapkual nungin khaw 2 kikalah muanmawh huai dinmun a omlai mukhia in a innkuante uh pekik uhi. Thusuakin agendanin in Boris in Cl-VIII zil a, Denis leh Tyson in VII ziltuak uhi. Tuma lam in leng huai Hosptel a om numei 2 in RPF/PLA zom uh chihthu om hi.

Nekguk ziaka khoih ahi : Maoist
Imphal, July-3: Zanhal nitak a in Imphal Urban Co-op bank (ICUB)’ Chairman, Thokchom Dilip Singh tenna inn a bomb puak amau gamtatna ahihdan taklang kawm in Maoist Communist Party(Manipur ) pawlin nekguk-takguk leh tanau-lainate deihsak tuamna paipih a official khat a gamtat ziaka thiltung ahi, chi uhi. Comrade Nonglen Meitei, Secretary Publicity and Propaganda, Maoist Communist Party apan thusuakin ataklatna ah bomb pen remote control tungtawn a hihpuak hi a, mi nautang tunga siatna a tunlouh ding lam-etna ziaka nitak zankim a cadre-te gamtang uh, chi uhi.

Singtangmite adin 5-yr plan
Imphal July-3:Tribal Youth Council(TYC), Manipur in Hill Areas Committee(HAC) Chairman kiangah items telkhiak 12 ading kum 5 sunga Annual Plan sehtuam sak dingin ngen uhi. Thusuakin a gendanin TYC in tuni’n HAC Chairman, Dr. Chaltonlien Amo kiangah Indian Constitution , Article 371 (C) nuai a sepkhiak ding kigente tamtak mangthang zel ahihdan theihsakna kawm in memorandum pia uhi.