KSDC in General Strike pan: gari 8 hihsiat in om
Lamka, July-8: Kuki State Demand Committee(KSDC) pawlin Ministry of Home Affairs, Govt of India leh Manipur govt tawh Suspension of Operations (SoO) a suaikai KNO leh UPF tawh political dialogue (peace talk) pan kin dinga govt nawhna in tuni zingsang dak 5.00 akipan July 9, 2013 nitaklam dak 5.00 tan daih ding in General Strike puang uhi. Tuni’n CCpur dist ah KSDC volunteer te’n gari 7- Shaktiman 1, Tata Magic 1, Honda Activa 3 leh Diesel Auto 3 hihsia uhi.
L.Khongsai, Chairman KSDC/CCpur in tuni nitaklam in Media-te kimuhpih a, SoO a suaikai KNO leh UPF tawh govt in political dialogue pankin ding a nawhna ziaka general strike kibawla mipi’n support ding in ngen hi. KSDC in Pass issue lou himhim a, himahleh damlou kuahiam doctor in Imphal a refer abawlte doctor lai a tawi ua leh paisak hiing a, Class XII improvement (compartment) exam a telding student te’n admit card atawi ua leh paisuak sak hidin gen hi. General strike leng July 9, 2013 in khauhsem ding hi’n gen hi.
General Strike bei tawh kiton in July 11, 2013 nitaklam dak 5.00 tan Economic Blockade om ding hi. Blockade sungin Imphal tawh kikawmna Highway tuamtuam 7 khaktan hidin leng puang uhi’ a, General Strike leh Blockade sung in Press/Media leh Medical kia khahkol (exempted) hiding chi’n KSDC thusuak in gen hi.Imphal leh Lamka kikal a passenger gari te’ Kangvai khua phakma tan tai uh a,passenger-te Kangvai apan Lamka tan khe in paitung in mi tamtak in haksatna tuak uhi.
Graduation leh kipahpihna om
Lamka, July-8: Gangpimual a Covenant Children Home ah tuni zinglam in class XII zouthak student-te khakkhiatna (Graduation Day) 7veina leh class X zouthakte kipahpihna om hi. Huai ah Rev Randy Mayfield, Secretary, PMI in graduation ngah student 15 lakah mi 11a teltheite ah capping leh thumsakna nei hi. Rev K.Thongzagou, Chairman, Convenant School Managing Board makaih in HSLC exam 2013 a lawhching student 19 te’ pahtawina om hi.
Rev Randy Mayfield in agenna ah kumtamtak Covenant Children Home (CCH) tawh semkhawm in tuni a graduation hun a teltheih kipahthu gen hi. CCH student, teacher-te thumna ah phawkgige uh ahihdan gen a, tuni a class XII zou graduation te’n hinkhua adia kalbi 1 suahbeh ahihziak un kipahpihthu gen hi. Student te’n CCH ah thil tampi zilkhia uh a, huai teng laka poimawh pen Jesu Christ a hinna neih hi’n gen hi. Student-te’n hinkhua a laisimna ah kuhkal a pangtou a, Pathian deih dana kizang ding in hasuan hi.
Covenant Children Home bel kum 2002 in kipankhia a, tunitan in nu-le-pa neilou naupang 500 val chawmta a, student 40 te’n class XII zou in graduation ngahta chi’n Lian C.Tombing, Executive Chairman, CCH in gen hi. Rev Randy Mayfield leh ateamte’n sum –le-pai ban ah thumna in a phawkgige ziak ban uah nu-le-pa, deihsaktu te’n panpihna banah thumna ah a phawk gige ziak un CCH lawhching hi’n gen hi. Graduation leh HSLC 2013 exam a lawhchingte kipahpihna hun ah Rev Randy Mayfield leh ateam mi 10 in uap uh a, nu-le-pa ban ah PCI (R) a makai tuamtuam leh mipoimawh hunkhop in leng uap uhi.
Thau tawh taikhia M/R kimankhia
Lamka, July-8: SP/CCpur apan kizadan in Tamenglong district Chingphutung villlage a om Railway tunnel 40 bawlna ah security guard a om 5-Manipur Rifles rifleman Jamkholal Lupho (26) s/o Sokhai Lupho of Maphou Dam (Saikul sub-divn) June 7, 2013 nitak a duty zingsang baihtak in AK rifles 1, Insas rifles 1 leh SLR 2 banah thautang hunkhop tawh taikhia a, July 7, 2013 nitaklam dak 4:00 in CCpur Police te’n Tuilaphai village (Henglep sub divn) ah mankhia uhi. Tuni’n Tousem Police te’n CCpur Police-te khut apan Jamkholal Lupho (Rfn. No. 022006178) la uh a, ama tung ah FIR No. 2 (6) 2013 TSEM-PS U/S 380/406 IPC & 25 (1-C) Arms Act registered uhi. SP/CCpur in SP/Tamenglong kiang ah Jamkholal Lupho matkhiat thu theisak a, SP/Tamenglong in Jamkholal in ataikhiat pih galvan- Insas rifles 1 leh SLR 2 te muhkhiat (recovered) hita a, himahleh AK rifles 1 pen bel muh hinailou chi’n SP/CCpur zasak hi.
DC in Ambulance Gari 2 pekhe ding
Lamka, July-8: National Rural Health Mission tungtawn in CCpur Dist a Singngat PHC leh Saikawt PHC azat ding Ambulance gari 2 hongtung a, Ms Jacintha Lazarus, IAS DC/CCpur in July 9, 2013 zinglam dak 8:30 in CMO office campus ah Medical Officer i/c te kiang ah pekhe ding hi. CCpur Dist ah PHC 5- Singngat, Saikawt, Senvon, Sagang leh Parbung a Ambulance gari ding approve himahleh Singngat leh Saikawt PHC ading kia govt in hong pia lai hi’n kigen hi.
DI bend kigukziak in tui supply theilou ding
Lamka, July-8: PHED/CCpur apan kiza danin gutate’n July 5, 2013 nitak in DI bend (pipe) 45” te 2 leh July 6, 2013 nitak in DI bend (pipe) 45” te 2 mah gumang uh a, Bungmual Tanky side leh Tipaimukh Road side ah ni bangzah hiamsung tui supply theilou ding uh chikawmin mipi’n theisiam ding in ngen uhi.
IRB personnel 4 teng Jail ah koih
Lamka, July-8: Khuga Dam area ah numei leh pasal kilawmlou taka bawlse kawma lem kila social media tungtawn a khahkhiak tawh kisai in Police te’n June 30,2013 in IRB personnel 4 mankhia uh a, July 1, 2013 in CJM court ah pawkhia uhi. CJM in July 8, 2013 tan Police khut a om din phalsak a, tuni’n Police te’n mi 4 teng CJM court ah dingsak nawn uh a, CJM in jail a omdi’n thutan khum a, Police te’n jail ah koih uhi. Mi 4 te tungah Police te’n FIR No.51 (6) 2013 CCP-PS U/S 354/341/34 IPC & 67 (A) I.T Act (Information Technology Act) registered uhi.
ASHA Convention &World Population Day
Lamka, July-8: Dist Health Society/CCpur leh DFWO/CCpur saina in July 11, 2013 zinglam dak 11:00 in Hiangtam Lamka a YPA Gen HQ Hall ah ‘ASHA Convention leh World Populaltion Day’ zang ding uhi. Huai ah Ms Jacintha Lazarus, IAS, DC/CCpur in khuallian hikawm in uap ding a, ASHA best performance award leng pekhe ding hi.
&&&&&&&&&&&&&&&&&&&&&&&&&&&&&&&&&&&&
IMPHAL NEWS
CM in Laptops leh Cheque hawmkhia
Imphal, July-8: Chief Minister O. Ibobi in ‘Handloom Expert Deve Approach Scheme’ nuaia private/society 22 kiangah cheque 22 leh handloom cluster 17 kiangah laptop 17 hawmkhia hi. Dept. of Commerce & Industries leh Dept of Sericulture saina nuai ah MDFC Auditorium Hall a laptop leh cheque hawmkhiakna ah Chief Guest in CM pang a, Functional President in Commerce and Industries & Sericulture Minister Govindas Konthoujam pang hi. Tuni a cheque hawmkhiak a omte ahihleh Rs. 3.20 lakh leh Rs. 5 lakh kikal hi’n kigen hi.
Numei sualtu jail ah khum
Imphal, July-8: Irom Bobby (39) s/o Irom Kameshor of Thaoroijam Maning Leikai, Patsoi police station in July 1, 2013 in Karong Mamang Leikai ah Maklang Govt High School akai naupang kum 12 mi sual a, local Meira paibi leh club member te’n mankhia in Police ah pia uhi. Bobby tuni’n CJM Imphal East in ni 15 sung Jail a om dingin thutankhum hi.
A/R leh KLO cadre-te kikaptuah
Imphal, July-8: Assam Rifles thusuakin agendanin 9-Sector nuai a om, 40-Assam Rifles leh helpawlte zan in Songjathal ah kikaptuah uh a, huaiah Kuki Liberation Organisation (L) cadre Ngamkhojang Khongsai (56) s/o (late) Khuplet Khongsai of Saikho, Senapati District leh Helen Khongsai (33) s/o Tilthang Khongsai of Saichang mankhia uhi. Mi 2 apan 9 mm pistol leh Magazine 1 tuak, 9mm tang 2, Chinese handgrenade 1, Mobile phone 2, KLO (L) min a sum ngetna lai banah Combat uniform 2 leh Rs 8526 mukhia uhi.
Addl. CS in Office memo. suah
Imphal, July-8 : Addl. Chief Secretary (Finanace) RR Rashmi in tuni’n Office memorandum a suahna ah Manipur Judicial Service Officer-te ading a dearness Allowanace/dearness relief lak theih hidan in taklang hi. Huai tawh kisai in July 1, 2012 apan in 65% of pay/pension laktheih ding a, tua banah July 1, 2012 apan ten 72% lathei ding ua, July 1, 2013 a ten 80% lathei ding uh hidan in kigen hi.
Manipur tuailai 500 hutkhiak in om
Imphal, July-8: Manipur apan tuailai adiakin singtangmi tamzawte telna mi 500 val kumkhat paisa sungin India khawpi tuamtuam apan hutkhiak hi uh a, amaute sepna leh zilna piak dinga khem chavaih a om ahi uhi. Thu kizadan in Manipuri student-te tungah thagum suahna thiltung kibehlap thei ahihman in non-govt orgn ‘Sarhad’ kichi in Manipur tuailaite panpihna peding a, July 15, 2013 akipan helpline hongkhe ding hi. Helpline honkhiak ahihchiang in, khawpite a haksatna thuak, child-trafficking tawh kisai thuakte telin north eastern state apan India khawpi a bawlsiat a omte kiangah huhna leh venbitna peding uhi. Sarhad chief, Sharad Nahar in Pune a Press conference ah gendan in Pune leh Mumbai pansan in bawlsiat a omte’n hinkhua ngeina zopneih nawn theihna ding uh awlmawh pipen hi.
Manipur in online shopping neita
Imphal, July-8: Internet zang a Manipur khutsuak thil tuamtuam zuak khiakna ding, online shopping portal ePotpham (www.epotpham.com) kichi tuni’n Manipur Press Club ah GA Naocha Sharma, General Secretary, All Manipur Working Journalists’ Union in hongkhia hi. E-commerce website thak tungtawn in vanzat le nuamte kiangah Dest to Desk Courier, First Flight, Blue Dart (special products) leh EMS Speed Post zang in khak(deliver) hiding uhi.
Art Exhibition hongkhia
Imphal, July-8: Lainingthou Art Exhibition, 2013 kichi tuni zinglam in Manipur State Art Gallery, Palace Compound, Imphal ah Mix-Media Foundation, Manipur saina in honkhiak hi a, huai ah Insang Song, Director, Korean Cultural Centre, New Delhi; Dr. RK Nimai Singh(IAS) , Commissioner , Art & Culture, Youth Affairs & Sports; Dr. N. Munish Singh, Regional Director, Indian Council of Cultural Relations, Shillong(Meghalaya) leh T.M. Rajen Ayangba, National Awardee, President, Japanese Hospital Manipur te’n special invitees hihna tawh uap uhi.
Aksa laklut daldi’n phut
Imphal, July-8: Manipur pawlam apan aksa(chicken) laklut doudal dingin sub-committee khat phuhkhiak in om hi. K. Achouba, Secretary, All Manipur Poultry Farmers leh Traders Association in agenna ah state dang apan nekding thil, adiakin aksa laklutna in state sunga akzuak a nekzongte adin haksatna tun chi a, mipite’n maban ah hibang a association panlakna om dingte kithuahpih chiat di’n ngen bawl hi.