Assembly Monsoon Session ni 1 omlai dingin BAC in thupuk
Deputy Speaker din tuhtu omlou in MK Preshow ching
Imphal, July-1: Manipur Assembly Monsoon session ah tuni in Deputy Speaker telna om a,nomination file theihna ding hun kihon sunga nomination paper file omsun MK Preshow,MLA (45-Chingai A/C) kuamah tuhtu omlou in ching hi.Assembly session kipatma deuh zinglam dak 10.00 in Assembly Speaker office chamber ah Business Advisory Committee(BAC) meeting om a, huai ah Assembly Session tuni tan ding himahleh July 2 & 3,2013 khawl ding a, July 4, 2013 in sutzop hiding a, huai ni’n session khawlsak hiding hi. Tuni’n Assembly Session ah MLA-lui Paolen Haokip suunna hun zang uh a, Approriation Bill tuamtuam 4 passed ahihban ah Chief Minister in Govt Bill khat luikhia hi.
Tuni a sitting kipat tungin Manipur Territorial Council a kipuaklai kum 1957 in CCpur A/C akipan MLA a telching banah kum 1972 a Assembly term masapen ah Saikul A/C apan MLA ching Paolen Haokip suunna(obituary) om a, huai ah IFCD Minister Ngamthang Haokip leh Chief Minister O. Ibobi in suunna thugen uhi.Chief Minister in a gendan in Paolen Haokip omlouh Kuki community kia hilou in Manipur pumpi in leng heutu leh makai suanhuaitak chan(lost) hi’n gen hi. Huaizawh in Assembly Speaker Th. Lokeshwar makaihna in minute 2 sung dai dide in suunna hun zang uhi.
Deputy Speaker ding telna ah Congress MLA 16 in MK Preshow adia nomination paper-te proposed uh a,MLA 16 mah in seconded uhi. Huchi’n Assembly Speaker Th Lokeshwar in MK Preshow kuamah tuhtu omlou in Deputy Speaker dinga telching hi’n puang hi. Huaizawh in House leader banah Chief Minister O. Ibobi leh Opposition leader Dr I. Ibohalbi in MK Preshow a tutna mun ding tan tonpih uhi. Chief Minister in Deputy Speaker dinga MK Preshow telching ahih kipahpihthu genkawm in a,Preshow in ruling leh opposition kal bangmah khentuam neilou in a mawhpuakna semkhe dingin Chief Minister in lam-en ahihdan gen hi.
Chief Minister in June 28, 2013 in House a a luikhiak ‘The Manipur Appropriation(No. 3) Bill, 2013’ ‘The Manipur Appropriation(No. 4) Bill, 2013’ ‘The Manipur Appropriation(No. 5) Bill, 2013’ leh ‘The Manipur Appropriation(No.6) Bill, 2013’ tuni’n bangtanhiam genkhawm nung in passed uhi. Chief Minister huaizawh in ‘the Manipur Public Servant’s Personal Liability (Amendment) Bill,2013’ kichi House ah luikhia hi.Hiai ‘the Manipur Public Servant’s Personal Liability (Amendment) Bill,2013’ bel July 4, 2013 a Assembly session beini in genkhawm banah pass hiding hi.
Tuni in Assembly session ah kum 2013-2014 sunga Financial Committee 3 a member ding anuai abang telkhiak in om uhi.
Committee on Public Accounts :
1. S. Bira
2. I. Ibomcha
3. Y. Surchandra
4. I. Ibohal
5. L. Dikho
6. Z. Kikhonbou Newmai
7. RK Imo
Committee on Estimates :
1. RK Anand
2. Ngamthang Haokip
3. Kh. Devendro
4. E. Chand Singh
5. K. Thamarjit
6. Samuel Risom
7. Kh. Joykishan
Committee on Public Undertakings :
1. Nandakumar
2. D. Korungthang
3. Ginsuanhau
4. Karam Shyam
5. Dr. Alexander Pao
6. O. Lukhoi
7. Jamghemlung Panmei
Zan nitaka thiltung tawh kisai in Joint meeting om
Lamka, July-1: Langkhanpau Guite, Chairman ADC/CCpur makaih in ama’ office chamber ah tuni sunnung dak 2:30 in zan nitak a Police Station a buaina tawh kisai joint meeting om a, Maniram Sharma, IAS, i/c DC/CCpur; S.Khaikhopau Ngaihte, BO Hq, DC’s office; L.Mangkhogin, IPS, SP/CCpur; CJWO makaite, CDSU makaite leh C.T Lian Guite tel uhi. Tuni a Assembly session omlai ziakin Minister/MLA te’n Chairman ADC makaih in panla ding a theisak uh hi’n kigen hi.
Meeting ah numei leh pasal vuaktang a omkhawm mawhpaih uh a, IRB personnel te’n numei leh pasal’ private part tanpha photo alak uh mawhpaihna sangpen puang uhi. Saptuam te’n khawtang siatna numei-pasal kal a thangtatna uanglua pen thumpih ding, buaina ziaka liamte Dist Adminstration in panpihna omthei dandan a panla ding in thupuk uhi. SP/CCpur & Staff te’n law dungzui a panlatou ding, CJWO in mipi lak ah 144 Cr PC om thu leh thil omdan mipi theihsak ding in thukim uhi. Buaina hun a panlatu leh mipi khou a panla student organisation-te leh Philantrophic Organisation tuamtuamte tung ah kipahthu gen uhi. Buaina ziaka liamte elected member -Minister, MLA leh MDC te’ pangkhawmna panpih ding leh govt apan panpihna omtheihna ding a panlak ding in thupuk uhi. Tulela liam mi 24 te maban leng CDSU te’n enkai dingin meeting atel tengin ngen uh a, CDSU te’n enkai touzel ding uhi.
Zan nitaka buaina ziakin CDSU te’n Pharmacy tuamtuam ah damdoi Rs 5845/- man la uh a, aliamte list leh damdoi man cash memo kimtak in Chairman ADC/CCpur kiang ah tuni’n pekhia uhi.
Police tawh kinawktuahna ah mi 24 liam, ICU ah 1 omlel
Lamka, July-1: Zan nitaklam dak 6.20 vel apan Lamka Police Station ah mipi’ leh Police-te kinawktuahna banah nitak dak 11:00 velin Imphal leh Bishnupur akipan Police Commando-te’ gari 10 vela hong kizui in hongtung uh a, mipi sousangte Police te’n blank firing a bawlkhum ban uah vuak leh khetliam liam teng kigawm 24 phazou hi’n kigen hi. Aliamte M.Gouzamang, EM/ADC makaih in CDSU leh YPA Gen HQ ban ah Philantrophic Organisation tuamtuam makaite’n tuni zingsang dak 3:00 tan buaipih in Dist Hospital ah puaklut in om uhi. Police Commando te’n mi 11 a hentang(detained) uh leng lakkhiak vek hi’n thusuak kingah hi. Lunminsiam Guite (20) s/o Lunkhopau of Zenhang Lamka a gil vei lampang ah thautang lut in taang a, Shija Hospital a ICU ah gim mahmah a etkol hi’n kigen hi.
Midang aliam Dist Hospital a etkol a omte- Robert Lalchungnung Kipgen @ Lalboi (21) s/o Paulun of Zenhang Lamka, a kong ah thautang 2 lut in a ngalguh ah 1 lut a, Lalramthar @ Thara (35) s/o (late) Thlamuon of Zenhang Lamka, a kawng leh khut thautang in kapkha in a thagui kitan a, amah Commando-te’n leng soisa uh chi’n kigen hi. Thangnunmuang (26) s/o G. Khanthong of Zenhang Lamka thautang in a tawbou veilam kha in pailet a, Obed Thangtansang (25) s/o Khamzapau of Zenhang Lamka leng thautang leng in a lusip nawk kha a, Lulun @ Mika (18) of New Lamka leng liam hi.
Soisak ziaka liamte Doukham (29) of Mualveng, akhe ah liam a, Kaikhanlal Simte (30) of Tuibuong alu liam hi. B. Hangthianmung(30) of Zenhang Lamka alu liam a, Tuanlalmuan (30) of Zenhang Lamka a khabe liam hi.,T.S. Khaipu (32) of Zenhang Lamka taksa tung mun tuamtuam liam hi. V. Lal (22) of Bungmual, Muante (22) of Salem Veng, Thangzakap (23) of Bungmual, Minlun (23) of New Lamka , Thangzamang (24) of New Lamka, Biaksang (24) of Zenhang Lamka, Mangkip Guite (31) of Zenhang Lamka, Suanmung (24) of New Lamka, Lalthuoilen (45) of Tipaimukh road, Lianmung (28) of Mision veng, Alfred Chinlianmang (28) of Bungmual leh Gin Johnson (27) of Pearsonmun leng liam uhi.
Dist Hospital a om aliamte Langkhanpau Guite, Chairman ADC/CCpur leh V.Khaikhanmung, MDC te’n tuni’n veh in panpihna Rs. 1,000 /-chiat pia uh a, Pastor V. Chinpau, Local Pastor, EBCC, Zenhang Lamka in thumsakhi.
Diesel man 50 paise in khang
New Delhi, July-1: India gamsung pumpi ah tunitak zankim apanin Diesel man litre ah 50 paisa in khangnawn hi. Tukum 2013 sung adinga diesel man guk vei hial punsak hita a, hiai thautui man khanna in local sales tax ahihkeileh VAT huamlou ding chih ahi hi. Tulel in ahihleh India oil company in litre khat ah Rs. 5.50 vel a manbat ziakua diesel man khansak a om hi’n official thusuak in gen hi. Centre govt in private oil company te’ kiangah kumlui 2012 December kha in thuneihna sangtak pia ua, thautui man tawh kisai amau khut ah akoih khiak dungzui un, amau leng hangsantakin tukum 2013 January kha apan in diesel man 6 vei hial hon khangsakta uh chi ua,May 31, 2013 in leng diesel man litre ah paisa 50 in ana khangkhata hi.
IRB personnel 4 te suspend in om, July 6 tan Police custody om ding
Lamka, July-1: Khuga Dam area kim ah numei leh pasal kilawmlou taka bawlse kawma lem kila June 25, 2013 nitak dak 7:00 velin social media (internet) tungtawn a khahkhiak tawh kisai in Police te’n zan nitaklam dak 3:25 velin IRB personnel 4- Hav Thyam Chaoba Singh (47) s/o (late) Th Khongnem Singh of Khong Ahanbi, Thoubal; Ningthoujam Dokendro (43) s/o N.Pishak Singh of Shyam Chirag Mayai Leikai, Hav T.Sonlian Tungdim (26) s/o Ginlianmang of Mata leh Hav Nengsuanmung(35) s/o (late) L.Gouchin of Sahei Road, New Lamka mankhia uh a, tuni’n CJM court ah puakkhiat hi uhi. CJM in July 6, 2013 tan Police custody a om ding in phalsak a, Police te’n FIR No. 51 (6) 2013 CCP- PS U/S 354/341/34 IPC & 67 (A) I.T Act (Information Technology Act) registered uhi. IRB personel 4 te tuni’n govt in suspend order suah hi’n Police apan thusuak kingah hi.
Inn bawllai electric current in man
Lamka, July-1:Manao(19) s/o Manihar of Yaiphakol tuni nitaklam dak 3.30 velin Covenant School,Mualkoi a inn bawl a omlai inntung a electric high tension(HT) gui in a lu hihkha in leitual kidenna a, hun sawtlou electric in a mat ziakin liam nasakei mahleh khawphawk nailou hi’n kigen a, hospital puaktung hi a, doctor-te’n admit uhi.
BSF te’n thaukap sunzom ding
Lamka, July-1: STC BSF CCpur a training te’n June 15, 2013 akipan June 30 31, 2013 tan zingsang dak 5.00 apan nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing ) uh July 1-15,2013 sung sutzop lai dingin ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in thupuan bawl hi.
Gari silna honkhiat hiding
Lamka, July-1: G.K Zalal & Family, Thawn Saauliim, Church Road, New Lamka te’n abawlthak uh Gari silna/Car wash kichi July 2, 2013 zinglam dak 8:30 in Ngulthawng Bazar, New Lamka ah LB Sona, Chairman Zomi Council in khuallian apang in hongkhe ding hi.
Tuni’n Traffic Police-te duty lou
Lamka, July-1: Zan nitaka Police Station a buailai in mipi’n petrol zangin Traffic Police-te’ office hal uh a, Police-te hahpanna ziak in phelhmit theih in om hi. Himahleh office sung a Traffic Police-te uniform tamzaw kangtum man a, tuni’n khawpi sung ah traffic police-te duty theilou uhi. Traffic Police a OC in SP/CCpur kiangah thil om dan report bawl a, July 2, 2013 apan khawpi sung ah duty theih dandan a duty sawm uh hi’n thusuak kingah hi.
Salvah Model school honkhiat in om
Lamka, July-1: Lamka leh a kimlak ah May 3, 2013 zingsang dak 6:30 velin huihpi leh vuahpi kithuah in school, biakinn leh tenna inn tamtak hihsia a, Kamdou Veng a Salvah Model School building leng mutsia hi. Salvah Model School building bawlthakna din mimal, leh pawl tuamtuam apan panpihna kimu Rs 82,240zang in bawlthak uh a , tuni zinglam dak 9:30 in Mannuamching, CEO/ADC in hongkhia a,Rev S.K Manlun, DS Lamka, MELC in Pathian kiang ah thumna in lan hi.
Vungkhannuam, Proprietor makaihna nuia ah Salvah Model School ah tulelin class A- V tan student 60 vel om uhi. Summer vacation sungin student Khupzalun (6) s/o Samuel Kapboi, Chief of S.Belpuan damlouhna ziak in si a, tuni’n staff, parents leh student te’n suunna nei uhi.
TKSU Gen HQ in hilhchian
Lamka, July-1: TL Haopu Haokip,Gen Secy Thadou-Kuki Students’ Union,Manipur in hilhchetna thusuah a bawlna ah TKSU Gen HQ a Vice President(Admn) Lalkhohao Chongloi tungtanga ngawhna diklou June 29,2013 issue Newspaper a kisuah nuamlou sakthu taklang kawmin kuapeuh in thudik kanchian masalou a thu suahlou dingin theisak uh a,TKSU in district sunga students’ orgn mai hilouin state level tanpha ah leng kituahna ding lunggulh hi’n taklang uhi.
IMPHAL NEWS
SBI Regional Office in pahtakna pia
Imphal, July-1: State Bank of India, Regional Business Office,Imphal in Board of Secondary Education, Manipur(BSEM) saina a High School leaving Certificate(HSLC) Examination-2013 a sangpen apan mi 3tan kipahpihna tuni’n Babupara a SBI conference hall ah nei uhi. Huai ah SBI Regional Business Office a Regional Manager, James Thatlinga in mi 3te kiangah Memento leh cash award Rs 5000 chiat pekhia hi.
Bandh kithuah ziakin nawngkai
Imphal July-1: Manipur singtanggam a Nagate luahna huamsung ah dakkal 12 sung bandh om ziakin hindan ngeina nawngkai a, thusuakin kizadan in Nagaland pansan Naga Students’ Federation (NSF) pawlin bandh abawl uh All Naga Students’ Association Manipur (ANSAM) te’n support puang in Manipur ah leng tuni zingsang dak 6.00 akipan dakkal 12 sung bandh om hi.Huailou in Thoubal district a Yairipok ah numei naupang khat sualluih ahihziaka lungkimlou JAC pawlin tuni’n dakkal 24 sung statewide bandh abawl ziakun phaizang bial pumpi nawngkai hi’n kigen hi. Mantri Pukhri Bazaar community hall ah mipi lungkimloute’n tuni’n kikhopna nei uh a, zan a sisa a kimukhia auto-rickshaw driver L Deben sihdan lungkimlouh latsakna in NH-39 ah tuni nitaklam dak 1.00 akipan July 2, 2013 nitak 6.00 sung bandh puang uhi.
KCP (MC) cadre mat in om
Imphal, July-1: Imphal East district police Commando te’n Kangleipak Communist Party (MC) active member(cadre) Laishram Nanao @ Rohit (24) s/o (late) L Ranjit Singh of Top Moirangkampu mankhia uh a, Yambung @ Khoirangba of Nambol makaihna nuaia gamtang zel hi’n press release suah uhi. Police te’n amah taksa tung apan 9mm Pistol mukhia uh a, akithuahpih W Somendro @ Bobby (33) son of W Ibomcha of Takyel Khongban leh Amom Aken @ Germany (23) s/o A Bhubon of Takyel Makha Leikai leng matkhiak hi uhi.
Management Committee guang
Imhal, July-1: All Manipur Working Journalists’ Union(AMWJU) pawlin Manipur Press Club Management Committee dingin mi 5 guang uhi. Huaite 1)Thingnam Anjulika of Eastern Chronicle, 2) Ramkung Pamei of PTI, 3)Thiyam Ranjan of IS TV, 4) Likla Leima of Sangai Express leh 5)Asem Bhakta of Indian Age hi uhi.
ASSEMBLY NEWS
‘Age relaxation’ thu dotna bawl
Imphal, July-1: Dr I. Ibohalbi,MLA in tuni’n Assembly session ah Manipur Civil Services examination ah ‘age relaxation’ poimawh ahihdan Calling Attention a puaklut Chief Minister in a dawnna ah kum 2010 a Manipur Civil Services examna ah khatvei kia adingin ‘age relaxation’ omsak hi a, huchibang om gige ding chihna hilou chi’n gen hi.Civil Servies examna kumteng a om ding himahleh kumteng om gige theilou ahihman in tunung a om ding ah leng kum tamlou bek ‘relaxation’ a om thei hiam en ding hi’n gen hi.
Dist Hospital ah Specialist doctor
Imphal, July-1: District Hospital a Specialist doctor koihtheihna ding(norms) leh Chandel District Hospital a Specialist doctor omzah tuni’n Assembly session ah ST Nunghlur Victor in dotna a bawl Health Minister Phungzathang Tonsing in a dawnna ah Specialist doctor kichinlouh ziakin Chandel District Hospital kia hilou in Ukhrul, Tamenglong District Hospital banah Moreh leh Jiribam sub-divn ah leng koih hilou in gen a, Specialist(PG) zouthak doctor 30 omte July, 2013 sungin Chandel district hospital leh adangdang ah posting sak hiding uh chi’n gen hi.
VDF tungtang ah dotna bawl
Imphal, July-1: Manipur a VDF te’ maban leh service protection bang om hiam chih Th. Biswajit,MLA in tuni’n Assembly session a dotna a bawl Dy Chief Minister(Home) in a dawnna ah tu dinmun ah maban thil leh service protection bangmah om nailou hi’n gen hi.
Home deptt a lower rank adiakin Follower, Rifleman, Havilder, Constable leh Head Constable-te adin transfer & posting policy bel om hi’n gen hi.
Review DPC tungtang genchian
Imphal, July-1: Dr I. Ibohalbi,MLA in tuni’n Assembly Session ah Jr MCS(Sr grade) 14 i Jr MCS(Selection grade) a promotion piakna ding in Aug 4, 2012 in Review DPC om hiam chih dotna a bawl Chief Minister in a dawnna ah Review DPC om a, huaia recommendation tamzaw leng kizang hi’n gen hi.Himahleh Officer 4 reversion a om banah Jr MCS Rules bawlthak ding in om a,huai dingin Cabinet in lem a sakpihna lak dinga ngak hilai chi hi.