Mobile mang ziakin kisel buaina piang: mi 1 si, 2 liam
Lamka, Sept-15: Saikul leh Saidan khua kikal a om Thingchom khua ah zan nitak in Mobile handset Nokia- 311 mang ziaka buaina piangin District Hospital ah aliam mi 3 puaktung hi uh a, huaite laka mi 1 damzoulou in si a, aliam midang 2te dinmun bel lauthong huailua hilou hi’n kigen hi.
Thutut kingahdan in Sept 9, 2013 inThingchom khua ah Mangchungnung Singson (27) s/o Thangkholal Singson of Munpi village(Henglep Sub-divn) tulela Bethel khua a om vahawh a, nungak helna ah Mobile handset Nokhia-311 sumang kha hi’n kigen hi. Aman huai mobile mang pen awla va kankhe nawn ding hi a a gen bang in zan nitak dak 6:30 velin Mangchungnung Singson (27) s/o Thangkholal Singson of Munpi village leh alawmte 2-Jangkholun Haokip (31) s/o Douthong Haokip of Kholmun village leh Khailun Haokip (23) s/o Letkam Haokip of Kunglal Veng, Tuibuong tawh mobile handset kankawm ding in Thingchom khua ah vahawh uh hi’n kigen hi.

Nitak nung in Mangchungnung in mobile gu hiding a gintak 1 tawh kiselbuaina piang hi’n kigen a, huchi kal ah galvantawi pawlkhat in lawmta mi 3te soisa uh hi’n kigen hi. Nitak dak 10:30 vel in vuakliam a om mi 3 te Dist. hospital ah puaktung a om in admit hi uhi. Aliam mi 3 te laka Jangkholun Haokip tuni zingsang baihtak dak 4:00 in damzoulou in si a, Dist. Hospital morgue ah koih in om hi.Aliam mi 2te leng tuni zinglam dak 8:50 in Doctor te’n Sielmat Christian Hospital a etkol dingin suan(refered) uhi.

Thingchom khua a buaina tawh kisai tuni zingkal apan in Tuibuong Forest Gate, Molnom leh K.Salbung ah mi bangzahhiam in Tedim Road lampi khaktan in gari taituah teng kiksak uh a, zinglam dak 11:00 vel in kihouna om theiding chihthu om ziak in Tedim Road ah ngeina bangin Gari painawn hi. Buaina ziaka si mi 1 leh aliam 2te tungtang Kuki Inpi/ CCpur leh Hmar Inpui makaih in pupa’ tawndan in Kholmun khua ah kihouna kipan a, hileleng KNO lamte lungkimlou in kihouna dinkhawl hi’n kigen hi. KNO Home Secy in case lasawn a, tuni nitak dak 6:30 in KNO Home Secretary makaihna in UPF makaite, HPC (D) makaite’ Hmar Inpui leh HYA makaite kimu uh a, Sept 16, 2013 zinglam dak 10:00 in New Boljang Hausa Khaipao Haokip tenna inn ah KIC, KSO, KKL makaite leh UPF, Hmar Inpui, HYA makaite’n kihouna taktak nei ding uh hi’n thutut kingah hi. Dist. Hospital morgue a si luang leng tuni zan-giak a, Sept 16, 2013 a kihou lemna a om theih leh morgue apan lakkhiak hipan phet ding chih ahi hi. Jangkholun Haokip in azi’ Nemneikhol tawh tanu 2 nei uh a, tulelin azi in naupai(pregnant) hi’n kigen hi.

NE a Model Village masapen di’n Pearsonmun hihsak sawm
Lamka, Sep-15: Northeat India adia Reserve Bank of India(RBI) Regional Office, Guwahati in NE bial a Model village hihsak dinga aguan uh khua 21 laka khatna Pearsonmun hi a, Model Village masapen dingin Pearsonmun puah sawm uhi. Model Village hihtheihna dinga thil 3 poimawhte – innkuan chih in bank acount neih ding, innkhat apan mikhat bek in loan a lak ut leh amuh teitei ding, sum siangthou (clean note policy) neih ding, bank-te kianga a lungkim louhnate uh a genkhiak theihna ding uh omsak ding chihte hi a, huaite a om chiang in Model Village a puankhiak theih hiding chih ahi hi.
Tuni sunnung in Pearsonmun ah MT Muanding Guite, Assistant General Manager, RBI, Guwahati, Regional Office makaihna in khawsung mipite tawh Model Village hihtheihna dinga poimawhte genkhawm uhi. Muanding Guite in a genna ah Pearsonmun in SBI Branch a neihtheih ziakin Model Village hihtheihna dinga poimawh tamzawte baihlam sak a, Loan tungtang ahihleh ditkik(return) teitei ding ahihman in, ditkiklouh ding dan a lungsim neihlouh ngai hi’n gen hi. Huailou in SMS leh e-mail tungtawn a sum muhtheihna dingin kikhemna tamtak om a, Debit Card/ATM leh tununga hong kizang ding Credit Card te ah kikhemna a om ziakin pilvan poimawh chi hi. Aman agenzelna ah Bank account leng midang theihsak luat hoihlou in, mundang a omte ading biik in foreign national te lakah pilvan poimawh, chi hi. Model Village hihtheihna dingin mipite mah leng kuhkal taka nasep-silbawl leh lunglutna lamte hih poimawh a, Lamka adia khaw bubitpen pawl ahihziakin Pearsonmun pen RBI in Model Village hihsak sawm ahihdan gen hi. Huailou in India gamah village 9 lakh vel om a, huaite lakah Anti-corruption campaigner Anna Hazare omna khua(village) leng tuni chiang in puahphat hi a, model village ahihdungzui in khangtou mahmah chi hi. Model Village tungtang genkhawmna Sept 3,2013 in Guwahati a RBI controlling office ah om a, NE apan bank makaite tel uh chi’n gen hi.

S. Khaikhopau Ngaihte in agenna ah kum 2011 a RBI Outreach Financial Campaign apan Adopted Village dinga Pearsonmun a telkhiak ziak un RBI panlakna tawh khawsung ah Bank honkhiak hi a, Lamka lam mi Muanding Guite in Guwahati ah AGM a let, hamphat huai hi’n gen a, India govt policy tungtawn a RBI in hon panpih dinga mansa ahihman in sep ding lam hahbawl poimawh chi hi. Tuni a khawsung mite tawh hun zatkhawmna ah RBI lam te’n Lamka a Bank tuamtuam – SBI/Ccpur, SBI/Pearsonmun, SBI/Tuibuong, UBI/Ccpur, UCO/Ccpur, Manipur Rural Bank/Ccpur, HDFC/Ccpur, Axis Bank/Ccpur, ICICI/Ccpur apan Manager leh staff-te leng tel uhi.

Bank tawh kisai meeting omding
Lamka, Sept-15: DC/CCpur makaihna in DC/CCpur office a BRGF Resource Centre ah Sept 24, 2013 zinglam dak 11:00 in District Consultative Committe leh District Level Review Committee pawlin June 2013 tan (Quarter ended June,2013) tawh kisai in meeting om ding hi.Huai ah Lamka khawpi sunga bank tuamtguam omte akipan Manager teng telkim ding in theihsak hi uhi

Traffic rule bawhsia 15 mankhia
Lamka, Sept-15: Lamka khawpi a ‘One way traffic rule’ leh ‘Gari parking’ dan ban ah gari kileithak a A/F kigelhte tulai in Traffic Police,Police leh VDF kigawm combined team in niteng in enzui uh a, Sept 9-14, 2013 kikal kalkhat sung in traffic rule bawhsia leh Gari No. omlou a A/F kia kigelh 15 mankhia in TR-5 receipt cut in fine sak uhi. Adiakin gari parking dan kum 2 paisa akipan zat himahleh nitengin huai bawhsia omden lai a, gari thak a A/F kigelhte leng dakkal 48 sungin Transport office ah registration bawlsak a number gelhding in govt in order suah hi.

Leimatak ah DLCC meeting
Lamka, Sept-15: Ms Jacintha Lazarus,IAS,DC/CCpur makaihna in Sept 21,2013 zinglam dak 11:00 in Leimatak khua ah Dist Level Co-ordination Committee (DLCC) meeting om ding a, huai a teldingte Sept 21,2013 zingsang dak 8:00 in DC’s Bungalow apan in Leimatak khua zuan ding uhi. DLCC meeting ah SDO/BDO te leh District Level Officer (DLO) teng kimtaka tel ding in DC/CCpur office apan theihsakna om hi.

Loan late’n dinkik dingin theisak
Lamka, Sept-15:Manipur State Co-operative Bank Ltd akipan 2-Wheeler, Micro-business, Tata Sumo,Fishery, Piggery leh SEGP nuaia Trade tuamtuam adia loan late’n tu Septemberr 2013 kha kichi ‘Half Yearly Closing of Accounts’ahih dungzui in Recovery Camp ahih dungzui in loan sum bat neilai tengin dinkik chiat ding in Manipur State Co-op Bank Ltd a Manager in theisak hi.

TB office ah Honorarium laktheih
Lamka, Sept-15: NRTCP/CCpur nuai ah Oct 2012 apan Sept 2013 sung a TB damdoi nezou (treatment) dampihte’ leh DOTs Provider te’n Sept. 2013 apan Dist. TB Centre, TB Office ah Honorarium laktheih ding hi. DP te’n duplicate card tawi ngeingei ding in Dist TB Officer/CCpur in theisak hi.

Manipur ai-oh in mi 2 kuan ding
Lamka, Sept-15: Jharkhand khawpi Ranchi ah Sept. 20-29, 2013 sung U-17 National Football Champion 49th Dr BC Roy Football Trophy 2013-14 om ding hi.Huai ah Manipur apan team 1 kuanding a, huailak ah Sumthianthang s/o Lhunkholal of Molnom leh Buanthanglur s/o Thangvung of Hebron Veng New Lamka leng tel ding uhi.

All Manipur Football Assn in Manipur team manager ding in Lalvullien Zote, President CDSA leh Coach dingin E.Ratan Singh guang uhi. Sept. 20, 2012 in Manipur team leh Madhya Pradesh team kimawl ding uh a, Sept. 22, 2013 in Uttar Pradesh tawh kimawl ding uhi. Sept. 24, 2013 in West Bengal tawh kimawl ding uhi.

Paybill & Muster Roll form om
Govt employee-te adia lawh lakna ding a bill bawlna ‘Paybill form’ leh Muster Roll adia bill bawlna form deihte adingin Manipur Exress office kai hunsung zinglam dak 10.00 akipan nitaklam dak 6.00 kikal in leitheih gige ding hi.

IMPHAL NEWS

NIA in thil omdan suizui:
MHA in Non-Manipuri 9 thahna ngai serious
Imphal, Sept-15: Union Home Minister Sushil kumar Shinde in Sept. 13, 2013 in Imphal a non-Manipuri mi 9 thah ahih Home Ministry in ngai serious mahmah ahihdan gen hi. Thusuak a gendan in Shinde in a gendan in Manipur govt in muanna leh bitna dinmun enkai zoulou hi’n gen a, Chief Minister O. Ibobi kiangah Manipur a migrant worker-te venbitna hoihtak pedingin thupia chih ahi hi. Non-Manipuri thahna a kigolh khate akinlam a mankhe dingin theisak a, maban ah hibang thil tungsak nawnlou dingin theisak chih ahi hi.

Union Home Ministry in thiltung tawh kisai National Investigation Agency (NIA) suizui sak a, amau bomb puahna mun a thil omdan leh thilneng chituamtuam telin handgrenade kizang bang hihiam chihte suizui uhi.

Mobile sale in antang kizuak ding
Imphal, Sept-15:Nidanga Food & Civil Supplies deptt kichi ‘Consumer Affairs, Food & Public Distribution(CAF & PD) deptt in Sept 16, 2012 akipan in Imphal khawpi sung mun khenkhat ah mobile sale in antang zuak ding uhi. Thutut kingah dungzui in Palace Gate, Samu Makhong,Keishampat leh Khoyathong ah Sept 16, 2013 akipan thuthak om nawn masiah zinglam dak 10.00 akipan nitaklam dak 4.30 tan mobile sale in antang kizuak ding a, mi khat in kg. 1 ah Rs, 10 rate in antang kg. 10 zel leithei ding uh chihthu om hi.District HQ tuamtuam ah leng tunung in Mobile sale kipan ding chihthu om hi.

Dy CM in bomb puaka liamte veh
Imphal, Sept-15:Deputy Chief Minister Gaikhangam in Sept. 13 nitak a Naga River tung a nasem a omte giahkhawmna mun a bomb paihkhumte naktak in mawhpaih a, tua tawh kiton in RIMS leh Shija Hospital a etkol a om a liamte leng a dinmun uh enkhia hi. Aman thiltung tawh kisai mihai tawpkhawkte thilhih hidan a gen in hoihtak a suizui hiding a genkawm in a kinlam a matkhiak hidingin gen hi.

IED bomb khat kimukhia
Imphal, Sept-15 : Imphal East District sung Lamlai PS huamsung a om Yourabung Khunou mun ah tuni zingsang dak 7:30 velin 13- Bn BSFpawla Road Opening Party(ROP) dana patrolling paite’n lampi kiangah IED bomb khat mukhia uhi. Huai police ah report zawh in Police a Bomb squad-ten lakhia in mun thoveng ah hihsia uhi. Huai hun ah 30-A/R te leng amun vatung man uh hidan in kigen hi. Nitaklam in Yourabung Khunou mipite’n bomb koihte mawhpaih in sit-in-protest tu uhi.

JN Hospital a Pharmacist-te lungkimlou in sit-in-protest
Imphal, Sept-15 : JN Hospital a Pharmacy Association pawlin helpawl group 3 akipan sum tamtak a demand muh ziaka lungkimlouh taklangin tuni’n JNIMS Hospital kong ah sit-in-protest tu uhi. Thusuakin a gendan in meltheihlouh khat in Pharmacy neitu khat phone a, tua hun in PLA min in sum demand hi’n kigen hi. Tuazawh in KCP (Luwangcha) leh PREPAK (PRO) min in Rs. 1 lakhs chiat phone tungtawn in demand a om nawn hidan in Assn spokesperson in gen hi. PLA pawlin khakhat a pai nungin a sum demand uh khawlsan mahle uh KCP leh PREPAK ten Assn member-te vaukawm in sum ngen uhi. Huai tawh kisai in Pharmacist Assn pawlin helpawl 2te kiangah sum demand khawlsan dingin ngen uhi.

Police-te’n non-Manipuri kaikhawm
Imphal, Sept-15: Khoyathong ah zanhal in Kolakata based Simplex Company nuaia nasemte omkhawmna mun a bomb puakzak ziaka mi 9 a sih ziakun Police te’n Non-Manipur omte venbit poimawhsa in Imphal khawpi sung mun tuamtuama nasema omte kaikhawm uh a,zan tannin Thangal Bazar a Dharmshala ah mi 107 kaikhawm in vengbit uhi.Bomb puahzakni a a liam mi 12 laka etkol ngai mi 11te lakah RIMS Hospital ah mi 6 etkol hi uh a, Shija Hospital ah mi 5 etkol hi uhi.

OTA apan officer 350 lakah Hermon tel
Lamka, Sep-14: Tuni’n Chennai a Officers Training Academy ah Officer training zoutajtre Passing Out Parade (POP) pai uh a, training zouthak Officer 350 kihel uhi. Huaite lakah Short Service Commission(SSC) 96 leh SSC(W) 10 Course apan numei cadet 70 leh Afghanistan mi Foreign Cadet 20 vel Passing Out Parade ah tel uhi. Officer chingthakte laka kitheipha chiang ah Lt Hermon Hauh thang Hlun s/o Rev. Dr En Za Sian of Pangzawl, telkha a, amah lasiam Miss Rody Za Lien Sing sanggampa ahi hi. Hermon in Rayburn College apan kum 2009 in 2nd Division in Cl-XII(Commerce), 2009 in zou a, kum 2012 in Kristu Jayanti College, Bangalore apan First Class in BBM(Graduate ) zou nawn a, CDS tungtawn in gelhching hi'n kigen hi.

OTA Chennai apan Commission ngahte laka tel, Hermon in 108 Field Artillery Regt tangkha hi. Amau kal 49 sung training nei uh a, Lt Gen Ashok Singh,Southern Command in salute la in Basantar Company kiang ah 'Chief of Army Staff' banner pia hi. Cadet Senior Under Officer Kuldeep Singh Baduriya in 'Sword of Honour' sang a, OTA Commandant Lt Gen SS Jog telin officer tuamtuamte’n huai hun uap uhi.

Tuahsiatna thiltung ah i-20 Car neite’n tuni’n sum pia
Lamka, Sept-14: Koite hanmual gei ah zan zinglam in Imphal apan Lamka zuan i-20 car (No.AS 01AU-6574) leh Lamka apan Saikul khua zuan Yamaha bike (No.MN-02-2317) kiphutuah kha a, Yahama bike atuang Thongkhankhup (54) h/o Niangmanching of New Lamka(G) etkol manlouh in amun ah si a, Upa D.Chinkhanthang (62) h/o Thongniang of Dorcas Veng, New Lamka bel Hospital tunpih nungin damzoulou in si hi.Huai thiltung tawh kisai in YPA Gen HQ leh Meitei Society makaih in zan nitak dak 6:00 in YPA Hall, New Lamka ah singtangmite’ tawndan inndongta level in kihou uh a, tuni nitaklam dak 5:00 in thilbangkim hihfel uhi. Huai ah Meitei Society makaih in i-20 Car neitute’n misi 2 te innkuante kiang ah luangman/zangna dopna in Rs 2 lakh tuak a piak ban uah Yahama Bike ading in Rs 1 lakh pia uh a, kilemna suaikai in kihoufel uhi. Misi 2te innkuante’n i-20 Car atuang aliam mi 2 tulela Dist Hospital a omte etkolna ding in Rs. 10,000/- tuak lehkik uhi.

S.Chinngaihpau, President YPA Gen HQ in Meitei Society- te’ a vaikhakna ah ‘Meitei area ah gari a accident chiang in driver khetlup leh gari mei ahalsiat chih kithang mahmah a, accident tuakte adia vangsiatna double ahihziakin maban ah hibang thilchi’n a om nawnlouhna dingin hoihtaka campaign dingin vaikhaak hi. Zan a i-20 car leh Yamaha kiphut tuah khak siaka si leh aliamte inndongta level a kihoulem theihziak in Police te’n case registered lou thak uh hi’ kigen hi.

The Good Old Days’ laibu hongkhia
Lamka, Sept-14: Lian Samte in abawl ‘The Good Old Days (A bunch of Memories)’ kichi laibu tuni zinglam in Rayburn College, Auditorium ah Thangkhopau Ngaihte, IAS (retd) in hongkhia a, Rev Khen P.Tombing, Principal Rayburn College in Pathian kiang ah thumna in lan (dedicate) hi. Thangkhopau Ngaihte in agenna ah Lian Samte’ pu leh pa te thei mahleh Lian Samte pen theihchiah lou hi’n gen a, Literature khanhat semnang a Lian Samte in laibu abawl kipahpihthu gen hi. Program hunsung in Langkhanpau Guite, Chairman ADC/CCpur; Paite Literature Society makai te, SSPP Gen HQ makaite leh S.Tualchinkham,MPS(retd) te’n thugenna saulou chiat nei uhi.

Manpur Rural Bank ah lawhching
Lamka, Sep-14: Manipur Rural Bank a Office Assistant lakna ding result suak ah singtangmi 3 lawhching in waiting list ah 1 om hi. Lawhchinna ngahte ahihleh Tingneithem Gangte, Elvina Th Buhril, Lalthangmoi Sitlhou hi ua, waiting list ah Hengoulien Khongsai om hi. Hiai recruitment ahihleh IBPS(RRB) - I apat kibawl hi a, ST te ading post 3, leh waiting list 2 pen official website www.manipurruralbank.in ah taklat in omta hi.

Khamtheih doudalna in Rally pai uh
Lamka, Sept-14: Phailian Women Welfare Assn. te’n Phailian khawsung ah khamtheih, zu-le-sa, sualna chituamtuam doudal in duty zel uh a, tuni zinglam in Phailian khawsung ah khamtheih leh sual douna in numei pawlte’ Rally pai uhi. PWWA makaih in numei pawl te’n Phailian hausapa tenna inn apan kipankhia in Phailian khawsung teng fangkual uh a, placard ah ‘puaklut’ ‘doplut’, ‘zawnlut’ ‘zuak phal ahikei’ chihte tawi uh a, mike zang in mipi’n khamtheih, guihtheih leh sualdouna ah kuapeuh pangkhawm ding in ngen uhi.

Zillai Rayburn College unit Freshers’ Meet
Lamka, Sep-14: Zillai Rayburn College Unit te’n tuni zinglam in Synod Hall, IB Road ah ‘Freshers’ Meet –cum- Felicitation programme 2013’ zang uh a, D Khuala Vaiphei, Program Manager, NRHM/Ccpur in Chief Guest hihna tawh uap a, Kh Vaiphei leh ST Lalson Vaiphei, Lecturer te’n Guest of Honour leh Functional President hihna tawh uap uhi. Chief Guest in a thugenna ah, tup kichian neite mah lawhching uh a, huai dingin chihtakna tawh pang dingin sinlaite hasuan hi. Govt in mipite khualna in scheme hoihtaktak pankhia a, huaite hoihtak a phattuampih chiat dingin ngen hi.

Uniform latna leh thumsakna
Lamka, Sept-14: Mrs Chingpi of HQ Veng in a tanu (late) Ms Zamngaihmuan theih gigena dingin HQ Veng Sporting Club (HSC) player te’ zatding uniform thak leisak a, tuni zinglam in HQ Veng Communty Hall ah Pathian kianga latna leh player-te thumsakna om hi. Huai ah Kamsuanlun, EM/ADC khuallian a pang in Uniform hongkhia a, Pastor V.Jamkhanthang, EBCC in Pathian kiang a lan kawm in player-te thumsak hi. Kamsuanlun in agenna ah kum bangzah hiam paisa ah football kimawl zawhlouh hun leh zawh hun in leng zu-le-sa a kisiatbat chindan tangpi hi a , huai in tuailai tamtak hinkhua susia a, football player te mahni ki control zawh poimawh mahmah hi’n gen hi. Sports in midangte tawh ki-itna, kinaihsemna leh kituahna tun a, HQ Veng sung mipite leng Sports tungtawn a kituahna, ki-itsemna a om deihthu gen hi.

Freshers Meet leh Award hawmna
Lamka, Sept-14: TKSU CCpur College Branch te’n tuni zinglam in Tuibuong Community Hall ah Freshers Meet 11veina leh Award hawmna kithuah program om a, DK Thangboi, MCS, ADC/Kangpokpi khuallian in pang hi. Huai ah Functional President in Ricky Vanlallawm Guite, Principal CCpur Collge, Guest of Honour in S.Lamthong Haokip, ASI leh Special Guest in Helien Kipgen, Social Worker pang hi. Rev LB Angam, Gen Director ECCI in fresher 230 te Pathian kiang ah thumsak a,mi 15 kiangah Award tuamtuam hawmkhia uhi.

‘
Exchange Mela ah gari 50 val tel

Lamka, Sept-14: Tedim Road, Hebron Veng a United Motors (Maruti Authorised Service Station ah tuni zinglam dak 10:00 apan United Motors leh Eastern Motors, Imphal pangkhawm in ‘Exchange Mela of Maruti 800 & Maruti gari free check up’ om hi. Huai ah Maruti gari nei 50 val te’n amanbei (free) in gari check-up uh a, lawhching mahmah hi’n kigen hi.

Vimala Raina in Headmaster neita
Lamka, Sept-14: Vimala Raina High School in kha 5 phial Headmaster leh DDO a neihlouh nungin Dy Secy (Edn/S) Govt of Manipur in Sept 9, 2013 a order suah in T. Donglianpau BSc, B.Ed in Vimala Raina High School a Headmaster in-charge banah DDO len ding chih ahi hi. Vimala Raina High School a Headmistress F Lalzuithangi ahihleh March 26, 2013 in Zonal Education Officer (ZEO), Chandel len dingin kisuan khia hi.

Mela-cum-Banquet om
Lamka, Sept-14: EFCI Saikot District numeipawl in Sielmat ah Prayer Hall bawlkhiat sawm uh a, huai ding sum leh pai kaihkhawmna in tuni zinglam apan Sietmat Christian Hr Sec School campus ah ‘Mela-cum-Banquet’ bawl uhi. Huai hun ah Dry flower, Arts & Craft tuamtuam, nikte’n puansilh zuakna (Jumble sale), fast food, nektheih chituamtuam zuak uhi. Huaiban ah Live Music concert om a, artist 20 val tel uhi. Artist lak ah Joseph Pakhuongte, Zeneth Varte, Lalengvari Sinate (Mizo Idol 2nd Position) telin lasiam tuamtuam in lasa uhi. Mela-cum-Banquet ah mi tam mahmah in numeipawl panpihna in thil tuamtuam leisak uhi.

Culvert bawlna nasep kipan
Lamka, Sept-14: Tedim road in a totkhak Simveng zotna lampi bul a electric transformer kianga BRO/BRTF te’n tukum bullam in lampi akimkhat ah culvert bawl uh a, huai zawhsiang nung zan in lampi kimkhat (tumlampang) bawlsawm nawn uhi. Zan in CJB zang in lampi khuat kuak uh a, hileleng hawktui luang tamlua ziak in cement zanga nasepna pan theilou uhi. Hawktui luannawn louh leh vuahzuk nawnlouh hun in cement zanga nasepnang in suanghum leh leingawi bel mansa in BRO/BRTF te’n koih khin uhi.

Suunna:
Tuanchin Samte (58) s/o (late) Luaizalang of Bungpilon tniu zingsang dak 7:50 in khawsik leh sungna kithuah in si a, tuni nitaklam in Bungpilon khua ah kivui hi.

IMPHAL NEWS
Misi innkuante’n Rs. 4 lakh chiat mu ding

Imphal, Sep-14: Chief Minister O Ibobi in non-manipuri nasemtu thah a omte innkuante ex-gratia Rs. 4 lakhs chiat piak hiding chi’n gen hi. Nagamapal ah zan nitak dak 7.30 in bomb hattak puakzak a, huai ah Asmad Ali s/o Anjo Ali, Arafat Ali s/o Ahmadullah , Abjal Haque s/o Md Jahar Ali, MD Tajuddin Ali s/o MD Jahir Ali, MD Mufiz Ali s/o Md Khadim Ali, MD Mubarak Ali, MD Motibur Ali, MD Motibur Ali s/o Tansan Ali of Assam Kamarup, Sabul Haque s/o Akbar Ali of Assam Golpara leh MD Zahir Hussien of Assam Jawkata si uhi. Amaute Assam apan Manipur a kilawh(migrant worker) hi uha, post-mortem bawlzawh in lenna zang in Assam ah puaktung hi uhi. .

Chief Minister in a gendan in aliam nasa deuhte Rs. 50,000 leh a liamze te Rs. 10,000 piak hiding chi hi . Police thusuakin a gendanin innkong lam apan handgrenade paihlut in om a, nasemtute’ playing card kimawllai alak uah bomb lenglut in puakzak a, aliamte leng serious a tam ziakin siluang kibehlap dinga gintak ahi hi. Shija Hospital ICU ah mi 5 omlel uh a, Revenue Minister Th. Devendra leh Commerce & Indus Minister Govindas Konthoujam te’n tuni’n vaveh uh a, Chief Minister O Ibobi leh Deputy CM Gaikhangam bel New Delhi ah omlai uhi.

RIMS Foundation Day 42veina kizang
Imphal, Sep-14: RIMS phuhkhiak nung kum 42 chinna tuni’n RIMS Jubilee Hall ah kizang hi. Huai ah International Peace & Social Advancement (IPSA) leh civil society organisation tuamtuam te’n uap uh a, Dr Thokchom Meinya,MP(Lok Sabha),Laishram Nandakumar,MLA leh Medicine Professor JNIMS Y Ibopishak te’n Chief guest, President leh Guest of Honour in pang uhi.

RIMS Director, Prof S. Sekharjit Singh in Annual Report a piakna ah, faculty, students leh nurse -te kuhkalna leh chihtakna ziaka RIMS in nasepna sunzom thei hi’n gen a, Manpur a ding kia hilou in India adinga mun poimawhtak ahihdan leng gen hi. Hiaimun apan Doctor, Nurse leh PhD zoukhia tamtak omta a, tunung sawtlou chiang in vanzat hoihtak kineita ding, chi hi.

Phumbi hahsiangna tawh kisai NHRC in report a nget state govt in petheilou

Imphal, Sept-14: National Human Right Commision in Loktak a Phumdi(biomass) hahsiangna tawh kisai CBI a piaklut ding in National Human Rights Commission in report a nget state govt in pe theilou hi’n kigen hi. Planning Commission in Loktak hahsiangna dinga Short Term Action Plan pailel March 2014 tan ding himahleh nasepna Planning Commmission in kipahpih chihthu im hi. Loktak Development Authority thusuak dungzui in Phumdi hahna ding in Planning Commission apan Rs. 220 crores phatuam taka zat hi a,huaiziak mahin mundang akipan Loktak mun a vasa(migratory bird) om leng kum 2010 in 14,000 himahleh tukum in 34,700 omta chih hi
Thu kizadan in tu dinmun ah Loktak dil ah 122,23 cubic metre akipan Phumdi hahsiang hi
a,huaiziakin Loktak dil km 28.7 kimkot hahsiang khit hita a, huaiziak mah in migratory bird leng 14,000 akipan 34,7000 a pung hial hi’n kigen hi.

MUTSU makai ding kitelna om ding
Imphal, Sep-14: Manipur University Tribal Students Union(IMUTSU) pawlin Sept 28, 2013 in Manipur University a Students Hostel ah kum 2013-14 sung vaipaw ding telna nei ding uhi. Post tuamtuam adingin nomination paper leng Election Commission kiangah Sep 14, 2013 in ngahtheih ding a, Sep 26, 2013 tan in submit ngai ding hi. Scrutiny ahihleh Sep 28, 2013 nitaklam dak 1:00 in om ding hi. MUTSU office bearer dinga post awngte ahihleh President, Vice-president, General Secretary, Asst. General Secretary, Finance Secretary, Education Secretary, Information & Publicity Secretary, Social & Culture Secretary, Games & Sports Secretary leh Treasurer hi’n kigen hi.

Parliament team te’n hongveh ding
Lamka, Sep-14: Committee on Estimate of the Parliament te’n Sept 30,2013 in Imphal – Tupul rail link a railway project nasepna enkhe kawm dingin Manipur hongpha ding uhi. Huai hunah textile industry nasepte leng enkhe ding uh a, Parliamentary teamte ahihleh MP 25 leh officer 5 hi uh a, Chairman Francisco Sarbinha in amaute makaih ding hi.

Nagaland ah Kangla Food Products
Imphal, Sep-14: Nagaland Chief Secretary, Alem Temshi Jamir in Kangla Food Products Private Limited nuaia Nagaland Unit ding, Hotel Japhu Kohima ah zan in hongkhia hi. Northeast mite’n khawpi hinkhua a gamtat leh nekzon, khawl nasepna leh khawvel siamna tuamtuamte zang a nekzonna poimawh ahihdan Chief Guest hihna tawh Chief Secy in huai hunah gen hi.

Election di’n Mizoram kisakhol
Imphal, Sep-14: Mizoram state ah November in assembly election om nawn ding a, state- leh district-level official-te’ntulai in training neilel ua, electronic voting machine leh thil tuamtuam etchetna leng pailel chi’n Mizoram Chief Electoral Officer (CEO) Ashwini Kumar in gen hi.