KCP te’ gamtatna mawhpaihna in Sit-in-Protest om
Lamka, Sept-12: HQ Veng a 46-Assam Rifles-te’ camp a om KCP surrender group te’n Dist Hospital campus ah Sept 10, 2013 sunnung in buaina bawl in VDF personnel 4 leh Police constable 1 vua in, ngaihtakin a kikou ziak un damloute tamtak patau leh lau in koih uhi. Huai thu ah CCpur Joint Women Organisation (CJWO) pawlin KCP surrender group-te’ gamtatna mawhpaihna sangpen puankhum in CCpur dist ah hibang lemna leh muanna hihse theiding thil a om nawnlouh ding deih ziakin tuni zinglam dak 10:30 apan Dist Hospital campus ah sit-in protest nei uhi.

CJWO makaite’n DC/CCpur tungtawn in Manipur Chief Minister ading memorandum pia uhi. Memorandum ah a taklat dungzui un Sept 10, 2013 sunlai in KCP surrender group apan mi 6 vel full uniform tawh Dist Hospital campus ah gari zang in tailut in buaina bawl uh a, hun paisa ah leng KCP surrender group te’ zukham leh omdan kilawmlou a om uh hi’n taklang uhi. CCpur dist a lemna leh muanna hihsiat sawm KCP te ahihziak un akintheipen in CCpur dist apan lakkhiat dingin ngen uh a, 46-Assam Rifles-te camp a om KCP-te free taka gamtangsak Army personel-te’ leng dan tawh kituak a gawtna piakding in CM phut uhi.

Sit in protest atel mipite’n Placard tuamtuam tawi uh a,huai ah ‘Stop Violence’, ‘We respect Peace Love’, ‘Hospital is for the patients’, ‘Give peace a chance in Lamka’,’ Let Gundas stay away in their home’ chih tel in thil tuamtuam kigelh tawi uhi.

Chairman, ADC makaih in ADC member-te meeting
Lamka, Sept-12: Langkhanpau Guite, Chairman ADC/CCpur makaih in a office ah tuni’n ADC member-te meeting uhi. Sept 10, 2013 a Minister 2 leh Parliamentary Secy 2 omlai in Dist Hospital ah 46-A/R-te’ camp a om KCP surrender group te’n buaina a bawl uh mawhpaihna sangpen puang uh a, CCpur dist a lemna leh muanna hihsethei ding KCP-te’n CCpur dist a potkhiaksan ding uh,huai din MDC te’n panlak dingin thupuk uhi. Assam Rifles te ‘Friends of the Hill People’ kichi uh a, singtangmite’ lawmhoih a ut taktak ualeh singtangmite adia haksatna tunthei kuamah kemlou dingin theisak uhi. Huailou in ADC nuai a Medical deptt nasepna, Tribal Affairs tungtawna Housing Scheme thu, ADC nuai a Peon-cum-chowkidar lakding thu leng gen uhi. Dist ading a DRDA fund hoihtaka hongpai touhzel theihna ding telin thutuamtuam kikum uhi.

Show Cause notice piak hi uh
Lamka, Sept-12: Pragati Educational & Socio Economical Development Society a Chief Administrative Officer J. Dutta in DC/CCpur kiang ah social service tuamtuam leh economical developmental scheme tuamtuam sem hi a kigen kawmin CCpur district ah office hon theihna dia phalna pe ding in ngen hi.Huai thu ah DC/CCpur office in point tuamtuam 3 dotna bawl in 1) Bang dan(act) pansan in micro-finance saithei uhiam kua’n phalna pia hiam chih dotna bawlkhum in om uh a, 2) a operational area uh koilailai hiam chih dotna banah 3) RBI in guideline a bawl dungzui in KYC norms bangchi sepkhiak uhiam chih dotna bawlkawm in legal document a neihte uleh point 3 dotna Sept 13, 2013 a dawnna pe dingin DC/Ccpur office in thupia hi’n thutut kingah hi.

Bank tungtang meeting kisuan
Lamka, Sept-12: DC/CCpur makaihna in DC/CCpur office a BRGF Resource Centre ah Sept 13, 2013 zinglam dak 11:00 in District Consultative Committe leh District Level Review Committee pawlin June 2013 tan (Quarter ended June, 2013) tawh kisai in meeting nei ding himahle uh lemtanlouhna omziak in Sept 24, 2014 zinglam dak 11:00 a meeting om ding in ahun kisuan hi.

ZC leh CDSU in memorandum pia
Lamka, Sept-12: Zomi Council te’n Dy Chief Minister kianga merorandum pia in Sept 10, 2013 in Dist Hospital ah Health Minister leh a teamte’n inspection a neihlai ua 46-Asssam Rifles-te’ camp a om KCP surrender group te’n buaina a bawl ziakun CCpur dist apan valley based urderground te lakhe ding, buaina bawl helpawlte dan dungzui a booked ding, a gari zat uh Bolero (black) MNO4-6963 matkhiat ding leh 46-Assam Rifles te’ tunga action lakding in ngen uhi.

CDSU pawlin leng Dy CM kiangah memorandum pia uh a, huai ah 46-Assam Rifles-te’ camp a om KCP-te bangchidan a combat uniform tawh CCpur Dist sung ah free taka omthei uh hiam?chih dotna bawl uh a, CCpur dist apan 46-Assam Rifles-te akintheipen pawtkhe ding leh valley based surrender helpawl te leng akintheipen in CCpur dist apan lakhe dingin ngen uhi. CDSU’ ngetna govt in Sept 22, 2013 tana aepbuchin keileh CDSU kiphinna(agitation) in zuiding in memorandum ah taklang uhi.

MDC te’n aknou hawmkhia
Lamka, Sept-12: Tuibuong a Dist Council office ah tuni in ‘Distributing low input Technology Bird under Backyard Poultry Farming scheme 2012-13’ tungtawn in aknou hunkhop beneficiaries 100 te lak ah hawmkhia uhi. MDC member 1 in beneficiaries 3 zel leh Executive Member te’n beneficiaries 4 zel quota nei uh a, beneficiaries 1 kiang ah aknou 20 leh aknou an(feed) leng hawmkhia uhi.

MDC-te leng MOAP quota pia
Lamka, Sept-12: State govt in Imphal ah Manipur Old Age Pension (MAOP)Scheme ngah thei dingte select bawlzel uh a, MDC te om nungin leng govt in MDC te’ quota petuan lou in Imphal mun ah beneficiaries ding select zel uhi. Huai thu ah Chairman ADC/CCpur in akaisaipih Minister kiangah Hill Dist a MDC teng leng MOAP quota peding in ngen a, Minister in leng Hill Dist tenga MDC teng ading in quota 400 pia a, huaite MDC 1 in MOAP quota 3 zel tangkha uh hi’n Chairman ADC/CCpur apan kiza hi.

BYF khawmpi leh La Kutpi 2013
Lamka, Sep-12: Baptist Youth Fellowship(BYF) Mizoram Divn in EBCC Aizawl ah Sep 13-15, 2013 sung Division BYF Khawmpi 33veina leh La Kutpi 2013 kithuah nei ding uhi. Huai ah Rev. M. Zalian Guite, DS, Mizoram Division/EBC in thugen ding hi. EBC division sunga khaw tuamtuam apan BYF-te amun tungkimta uhi.

SUUNNA
Mrs Luan Go Cing (83) w/o(late) Thang Za Do of Lanva tuni zingsang baihtak dak 1:00 vel in RIMS Hospital ah heart case in si a, tuni in kivui hi.
H.Pauthianmung(32) s/o (late) Joyful Zamchianlian Hangzo of Zellang Veng, Hiangtam Lamka tuni sunnung dak 1.30 in si a, Sep 13, 2013 in Lamka Hanmual ah kivui ding hi.
Khaiminthang s/o Thangchinsuah @Pu Meng of Joutung, Thanlon sub-divn tuni nitaklam dak 2.30 velin Joutung khua ah sungkhawh in si a, Sep 13 in kivui ding hi.
&&&&&&&&&&&&&&&&&&&&&&&&&&&&&&&&&&&&&
IMPHAL NEWS
CM leh Dy CM tuni’n zinkhia
Imphal, Sept-12: Chief Minister O Ibobi leh Deputy Chief Minister Gaikhangam in tuni nitaklam in Imphal nusia in Delhi ah zin uh a, amau Indo-Myanmar border fencing thubuai leh Senapati district sung a Sub-divn 3 a census tungtang ah ahuntaka panla ding in Centre nawh ding uh hi’n kigen hi. Thutut kingah dungzui in CM leh Dy CM tuni’n zinkhe mahle uh flight tuamtuak ah tuang uh a,amau Delhi a om sung un Union Home Minister Sushil Kumar Shinde tawh border fencing tungtang genkhawm ding uh hi’n kigen hi. Huailou in Prime Minister Dr Man mohon Singh leh UPA Chairperson Sonia Gandhi leng muhsawm uh a, hileleng appointment a ngah nailouh ziakun a muhtheih hun ding kichian nailou hi.

Huailou in Senapati district a Mao Maram, Paomata leh Purul sub-divisions a Census tawh kisai re-verification tungtang leng Manipur govt in pom utlou in palak thak teitei sawm lsai hi. Kum 2011 a census report ah India gama population overall growth 17.64% hi a, hileleng Senapati district a sub-divn 3 a growth rate 23.89% tung a, huai sub-divn 3 tellou in bel 18.6% tung hi. Hileleng sub-divn 3te telsak ahih lebel kum 2026 a delimitation om hun ah population dan etin phaijang biala Assembly Constituency khenkhat beithei ding in om a, huai in state govt patausak hideuh in kigen hi.

RIMS ah kum 42 sungin 4,000 in doctor 4000 zoukhia
Imphal, Sep-12: RIMS phuhkhiak nunga kum 42 sung in mi 4,000 in MBBS leh post-graduate zoukhia uhi.RIMS kichi atunglam in Regional Medical College (RMC) chih in om a, Sept 14, 1972 a phuhkhiak ahi hi..

RIMS bel September 14, 1972 in Northeastern state adingin Regional Medical College (RMC) min tawh patkhiak in om hi. North Eastern Regional Medical College Society huhna tawh nasep kipat nungin North Eastern Regional Medical College chi a khek in om a, August, 1976 apan Union Ministry of Home Affairs nuaia etkol hi a, April 1, 1995 apan Union ministry of DoNER nuaia NEC tungtawn a etkol ahih apan Regional Institute of Medical Sciences (RIMS) chi a khek in om hi. April 1, 2007 in Ministry of Health & Family Welfare, Govt of India nuaiah om nawn hi. RIMS phuhkhiak apan tuni 42nd foundation day tan in doctor 3932, MBBS 2,838, post graduate degree 1,057 leh M Phil 37 in zoukhia uhi. Meghalaya Chief Minister Dr Mukul Sangma in leng RIMS apan MBBS zoukhia hi.

RIMS ah tulelin staff 1800 vel om a, huaite lakah doctor 250 om in, academic session khat adi’n MBBS course ah student 100, post graduate student 147 adingin state tuamtuam apan seat om hi.

Parliamentary Secy makaih in meeting
Imphal, Sept-12: Vungzagin Valte, Parliamentary Secy (Hort, Soil & CADA) in tuni in Lamphel a a official quarter ah singtheimi(mulberry) nou hawmkhia a, tua tawh kiton in Bi-voltime cluster promotion program meeting leng om hi. Huai ah Thanlon A/C apan leh mun tuamtuam apan khaw hausa hunkhop tel uhi.

Huai hun ah Centre govt a Ministry of Textiles apan Sarat Deory, Jt Secy (Tech) & Regional Dev officer/Guwahati leng tel hi. State govt apan H Ginzamang Simte, Director (Seri); N Vialkhanthang, Dy Director (Seri) & Chairman Cluster promotion committee; Somen Singh Scientific officer & member Silk board; N Sanaton Singh, Supt Sericulture i/c MIV leh Lalnunthar, Inspector (seri) tel uhi. Thanlon A/C sunga om Tallian khua ah acre 325 alian ah singtheimi suandim sawmin govt kisa lel hi’n kigen hi.

MNREGA nuaiah water tank 1167
Imphal, Sep-12: MGNREGA scheme nuaiah Tamenglong district pumpi ah Water tank 1167 bawlkhiak in om a, kum 7 paisa sunga Tamenglong district a nasepna gahsuah hi’n kigen hi. Tulelin tank 30 bawl uh ahihdan DRDA/Tamenglong Project Officer K AchamRongmei in tuni’n Tamenglong a Town Baptist Church hall a ‘3 day Bharat Nirman Public Information Campaign’ 2na ah gen hi.

Numei naupaite’ ading sum
Imphal, Sep-12: Manipur adia masapen dingin Tamenglong district ah numei naupai(pregnant) te’ ading scheme thak puankhiak om hi. Huai scheme thak Indira Gandhi Matritva SahyogYojana (IGMSY) kichi hi a, Integrated Child Development Scheme (ICDS) nuaiah numeite etkaina dinga kibawl hi a, Development Project Officer M Memcha Devi, Social Welfare Department, Tamenglong in huai tawh kisai a genna ah, District Administration in sub-division tuamtuamte kiangah leng huai hamphatna piakdan ding ngaihtuah lel chi’n gen hi.

Sanaching akipan Samulamlan ah
Imphal, Sep-12: KSO/Sadar Hills in Sanaching village a innkuan 19 te’ Job Card tu’n Samulamlan Block/ CCpur adia suankhiak ahih ziakin DC/DPC, Senapati kipahpihthu puang uhi. KSO thusuakin a gendanin Sanaching village pen kum 1993-94 buaina ah haltum in om a, khawsung mite’ H.Champhai village ah khawsa ua, huchihlai in Sanaching hausa in Samulamlan Block, CCpur dist. ah gam valei in a khawmite tawh huai ah khawsa uh a, Sanaching village leng Sep 7, 2013 in kihongkhia chi uhi.

Special Assembly session om deih
Imphal, Sept-12: UCM pawlin Manipur Assembly special session a om deihthu gen uh a, Manipur gam leitang kepbitna ding tungtang genkhawm hihen chi uhi.Manipur-Myanmar border a border fencing bawl ding ziakin Manipur gam leitang liankhop mangthang ding pen pammaih ahihdan leng taklang uhi

NSCN (K) Joint Secretary in GPRN/NSCN dotna bawl
Imphal, Sep-12: NSCN (K) joint secretary L. Tuccu in GPRN/NSCN thuneite’ kiangah bangziak a a sanggampa Atobo Awomi pimang uhiam, chi’n dotna bawl hi. NSCN(K) apan thusuakin a gendan in Atobo ahihleh civilian poikhoihlou hi a, gari bawlsak dinga a vakkhe lai GPRN/NSCN highway command, Atoshe kichi in pikhia in naktaka soisak in om, chi hi. Huailou in Rs. 10,000 piak zawh a khahkhiak pat hidan in leng gen hi.

Moreh a accident ah mi 1 siLamka, Sep-12: Tuni in Moreh line a gari tai khat tuahsia in a sunga tuang Thangminlen Baite s/o Letthang, Chief of Ch.Tengnoupal si a, Seiminthang Baite s/oThongkholun of Moreh gim mahmah hi. Misi pen RIMS morgue puaktun in om a, a liam pen Shija Hospital a etkol hi’n kigen hi.