Manipur Hills Journalists Union(MHJU) kum 29 chinna zang uh
Lamka, Sept-8: Manipur Hills Journalists’ Union(MHJU) kiphuhkhiak nung kum 29 chinna zan in Hmuia Veng a YMA Hall ah zat in om a, Chief Guest in Gaikhangam, Dy Chief Minister pang hi. Huai ah Chief Host in Phungzathang Tonsing,Minister(Health & FW, GAD & CADA) pang a, Functional President in Dr Chaltonlien Amo, Chairman, Hill Areas Committee(HAC) pang a, Special Guest in T. Manga Vaiphei,Chairman/MTDC, leh Special invitees in Maniram Sharma, IAS, i/c DC/CCpur pang hi.

Chief Guest in society adingin media poimawhdan gen a, mipi vaihawmna gam ah khuam poimawh 4 omte Executive, Legislative, Judiciary leh Media(4th estate) ahi chi hi. Tulai hun ah a media poimohna lian semsem hi’n gen a, media tungtawn a kikhangtou hi’n gen hi. RTI Act ziakin India ah thuthak puahzak sak a in om a, elected member-te’ vaihawmdante leng Information Technology(IT) tungtawn a thehzak in a om in, mipite’n gamsung vaihawmte nasep theizel uh chi hi. News saite’n thudikte heikoi tuanlou a thudik maha gelh di’n ngen a, khawtang siatna tunthei dingte gelhlouh ding chikawm inAMWJU leh MHJU in kituak a semkhawm dingin deihthu gen hi.

Chief Host in agenna ah Media tungtawn in Infant Mortality Rate lam ah nasep hoihzaw piang a, society sunga nasem theita Media ahihman in apoimawhna lian mahmah chi hi. Functional President in Journalist te’n media tungtawn a thil a suahte uh pilvang ding leh khentuam neilou a thudik taklat ding ahi chi hi. ATSUM in PM kianga memorandum a piak uh uh point 1a hilhchian kawm in, singtanggam a khua 27 vel phaizang adia koih tawh kisai HAC in genkhawm in panla hi’n gen hi. Special Guest in Society adia poimawhna liantak nei, News saite’n siatna tungthei dingte pumpelh sak thei ua, suahkhelh a om leh siatna thupitak om thei gige ahihman in thusuah ah pilvan poimawh chi hi.

MHJU in khuallian a uapte memento pia uh a, Imphal a MHJU ading Press Club leh DIPR a translator koih ding banah Lamka a Press Club building bawlsak dingin Dy CM leh khulliante ngetna pia uhi.

Headquarter Veng ah khamtheih tamkhop mankhia
Lamka, Sep-8: HQ Veng V/A leh HYO pangkhawm in Aug 22, 2013 in HQ Veng Women’ Welfare Assn(HWWA) kichi phutkhia uh a, khawsunga khamtheih, zu leh thilchin hoihlou bawlte tawpsan dia thupia in, a kalh omhiam chih enzui uh a, tuni’n khawsung a check ua leh vengsung munkhat apan zu tamkhop leh bucket sung ah zu bawlna dinga kikoih tamtak mankhia in mipi muh in bua uhi. Amau agendan un thupiak om nung, maban a matkhiak a omlai leh News ah alim utawh suah hiding chi uhi.

Huailou in Molnom Area Joint Welfare Assn(MAJWA) pawl nitak tengin duty uh a, sun chiang inleng khawsung tawna pai vialte enkhia uhi. Duty hunsung in zu leh khamtheih bangzah hiam mankhia uh hi. Huailou in Tuibuong Women’s Welfare Assn leh Hmarveng Welfare Assn nuaia Women’s Wing leh Bijang Area Women Welfare Assn te’n nasep sunzom in duty gige uh a, huai area-te ah guta-lata leh khamtheih hih a buaina bawl, khamtheih hih kawma khawlai pawt chih vang mahmah hi’n kigen hi.

All Lanva Y/ C Silver Jubilee
Lamka, Sept-8: Lanva a TCCC Hall ah zan in All Lanva Youth Club (ALYC) kiphuhkiat nung kum 25 chinna Silver Jubilee lopna om a, Health Ministr Phungzathang Tonsing khuallian apang in Silver Jubillee suang hong a, Pastor DS Pau in Pathian kiang ah thumna in lan hi. Huai ah Guest of Honour in Langkhanpau Guite, Chairman ADC/CCpur leh Functional President in S.Sumlianthang, MDC pang hi. Khuallian in a genna ah ALYC in kum tamtak kituaktak a vai a sainate uh phathuai sakthu gen hi. ALYC thupi Unity chih ahih bangin silver jubilee a lop tawh kiton in malam a nawt uh deihthu gen a,nu-le-pa zahtak kawm a kalsuan din hasuan hi.

Kha 1 sungin gari 113 kibehlap
Lamka, Sept-8: Dist Transport Office/CCpur ah August 2013 sungin gari tuamtuam 113 register thak in om a, huaite lak Truck 1, DI gari 1, Bolero 3; Diesel Auto Richshaw 6, Car 10, Bike/Activa 84, Maruti Van 6, Ambulance gari 1, Tractor 1 tel uhi.DTO staff te’n Aug khasung mahin revenue Rs.7,63,609/- mukhia uhi.

Seminar on Human Rights and Current political issue
Lamka, Sept-8: Kuki Women Human Rights Orgn (KWHRO) saina in zan in B.Vengnuom Community Hall ah ‘1-day seminar on Human Rights and Current Political Issue’ om hi. Seminar ah ‘Kuki gam humbit dingdan’ chih thupi a zangin, Dr. S.Chongloi in seminar paper luikhia a, Rev. Dr.Kim Vaiphei in ‘Kuki Custom leh numeite’ dinmun chih thupi zang in sinsak hi. ‘Kuki Political Movement for Homeland’ chih thupi pansan in George Guite, Inf. Secy. KSDC in sinsak a, ‘Human Rights is Women's Rights’ chih thupi pansan in Kim Gangte in sinsak hi.

Traffic rule bawhsia 15 mankhia
Lamka, Sept-8: Khawpi sunga ‘One way traffic rule’ kizang leh ‘Gari parking’ zatdan bawhsiat ziak banah gari ah dakkal 48 sanga sawtzaw A/F kigelhte tulai in Traffic Police, Police leh VDF kigawm in enzui uh a, Sept. 2-7, 2013 sung in mi 15 mankhia in TR-5 receipt cut in liausak uhi.

CDCTA pawlin DCG pekhia
Lamka, Sept-8: CCpur Dist. Council Teachers Assn(CDCTA) pawlin zan in CEO/ADC office ah (late) D.Lunkhohao Haokip leh (late) T.Songkhopao’ innkuante kiang Death cum Gratuities(DCG) ah Rs 2 lakh pia uh a, CEO/ADC in pekhia hi. CEO/CCpur in agenna ah CDCTA a member mualliamsa DCG sangte suunthu puang in, a damlaite’n tusang a hatzaw a panla din hasuan hi. CDCTA pawl kituaktaka a paitheih uh deihthu gen a, pension leh a si/mualliamte’ innkuante kiang ah a sum pe mahle uh a damlaite’n tuasang a na hahsep zaw din deihthu gen hi.

Bungpilon ah ‘Autum Meet’
Lamka, Sept-8: Thanlon Sub-divn sung Bungpilon khua ah Sept 25, 2013 in ‘Autum Meet’zang ding uh a, Bungpilon khua a Sial lianpen gou in ankuang luina tanpha bawlsawm uhi. Huai hun ah Health Minister Phungzathang Tonsing,bialtu MLA Vungzagin Valte leh bialtu MDC M. Ginzapau Guite in uap ding uh chih thutut kingah hi.

Dist Level Ntl Children’s Sc Congress
Lamka, Sept-8: Science Teachers Forum Manipur, Rashtriya Vigyan Evam Prodyogiki Samchar Parishad, Dept. of Science and Technology, Govt of Manipur, leh NCSTC Network, New Delhi saina in zan in Bungmual a L.Foundation school ah “District Level 21st National Childrens Science Congress 2013” om hi. Huai ah Energy; Explore, Harness and Conserve chih thupi zang in school 7 apan team 12 kidem uhi. Kidemna group 2 in kikhen a, kum 10-14 kikal te Lower age group leh kum 14-17 kikal te upper age group a kikhen in kidem uhi. Organiser lam apan kizadan huai result-te Delhi a finalised ding ziakin result puangkhe thei pahlou uh hi’n gen uhi.

Manager in President CDSA pang ding
Lamka, Sept-8: Jharkhand state khawpi Ranchi ah Sept 20, 2013 apan Dr BC Roy Football Trophy National Level Under 17 yrs Juniour Football Tounment omding hi. Huai ah Manipur apan team 1 kuanding uh a, All Manipur Football Assn. (AMFA) in Manipur team manager ding in Lalvullien Zote, President CDSA leh Coach dingin E.Ratan Singh guang uh hi’n thusuak kingah hi.

Shaktiman in a gawikhak si
Lamka, Sep-8: Lamjang khua a NREGS (Job card) tungtawna singnou suan dinga kuante laka tel Suangchin(70) s/o (late) Ngaihkhojam of Lamjang lamlian sak a lamkhou apan tolhkhe kha a Shaktiman nuaia lut kha driver in a theihpahlouh ziakin Gari in agil ah gawikha a, Aug 26 apan Dist. Hospital a etkol himahleh dam zoulou in tuni’n si hi.

SUUNNA
Siajam f/o Upa Tunjagin of Kamdou Veng taksa damlouh ziakin tuni’n si a, tuni mah in kivui hi.
Langkhanniang @Niangnu (40) w/o Chinkhanthang of Tuining zan nitak dak 8:35 velin District Hospital damlou in si a, tuni’n Zenhang Lamka hanmual ah kivui hi.
&&&&&&&&&&&&&&&&&&&&&&&&&&&
IMPHAL NEWS
Dakkal 72 sung bandh puang
Imphal, Sept-8: All Tribal Disabled Students’ Union(ATDSU) pawlin Govt ah a thilnget uh Aug 30, 2013 tana tangtunsak ding in theisak mahle uh bangmah sepkhiak omlou chi a lungkimlou in Sept 8, 2013 zankimlai akipan Sept 11, 2013 zankim tan dakkal 72 sung singtanggam district teng ah bandh puang uhi. ATDSU pawlin singtanggam mun khat ah Special school leh hostel kithuah ding khat ngen uh a, Disability certificate leng district level a laktheih ding chih phut mahle uh govt in order a suahte leng zat leh zuih hituanlou chi uhi.

Saparmeina ah dukan 9 mei in kangtum
Imphal, Sept-8: Sadar Hills bial a a Saparmeina bazaar ah zan nitak in dukan 9 vel mei in kangtum hi. Thusuak kingah dan in zan nitak nungin Saparmeina bazar ah akipatna theihlouh in dukan mei in kang a, mei phelhmit zawhpah ahihlouh ziakin dukan 9 vel kangtum a, Kangpokpi Fire Sub-Station te’n delh uh a, bangtanhiam nung in meikang phelhmit thei uhi. Huai meikang ah dukan van tuamtuam Rs. 50 lakh vel man ding kangtum hi’n kigen hi.

Editor leh reporter te’n news hawm
Imphal, Sept-8:Imphal a newspaper hawmkhia ‘All Manipur Newspapers Sale & Distributors’ Assn pawl helpawlte’n avau ziakun ni bangzahhiam news hawmlou uhi. Huaiziakin Imphal a kisuah Newspaper-te Editor leh senior reporters te’n hawmkhia uh a, ni 2 bang a hawmkhiakna uh hita in kigen hi.Editor te’n a gendan mobile phone tungtawn in helpawl kuate hiam in News hawmkhiate vauna abawl uh tunitan matkhiak louh thu a lungkimlouh thu gen uh a, police leh intelligence ten pan la taktaklou uh hidan in gen uhi.
Hiai tawh kisai in Editors leh reporters te tel in All Manipur Newspapers Sale & Distribution Association ten kihouna nei ua, himahleh thuchian bangmah theih hi nailou hi.Hibang kalah tyuni nitaka thusuak kizadan in All Manipur Newspapers Sale & Distributors Assn pawlin Sept 9, 2013 akipan in ngeina bangin Newspaper hawmkhe ding uh chihthu om hi.

SoO ah suaikai ding uh
Imphal, Sept-8: DIPR thusuak in a taklatdan in Manipur a helpawl Kuki Revolutionaty Front (KRF), Kuki National Liberation Front (KNLF) leh Kangleipak Communist Party )KCP) Nongdren Khomba group te’n Sept. 9, 2013 in 1st Bn Manipur Rifles Banquet Hall ah zinglam dak 10:00 in Centre leh state govt tawh kal ah Suspension of Operations (So0) suaikai ding uh hidan in kigen hi. Hiai thu a UKLF in press statement a suahna uah UKLF factions-te tawh kibang amau koih theih ahihlouhdan uh taklang ua, amau sungah makai (leadership) kituhna om ziakin faction om hidan in gen uhi. Tunaizek a cadres bangzahhiam galvan tawh kipekhiate a taktak hilou in fake cadres ahi uh chi uhi.

Tuni in Bal Vikas Rally nei uh
Imphal, Sept-8: The 6th State Level Sri Sathya Sai Bal Vikas Rally Day celebration kichi tuni in Palace compound a Lamyanba Shanglen mun ah “SSSBV the pathway to excellence” chih thupi a nei in zang uhi. Hiai hun a mipi paikhawmte Rally pai uhi.

Indo-Myanmar gamgi tawh kisai report submit ding uh
Imphal, Sept-8:Manipur govt in Indo-Myanmar gamgi thubuai enzui dia a bawlkhiak ‘Committee on Border Issues’ ten thil a muhkhiak govt ah report pe ding uh hidan in thusuak om hi. Dy. CM Gaikhangam in a gendan in huai report pen muh ahih chiang in Ministerial teamte gamgi enkhe ding a sawl hiding un gen hi. Ahihziakin Chief Minister O. Ibobi in Congress Legislature Party(CLP) meeting ah Ministry of External Affairs in gamgi tungtang enkhe ding uh a Ministerial teamte sawllou ding a theisak hidan in kigen hi.August 26, 2013 in Principal Secretary (Home)J. Suresh Babu makaih in Aug 26 in gamgi enkhia uh a, tuahun in Suresh Babu in border fencing kibawl pen border fencing hilou in security fence ahi chi hi.

KSO/Sadar Hills in support lou ding
Imphal, Sept-8 :All Tribal Disabled Students’ Union (ATDSU) pawlin Sept. 8, 2013 zankim apan Manipur pumpi dakkal 72 sung bandh a puan uh tawh kisai in KSO/Sadar Hills ten bandh support louding uh hi a puang kawm in Sadar Hills ah ATDSU bandh om theilou ding in gen uhi. KSO-SH President Thangminlen Kipgen in Sadar Hills ah ATDSU kichi organization om lam theih hilou a, student body te’n leng theikha lou uh ahihdan gen hi. Huaiziakin, ATDSU kichi kuate hiamin disabled te hamphatna muh ding etlah ziaka abawl uh hiding chi kawm in Imphal-Dimapur lamlian(No.NH-2) in a totkhak Sadar Hills in a huamkhak sung ah hibang thil om theilou ding chi hi.