HQ Veng nupite’n khamtheih doudal in lampi zui uh
Lamka, Sep-11: HQ Veng a HQ Veng Women' Welfare Association (HWWA) makaihna nuai ah zan in khamtheih(drugs leh zu) banah sualna tuamtuam doudalna in khawsung fangkual in lampi zui uhi. HQ Veng Community Hall ah hun saulou zang masa uh a, huaimun akipan SDO/CCpur office tawn in khawsung a Emmau Street tan zui uh a, vengsung sianthouna ding tawh kisai a panlakna sutzopna in HWWA panlakna daltute gawtna piak dingin kikou uhi.
HQ Veng Village Authority, HQ Veng Youth Organisation leh HQ Veng Cemetry Board kituaktaka pangkhawm in Aug 22, 2013 in HQ Veng Women’s Welfare Association phutkhia uh a, khawsung hihbuah thei ding thilchin hoihloute enkai in niteng in duty uhi. HWWA te’n zanhal in zu tamkhop leh bucket sunga zu bawlna ding kikoih tamtak mankhia in mipi muh in bua uh a, khawsung sianthouna in masawn zel hi’n kigen hi.
DIG (Range-III) in Lamka pha
Lamka, Sept-11: S.Manglemjao Singh, IPS, DIG (Range-III) in tuni sunnung in Lamka hongpha a, L.Mangkhogin, IPS, SP/CCpur office chamber ah law & order dinmun genkhawm uhi.Huaizawh in DIG( Range-III) in SP tawh kizui in Lamka Public Ground ah Zomi Football Club leh Kuki Sporting Club charity football kimawlna en uhi. S.Manglemjao Singh, IPS ahihleh Nov 15, 2006 apan January 31, 2009 sung CCpur Dist ah SP in hong om a,amah sports lam lunglut mahmah hi.
CJWO makaih in sit-in-protest
Lamka, Sept-11: Health Minister, Commerce Minister leh Parliamentary Secy 2 in zan sunnung a Dist Hospital a etkhiak lai un HQ Veng a 46-Assam Rifles-te’ camp a om KCP surrender group te’n Dist Hospital campus a buaina bawl in VDF leh Police-te vua in, ngaihtak in a kikou ziak un damloute patau sak uhi. Huai thu ah tuni’n CCpur Joint Women Organisation (CJWO) pawlin emergency meeting nei uh a, KCP surrender group te gamtatna mawhpaihna sangpen puang uh a, maban ah CCpur dist a lemna leh muanna hihse theiding thil a om nawnlouh deihna ziak in Sept 12, 2013 zinglam dak 10:30 apan Dist Hospital campus ah sit-in protest nei ding uhi. Huai hun ah CCpur dist sunga numei tamtheipen telding in chial uhi. Zan a KCP surrender group te’n Dist Hospital campus ah VDF personel 4, Police constable 1 a soisakna thu uah CCpur Police te’n FIR No.79 (9) 2013 CCP-PS U/S 447/186/333/353/325/ 34 IPC registered uhi.
Bank tawh kisai meeting om ding
Imphal, Sept-11: DC/CCpur makaihna in DC/CCpur office a BRGF Resource Centre ah Sept 13, 2013 zinglam dak 11,00 in District Consultative Committe leh District Level Review Committee pawlin June 2013 tan(Quarter ended June, 2013) tawh kisai in meeting nei ding uh a, huai ah agenda tuamtuam 14 genkhawm ding uhi.
Car loan & Exchange Mela kipan
Lamka, Sept-11: M/s Tedim Motors, Kwakeithel/ Imphal West saina in tuni apan Sept 12, 2013 tan daihding in Bijang a Dist Transport Office ah Car loan & Exchange Mela kipan hi. Huai ah Tata Indigo eCS; Nano LX; Tata Sumo Gold GX tel in gari bangzah hiam mipi leitheih ding in koihkhia uhi. Gari kizuakte loan leh cash payment hithei ding a, gari lui leng sum behlap in athak a khektheih hi’n kigen hi.
Numeite makaih in thumna
Lamka, Sept-11: New Lamka area ah khamtheih chituamtuam zuak, hihzongsang leh numei-pasal kala thangtatna banah sualna tuamtuamte numei pawlte’n vei mahmah uh a, huaiziakin Sept 12, 2013 sunnung dak 3:00 in New Lamka a EBC Hebron biakinn ah a 4vei nang din New Lamka Area Numeipawl makaih in Pathian kianga thumkhawmna om ding hi.
Managers Meeting om
Lamka, Sept-11: CDSA saina in Sept 14, 2013 apan (late) Thawnsonlian Memorial II Div. League kipan ding a, huai thu ah tuni zinglam in CDSA office ah Mangers’ meeting om hi. II Div. League ah pool 4 om ding a, pool 1 ah team 6 zel om ding hi. 1st in kipahman in Rs 10000 + Trophy + Certificate, 2nd in Rs. 5000 + Cerificate ngahding a, Golden booth; Safe hand leh Man of the match te’n kipahman Rs 1000 chiat ngah ding uhi. Opening match ah HQ Sporting Club leh Koite Youth Union kimawl ding uhi.
ZSF in mawhpaihthu puang
Lamka, Sept-11: Zomi Students Federation(ZSF) Gen HQ thusuak in 46-Assam Rifles laka on helpawl kipia KCP)Nongdren Khomba) pawlte gamtatdan khengval sakthu genkhawm in genkawm in mawhpaihna sangpen puankhum uhi. Thusuak in a genzelna ah phaijang helpawlte singtanggam a koih ahih ualeh muanna bitna dinmun haksataka tunding thak tanpha kisezak thei dinga patauhhuai ahihdan tanpha taklang uhi.
i/c Headmaster &DDO len ding
Lamka, Sept-11: Vimala Raina H/S a Science Graduate Teacher sem T.Donglianpau in Headmaster i/c leh DDO power lenkhawm ding in Directorate of Edn (S) in order suah a, tuni’n T.Donglianpau in Headmaster i/c lenlel Thanglenlal apan charge la hi.
Hilhchetna thusuah bawl
Lamka, Sept-11: Tiger Kuki, Town Commander, KNA/KNO in hilhchetna thusuah a bawlna ah Sept 2013 kha bulin Orgn min a phutluih a sum ngen 3-Holkhopao, Ngamboi leh Seikhohao matkhiak a om in court ah a tungthu uh genfel nungin anu leh pate khut a piakkhiak hi uh chih thusuak in gen hi.
SUUNNA
Vungsinga (88) f/o Lalmunmawia of Zamkunga Colony, Salem Veng Arakan, tuni zinglam dak 10.30 in asthma ziakin si a, Sep 11, 2013 in Lamka hanmual ah kivui ding hi.
Vungkhum f/o Paudam of Singngat tuni nitak in zunkhum(diabetes) ziakin si a, Sept 12, 2013 in Singngat hanmual ah kivui ding hi.
Lalthanlian Suantak (40) s/o Genchinthangof Chongkhojou zan in Imphal ah TB natna ziakin si a, Imphal apan Lamka puaktun ahihnung in Go Cin Khup veng a om a paneu inn pansan in kivui hi.
&&&&&&&&&&&&&&&&&&&
IMPHAL NEWS
Cabinet in DA/DR punsak ding thukim
Imphal, Sept-11: CM Cabinet Secretariat ah tuni nitaklam dak 3.00 n Cabinet meeting om a, huai ah Oct 1, 2013 akipan in govt employee-te’ Dearness Allowance(DA) leh pensioner-te Dearness Relief 72% piak ding in thukim uhi.Govt employee-te’n tulelin DA 65 mu uh a, pensioner te’n leng tulelin Dearness Relief(DR) 65 mu uhi. Tuni a Cabinet meeting in DA/DR 7% a punsak ding in thupuk uh a, huai hileh tulela DA/DR 65% pen 73% tungtou ding chih ahi hi.Tuni a Cabinet meeting in 14th Finance Commission leng sum tamtheilam nget ding lemsa uhi. RBI Governor-lui YV Reddy in 14th Finance Commission ah Chairperson hihna len a,amah leh member te’n Oct 8 & 9, 2013 in Imphal hongpha ding uh chihthu om hi.
Air-Bag ziakin minute 40 sung buai
Imphal, Sept-11: Kwakeithel Thounaojam Leikai mun ah tuni zinglam dak 9:45 velin air-bag khat a neitu theihlouh muhkhiak in om hi. Huai tawh kisai in bomb hiding a muanmawh hi a, police te’n minute 40 sung vel ding huaimun ah traffic khawlsak uhi. Police bomb expert te’n a etchet nungun a sungah puan leh toilet tissue om a, bomb hilou ahihdan theihkhiak phet in lampi ngeina banga hon in om nawn hi.
Free Eye Care Camp om ding
Imphal, Sept-11: Lions Club of Imphal leh Lions Imphal Mayai Lambi Branch Club kithuahkhawma saina in Sept 15, 2013(Sunday) in Mayang Imphal a Prabhabati College ah zinglam dak 9.00 akipan sunnung dak 1.00 kikal Free Eye Care Camp leh Cataract Detection Camp kithuah om ding hi.Huai as Lions Eye Hospital in thil bangkim ah kithuahpih ding chihthu om hi.
Bharat Nirman Campaign
Imphal, Sep-11: Central govt’ sponsored flagship programme laka Bharat Nirman campaign (BNC) ni 3 sung daih dingin Tamenglong a Baptist Church ah tuni’n kipan a, BNC 15th edition hun ahihleh PIB, Govt of India, Imphal leh Directorate of Field Publicity(DFP),Directorate of Advertising and Visual Publicity, Song and Drama Division, All Indian Radio, Doordarshan leh District Administration, Tamenglong pangkhawm a asai uh hi’n kigen hi. Huai hunah MLA Janghemlung Panmei of Tamenglong A/C in Chief guest hihna tawh uap in function hongkhia a, District Council Member, Charles Liangdiyang in functional president hihna tawh uap a, Assistant District Magistrate Joseph Pauline in guest of honour a pang in uap hi.
Civil orgn in mass movement pat sawm
Imphal, Sept-11: Manipur a civil organization tuamtuam in Ino-Myanmar gamgi tawh kisai akinlam a sukfel ahih kei leh mass movement pan ding uh hi’n taklang uhi.UCM te makaihna in tuni in press conference om a, tua hun in AMUCO apan makaite leng tel ua, UCM President Y. Nabachandra in Indo-Myanmar gamgi tawh kisai akinlam asuk fel ahih kei aleh Manipur a orgn tuamtuam kigawmten mass movement pan ding uh hidan in gen hi. Amau ahihleh border fencing tawh kisai state govt in ‘white paper’ a puak hiak ding uh ahi, chi uh a, huai tawh kisai in New Delhi in thu selguk nei hiding uh ahi, chi uhi.