SDO makaih in Joint meeting om
Lamka, Sept-17: LT Puii, MCS, SDO/CCpur makaih in tuni zinglam dak 11:00 apan in a IB Road a KKL complex ah Samulamlan Block sunga Hausa leh Village Authority member-te'n joint meeting nei uhi. Huai ah National Food Security card tawh kisai genkhawm uh a, National Food Security card sepsuah ding dan, Antyodaya Anna Yojana (AAY) card leh Priority Household card under Food Security Ordinance 2013 genkhawm uhi.Food Security card ngahding Hausa te'n mahni khawsung ah kaikhawm a, Domicile leh Income Certificate leng submit sak dingin SDO/CCpur in Hausate theisak hi.
Malaria damdoi tamlou hongtung; Malaria positive mi 2 mukhia
Lamka, Sept-17: District Malaria deptt te'n Sept. 1-15, 2013 sungin damlou mi 660 sisan test uh a, huaite lak apan positive 2 a muhkhiake uh lakah PF 1 tel hi'n kigen hi. Huai lou in March 2012 kha akipan CCpur district ading malaria damdoi hongtun ngeilouh ziakin malaria vei khawsik a damloute adi’n buaihuai mahmah a, hileleng khalui beikuan in tamlou hongtung a, a poimawh tentente ading in tamlou omthei ding hi'n thusuak kingah hi.
Numeite makaihna in thumna om
Lamka, Sept-17: New Lamka area ah khamtheih chituamtuam zuak, hihzongsang leh numei-pasal kala thangtatna banah sualna tuamtuam omte numei pawlte’n vei mahmah uh a, huai ziakin tuni sunnung dak 3:00 in New Lamka a EBC Hebron biakinn ah a 5veina din New Lamka Area Numei pawlte makaih in Pathian kianga thumkhawmna om hi. Huai hun ah Mrs Chingngaihlun in thugen in thumna ah makaih a, numei tamtak tel uhi. Huailou in New Lamka Area Numei pawlte makaihna mah in Sept 20, 2013 zingsang dak 7:00 apan anngawl thumkhawmna om ding hi.
SBI/CCpur ah ATM 4 koih hiding
Lamka, Sep-17: State Bank of India/ CCpur Branch a Chief Manager S. Kaikhanthang in customer-te khualna ziaka pan alak lawhching in SBI/CCpur Branch a ground floor ah ATM 2 omsa banah tu’n 2 mah koihbeh hiding chihthu om a,ATM 2 koihna mun ding nasepna pailel hi. Tulelin SBI/CCpur Branch ah Green Channel Counter leng 6 omlel a, huaite ah ATM card zangin Rs. 40,000/- tan deposit leh withdrawal bawl theih a, paper bangmah zat ngai selou in ATM card zang in hithei hi.
Dist Level Workshop on Drugs Abuse
Lamka, Sept-17: Diocesan Social Service Society (DSSS), Community Based Drugs and AIDS Program saina in Sept. 20, 2013 zinglam dak 10:00 in IB Road a Synod Hall ah ‘Dist. Level Worskhop on Drugs Abuse and HIV/AIDS’ om ding hi. Huai ah Dr F.Thienkhogin, DACO; A.Umarani Devi, DSWO/CCpur; Sasang, Project Co-ordinator, HOPE leh T.Lalboi, Dist. Co-ordinator, DSSS te'n sinsak ding uhi.
3rd World Zomi Convention tawh kisai sticker hongkhia
Lamka, Sept-17: Lamka ah Oct 25-27,2013 sung ‘3rd World Zomi Convention’ om ding tawh kisai fund drive-na dingin Mobilization Team makaih in tuni nitaklam dak 3:30 in Nehru Marg a Zomi Council Office ah sticker honna om hi. Huai ah Genneikhup Vaiphei, EM/ADC khuallian apang in hongkhia a, Rev. Dr. B. Luaichinthang, Chairmam ZOLLS in thumna in lan hi. Genneikhup in a genna ah 3rd World Zomi Convention om hun ah sum leh pai tamtak poimawh a, tuni a sticker kihong mipi’n leichiat dingin ngen a, aman Rs 5000 in sticker khat lei hi. Langkhanpau Guite in leng Rs 2000 in khat lei hi. Huai ah Zomi sung a Frontal Organisation tuamtuam apan makaite leh MDC hunkhop tel uhi. Sept 18, 2013 apan sticker zuak kipan ding a, kuapeuh in leichiat dingin Mobilization Team te’n ngen uhi.
Kaprang ah Farmers’ Club Orientation
Lamka, Sept-17: Kaprang Women Welfare Assn. leh Agri deptt/CCpur pangkhawm in tuni in Kaprang Women Farmes Club launching & Best Level Orientation program om a, S.Khaikhopau Ngaihte, BO HQ DC’s office khuallian apang in hong hi.Aman a genna ah Farmers Club omlou inleng numeite’n haichi tuamtuam chiing uh a, Farmers Club organised na nuai a haichi tuamtuam chiindan ding kisinsakna om kipahpih thu gen hi. Kaprang Women Farmers’ Club te’n technology assistance leh financial assistance a poimawh hun uah bank-te ban ah govt lam in panpih dinga mansa gige hi’n gen a,Women Farmers’ Club te’n mahni nekding kia hilou a, sum leh pai muhsuah theihna ding haichi tuamtuam chiing ding in hasuan hi.Orientation ah K.S Lal, NABARD leh Paulianvung, EO/Agri deptt, CCpur te’n sinsak uhi.
Delhi ah gari accident ziakin si
Lamka, Sep-17: Lalhossan Varte s/o H.Zakap of B.Street, Rengkai in Delhi apan a innkuante kiang pha dinga Lamka hong zuanlai Sep 15, 2013 in Dimapur apan Tata-Winger a tuang Kohima kiang Zakhama munah a tuanna uh Tata-winger leh Truck kiphukha in amun ah si hi’n kigen hi. Kohima HYA te’n siluang buaipih uh a, Imphal HYA te’n gari 2 zang in Lamka ah siluang hong pawtung uh a, zan in Rengkai hanmual ah kivui hi.
SUUNNA
Lalpiengthar Joute s/o Upa Phirthang(Lungthulien V/A Chairman) of Lungthulien, Tipaimukh sub-division tuni zinglam dak 10.00 velin cancer ziakin si a, tuni mah in Lungthulien ah kivui hi.
&&&&&&&&&&&&&&&&&&&&&&&&&&&&&&&&&
IMPHAL NEWS
Nagamapal ah tuni’n antang kihawm
New Delhi, Sep-17: Consumer Affairs, Food and Public Distribution Deptt, Govt. of Manipur saina in tuni’n Nagamapal mobile sale in antang subsidised rate in kizuak a, mi khat in kg. 1 ah Rs. 10 rate in antang kg. 5 tan leithei uhi. Nagamapal banah Imphal khawpi sung a Kwakeithel, Imphal Municipal Council(IMC) office gate leh New Checkon ah leng mobile sale in antang tamkhop deptt in zuakkhia uhi.
M/R khat in naupang khoihsawm
Imphal, Sep-17: 5-Manipur Rifles jawan khat in numei naupang kum 7 vel ding mi khat school bus sungah khoihsawm a, huai thu Police ah report om ziakin zan in Police in M/R jawan pen mankhia uhi. Thusuakin a gendanin Sept 12, 2013 in Tamenglong district sunga thiltung hi’n kigen a, huai M/R personnel pen school bus driver hikawm hi’n kigen hi. M/R personnel leng Tamenglong district headquarter a posting a om hi’n kigen hi.
Imphal News-te suaklou ding
Imphal, Sept-17: Tuni (Sept 17, 2013) in Manipur ah ‘Vishwakarma Puja’ a kizat ziakin Imphal a Newspaper office tengin Puja zang in khawl vek uh a, huaiziakin Sept 18, 2013 in Imphal apan kisuahkhia Newspaper-te a suak omlou ding chih thutut kingah hi.
Nagamapal a thiltung CBI khut ah
Imphal, Sep-17: Manipur Deputy Chief Minister Gaikhangam in Nagamapal a bomb puakzak ziaka non-Manipuri mi 9 sihna police te’n suizuina a neihzel lai un CBI khut a piakkhiak hiding chi’n gen hi.Sept 13, 2012 nitakin Nagamapal ah bomb puak ziakin Assam apan nasem a hongkuan mi 9 si in midang 10 liam uh a, huai thu ah All India United Democratic Front (AIUDF) pawlin Centre ah CBI in a suizui ding a pekhe ding in ngen uh a, huchih lai in NIA teamte’n leng huai thiltung suizui lel lai uhi.
Chandel ah District Level Committee
Imphal Sept 17: Hill Peoples’ Forum (HPF), Manipur pawlin tuni’n Chandel district sunga Aimol village ah member 13 om ‘HPF district level working committee’ dinkhia uhi. HPF Chairman Dr. R. Sanga in keynote address a genna ah SoO suaikai United People Front (UPF) in HPF(M) phutkhia hi’n gen a, Article 244 (A) nuaia Autonomous Hill State within a state ngetna tawh kisai, public lakah grassroot level a awareness omsak dinga phuhkhiak hi’n gen hi. ZC Chairman L.B. Sona in resource person hihna tawh a genna ah political goal ngah theihna dingin kipumkhatna ngai a, tribe based ahihlouh man in Manipur tribal-te adinga plateform omthei sun HPF hi’n gen hi. Resource person dang K. Guite, Advisor, ZRO in a genna ah Manipur singtangmite khawsuahna dinga political awareness kibawl hi a, Manipur ah recognised tribe 34 omte i pankhawm keileh mangthang ding ihi, chi hi. (UNA)
Mizoram tribe te’n UT ngen
Aizawl, Sep-17: Maraland Democratic Front (MDF) political outfit pawlin Mizoram state a Sixth Schedule nuai a kivaipuak Mara Autonomous District Council pen Union Territory a koih ding in Centre ah ngen uhi. Mara Autonomous District Council ahihleh Mizoram simlam a India-Myanmar-Bangladesh gamgi kawmtuah square km 1,500 vel huamsung luah a om hi’n kigen hi.
Kohima in mountain summit zintun ding
Kohima, Sep-17: Nagaland state in Kohima ah Sept 25-27, 2013 sungteng NBCC Convention Hall ah 3rd Sustainable Mountain Development Summit (SMDS-III) kichi zintun ding hi. Huai huai summit ahihleh Indian Mountain Initiative (IMI) saina nuaiah Himalayan Region a mountain state-te’ pankhawm ding deihna ziaka kibawl hi’n kigen hi. Summit masate Nainital leh Gangtok ah zat in om ngeita hi.