i-20 Car leh Yamaha kiphutuah: mi 2 si midang 2 liam
Lamka, Sept-13: Lamka Police Station apan km 3 ½ vel a gamla Koite hanmual gei ah tuni zinglam dak 10:40 velin Imphal apan Lamka zuan i-20 car (No.AS 01AU-6574) leh Yamaha bike (No.MN-02-2317 kiphutuah kha a, Yahama bike atuang 1 amun ah si a, Bike a tuang mah khat pen leng gim mahmah kawm in Dist Hospital puaktung nungin damzoulou in si hi. I-20 car atuang mi 2 te leng Dist Hospital ah admit in om uhi.

Thu kingahdan in Saikul khua a misi galding in Thongkhankhup (54) h/o Niangmanching of New Lamka(G) leh Upa D.Chinkhanthang (62) h/o Thongniang of Dorcas Veng, New Lamka tuni zinglam in Bike a kipaw kawma Saikul zuanlai Koite hanmual a mualbou khenzek ah Lamka zuan i-20 car tawh kiphutuah kha uh a,bike atuang 2 te lengkhia in bike driver Thongkhankhup etkol manlouh in amun ah si a, anung atuang Upa D.Chinkhanthang pen lampi gei a singkung ah kibatkha in huai apan phatuamngaite’n lakhia uh a, i-car 20 atuang Saratchandra Singh(25) s/o Guneshore Singh of Yumnam Huidrom Konglak(Imphal West) leh Miss Suyalata Devi(19) d/o Yamanikanta Singh of Langthabal Phuramakhong, (Imphal West) te Diesel Auto zang in Dist Hospital puaktung hi uhi.Upa D.Chinkhanthang damzoulou in Dist Hospital puaktung nungin si hi. Accident na mun a si Thongkhankhup luang ahihleh KKL’s Ambulance zangin Dist Hospital puaktung in om hi. I-20 Car driver Sarachandra leng a nakguh(ribs) taklam bangzah hiam khaang(crack) hi’n kigen hi.

Mit a mukhate gendan in i-20 Car hat taka tai hi’n kigen a, bike tawh akiphutkhak phet un car in khoubang phu in kilep a, kise nak mahmah in Police te’n kemlel uhi.

Misi luang 2te tuni mah in Postmortem kibawl a, Police-te’ makaih in Meitei Society/CCpur; YPA Gen HQ, ZSF, misi 2 inndongta te’ ban ah i-car gari neitute Police station ah kihou uh a, nitak 6:00 in car neite’n inndongta level a kihouna neihding a pomtheih ziakun muntuam ah kihou uhi.

YPA Hall, New Lamka ah nitak dak 6:00 apan kihouna om a, misi 2te puandum atuam in gan gawh sikin Rs 30,000 tuak pia uhi. Luangman dingin Rs 2 lakh tuak leh Yahama Bike ading in Rs 1 lakh in kihoulem thei uh a, tunitak in puandum leh gan gawh sikin Rs 60,000 pefel uhi. Misi 2te innkuante Rs 2 lakh tuak kigawm Rs. 4 lakh piak ding leh gari ading Rs 1 lakh kigawm in Rs 5 lakh ahihleh Sept 16, 2013 zinglam dak 10:30 tan in YPA Hall, New Lamka a piakfel ding in kilemthei uh chihthu kiza hi. Misi 2te ahihleh Sept 14, 2013 in kivui ding uhi.

Police thusuak kizadan in Surachandra Singh in tuni zinglam in College kai ding a kuanlai Suyalata Devi a college kaina mun a drop ding chi’n taipih a, hileleng azi dia guksawm in Lamka lam ah hong taipih a, numei lamte’n Police ah kidnap case bulhkhum in CCpur Police te’n Imphal apan gari hongtaite check uh a, accident ahihlam theikhia uh hi’n kigen hi. Koite a accident thu ah Police te’n FIR No.80(9) 2013 CCP-PS U/S 279/427/338/304-A IPC registered uhi.

Thingkangphai ah khamtheih doudal kipan
Lamka, Sep-13: Thingkangphai a saptuam pawl tuamtuam leh Village Authority(VA) banah philanthropic orgn omte pangkhawm in Thingkangphai Women Welfare Assn(TWWA) kichi tuni’n phutkhia uhi. Tuni’n ECA biakinn ah mipite’n thumkhawmna leng nei uhi.

Khamtheih-guihtheih leh sualna chituamtuam doudal dinga phuhkhiak, TWWA pawlin tuni mah in khawsung fangkual uh a, ngaihtak a kikou in sualna tuamtuam bawlte vau kawm in lampi zui uhi. Khawsung a zuzuak, khawdang apan Thingkangphai a puaklut, leh khamtheih hih phallou in kham bikbek uh a, huailou in numei-pasal omdan kilawmlou a gamtat phallou uh a, mipi patausak thei dinga buaina bawl leh siatna tuamtuam tunthei ding thilte kham bikbek uhi. Tuni a lampi zuih nungin nasep pan uh a, tuabanga thupiak zuiloute’n khawsung hoihna ding deihlou a ngaih hiding chi uh a, akituahpih bang gawtna piak hiding chi uhi.

Tuabang kalah tulai in Lamka khawpi sunga siatna tungte a thumai a hihveng zawhlouh hita, chih ngaihdan nei in veng tuamtuam ah duty sunzom uh a, Bijang, Tuibuong, Molnom, D. Phailien, Hmar Veng, HQ Veng telin mun tuamtuam ah khamtheih doudal a duty kibehlap zel a, duty omna munte ah siatna thupilua muh hilou chihthu om hi. Zan nitak dak 10.00 in D. Phailien ah duty numei pawl te’n News saite kianga agenna uah khamtheih hih leh zuak a nasat ziakin siatna huaisetak om a, huai siatnate’n innsung a pate leh tate tanpha hawi tuanlou in hihsia a, tuabang siatnate hihbei theihna dinga duty ahihdan uh gen uhi.

KCP (Nongdren Group) mi 6 kimankhia: bail in pawtkhia uh
Lamka, Sept-13: HQ Veng a 46-Assam Rifles-te’ camp a om KCP(Nongdren Khomba) surrender group te’n Dist Hospital campus ah Sept 10, 2013 sunnung a buaina bawl in VDF personnel 4 leh Police constable 1 vua in, ngaihtakin a kikou ziak un damloute tamtak patau leh lau in koih uhi. Huai thu ah tuni nitaklam dak 5:30 in SP/CCpur in Press/Media te kimuhpih a, tuni nitaklam dak 3:30 velin SDPO/Thanlon makaih in Police te’n 46-Assam Rifles camp apan KCP (Nongdren Khomba goup) mi 6 mankhia uh a, CJM/CCpur ah pawkhia(produced) uh a, CJM in bail in pawt sak hi’n kigen hi. SP in a gendan KCP member 6 bail in pawtkhe mahle uh a poimawh hunhun in CCpur PS a officer i/c leh Investigation Officer ma ah kilang thei gige dung uh chi’n gen hi.

KCP (Nongdren Khomba) member 6 te- Commander in Chief (C-in-C) Ningthoujam Romen @ Nongdren Khomba (32) s/o N.Ibotomba Singh of Kumbichingel Leikai; Wahengbamthoi @ John Singh (27) s/o (late) Thoiba Singh of Wabangai Tera bazar; L.Gulsan Singh @ Bucky (28) s/o (late) Rajen Singh of Kongbam Laishram Leikai; Salam Santi Singh @ Sound (36) s/o S.Salam Mela Singh of Khodak awang Leikai; Heishram Soba Singh @ Chaoba Singh (32) s/o H.Ibocha Singh of Thangaheishram Leikai leh Saikhomkhogen Singh @ Kyamba (25) s/o S.Kerani Singh of Takhelmaka Leikai hi uhi. KCP (Nongdren Khomba) group-te tungah Police te’n FIR No. FIR No.79(9)2013 CCP-PS U/S 186/353/325/34 IPC registered uhi.

Ningthoujam Romen Singh @ Nongdren Khomba , C-in-C, KCP (MC) in gelthawh in thupha chawina(apology letter) bawl a, witness in Taibanganba , Gen Secy KCP Lamphel Group pang in SP/CCpur; DIG 27-Sector A/R , General Public leh CO 46-AR copy pia uhi. Huai lehkha ah Sept 10, 2013 a CCpur Dist Hopital a thiltung poisa mahmah a,maban ah Sept 10, 2013 abang thil tun nawnlouhna ding in theihtawp suah ding a kichiam in mipi, SP, CO 46 AR leh DIG 27-Sector AR kiang ah ngaihdam ngen hi.

Mun tuamtuam Kuki Black Day kizang
Lamka, Sep-13: Tamenglong district a Joupi khua ah Sept 13,1993 in Naga helpawlin Kuki mi numei leh naupang tanpha hoilou in mi 106 mulkimhuai tak a thahte uh phawk tawntungna in tuni’n Black Day(Sahnit Ni) zatna om hi.Black Day zat nawnlouh ding a puang pawl om mahleh mun tuamtuam a mipite’n lemna leh muanna omna dingin biakinn ah thumna hun zang uh a, hiamgamna mulkimhuasi a om nawnlouhna ding in thumna nei uhi.

Kanggui(Kangpokpi) ah State level Black Day kizang a, CCpur district te’n Gothol ah zang uh a, khaw chih in leng amau lemtan bang zel n zang uhi. Tuni zingsang baihtak akipan Kuki community omna inn tamzawte’ innkong ah puanvom(black) khaikhia in Black Day hun a thiltung suunna zahna pia uhi.

Gospel Boot Camp om ding
Lamka, Sep-13: Saptuam makaite adia tangthupha puanzakna ding a sinsakna, ‘Gospel Boot Camp’ kichi Rayburn Presbyterian Church, New Lamka ah Sep 23,2013 zinglam dak 9.30 akipan nitaklam dak 3.00 kikalin om ding hi. Huai ah Pastor Ron Tobias leh Elder John Slavicte in tangthupha gen dingdan leh saptuamte kianga puanzakdan ding sinsak ding uh a, Indian Evangelical Mission, Here I am Ministries(HIM), Maharastra Village Ministries(MVM) leh Meitei Mission Field te’ banah Pastor leh azite uh, local session member teng, board of deacons member-te, missions committee member-te, PWF committee member-te tel ding uhi.

BSF te’n thaukap hun ding behlap
Lamka, Sept -13: STC BSF CCpur a training te’n Sept 0l, 2013 akipan zingsang dak 5.00 apan nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing ) uh Sept 15, 2013 tan ding himahleh Sept 16,2013 akipan Sept 30, 2013 tan hiding in ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in thupuan bawl hi.

Ngailut Camp 2013 kipan
Lamka, Sept-13: B. Vengnuom Community Hall ah zan sunnung in Dr T.Lunkim in ‘Christian tahsa bukimlou ho ngailut camp 2013’ kichi hongkhia hi. Camp om sungteng Demjang Haokip leh Evan.James Chongloite’n Pathian thu gen uh a, Sept 15, 2013 in zou ding uhi. Huai camp ahihleh Demjang Haokip of Molnom in asai hi’n kigen a, amah kum bangzah hiam paisa in bomb thang kikam a sikkhak ziakin a khe(leg) langnih tankhiat in om hi. Huai Camp ah mi 34 tel uh a, camp a omteng as innkuante uh mi 1 zelin ompih uhi.

Uniform thak latna om ding
Lamka, Sept-13: HQ Veng Sporting Club (HSC) te’n uniform thak a neih uh Sept 14, 2013 zinglam dak 10:30 in HQ Veng Communty Hall ah Pathian kianga latna leh player te thumsakna om ding hi. Huai ah Kamsuanlun, EM/ADC in khuallian apang in Uniform (Jersey) hong khe ding a, Pastor V. Jamkhanthang in Pathian kiang a latna nei kawm in player-te thumsak ding hi.

Kiginni tengin Fasting Prayer om
Lamka, Sept-13: Gospel for India(GFI) saina a biakna mun CCpur Govt College kong a om Gerezim building innsawng tunung(top floor) ah Kiginni tengin zingsang dak 7.00 akipasn sun dak 12.00 tan an-ngawl thumna(mass fasting prayer) om gige a, Pathianni teng sunning dak 1.00 in Hindi pau zanga biakna kikhopna leng om gige hi.

Paybill & Muster Roll form om
Govt employee-te adia lawh lakna ding a bill bawlna ‘Paybill form’ leh Muster Roll adia bill bawlna form deihte adingin Manipur Exress office kai hunsung zinglam dak 10.00 akipan nitaklam dak 6.00 kikal in leitheih gige ding hi.

SUUNNA
Upa C. Dengkhuma(80) s/o (late) Kawlthawm of Thingkangphai zunkhum ziakin tuni zinglam dak 8.30 in si a, tuni in Thingkangphai hanmual ah kivui hi.

&&&&&&&&&&&&&&&&&&&&&&&&&

IMPHAL NEWS
Bomb puak ah mi 9 si in 10 liam
Imphal, Sept-13: Tuni nitak dak 7:20 velin Khoyathong leh Nagamapal kikal lamlian kiang ah bomb hattak puakzak in Non-Manipur Vaite mi 8 vel in si uh a, midang 7 liam uh chih thusuak in gen uhi. Aliamte lak ah tualsungmi(local) khat telkha a, a liam leh a site lak a mi atamzaw Assam lam mi hidan un kigen hi. Bomb puakzak sakte Police in thuchian suikhe naikei mahle uh phaijang helpawlte hiding in gintak thu gen uhi.Misi 9te laka tel mi 3 ahihleh RIMS tut ahihnung ua si uh a, aliam khenkhat agim mahmah ziakun misi kibehlap lai ding a gintak ahi hi.

Thusuak in a gendan in Khola mun ah non-Manipuri mi 22 vel omkhawm uh a, bomb puah hun in Khola mun a omlou mi 2 a site lakah telkha ua, hiai mun a om mi 3 te suakta uhi. Aliamte laka mi 3 gim mahmah uh a, a dam zawh uh gintak-huailou a kigen hi.

Sept 15 in ASER survey kipan ding
Imphal, Sept-13: ‘Annual Status of Educational Report (ASER)’ kichi village tuamtuam a elementary school akai student-te’ education level suina(survey) Sept 15, 2013 in Manipur ah district teng ah kipan ding a, kha 2 sunga zawh hiding chihthu om hi. Huai ASER report ahihleh district leh state level a bawl hiding chihthu om hi. Planning Commission of India in Education sector a planning leh funding a bawl dingdan hiai report ah kinga lian mahmah ding a, huai dungzui in survey bawl hun ah inn teng leng huamvek ding hi. ASER Centre Imphal hiding a, huai dinga kisakkholhna leng zawhsiang phial hita a, survey bawl ding volunteer-te’n leng training zou phialta uh hi’n kigen hi.

Maoist te’n General Strike puang
Imphal Sept-14: Maoist Communist Party, Manipur pawl in a thupukna uh khengtuanlou in RIMS Hospital foundation day tawh kituak in Sept 14, 2013 zingsang dak 5.00 akipan nitaklam dak 5.00 tan General strike puang uhi. Maoist Communist Party, Manipur thusuak in a gendan in essential service-te, schools, media, electricity, water supply, religious ceremonies leh hospitals/ health centers khahkol hi a, hileleng RIMS Hospital adin khahkol hilou chih taklang hi. Maoist pawlin Aug 2012 akipan RIMS Hospital baswlhoih sawm a enzui uh hi’n taklang uh a, RIMS hospital a sem doctors khenkhat in sum etlahna ziakin private hospitals aleng sem uh hi’n taklang uhi. Maoist pawlte’n RIMS Hospital kivaipuaksan lungkimlou uh hi’n kigen hi.

Higher studies din kuankhe ding
Imphal, Sept-13: Arun Kumar Sinha @ AK Sinha,IAS tulela Secretary, Manipur Public Service Commission(MPSC) in gamdang(foreign) ah zilna sangzaw sin ding in kuankhe ding a,huaiziakin Norbert Disinang, IAS, Commissioner(GAD) in Secretary,MPSC len ding in Manipur govt in order suah hi.

PLA te’ attack ah A/R te suakta
Imphal,Sept-13: PLA hidia gintakte’n tuni’n Imphal-Ukhrul road a patrolling pai 40-A/R te attack uh a, huai ah Assam Rifles-te suakta uh hi’n kigen hi. Thusuak a gendan in PLA ten Khurai a Popular High School kianga waiting shed mun ah bomb hihpuak uh a, himahleh A/R te asi leh liam nasalua omlou uhi. Bomb hal neng akim leh kiangah kithehdalh a, police te’n bomb pen hat mahmah hi’n gen uhi.

Bomb puak ah A/R khat leh civil khat liam a, himahleh a liamna uh nasalou hidan in kigen hi. Aliamte laka khat auto driver Ningthoukhongjam Robin (35) of Keibi Makha Leikai hi’n kigen hi. PLA te’n amau thilhih hidan in puang uh a, PLA a Special Warfare Group te gamtatna hidan in Chief Dept. of Publicity in press statement suah hi.

Entrance Test hun ding bikhiah
Imphal, Sept-13: Medical Directorate, Govt of Manipur apan thusuak kingah dungzui in Female Health Worker(FHW) course sinding lakna ding a Entrance exam om ding ahun kisuan bikhiah thak hi a,Sept 29, 2013(Sunday) zinglam dak 10.00 akipan sun dak 12.00 tan Ramlal Paul Hr Secondary School,Imphal West ah om ding a, huai tawh kisai Medical Directorate website www.manipurhealthdirectorate,in ah leng ah leng muhtheih ding chih ahi hi.