* Traffic Police te'n theihtawp suah in panla.
* Kuki State Demand Committee in hunchiam omlou in Bandh leh Blockade patsawm.
* District Social Welfare Office in Universal Childrens Day zang ding.
* Teachers Eligibility Test Exam neih hunding November 27, 2012 in kisuan.
* North East Police Academy, Nepal ah Churachandpur mi 10 kuan ding

Churachandpur Distt. Traffic Police Control Department in theihtawp suah in khopi sunga two wheeler hek tu helmet khulou leh Parking na mun dik lou te tung a action la in khopi sunga, a kheng val a tai hat te man in Polic Station ah, challan cut in sum liau sak uhi.

Kuki State Demand Committee in tunni sung nung dak 1:00 am in Manipur Press Club, Imphel ah Media te ki pih uhi, Press Conference nei uhi. Hiai hun ah Mr. Benjamin Mate, General Secretary, Kuki State Demand Committee in a gen dan in Kuki Day kum 1961 a kipan Kuki National Assembly min in Kuki State ngen mahleh uh tunni tan ngaihsak hi lou a Kuki te nelhsiah leh pampaih in om chi a tunni tan nget na tampi vei piak ahih nung a Central Government in a limsak louh ziak a lungkim lou in thil nget te sukbu ching ding na in Novernment ni 15, 2012 nitak lam dak 5:00 p.m a ki pan Kuki te om na teng ah hunchiam om lou in Band om ding a Band in Government leh Private Institute teng ban ah sumbuk teng huam kha vek ding hi. Huai ban Imphal to Ukhul Road, Imphal to Tamenglong, Imphal to Moreh Road, Imphal to Senapati Road, leh Imphal to CCPur Road ah Blockage om ding a thu puan bawl a, hiai  Bandh in Emergency Service, Medical, Fire leh Water Supply huap kha lou ding hi. Huai ban ah Kuki State Demand Committee leh Kuki Militant Organization tuam tuam in Kuki State deih na in Prime Minister, Dr. Manmohan Singh, Sushilkumar Shinde, Home Minister, V.Kishore Chandra Deo. Minister of Tribal Affairs leh G. Gaikhangam, Dy. Chief Minister & Home Minister, GOM kiang ah Memorandum pia uhi.

Distt. Social Wealfare Office CCPur sai na in Nov., 14, 2012 sunnung dak 1:00 p.m. in Universal Children Day zang ding uhi. Huai ban ah Grace Zamnu, MDC, Funtional President in Rachel N. Guite SDO, Singat,Guest of Honour in A.Kumari Devi, Distt. Social Wealfare Officer pang di hi.

Board of Secondary Education Manipur (BSEM) in Nov., 18, 2012, a TET Examinational neih ding ki chi pen Nov., 27, 2012 a ding in suan uhi. Hiai exam na ding tawh ki sai a kal lui a Admit card hih fel ten ZEO office ah ngaih ven theih ding a, a hihfel nai lou ten BSEM office Imphal ah mahni mimal in ngaih ven theih ding hi.

North East Police Academy, Nepal ah Nov., 15th  to 17th, 2012 sung Police Traffice Management Trainig om ding a, huai ah Manipur a pan mi 57 lak ah  Churachandpur a pan mi 5 tel ding uhi. Second Phase Nov.19 to 21, 2012 in Manipur apan mi 59 tel ding ua huai a pan Churachandpur mi 5 tel non ding uhi.

* Goukhomang President ZYA General Headquater in SYO Hall huangsung a Toilet Complex bawlna munding ah Leitou kham.
* Ngaihte Innkuan in Thumkhawmna nei.
* Tedim Chin Cultural Club saina in Khuado Pawi kizang.
* Siamsinpawlpi Joint Headquater Lamka in 2nd Siamsin Annual Conference nei.
* DC Churachandpur in Monthly Magazine thak The Lamka Chronicle kichi hong.
* Royal Academy in Annual Sharing Cum Thangsgiving Programme zang ding.
* Parbung khua ah 7.97 Crore bei in Gallery tawh kithuah Playground kibawl ding.

Simte Youth Organisation (SYO) General Headquater in tuni zinglam dak 7 in SYO Hall huangsung Simveng ah Toilet complex bawlna munding ah ground breaking ceremony zang uhi. Hiai hun ah Goukhomang President Zomi Youth Association in Toilet complex bawlna munding ah lei toukham in Pastor S Kaikhanmang in Pathian kiang ah lan hi. Hiai hun a L Dongchinthang President Simte Youth Organisation in agendan in, SYO hall ahihleh District sung a hall poimoh leh kizang tampen pawl hiding in gen a, programme leh function tuamtuam kizat hun in VIP te zunthakna ding nasan omlou in, toilet complex bawl teitei sawm in MDC, MLA leh MP te kiang ah kitai a, bawlsak ding in thuchiam kilawm taktak honpe chiat mahle uh, bangmah taksuah omlou chi hi. Centre leh State apan development fund tamtak kum teng in hongpai gige a, bangziak a community khat dia phatuam a zatding omlou hiam chi a, mimal ading leng hilou a, community adia phatuam a zatding omlou ahihleh koilam a om hiam chi hi. A ban agenzelna ah, hiai bang a zuau thuchiam te poi kisa mahmah in, Simte te leng community khat Nam khat ahi, chi in nam sung a mi kiphal te kiang ah kitai in phal khamkham hon thohkhawm uh zang in nasep kipan ngal ding chi a, maban ah leng mipi'n kithuahpih ding in ngen hi.

Tuni zinglam dak 9 akipan sunnung dak 3 sung in D Phailian a Royal Academy ah " Hongpai un na khelna uh kikumkhawm dih ve ni" chih pansan in Ngaihte Innkuan Thumkhawmna nei uhi. Hiai hun ah Ngaihte beh sung apan mi hunkhop paikhawm in mimal kilan thak in, Pathian kiang ah ngaidam in kipah thugen ua, a kallak ah Rev. L Khamkholun, Rev. S Kaikhanmang leh Rev. Dr. Luaichinthang leh Rev. Dr. S Langzakham in thugen uhi.

Tedim Chin Cultural Club saina in tuni sunma dak 11 in Lanva a Tedim Chin Cultural Club hall ah Zomi Khuado Pawi 2012 zang uhi. Hiai Khuado Pawi zatna hun ah LB Sona Chairman Zomi Council in Pawi hong a, Cultutral troupe tuamtuam in pupa tawndan ngeina leh nam laam tuamtuam lak uhi.

Siamsinpawlpi Joint Headquater Lamka in tuni sunma dak 11 in New-lamka YPA hall ah The 2nd Siamsin Annual Conference 2012 nei uhi.Hiai hun ah Langkhanpau Guite Chairman ADCC Chief Guest in pang a, aman athugenna ah Siamsinpawlpi in College level a Branch a honkhiak kipahpih thugen in hithei leh School level a Unit hongthak nawn ding in ngen hi. Guest of Honour in M Gouzamang Guite Executive Member ADCC pang a, Chief Host in Lianzapau Samte President Siamsinpawlpi General Headquaters pang in, Annual Sports lai a kitaitehna tuamtuam a kipahman te pekhia uhi. Hiai hun ah Siamsinpawlpi VK Tawna Colllege Branch, Rayburn College Branch leh Donbosco Branch in cultural dance lak uhi.

Tulai khangthak te adia phatuam ding leh simnophuai mahmah monthly magazine The Lamka Chronicle kichi paite pau kigelh suakthak hi. Tuni sunnung dak 2 in Jacintha Lazarus IAS DC Churachandpur in a tenna inn a hong in, magazine in masawn zelding in deihsak thugen hi. Hiai The Lamka Chronicle ahihleh K Suanthang Editor hihna nuai a Th. Thangzalian in a published hidan in kigen a, copy khat cheng 50 in leitheih ding hi.

D Phailian a Royal Academy in November 14, 2012 sunma dak 10:30 in Annual Sharing and Thanksgiving 2012 neiding uhi. Huai hun ah Rev. L Khamkholun General Secretary EBc chief guest in pang ding hi. Guest of honour in T Pachuau IPS, IGP (Law and Order) pang ding a, functional president in FP Gangte Diplomat Retired pang ding a, chief host in Sholet Haokip, Chief of D Phailian pang ding hi. Hiai hun ah Student te'n special item tuamtuam present in, kipahman tuamtuam leng hawm ding uhi.

North Eastern Council in Manipur ah proposed a omsa project 4 approved bawl in sepsuahna ding in fund release ding in lemsa uhi. Thusuak kingah dan in Project 4 te ahihleh Karong Senapati a boys and girls hostel bawl ding, high school leh higher secondary school a science laboratory leh library ban ah Parbung Churachandpur a gallery tawh kithuah a playground bawl ding leh Luwang Shangbam a Cricket stadium kibawl tungkhuah ding hidan in kigen a, hiai project 4 te sepsuahna ding in North Eastern Council in 21.4418 crore release ding hi. Huailak ah Churachandpur District sung Parbung khua a, gallery tawh kithuah a playground bawlna ding in 7.97 crore release hiding hi.

Mualvaiphei a Bethesda School of Nursing in abawl Music Video Album khatna Instrument of Peace kichi zingchiang sunnung dak 1 in Rengkai ICI Biakinn ah ahonna om ding hi.

Zomi Theological Students in zingchiang sunnung dak 1 in Grace Bible College huangsung a Jelshyam Chapel ah Zomi Theological Students 2013-2014 sung vaipaw ding kitelna neiding uhi. Hiai kitelna ah State dang a laisiangthou zilte'n  leng online in vote khethei ding ua, Zomi nam sung a laisiangthou zil peuhmah telding in theihsakna bawl uhi. Hiai kitelna ah vaipaw ding in pasal 10 leh numei 5 telding uhi.

Phalbi khawvot a numei te dawn zangkhaina ding in Mission road a Hornbill Show Show room ah Washing Machine 6 kg. kimantak in kizuak a, stock a tamlouh ziak in adeihte'n a kinlam in ngaihven theih ding hi.

GAMDANG THU:

America adia sepaih muanhuai mahmah four-star general ban ah CIA director David H Petraeus in a Zi chihlouh ngaihzawng dang a neihlam FBI te'n a theihkhiak ziak un, a dinmun apan kitawp hi. CIA director Petraeus in US resident Barack Obama kiang a kitawpna pelut a, Obama in a kitawpna a pomsak nung in thil omdan puangkhia hi. CIA in director pa kitawpna official in puangkhia ua, a kingaihpi numei nu min leng puankhiak hilou a, FBI te thuguk suidan leng puankhiak hilou hi.

Congress President Sonia Gandhi in Haryana a party review cum strategy meeting neihna ah party leader leh minister te thuhilhna nei in 2014 general election a, vaihawmna letnawn I sawm leh pangkhawm a nasep ngai ahihdan gen hi. general Election neihna ding kha 18 lel in samta a, thuneihna lakkik ding ahihleh govt. leh party te kithutuaktak a pankhawm ding ahihdan gen hi. Hiai meeting ah Congress in United progressive alliance govt. tawh kizopna sukkip sem dingdan genkhawm ua, minister leh congress working committee tel in meeting ah mi 66 tel uhi. Sonia gandhi in minister te kiang ah, 2009 election manifesto a kigelh teng election nawnma a semsuah ding in theisak hi.

Pakistan a human right activist naupang numei Malala in numei te siamsinna ding tawh kisai a buaipih lai in Taliban helpawl te'n thahsawm ua, himahleh vangphat huaitak in suakta hi. Khovel pumpi in Malala ngaisang mahmah in United nations in tuni November 10 pen Malala Day in puang uhi. UN General Secretary Ban Ki-moon in Malala siamsinna ding tawh kisai a kithuahpih ding ahihdan gen a, numei te siamsin theihna ding tawh kisai a "global symbol" ahi chi hial uhi. Malala ahihleh kum 14 lel in upa a, khovel pumpi ah mihing 32 million in ngaisang mahmah uhi.

Delhi khopi sung meikhu sahtak in atuam thutawh kisai in tuni'n Delhi, Haryana leh Punjab a Secretaries, scientist leh environmentalist te'n meeting nei uhi. Delhi khopi sung ah meikhu sah mahmah in niteng in uang deuhdeuh a, khaw muhtheihna hatlou in, huih siang tawm tuan mahmah hi. Delhi chief minister shiela dixshit in punjab leh haryana a loubawl te'n buhpawl a hal ziak uh hidan in gen a, himahleh environmentalist te'n Delhi leh a kim-le-kiang a state te ah gari a tamluat ziak hiding in gen uhi. Pollution tam ziak in Chief Minister Shiela Dixshit in kalnawn a Diwali festival hun ah kuamah in fire-cracker hallou ding in ngen hi.

Film producer Jerrit John in a ngaihzawng luinu mai a, chemical chikhat a buah ziak in Thane police te'n Mumbai khawpua a Mira road a hotel khat apan mankhia ua, Mumbai police te khut ah pekhia uhi. John in a zi ban ah kum 26 miding physiotherapist leh international cyclist tawh kingai uhi. Numei nu damdawi inn a etkol ahihnung in tuni'n damdawi inn apan pawtkhia hi.

Tuni zingkal in Turkey ah helicopter khat kia in helicopter sung a tuang sepaih 17 si uhi. State media report dungzui in tuni zingkal in Siirt province sung a Pervari district ah helicopter kia a, taang sang taktak lak a meipi a sahluat ziak hiding in kigen a, thuneitu te'n thiltung suizui ngal uhi. Helicopter kiakna mun ahihleh Kurdish helpawl te hat mahmah hidan inleng thusuak in gen hi.