* Tualnuam khua ah FCI Godown bawlna pailel.
* Ginsuanhau MLA in Singngat khua a School 2 leh Playground ban ah SDO Office naktak in puah ding.
* Central Team in Lamka a Horticulture Department nasepna hong enkhe ding.
* Bukpi khua ah Baptist Youth Leaders Fellowship om ding.
* Haichi chituam deuh neite'n Horticulture Department Office ah zuak theih.
* The 5th (L) Seikam Memorial Open Football Tournament Closing Ceremony om ding.
* Tualnuam khua ah FCI godown ding kibawl lel a, fencing teng bawlzawh hita a, tun a main building ding kibawl lel hi.
Singngat Area sports Association (SASA) saina in tuni sun dak 12 in Singngat khua a MK Thomas Mini Stadium ah The 1st (L) Khamkhohau and (L) Ngaihoihching Memorial Tourney 2012 Closing Ceremony neih in om hi. Hiai hun Ginsuanhau MLA 60-Singngat Asembly Constituency in Chief guest hihna tawh hi. Aman a thugenna ah, Kimawlna a poimoh dan leh nekzonna dia simoh huailou ahihdan gen in, MK Thomas Mini Stadium leh Singngat khaw khung a playground te puahthak hiding a, MK Thomas Mini Stadium ah Public Toilet bawl hiding chi hi. Huaiban ah Standard English School leh Hill Model School building tunung sawtlou in Crore 1 tuak bei in kibawl thak ding chi a, Singngat SDO Office building leng Crore 11 sanction in kibawl thak ding chi hi. Hiai hun Ginsuanhau MLA in Khaw hausa om khate kiang ah puansan pia in, hiai Tournament a Club 18 te footbal 1, Volley ball 1 leh Net 1 chiat pia in Singngat Area Sports Association kithuahpihna in sum sing 2 pia hi. Chief host in Racheal N Guite SDO Singngat pang a, aman a thugenna ah, Kimawlna uang bawl a poimoh dan gen in (SASA) te kithuahpihna pia hi.Functional President in L Mangkhogin Haokip IPS, SP Churachandpur pang a, aman a thugenna ah, Govt. in khawsung khantouhna ding in thil hoih taktak hon piak te kepsiam poimoh ahihdan gen a, mahni rights kia theilou a, duty leng theih ding ahi chi hi.Guest of Honour in Tongkai Baite MDC Sangaikot pang a, aman leng kimawlna apoimoh dan gen in MK Thomas playground hoih a sakdan leng gen in, nitaklam chiang a round table a tutkhawm sang a, kimawl houhzaw ahihdan gen hi. Tuni'n final match ah Ngailianching Memorial Team leh S Phaiza Youth Club te kimawl ua, winner team in cash award sing 3 leh runner up team in sing 2 sang uhi.
Central a Horticulture Department apan N Sana Tomba Singh Under Secretary HMNEH Ministry of Agriculture and Co-operation Govt. of India in zingchiang zinglam dak 8 in Lamka hongpha ding a, District sung a Horticulture Department nasepna mun tuamtuam enkhe ding hi. Imphal apan agriculture Director in honzui ding a Lamka ah Horticulture Department in kithuahpih ding uhi.
Thanlon Sub-Division sung Bukpi khua ah November 16-18, 2012 sung in Evangelical Baptist Convention Baptist Youth Leaders Fellowship om ding hi. Hiai Leaders Fellowship ahihleh Rev. D Kamchinmang Divisional Superintendent Thanlon in hong ding a, Fellowship sung in Rev. K Kamchinkhup Director of Ministries EBC leh Lianding Guite Child Co-ordinator EBC in " Theihpihtu Muanhuai" chih pansan in thugen ding ua,Pastor T Thangzasiam in Seminar on Discipleship makaih ding a, Pastor Dalkhanlian leh Pastor MT Khanlal in Devotion makaih ding uhi.
Horticulture Department saina in Kangjenbung Imphal ah Horticulture Mela om ding a, huai a mipi muh a koih theih ding in District Horticulture Department in Mai, Maipuang leh Balpi lian taktak kaihkhawm sawm uhi. Mai, Maipuang leh Balpi lian taktak neite'n Horticulture Office ah November 19, 2012 mangei in piak theih ding a, Horticulture department in ana leisak ding uhi.
Khawlmun Youth Club saina in zingchiang sunma dak 10:30 in Khawlmun playground ah The 5th (Late) Seikam Memorial Open Football Tournament Closing Ceremony om ding hi. Huai hun ah H Calvin Social Worker Chief Guest in pang ding a, functional president in TS haokip pang ding a, guest of honour in L Sanga Social Worker pang ding a, Chief Host in Khaipao Haokip MDC pang ding hi. Final Match kipatma in Churachandpur District Sports Association leh The 5th Seikam Memorial Open Football Tournament Organising Committee te Exhibition Match kimawl ding ua, final match ah Zomi Football Club leh B Aizalon Soccer Club kimawl ding uhi.
GAMDANG THU
Myanmar a Pro democracy leader Aung San Suu Kyi in ni 6 sung om ding in tuni'n India hongpha hi. national League of Democracy of Myanmar a, chairperson Suu Kyi in zingchiang in Prime Minister Dr. Manmohan Singh, Vice-President Hamid Ansari, Lok Sabha Speaker Meira Kumar, Congress President Sonia gandhi leh External Affairs Minister Salman Khurshid kimuhpih ding hi. Nobel Prize winner Aung San Suu Kyi in kum 40 nung a India a phaknawnna hidan in kigen hi. Suu Kyi in a graduate na mun Lady Shri Ram College pha in college faculty leh student te kimuhpih ding hi. Huaiban ah Bangalore leh Andra Pradesh zuan a, a lengkhiak ma in Gurgaon a Energy and Resource Institute pha ding hi.
Uttar pradesh a Auraiya ah phalna neilou a Diwali zatna ding tawh kisai a fire cracker bawlna factory ah, puakthei thil tamtak puakzak in innkuan khat apan mi 6 tel in midang 2 si in mi 12 liam uhi. Yaqoobpur khopi a Bela police station a deputy superintendent of police Ashok kumar singh in agendan in fire-cracker puakzak ngaih petmah in mi 8 te amun mah a singal uh hidan in gen hi.
Afghan President Hamid Karzai in India hongveh in NDTV tawh interview na ah India company tamtak, amah gamsung invesment bawlte poimoh ngaih petmah ahihdan gen a, amah gamsung a invesment bawl nuam India company peuhmah naktak in kipahpih leh vaidawn gige ahihdan gen in bitna leng piakchiam hi. Aban agenna ah india company te kizekai saklou a, kitaitehna a vualzawhna dia a kinlam hoih ding ahihdan gen hi.
Indian American Austronaut Sunita William in tuni Diwali ahihtawh kiton in za-awng akipan in India mipi te deihsak thu khak in, za-awng a, Diwali zatding thawmhauhuai ahihdan gen a, a nuam thei pen a zang ding in leitual a om India te kiang ah deihsak thu khak hi.