* Baptist Childrens Department Headuqater saina in Sunday School Teacher te'n Orientation nei.
* District Blindness Control Society in Eye Testing zousiang ta.
* Tuibuang Peace Ground ah Mini Mela om lel.
* Lamka a Hindu sahkhua zui te'n Durga Puja zang.
* Manipur Govt. in Village Authority Election neih ding Order a suah Zomi Council in kipahpih in full-support puang.
* YPA hall Hiangtam Lamka ah Kut Handloom Exhibition om ding.
* CDSU in DC leh SP Churachandpur tung ah kipahthu puang.
* Baby Joel (2) tuisou in kibuak kha.
* Health and Family Welfare Minister Phungzathang Tonsing in Lamka hongpha.
* MZP Manipur Headquater in Diamond Jubilee lawm ding.

TUN TANCHIN KIMZAW IN :

Baptist Childrens Department (BCD) Headquater Dorcas Hall saina in zan apan in EBCC Hebron New-Lamka ah Sunday School Teachers Orientation nei uhi. Resource Person Gary Brewer Executive Director Partners in Dicipleship, USA, Suresh Singh Co-ordinator Partners in dicipleship,. Asia leh Rev. B Luaichinthang Translator Partners in dicipleship in sinsak ua, sunday school heutu tamtak tel in, tuni sunnung in Rev. Kamchinkhup Director of Ministries leh Lianding Guite child Co-ordinator EBC in baptist Children department tawh kisai in kikupkhawmna makaih ua, tunitak lam dak 3:30 in zousiang uhi. Hiai Orientation neih sung in Partners in dicipleship International USA in laibu a bawl, Rev. B Luaichinthang in Paite pau in letkhia a, huai laibu thak kum nawn chiang in EBC saptuam a Primary leh Junior pawl in tawi ding ua, huai laibu tawh kisai in sunday school heutu te sinsak uhi.

District Blindness Control Society Churachandpur in 13th World Sight day tawh kizawitawn a "Eye Testing for All" chih pansan a, mun tuamtuam a mit etna a neih uh sunzom in tuni'n St. Mary School Tuibuang ah neinawn in zousiangta uhi. Eye testing neih a, cataract muhkhiak a om te tutung in district hospital ah aat ngai te aat hiding a, damdawi leng a thon in peding uhi.

Northern Churachandpur Youth Club Federation saina in Tuibuang Peace Ground ah Autumn Mini Mela om lel a, zingchiang apan Chitrahar ah dancer thak leh magician thak hongpai ding a, Mela sung a lutman leng omta ding a, mikhat ah gate a lutman cheng 5 hiding a, mi 3 kizui te cheng 10 hiding in a saitute apan thu kiza hi.

Lamka Hindu sahkhua zui Bihari leh Malwari pawl in mun tuam tuak ah Durga Puja zang in limsang mahmah uhi. Zingchiang in, hiai pawl nih te'n amau pathin bawl chiat lampi zuihpih in Tuitha lui ah kheding uhi.

Zomi Council in Press Release a bawlna ah, Manipur state Govt. in Hill District a Village Authority Election neih ding a, Order suah Zomi Council in kipahpih in full-support puang uhi. Huaiban ah Zomi Council in village authority election siangthoutak neih ding in deih a, kum dang a nominate thoh kichite deih nawnlou ahihdan taklang in khochih a mipi te'n mahni deih telna, a zat theihna dia Zomi Council in naktak a panla ding ahihdan leng taklang uhi.

District handloom and textile office churachandpur saina in October 30 akipan November 3, 2012 sung in YPA general headquater hall hiangtam lamka ah Kut handloom Exhibition 2012 om ding hi. Hiai ding tawh kisai a district sung a primary weaver's co-operative societies, self help group, NGO leh handloom section nuai a mimal lunglutna nei te'n plain paper a ki-ngetna gelh in october 25, 2012 tan in District handloom and textiles office churachandpur ah pialut theih ding a, exhibition a tel te'n a thon in stall hong thei ding ua, huaiban ah TA/DA leng piak hiding in M meghachandra Singh Project Manager handloom Churachandpur in thusuahna ah taklang hi.

Churachandpur district sung a traffic rule khauhtak bawl a district sung hoihna dia panla jacintha Lazarus IAS DC Churachandpur leh L mangkhogin haokip IPS, SP Churachandpur tung ah churachandpur district students union kipahpih thupuang uhi. Huaiban ah traffic thoven zawk nang leh accident a pan suahtak theihna dia district administration panlakna mipi'n theihtawp suah a kithuahpih ding inleng CDSU in ngetna bawl ngal hi.

Tuni zinglam dak 9:30 in Baby Joel (2) S/o Joy Muan of New-lamka, bel sung a tuisou palkha in a veilam khe leh a pheipi teng dulh in tun lamka damdawi inn ah etkol in om lel hi.

Health and Family Welfare Minister Phungzathang Tonsing in tuni zinglam dak 10 in lamka hongpha a, hebron veng a tenna inn ah sawtlou khawl in huai apan M Gouzamang Executive member ADCC tawh kizui in Lanva TD Block Office munding enkhia uhi.

Mizo Zirlai Pawl (MZP) Manipur Headquater in zingchiang sunma dak 11:30 in YMA hall Hmuia Veng ah Diamond Jubilee lawm ding uhi. Hiai hun ah Lungmuana Lakher IAS Commissioner, Chief Guest apang in Jubilee suang hong ding a, Rev. K Mawia in Pathian kiang ah lan ding hi. Functional President in JC Ramthanga IAS Commissioner pang ding a, Guest of Honour in Thianghlima Pachuau IPS, IGP, Law and Order pang ding a, Special Guest in Jacintha Lazarus IAS, DC Churachandpur pang ding hi. Nitak dak 6 in programme om nawn ding a, huai ah Thangso Baite MP Outer Manipur, chief Guest in pang ding hi. Functional President in James Thanghmingmawia President MZP General headquater pang ding a, Guest of Honour in V Zathanga IPS Additional DGP pang ding a, Special Guest in Th. Sangkhuma President Mizo People Convention Manipur, Mangcha Thangzom President YMA Manipur Group, MB Sanghnuna Chairman Mizo Literature Society Manipur leh Laltanpuii MCS, SDO Churachandpur pang ding uhi.

GAMDANG THU.

Khovel a football peksiam a minthang Diego Maradona tuni'n India hongtung in Kochi a Nedumabassery International Airport ah helicopter in hongboh hi. State sung a football ngaisang a sang a sim in ana vaidawn uhi. Maradona in zingchiang in Kannur ah Boby Chemmanur International Jewellers and Airlines Show room thak hong ding hi. maradona ahihleh hiai Boby Chemmanur International Jewellers and Airlines ading in brand ambassador leng hingal hi. India ah ni nih sung om ding a, Kozhikode, Malappuram leh Kasargod district apan amah ngaisang mi a tam mahmah ziak in security hihkhauh in om hial a, security lam enkai ding police personnel sang 2 zat in om hi.

Karnataka Chief Minister lui BS Yeddyurappa in thupuan a bawlna ah December 10, 2012 a Party thak dinkhe ding ahihdan gen hi. Lingayat stongman in a gendan in Yeddyurappa in BJP tawh kizopna neilou in party thak dinkhia ding lunggulh zaw chi hi. Thusuak in agendan in Assembly election om nawn hun a, amah party thak a ki-candidate ding teng leng guang fel khin hidan in kigen a, district tuamtuam apan makai te leng meeting neihpih khin kichi hi. Huaiban ah Assemby member ahihna apan a kitawp zawh chiang a, state pumpi huap a tour neih sawm hidan inleng kigen hi. Yeddyurappa ahihleh July 2011 a mining bribery charge ziak a chief minister hihna apan kitawp hidan in kigen hi.

Tom Cruise film minthang mahmah bawlkhetu kum 68 a upa Tony Scott, California lei apan kitawmkhia in si a, hiai thu tawh kisai a Los Angeles County Coroner in agendan in Scott in sihtheihna ding khop a lauhhuai natna neilou a, a taksa tung ah kingaihsiatlouhna ding leh ihmut theihna ding damdawi muhkhiak in om chi hi. Mr Scott did not have any life-threatening conditions including cancer, the Los Angeles County Coroner said. Scott in project thak 30 leh a zi thumna Donna W Wilson  leh atapa phik te nusia hi.

Srinagar pawlam a Budgam district sung ah, army troop khat in helpawl te hawlkhiak sawm in panla ua, a lehlam ah army troop khat petrolling a, paite'n helpawl te ding sa in kapkha uhi. Army te kitheih khelhna kal ah army 1 si in midang 3 liam uhi. Thusuak in agendan in, srinagar apan kilometre 20 vel a gamla Chattergam chowk area ah helpawl om chih thuzak ahihphet in 53 Rashtriya Rifle pawl in gari tai teng check ngal ua, huchihlai in 35 Rashtriya rifle te uniform silhlou in tata Sumo sung ah tuang in hongtai ua, gari kham dia theihsak ahihnung ua, leng a khawllouh ziak ua, check post a om 53 Rashtriya Rifle te'n kap zuingal in, tata sumo sung a tuang army 1 kaplum in 3 kapliam kha uhi. Hiai thiltung tawh kisai in police te'n suizuina pan ngal uhi.

Moscow a North Caucasus region a police check post ah suicide bomber khat amah tuanna car sung ah puakzak a, police 1 si in midang 3 naktak in liam uhi. Hiai area ah Islamist helpawl te niteng phial a, gamtang uh hidan in kigen a, Russian Interior Ministry thusuak in agendan in Police ten car check dia a kisaklai un suicide bomber puakzak chi uhi. Hiai bomb puahzakna ziak theih hikei mahleh hiai area ah Christian leh Muslim te kikal ah kum tamtak paisa inleng kitheihsiamlouhna om gige hidan in kigen hi.

United Nations in Syria gamsung ah peacekeeping force sawllut ding in lemgel khinta a, UN peacekeeping force chief Herve Ladsous in agendan in peacekeeping force sawllut ding in thupukna kila mahleh bangzah sawllut ding hiam chih bel kigen theinailou chi hi. Syria gamsung a solkar dou a galvantawi pawl te leh solkar sepaih te kikal a cease fire om theihna ding in UN and Arab League envoy to Syria Lakhdar Brahimi in pathianni in Damascus ah Syrian President Bashar Assad kimuhpih hi.

Thusuak kingah dan inParliament's winter session November 21, 2012 akipan thei dinmun in om a, session kipan leh khakhat sung daih ding in kigen hi. Defence Minister AK Antony makaih in October 25, 2012 in Cabinet Committee on parliamentary Affairs meeting om ding a, huai meeting in winter session hunding bikhiah ding hi. Opposition BJP pawl in govt. deihna bang a winter session november 21 akipan december 21 sung neih kichi lemsakpih uhi. Kum dang inleng hiai hun in winter session om gige hi.

Taiwan suahlam pang a hospital khat mei inkang a, hospital a om damlou 12 kanglum in midang 60 val liam uhi. Health authority thusuak in agendan in tuzingkal baihtak in nursing facility housing ah meikuang kipan in damlou za 1 val mun bitzaw ah tuahkhiak in om ua, misi te sihna ziak meikang hilou in meikhu diik tamluat ziak hiding in kigen a, a liam te hospital tuatuam ah etkol in om uhi. Tutung a thiltung ahihleh Taiwan adia hospital kang nasa pen hilai ding in kigen a, meikuang kipatna suizui hilel hidan in official thusuak in gen hi. Fire official te gendan in hospital building sawng nihna a store room akipan meikuang kipan hiding in gintak thugen uhi.

Britain solkar in Afghanistan a galdou dia a koih galvan pua drone aircraft flying combat leh surveillance operation, tulel dingmun sang a, a lehkhat a tamzaw koih beh sawm hidan in thusuak in gen hi. Britain in Afghanistan ah drones aircraft 5 sawllut beh ding a, nipi kal 6 sung in zattheih hiding hi. England millitary base RAF Waddington apan America khutsuak, athak liklek unmanned aerial vehicle leh sawllut hiding in kigen hi. Himahleh govt. in bel hiai aircraft te kum 2014 beitan om sak ding hiam chih tungtang ah thupukna lanailou uhi. A lehlam ah NATO sepaih te'n Afghanistan pawtsan zungzung zel uhi.

Thusuak kingah dan in Myanmar tumlam ah Buddhist leh Muslim te kikal ah ktheihsiamlouhna piang nawn in, pawl nih te buaina ziak in tenna inn a za a sim kihal in mi 3 si uhi. Hiai Buddhist leh Muslim te kikal a buaina ahihleh pathianni nitak a Rakhine's Min Bya township sung a khaw 2 akipan hidan in kigen a, huai paisuak in tenna inn tamtak kangtum a, thuneitu te'n buaina in a sukkhak khua te ah sun-leh-zan in curfew koih uhi. Hiai pawl nih te June kha inleng naktak in buai ngei ua, mi tamtak si in, a sang a sim pemkhia uhi.