Dr. Chaltonlien Amo Chairman Hill Area Committee in Mary Lun Music Video Album hong
Zomite lak a lasasiam pen pawl a kigen Mary Lun in Music Video Album a bawl thak "Zolei Lunggel" kichi tuni sunma dak 11:00 in SYO Hall, Sim Veng ah honkhiak in om hi. Hiai hun ah Tipaimukh MLA Dr. Chaltonlien Amo, Chairman, Hill Area Committee in chief guest hihna toh uap in music video album hong a, Thanlon MLA Vungzagin Valte in Guest of Honour hihna toh a uap ban ah, Singngat MLA Ginsuanhau Chief Host in pang a, Langkhanpau Guite, Chairman, ADCC in Special Guest hihna toh uap hi. Chief Guest Dr. Chaltonlien Amo, Chairman Hill Area Committee in a thugenna ah, music tungtawn a khangthak te'n tulai a tawndan deih huailou tuamtuam te subei a poimoh dan gen hi.
IUCD Insertion tawh kisai in Nurse te'n Training nei
District Family Welfare Officer Churachandpur saina in zan akipan October 23, 2012 tan daih ding in DFWO Conference Hall ah Nurses Training on IUCD Insertion 2012-13 kipan hi. Hiai hun ah District Family Welfare Officer Dr. VC Pau Tonsing leh a nuai a nurse te tel in, Dr. Kungi, Medical Officer Incharge Saikot Primary Health Centre leh Vungmuanching, Nurse trainer in numei te'n nau kivangna ding a Copper T koih dingdan sinsak uhi.
National Vector Borne Disease Control Programme apan Medical team in Lamka ah Dengue natna pua Thoukhang mukhia
Chief Medical Officer in Lamka khopi ah Dengue natna om thei nawn ding dinmun a om hidan a thupuan a bawl dungzui in tuni sunma dak 11:30 in Imphal apan State Malaria Officer Dr. A, Ibochouba Singh, National Vector Borne Disease Control Programme (NVDCP), Manipur leh T. Kamini Singh, Biologist, NVBDCP, Headquater Manipur in Lamka hongpha in Chiengkonpang leh a sehvel hong enkhia uhi. Tuni'a Dr. Dr. A. Ibochouba Singh makaih a Chiengkonpang leh a sehvel etkhiakna ah, Dengue natna pua thoukang leh a tui hunkhop mukhia uhi. Thutut kingah dan in tuma in Chiengkonpang a teng mi 3 sisan etkhiakna ah, khat positive hidan in kigen a, nihte result bel chiang nailou in RIMS, Imphal ah etchet ding in om lel hi.
Langkhanpau Guite Chairman ADCC in Traffic Rule thak tawh kisai mipi'n kithuahpih ding in ngen
Langkhanpau Guite Chairman ADCC in tuni sunnung dak 2 in amah Office Chamber ah Media te kimuhpih in, Lamka khopi sung a traffic rule thak tawh kisai leh maban a Village Authority Election neihna ding tawh kisai genpih hi. Langkhanpau Guite Chairman ADCC in a thugenna ah, traffice rule thak tawh kisai a. District Administrator leh SP churachandpur panlakna tung ah kipahpih thugen in, a bohse tu hilou a a zuitu hihzawk sawm ding in ngen a, huaiban ah lampi zul a mehzuak te'n leng khopi sung kilawmna dia, haksatna tampi om mahleh theisiam a, footpath pel a mehzuaklou ding in ngen hi. November 1, 2012 akipan 2 wheeler hek te'n helmet khuk chiat ding kichi leng eimah damna ding ahihman in kithuahpih chiat ding in ngen hi. New-Bazar ah leng nin paih thang nawnlou a siangthouna ding naihtuah chiat ding in ngen hi. Huaiban ah, maban a Village Authority Election om ding ah leng mipi te'n lungpi geltak a, mi diktat leh gamsung khantouhna ding deih mi tel ding in ngen a, huchi hileh gamsung ah khantouhna kichian tak om thei ding chi hi.
T Goukhomang President ZYA General Headquaters in ZYA Rengkai Unit hong
Zomi Youth Association (ZYA) in Lamka khopi leh a sehvel mun bangzah hiam ah unit thak a honkhiak nung un, tuni sunnung dak 3 in Zion veng ah ZYA Rengkai Unit honna nei uhi. Hiai hun ah ZYA General Headquarters President T. Goukhomang in ZYA Rengkai Unit hong in vaipaw dia telching thak a om te kichiamsak hi. Pastor B. Chinzahau in vaipaw dia telching a om te Pathian kiang ah thumsak hi. Hiai hun Langkhanpau Guite, Chairman, ADCC in Chief Guest hihna toh uap a, M. Gouzamang Guite, Executive member ADCC Functional President in pang a, Lalhosan Executive Member ADCC leh S. Kamsuanlun Executive member ADCC in Guest of Honour hihna toh ZYA Rengkai Unit honna hun uap uhi
39 Assam Rifle pawl in PLA Overground hidia muanmoh galvan tawh mankhawm
Police apan thu kiza dan in apaisa October 15,2012 zinglam dak 3:00 in 39 Assam Rifles te'n PLA Overground member hidia muanmoh Ngasepam Ingocha (45) s/o Ng. Biramangol of Sumchinvum makhia ua, Imphal police khut ah pekhia uhi. Hiai case Singngat Police in lasawn in zan in CJM mai ah dingsak ua, CJM in October 23 tan Police custody a om ding in thupia hi. Police apan thutut kingah dan in, matkhiak a om Ngasepam Ingocha apan in AK 47 Rifles 2 leh magazine 2 ban ah a tang 23 mukhia uhi. Hiai toh kisai in Singngat Police in FIR chiamteh uhi.
GAMDANG THU:
Bihar khopi Patna akipan kilometre 100 vel a gamla Gaya District sung a Barha khua ah tuni zinglam dak 6:20 vel in Maoist te'n CRPF te tuanna anti-landmine gari, IED zang in hihpuak ua CRPF jawan 4 si in midang 4 liam uhi. DIG Hasnain Khan in a gendan in anti-landmine gari sung ah mi 12 vel tuang in Maoist te tung ah operation ding a kuan uh hidan in gen a, huaiban ah Maoist te IED hat mahmah ahihdan leng gen in CRPF te tuanna anti-landmine gari leng a omna kitheilou hidan inleng genbeh hi.
Tuzingkal baihtak in Madhya Pradesh ah 5.0 richter scale a hat zinling om in, kuamah a si-leh-liam van ah van kisia bangmah zakding omlou hi. Raipur Met Office Director ML Sahu in a gendan in zinling kipatna leitung apan kilometre 20 hidan in gen a, geographical tak in bel a epicentre ahihleh Jaisinghnagar north west apan kilometre 19 leh Shahdol kiang a Umaria north east apan kilometre 58 hidan in gen hi.
Madhya Pradesh a Museum kiluh in silver quintal 1 leh gou manpha tamtak kigumang a, Museum guard aom Kemla Prasad leh guta te'n a pawtkhiak ding kuan un that malam uhi. Zinglam dak 2 vel a thiltung hidan in Rewa Superintendet of Police Bhagwat Singh Chauhan in gen a, silver quintal 1 tel in gou manpha dang, gold lamp, silver lamp 3, pistol bangzahhiam leh festival poimoh om hun a saipi cheina dia kizang gou manpha tamtak kigumang chi a, van mang teng sum a tuat a bangzah manpha zouding hiam chih bel kigen theilou chi'n gen hi.
Congress President Sonai Gandhi in kum nawn a Assembly Election neih ma a nihveina ding in tuni'n Karnataka va pha nawn hi. Aman Udupi leh Dakshina Kannada District a makai tuamtuam leh Party makai te kimuhpih hi. Huaiban ah Kudroli Gokarnatha Temple Centenary Celebration leh Mangalore Dasara festival leng hong ngal in nitaklam in Delhi ah kiknawn hi.
Congress leader masa leh Minister lui Narayan Chaudhary, hunzawt tak damlou a om nung in tuni'n Jaipur ah si hi. Chaudhary ahihleh kum 84 in upa a, chest infection ziak in tukum August 31 akipan Private Hospital ah etkol in om a, zan nitak dak 12:30 vel in si hi. Chaudhury luang ahihleh tuni taklam in Jhunjhunu ah kihal hi. Chaudhury in MLA term 7 len in Minister dinmun 2 vei lenkha hi. Assembly ah Deputy Speaker khatvei lenkha a, kum 1980-1982 sung in Rajasthan Pradesh Congress Committee ah President dinmun len a, atanu Reeta Chaudhury leng Mandawa Constituency ah MLA in om lel hi.
Peru gam ah menchim thupitak om in mi 11 si in midang 10 a omna uh theihlouh in om hi.san Martin Province sung a El Porvenir khua a Coffee farmer te tenna inn tamtak kisia a, vuahtui tamluat ziak a
thiltung hiding in kigen hi. Hiai menchim ah innkuan khat a vek un mangthang ua, a si te lak ah naupang 5 telkha hidan ineng thusuak in gen hi.
Chennai Airport thusuak in a gendan in Chennai Airport building sawngnihna apan Airport Authority of India a nasem kum 34 a Upa khat kitawmkhia in a lulak naktak a liam ziak in damzoulou hi. Kum 34 a Upa Balaji in Airport authority nuai a house keeping section ah sem hi. Balaji kithahna ziak theih hinailou hi.
Uttarakhand Govt. in tukum sung ading in gutkha, pan masala leh nicotine tel himhim zuak ding kham uhi. Food Commissioner Ranbeer Singh in a gendan in gutkha bawl leh zuak ding ban ah advertisement bawl ding kumkhat sung kham hiphot ding chi a, kum khat nung in thil omdan etthak hiding a, a poimoh leng a hun behlap hiding chi a, huaiban ah gutkha, pan masala leh nicotine tel himhim, bawl leh zuak teitei om leh dan tawh kituak in action lak hiding chi'n leng genbeh hi.
United State leh Israeli sepaih te'n kitanauna sukhatna ding in tukha tawp kuan in Joint air defence drill neiding uhi. Hiai military excercise ah american sepaih sang 3 leh za 5 leh Israel sepaih sang 1 telding ua, rocket leh long and short ballistic missile apan kiveng dingdan kisinsak ding uhi. Tutung a Joint millitary excercise ahihleh gam nihte adia excercise thupipen hiding in kigen hi.