* Lamka khopi sung ah Traffic Rule thak kizang.
* District Health Society nuai a semding lakna ding in Interview neih in om.
* Lanva ah Zomi Khuado Pawi 2012 kizang ding.
* Dr. Chaltonlien Amo Chairman Hill Area Committee in Music Video Album hong ding.
* ZYA General Headquaters President T Goukhomang in ZYA Rengkai Unit hong ding.
* Mizoram University a Post Graduate student te'n subject thak tawi ding.
* Tuibuang Peace ground ah Autumn Mini Mela kipan.
TUN TANCHIN KIMZAW IN:
Lamka Khopi sung awngthawl zawkna ding deihna leh accident hun a bitzawk theihna ding ngimna in apaisa October 5, 2012 in District Administration makaih in Transport department leh police lam ten meeting nei in thupukna leng nei uhi. Thupukna dungzui in traffic rule thak tuni'n kizang pan hi. SP Churachandpur L.Mangkhogin Haokip leh Mannuamching Chief executive Officer in traffic paidan enkhia in footpath a mehzuak te sawl khia uhi. Traffic Regulation thak paidan ahihleh Imphal apan hong kipan gari te Teddim Road ah taisuak ding ua, Imphal lam manoh gari peuh mah, IB Road ah luttou in, Tipaimukh Road zuisuk in Police Station kong ah Tedim Road man ding uhi. Huaiban ah, Singngat lam apan Diesel Auto hong taisuk teng IB Road ah taitou in Mission Road ah lut in Town Hall kong ah kinga ding ua, huai apan Tipaimukh Road zuitou in Thangjam Road ah lutsuk zel ding uhi. Huai lou in Churachandpur College kong apan IB Road ah gari suklut phal hinawnlou him him ding a, Passenger pua gari Thangzam Road tawn kha teng, Thangzam Road ah khawl thei nawnlou ding ua, Zion Street a Bus, Jeep, Auto leh gari dangdang kinga teng Lailam Lei kiang ah kingata ding uh hidan in taklang uhi. Traffic Regualtion thak toh kisai L.Mangkhogin, IPS, Superintendent of Police, Churachandpur in a gendan in, hiai dan thak pen, Distirct Administration lam te deih na ziak kia hilou in, khopi sung a awngthawl zawk na ding deihna ziak hizaw chi a, November 1, 2012 apan gari neu, 2wheeler heek peuh mah in helmet khuk ding kichi leng, mipi te khualna leh accident tuah hun a bitzawkna ding deihna ziak ahihman in mipi'n kithuahpih ding in ngen a, helmet khulou a mat om leh sum liausak hiding u, dan tawh kituak in action lak hiding chi hi.
District Health Society Churachandpur nuai a sem ding Block HMIS Assistant post 2, Block Finance Manager post 1, Block Data Manager post 1, AYUSH Pharmacist post 5 lakna ding in tuni sunma dak 10:00 apan in DC office Conference Hall ah inteview nei uhi. Thutut kingah dan in, Ayush Pharmacist a dia post 5 lakna ding ah candidate 5 mah om a, HMIS Assistant a dia post 2 awng lak ah candidate 6 om hi. Huaiban ah, Block Data Manager post 1 ading in candidate 6 om a, Block Data Finance Manager post 1 ading in candidate 14 om hi. Tuni a interview neihna hun ah, interview borad ah Additional DC, C. Hangshing, MCS; CMO Dr. HL Liensang, Block Data Manager Seiboi Mate leh Romeo Singh, State Data Manager tu uhi. Interview result bel tunung sawtlou a suak ding hidan in kigen hi.
A hongtung ding November, 10, 2012 sunma dak 10 in Lanva tedim Chin Cultural Club Hall ah Zomi Khuado Pawi 2012 zatna om ding hi. Hiai hun ah LB Sona Chairman Zomi Council in Khuado Pawi hong ding a, Rev. Enn za sian Executive Secretary CBA in thumna in landing hi. Hiai hun Zomi sung a tribe 8 apan president leh Mizo People Convention, Hmar Innpui, Kuki Innpi, health and Family welfare minister Phungzathang Tonsing leh langkhanpau Guite Chairman ADCC, Hangshyan thang Secretary GAD, ZRO, SP Churachandpur leh DC Churachandpur in thugenna hunzang ding uhi.
Zomite lak a lasasiam pawl a kigen Mary Lun in Music Video Album abawl thak Zolei Lunggel kichi zingchiang sunma dak 11:00 in SYO Hall, Sim Veng ah a honna om ding hi. Hiai hun Tipaimukh MLA Dr. Chaltonlien Amo, Chairman, Hill Area Committee in chief guest hihna toh uap in music video album hong ding a, T. Khanthang, Social Worker, Langkhanpau Guite, Chairman, ADCC, Thanlon MLA Vungzagin Valte leh Singngat MLA Ginsuanhau in hiai music video album honna hun uap ding uhi. Zomi Youth Association (ZYA) general headquaters in Lamka khopi leh a sehvel mun bangzah hiam ah unit thak a honkhiak nung un, zingchiang in ZYA Rengkai Unit hong nawn ding uhi. ZYA Rengkai Unit honna program ahihleh zingchiang sunnung dak 3:00 in Rengkai Bible Hill ah om ding a, huai ah ZYA General Headquarters President T. Goukhomang in hong in vaipaw ding te kichiamsak ding a, Pastor B. Chinzahau in Pathian kiang ah landing hi. Hiai hun ah, Langkhanpau Guite, Chairman, ADC/CCpur in Chief Guest hihna toh uap ding a, M. Gouzamang Guite, Executive Member/ADCC in Functional President in pang ding a, Lalhosan, Executive member ADCC leh S. Kamsuanlun, Executive Member/ADCC in Guest of Honour hihna toh ZYA Rengkai Unit honna hun uap ding uhi.
Zan in Board of Study, Mizoram University in meeting nei ua, huai ah Post graduate student te ading in subject thak khat koih beh ding in thupukna la uhi. Muanhuai tak apan thu kiza dan in, Mizoram a Post Graduate student ten tunung sawtlou in subject thak, Panchayati Raj and 6th Schedule" kichi subject thak tawi ding ua, hiai subject ahihleh stream khat peuh in laak theih ding a, compulsory bel hilou in optional subject hiding in kigen hi. Huai ban ah, hiai subject thak gelhtu ding in Dr. J.Doungel, Associate Professor( incharge Head of Department Political Science ) leng guang ngal uhi.
Northern Churachanpdur Youth Club Federation, NCYCF saina in tuni sunnung dak 4:00 in Peace Ground, Tuibuang ah, Autumn Mini Mela kipan hi. Hiai Mini Mela ahihleh tuni a honni ahih dungzui in a thon in ettheih a, zingchiang apan in a lut man om ta ding hi. Mela hun sung in item chi tuamtuam, chitrahar, leh Magic Show ban ah van tuamtuam zuakna om ding hi.
GAMDANG THU:
Congress leader Rahul Gandhi in tuzingkal in Prime Minister Dr. Manmohan Singh kimuhpih in Cabinet resuffle ding tungtang genkhawm uhi. Rahul Gandhi in tulel a General Secretary dinmun a let sang a dinmun lian leh poimoh zaw lending a party in deih hidan in kigen hi. Prime Minister in tukum July kha inleng in Cabinet sung a Rahul om dia deih mahmah ahihdan gen ngeita hi. A lehlam ah Rahul in Minister hihding lunggulhna lungsim neilou hidan inleng kigen hi. Prime Minister in August kha inleng Cabinet a om ding in Rahul tamvei tak chial in, tutung in serious tak a honlak ka lam-en chi hi.
Arunachal Superintendent of Police of the Special Investigation Cell in a gendan in Arunachal Pradesh Capital Itanagar apan Tawang zuan a pailai IPS Officer MS Chauhan, zan sunnung dak 2 vel in west Kameng District sung Tippi lak ah mang hi. Chauhan in a kizuihpih Inspector Moan leh constable Vikram Singh kiang ah Tippi market tan hongkha unlan, a kiang nai a luidung ah honna ngak un, ann I nekhawm ding uh chi in nusia hi. Huainung in a omna theihzui hinawnlou a, Chauhan kumkhiakna mun mipi tamna lak ahihman in kipnapped a om hiding hiam chih ngaihdan om thei hidan in kigen a, zan khua in naktak a zong himahleh muh hinailou hi. Hiai thil tung tawh kisai in Bhalukpong Police Station ah case chiamteh in om hi. Chauhan ahihleh Gauhati high court in Arunachal a multi-crore PDS scam tawh kisai suizui ding a kum 2008 a Speical investigating officer dinmun a piak hidan in Police thusuak in gen hi.
Kolkata kiang nai a Baruipur ah zan in nungak nou kum 14 miding pawngsual in om a, huaizawh in pawngsual tute'n mei in hal uhi. Thusuak in agendan in nungak nou nu innsung ah amah kia om lai in, a khaw sung mi pasal 3 valut in pawngsual ua, huaizawh in khawnvaktui pumbuah in nungak nou hal in kihem mang uhi. Nungak nu pianna pa niteng nektawm zong in, zan nitaklam in FIR bawl a, a tanu sualtu pasal 3 leng tuzingkal in police te'n mankhia uhi. Sual a om nungak nu local nursing home ah etkol ahihnung in Kolkata SSKM hospital ah kisuan a, a dinmun in hoihlam nawt hidan in kigen hi. Hiai nungak nu khua Baruipur ahihleh Kolkata pan kilometre 30 lel in gamla hi.
Maharastra ah Dengue natna hiileng ziak a mi 18 a sihnung in state govt. in health department te kiang ah, natna hii beisakna dia panla ding in thupia hi. Health department thusuak in a gendan in January akipan september 2012 sung in dengue natna vei 762 muhkhiak in om a, urban leh semi-urban area a khua 139 ah natna hiileng hatdiak hidan in thusuak in gen a, mi sang 7 za 6 leh 5 in dengue natna veiding in gintak thu kigen a, serum sample sang 6 za 1 leh 95 etchet hita hi. Mumbai ah dengue natna vei 504 om a, huailak ah mi 3 si in Kolhapur district ah mi 35 in dengue natna vei in 2 in sihloh ua, Raigad district ah mi 26 in vei in 1 in sihloh hi. dengue natna ziak in maharastra ah kumlui in mi 25 in sihloh uhi.
International Security Assistance Force thusuak in a gendan in eastern Afghanistan a Joint NATO-Afghan army base ah suicide car bomb puakzak in Afghan sepaih te bangzah hiam liam uhi. Hiai thil tung ah Afghan National Security Force te liam kha in ISAF te bel a liam omlou hidan in thusuak in gen hi.