* Thingkangphai khua a Meitei te Kihalna mun hihsiat in om.
* PYKKA Tournament neihna ding tawh kisai in Physical Education Teacher leh Kridashrees te'n Joint Meeting nei.
* C Hangshing Additional DC leh Khaikhopau Ngaihte Branch Officer Headquater in Media te Helmet ding pekhia.
* Nu Chinzaniang (60) tunitan a omna kitheilou.
* 39 Assam Rifle pawl in Indo-Myanmar Border ah PREPAK member 1 galvan tawh man.
* DC Office ah Indira Gandhi Sunna hun kizang.
* ICICI Health Card nei Handloom Weaver te ading in Free Health Camp om ding.
* Medical and Family Welfare Regional Director in Dengue tawh kisai in Lamka hongpha.
* Ngathal Line Auto Society in 2nd Rising Day lawm ding.
* Red Cross Society Churachandpur Branch saina in 2 Days First Aid Training om ding.
* Zingchiang akipan 2 Wheeler hek peuhmah in Helmet khuk ngai ding.
* Zingchiang Kut Festival ahihziak in Hornbill News hong suaklou ding.

TUN TANCHIN KIMZAW IN :

Thingkangphai khua a Meitei te kihalna Mongpham kichi tuni zinglam dak 6 vel in Thingkangphai khaw hausa Chingkhanlian tapa Lemboi in JCB zang in hihsia hi. Hiai thu tawh kisai a Thingkangphai khua a Meitei te thangpai in C Hangshing Additional Deputy Commissioner Churachandpur kimuhpih uhi. C Hangshing in DC kimuhpih zaw ding in theisak hi. Hiai thu tawh kisai, a kigen dan in hausa nu in khaw sung a Meitei te samkhawm in 2vei meeting neihpih in, kihalna mun pen, lampi tawh a kinaih ziak leh Biakinn tawh a kinaihluat ziak in khaw khunglam a Khuga Canal kiang ah bawl thak ding in genpih a, himahleh Meite te utlou in pang teitei ua, hausa nu leng thangpai in tuzingkal in kihalna mun hihsia hi. Kihalna mun thak ding leng bawlsak panta hidan inleng kigen hi. Thingkangphai khua ah Meitei te inn 150 vel om uhi.

Directorate of Youth Affairs and Sports thupiak dungzui a Block leh District level PYKKA tournament neihna ding tawh kisai in tuni sun dak 12 in Lunkhosei Haokip District Youth Affairs and Sports Officer makaih in Physical Education teacher leh Kridashrees te'n Joint meeting nei in tournament neih hunding leh a mun ding tawh kisai genkhawm uhi.

District Administration leh Churachandpur Reporters' Guild kithuah in helmet khuh a poimoh dan pamphlet a bawl in khopi sung ah thehzak uhi. Huaiban ah Churachandpur Reporters' Guild in zan nitak inleng khopi sung ah helmet awareness campaign nei in mike in kikou uhi. Huailou in District Administration in Churachandpur Reporters Guild te kithuahpihna in Helmet khat chiat pia a, tuni sunnung dak 2:30 in C Hangshing Additional Deputy Commissioner leh Khaikhopau ngaihte Branch Officer headquater in pekhia uhi.

Nu Chinzaniang (60) W/o (Late) Pumhenthang zan zingkal dak 6:30 vel in inn apan pawtkhia in tutan inntung kiklou hi. Aomna theite'n YPA Dorcas veng Unit ahihkei leh contact number 8732065679/ 8974603942/ 986219171 ah theihsak theih ding hi. Nu Chinzaniang in puan khedap sandup bun in, niktual teng a, feet 5 leh inch 1 vel in sang a, a sam leng sau hi.

39 Assam Rifle pawl in apaisa October 29, 2012 sun dak 12 in Indo-Myanmar Border Pillar number 43 kiang ah PREPAK member Army number 39906 Self Style Sergeon Sarangthem Macha @ Prem Kumar @ Marging (40) S/o (late) S Pramo of Wangkhei Thambalkhong Imphal East mankhia ua, amah apan pistol 1, magzine leh a tang 3 mukhia uhi. 39 Assam Rifle te'n Imphal Police te khut ah pekhia in Singngat Police te'n a Case lasawn in Chief Judicial Magistrate mai ah dingsak ua, Chief Judicial Magistrate in November 5, 2012 tan Custody a om ding in theisak hi.

Tuni Indira Gandhi sihnung kum 28 chinni Rashstriya Sankalp Diwas ahihtawh kiton in tuni sunnung dak 1 in DC Office a BRGF resource centre ah C Hangshing Additional Deputy Commissioner makaih in DC Office staff te tawh Indira Gandhi suunna nei in zahna pia uhi. ICICI Lombard saina in November 2, 2012 sunma dak 10 akipan sunnung dak 3 sung in YPA hall Hiangtam Lamka ah Handloom Weaver ICICI Health Card neite ading in Free health Camp om ding hi. Hiai hun ah ICICI Health Card nei peuhmah in Health Card tawi in a thon in ki-etsak theih ding a, damdawi leng a manbei in peding uhi.

Dr. A Sachinnanda Regional Director Medical and Family Welfare Mizoram, Nagaland and Manipur in tuni sunma dak 11 in Lamka hongpha a, District Malaria Officer kimuhpih in District sung a Dengue natna hiileng tawh kisai genkhawm uhi.

Ngathal Line Auto Society in zingchiang sunnung dak 1:30 in Ngathal YMA hall ah 2nd Rising Day lawm ding uhi. Hiai hun ah Phungzathang Tonsing Health and Family Welfare Minister chief guest in pang ding a, functional president in B Zodingliana MDC pang ding a, guest of honour in Lalzova Sailo chief of Ngathal pang ding hi.

Red Cross Society Churachandpur branch saina in November 2 leh 3, 2012 sung in KKL Complex Headquater veng ah 2 Day first aid training om ding hi. Hiai hun ah Philantrophic organisation tuamtuam in palai 2 zel sawl ding ua, Red Cross Society State Branch apan resource person te'n sinsak ding uhi.

District Administration thusuah dungzui in zingchiang akipan 2 wheeler hek peuhmah in helmet khuk ngai ding a, helmet khulou mat omleh amasa in za 1 liausak hiding a, matnawn ahihleh za 2 liausak hinawn ding a, thumvei mat ahihna ah za 3 liau in lock-up ah lutding hi.

Zingchiang Kut ahihziak in Govt. Office leh Institution teng suty ding ua, Hornbill Cable News leng hong suaklou ding hi.

GAMDANG THU.

Cyclone in Chennai sukha ding dinmun in om a, tun Chenai akipan kilometre 180 vel a gamla ah omlel a, tunitak dak 6 vel a chennai nuai thei dinmun in om hi. Chennai ah School leh College teng zan a kipan in kikhak a tuni'n leng kikhak lai hi. Govt. leh private organisation tuamtuam in traffic rush luat ding lauhna ziak in tuni'n office te nitaklam dak 3 in khak uhi. Cyclone in Chennai a naih mahmah ziak in vuah tam mahmah in huih leng hat mahmah in sing hiang te mutkhia in khopi sung kikawmtuahna mun bangzah hiam ah kikhak hi. Marina Beach ah tui kifon hat mahmah in, coastal andra pradesh leh bangalore ah leng khawllou in vuahzu den hi. Huih a hat mahmah ziak in kithuzaktuahna leng buai ban a, State thuneitu te'n kuamah innpua a omlou ding leh tuipi a ngabeng te'n leng khawlsan phot ding in thupia hi. Hiai thiltung ding ziak in State Govt. IAS Officer 13 in thiltung enzui ding in mohpuakna pia hi. Chennai, Kancheepuram leh  Tiruvallur district sung a mun niam deuh te tui in tum gaita a,  school 282 te relief centre ding in kizang hi. Nellore Coast ah ngabeng mi 140 te tangden in coast guard te a hunkhe ding in kuan uhi.

United State suahlam a Storm sandy hattak om ziak in mi a lakh a sim in genvuallouh haksatna tuak in mi 45 sita in insurance company tuamtuam te sum a billion a sim mangta uhi. Hiai Storm sandy in November 6, 2012 a US presidential election neih ding naktak in hihbuai a, polling station teng leng kikhakvek in kalnawn sepnawnni apan hon theih ding dinmun in om hi. Tenna inn million 8 val in electric meivak neilou in storm ziak in flight sang 16 cancelled in om hi. Cellphone zattheih louh in om a, emergency call centre nasan leng buai ban hidan in kigen hi. US President Barack Obama in a gendan in thiltung mulkimhuai petmah a, United State khangthu a thil tung huaise pen hiding in gen a, thiltung in maban sawn laiding a, mipi te kigingsa in omlai un chi hi.