* STC/BSF in Passing Out Parade nei.
* Gangte Christian Gospel Centenary Celebration Committee in Press Conference nei.
* Sangai Festival a telding Cultural Troupe te'n Final Rehearsal nei.
* KZP General Headquaters a President ding in Thomas Thonglunmang telching in om.
* 27 Sector Assam Rifle in Lamka Public Ground ah Football Tournament saisawm.
* TET Candidate te'n ZEO Office ah Sit Chart et-theih.

Tanchin Kimzaw:
Subsidiary Training Centre STC/BSF in tuni zinglam dak 8:30 in Passing Out Parade nei uhi. Hiai hun Dashrath Singh Rathore IG (Training) Force Headquater Border Security Force, New-Delhi in Chief Guest hihna tawh uap in Salut la hi. Aman a thugenna ah, security force leh mipite kikal ah kitheihsiamna a om poimoh a, security leh mipi te a kituah keileh Security force te'n deih bang in nasem theilou chi a, sual galdouna ah leng lohchin a haksa mahmah chi in training zouthak te kipahpih thugen hi. Hiai hun L Mangkhogin Haokip IPS, SP Churachandpur leh Security Officer hunkhop in uap uhi.

A hongtung ding December 13 akipan 16, 2012 sung in Chiengkonpang ah Gangte Christian Gospel Centenary lopna om ding hi. Hiai ding tawh kisai in Organising Committee in tuni sunma dak 11:30 in ESC Headquater Chiengkonpang ah Press Conference nei uhi. December 13, 2012, a tunkim ni hiding a, hiai nitak in Saichang akipan Gospel Meisel hongtung ding a, vaidawnna tawh kithuah in Centenary hall honna leh latna omding hi. Hall sung ah, mipi'n  Meisel zuilut in Upa LS Gangte Chairman Gangte Christian Gospel Centenary Celeberation in hall honna leh latna neiding hi. Gospel Centenary lopsung in "Chanchinpha zieka Kithenna" chih pansan in Head Deacon Soitinthang, Rev. Khaigin Gangte, Rev. T Paokholian, Rev. TM Thangzalien, Rev. Sawngthang leh Rev. T Kampu in thugen ding uhi. Upa. LS Gangte Chairman Organising Committee in a gendan in Chiengkonpang hanmual sak ah mi sang 10 tut theihna ding in Centenary hall liantak kibawl panta chi a, hiai Centenary lopna ah
 Biakinn 79 apan mi tamtak paikhawm ding a, khutgelh (Handwriting) a mi tuamtuam in a gelh uh Holy Bible leng display hiding chi a, huaiban ah Nagalang a om Gangte te'n Gospel Centenary Pen leng bawl khinta uh chi hi. Aban agenzelna ah Gangte te'n nidang lai akipan hinkhaw zatdan Documentary film leng kibawl a huai leng suahkhiak hiding chi a, Gospel Centenary lopna dia budget lakh 20 kiguang ahihdan leng genbeh hi.

Imphal a Sangai Festival omlel ah, zingchiang a Churachandpur district te perform na ding tawh kisai in tuni'n YPA hall hiangtam lamka ah final rehearsal nei uhi. Final rehearsal hun, DC leh SDO te ban ah Govt. Official tuamtuam in enkai ua, district sung apan cultural troupe tuamtuam 5 vel kuan ding in kigen hi.

Khangthah Zuun Pawl (KZP) General Headquaters in tuni sunnung dak 2 in SYO hall Simveng ah Annual Assembly Cum Election nei uhi. President ding in Thomas Thonglunmang telching uhi. Vice President ding in Hangminlun, General Secretary ding in T Pausianlal, Joint Sesretary ding in Th. Thonglunthang, Finance Secretary ding in Soilalmuan leh Treasurer ding in D Lianminthang telching ua, Th. Pumzakham in kichiamsak hi.

Wipro BPO Kolkata apan Assistant manager leh HR department te lamka ah omlel in November 26, 2012 in Digital Centre ah Interview hong siading uhi. Interview a ching teng offer form leng pengal ding uhi. Alok Raj Sehti Assistant manager in a gendan in WIPRO company lian mahmah in Govt. paidan tawh kilamdanglou chi a, Company a sepsung inleng a sinbeh utte'n sinbeh theih ding chi hi. Nipi kalkhat sung in ni 5 lel nasep hiding a, lunglutna neite ading in Digital Centre ah November 26, 2012 in ID proof leh Resume, passport 4 leh education qualification proof leh original document tawi ngai ding hi.

27 Sector Assam Rifle in December 3 akipan 23, 2012 sung in Lamka public ground ah Football Tournament saisawm uhi. Lunglutna nei Club tuamtuam te'n November 30, 2012 tan in registration bawl theih ding hi. Thuchian kimzaw theinuam te'n CDSA Office Hiangtam Lamka ah kanchet theih ding hi.

BSEM saina nuai a November 27, 2012 a Imphal a TET exam neihna ding tawh kisai a Churachandpur dist. sung a candidate te'n ZEO Office ah zingchiang akipan in Sit-Chart ettheih ding hi.

Integrated Rural Development and Educational Organisation nuai ah Entreneur and Career Development Centre, Grace Villa Building 1st floor Nehru Marg ah Class 5 zousa te ading in nekzonna a dia phatuam course tuamtuam sin theih ding om hi. Lunglutna neite'n ngaihven theihding hi.

GAMDANG THU
Kelera a hospital a sem nurse 1000 val te'n nasepna thoveng zaw leh khaloh tamzaw ban ah  nasep hunsung tomzaw ngen a ni 80 sung kiphinna a neih nung un, Member Parliament K Sudhakaran kigolh in Nurse te buaina thu tawh kisai a Balaraman Committee te tawh kihou ding ahihdan a theihsak nung in Nurse te'n nuakna khawlsan uhi. Nurse te'n numei te tung a simmoh huaitak a, kibawlna leh deihlou in kumteng a khaloh 250 a khansak ding deih in kiphin uhi. Hiai thu Govt. in Official tak in thupukna bawl nailou hi.

Arvind Kejriwals in, politices vaitawh kisai a buaina tampi a tuah nung in tuni'n Political Party thak khat dinkhia hi. Arvind Kejriwals in a gendan in a Party min ahihleh Aam Admi Party kichi a, hiai party hihhat ding a National Council leng bawl khia ahihdan gen hi. Maban a Election om ding ah theihtawp suah a tuhding leh a Vote a tam theipen khe ding ahihdan gen in, hiai Party thak in gamsung ah zalenna tunding ahih thugen hi.

* TN Haokip MLA in Logos English School Annual Day khuallian hihna tawh uap.
* SSA nuai a In-Service Teacher te ading in "Grading in School"chih pansan in Training kipan.
* DC makaih in Sangai Festival a telding te'n Rehearsal nei.
* TET Admit Card munailou te'n BSEM Imphal ah laktheih.
* SSA nuai a Upper Primary Teacher te'n Meeting neiding.
* Lamka Traders and Self Employed Association in Vanman khangsaklou ding in thusuah bawl.
* PTC General Headquaters in Special Assembly neiding.

B Vaiphei Veng a Logos English School in tuni sunma dak 10:30 in Annual Day zang uhi. Hiai hun TN Haokip MLA 59 Saikot Assembly Constituency in Chief Guest hihna tawh uap in Student te hasotna thugen hi. Guest of Honour in L Mangkhogin Haokip IPS, SP Churachandpur pang a, aman a thugenna ah, lohchinna dia thumanna poimoh ahihdan gen a, nu-le-pa thumanglou te kuamah a lohching omngilou ahi chi a, Pathian thupiak omsa ahihman in nu-le-pa te thuman ding ahihdan gen a, huaiban ah lohchinna ding in kuhkalna poimoh a, lohchinna ding in magic omlou a, kuhkal peumah te lohching gige ahihdan gen hi. Hiai hun ah Rev. Thongkholun Touthang in kumnawn a Class X exam ding student te vualzawlna ngetsak a, student te'n entertainment item tuamtuam lak in nu-le-pa tamtak inleng hiai hun uap uhi.

Sarva Shiksha Abhiyan Churachandpur saina in tuni'n mun tuamtuam ah In-Service teacher te ading in "Grading in School" chih thupi pansan in One day monthly cluster level meeting kipan hi. Tuni'n Rengkai Govt. Higher Secondary School, New-Lamka JB School, MB Saichang JB School leh Vungzagen High School ah Training nei ua, zingchiang in Sagang High School leh Nirpu Junior High School ah Training neinawn ding uhi.

Sangai festival a Churachandpur district akipan district ai-oh a kuan ding cultural troupe te'n tuni'n Jacintha Lazarus IAS DC makaih in YPA Headquater hall Hiangtam Lamka ah rehearsal nei ua, zingchiang in cultural troupe te'n cultural dress tawh final rehearsal neinawn ding uhi. Churachandpur district akipan cultural troupe 5 vel telding ua, Sangai festival ah November 25, 2012 in perform ding uhi.

Teacher Eligibility Test (TET) examna ding tawh kisai a tunitan a admit munailou te'n Imphal a BSEM ah laktheih ding hi.

SSA nuai a Upper Primary Teacher teng in zingchiang sunnung dak 1 in Family Lane a Association ah meeting neiding uhi. Huai hun ah Member teng telkim ding in general Secretary John C Manlun in chialna leh theihsakna bawl.

Lamka Traders and Self Employed Association in thusuah a bawlna ah district sung a dawr kai peuhmah in Lamka Traders and Self Employed Association theihpihna tellou a Economic Blockade suanlam a vanman khangsaklouh ding in thusuah bawl uhi. Pepsi, Coca Cola leh Amul cold drinks wholesaler leh dealer te'n tualsung van zuakna tawh kisai a company te'n zuakna aman a bikhiah uh hoihtak a, zuih ding, Aman bikhiaksa sang a mantam zaw a zuak omleh local mite simmohna bang a ngaih hiding a, December 20, 2012 akipan hiai company te van lamka a zuak ding kham bikbek hiding in thusuahna ah taklang uhi. Van lei peuhmah in, aman a tamluat leh Lamka Traders and Self Employed Association kiang a, reciept? cash memo tawh report bawl ding in theisakna bawl ua, dawr kaipeuh mah in company bikhiahsa sang a mantam zaw a zuaklou a, rate omsa hihsia a, mantam zaw zuak chihte leng hihlou ding in theihsakna bawl uhi. Huaiban ah dawr bawl, lamnawl a tu leh kivial leh a vanzuak peuhmah in Govt. ah Trade License la chiat ding inleng theihsakna bawl uhi.

Paite Tribe Council (PTC) General Headquaters in December 5, 2012 zinglam dak 9 in YPA Hall Hiangtam Lamka ah PTC Special Assembly om ding hi. Huai hun ah Langkhanpau Guite CWC member and Chairman ADCC, Speaker in pang ding a, Deputy Speaker John K Ngaihte CWC member makaih in Business Session om ding hi. Hiai Assembly ah PTC Constitution Amendment proposal luikhiak hiding a, Paite Customary Law kikupkhawmna om ding hi. Huaiban ah Paite Customary Law and Practices pomkipna om ding a, tulai a zattheih ding Dan thak bawl ding hi.

GAMDANG THU

Southeast Texas ah meipi sahluat ziak in gari a taite kimutuah theilou in tuni zinglam dak 8:45 in gari tuamtuam aban ban in kiphukha uhi. Gari 140 vel kiphutuah in pasal khat leh numei khat in midang 80 val liam uhi. A liam te damdawi puaklut in om ua, a lak uah mi 12 vel gimdeuh uhi. Gari te kiphutuah lemlum in accident thupitak suak a, a khente'n gari tampi kiphukha ahihlam leng theilou ua, Gari teng lampi apan lakkhiakna ding in dakkal 8 lut hi.

Parliament Winter Session ninih paipan mahleh lamzangtak in paisuak theilou a, tuni'n leng opposition pawl in retail sector a Foreign Direct Investment omsak ding in UPA solkar in thupukna a bawl deihlou in kiphinzak nawn ua, Lok Sabha speaker Meira Kumar in a lohngaihna theilou in winter session seppatni tan khawlsak hi. Rajya Sabha leng sunnung dak 2:30 tan khawlsak in om hi. BJP, CPI(M) leh Trinamool Congress member te innpi sung ah kikouzak in, foreign direct investment thu tawh kisai a debate leh vote lakkhawm ding in phut uhi.

Director minthang mahmah Ang Lee in a bawlkhiak 3D movie Life of Pi kichi tuni'n release hita hi. Hiai film ah lemchingtu in Bollywood actor Tabu, Suraj Sharma leh Irfan Khan pang ua, a film thupi petmah hidan in kigen a, tukum sung a 3D Movies te lak a thupipen laiding in kigen hi. A filma lemchingtu pipen ahihleh St. Stephen College a kailai kum 19 miding Suraj Sharma hi a, lemchingtu a, apang ding a college in phalsak mahleh, college a kai ngeilou ziak in first exam petheilou a, college thuneitu te'n Suraj in zingchiang akipan exam a pethei ding chi in phalna pia uhi.

Isreal leh Palestenian kikal a ni 8 sung kikaptuahna om nung in gam nih te vualzou tuak in kikoih uhi. Isreal in Hamas te douding a Gaza Strip a army a sawllut te kizukikta in ni 8 sung kidouna ah, a langnih tuak un vualzou bang in kikoih uhi. Hiai ni 8 sung kikaptuahna ah mihing 1400 si in, Hamas pawl in kidouna ah Isreal te si tamzaw chi in kikoih sang mahmah a, Hamas pawl in Gaza apan rocket 700 kapkhia in, Isreal gamsung a suksiat dan et in vualzou bang in kingai a, Isreal in F!6 fighter apan Hamas top military commander a kaplup ziak in kikoih thupi nawn mahmah hi.

India leh China kikal ah gamgi thu tawh kisai in buaina om nawn ding in kilang hi. China in agamsung mite kiang a passport a issue na a China map ah Arunachal Pradesh leh Ladakh a Aksai Chin huamkha hi. Thusuak kingah dan in Delhi in official tak a hiai thu ngaihtuah nailou hi. Hiai thu in gamnih te kikal ah kitheihsiamlouhna piangsak ding in kilang a, tuma inleng China in Arunachal Pradesh leh Sikkim apan China a zinte China in visa penuamlou in China gamsung mah a hong kipan na hi uh chi hi.