* The Malsawm Initiative ah Sign Language kisinsakna kipan.
* Vungzagin Valte Parliamentary Secretary in National Seminar-Cum-Workshop on Development on Zomi Language and Literature, hunkhakna uap.
* ZOGAMonline in ZOLMA Users' Choice Music Award saisawm.
* TN Haokip in Logos English School Annual School Day Khuallian hihna tawh uap ding.
* The Malsawm Initiative ah World Disability Day 2012 kizang ding.

Naupang khanvual phalou te siamsinna mun The Malsawm Initiative a teacher nih in Voice and Vision India Mumbai sponsorna nuai a Helen Keller Institute for Deaf and Deafblind Mumbai a kum 2 sung a training zawhnung in Lamka hongkik ua, tuni'n The Malsawm Initiative ah Sign Language kisinsakna kipan theita hi. Kum nawn january kha chiang in tua teacher apan lel mi 2 Helen Keller Institute for Deaf and Deafblind ah nipi kal 3 sung training in kuan nawn ding uhi. Huaiban ah The Malsawm Initiative a naupang te kimawlna ding Voice and Vision India Mumbai in Mary go round, Trampoline, Slide leh chair pia in kithuahpih uhi.

Zomi Language and Literature Society leh Central Institute of Indian Language (CIIL) pangkhawm in November 20, 2012 a kipan Lamka College Examination Hall ah National Seminar-Cum-Workshop on Development of Zomi Language and Literature neih in om a, tuni sunnung dak 3 in a khakna nei uhi. Hiai hun Vungzagin Valte Parliamentary Secretary leh K Guite Adviser Zomi Language and Literature Society thugenna hunzang uhi. Vungzagin Valte Parliamentary Secretary in a thugenna ah, Zosuan te ngen kihi ngal a bangziak a namdang te Zo kichi utmailou uh hiam chi hi. Pau tuamtuam zang in kipau mahleh a tangpi in pau kizang kibang vek chi hi. Seminar Cum Workshop neih sung in Prof. Kedutso Kapfo Deputy Director Central Institute of Indian Language, Dr. Sobha Satyanath Assistant Professor Delhi University, Dr. Gail Coelho Assistant Professor Delhi University leh Dr. SS Bhattatarya Former Head Language Division Office of the Registrar General India, Kolkata in sinsak uhi.

ZOGAMonline in December 29, 2012 in Dorcas veng New-Lamka ah ZOLMA Users' Choice Music Award 2012 saisawm uhi. ZOGAMonline user leh mipi te'n kum 2000 akipan 2012 sung a lavui 5 tanbek bawl a, mipi ngaih theih dia, ana thehzak te category nih numei leh pasal a khen in, mahni deih penpen nominate theih ding hi. Nominate theih hun November 30, 2012 in kikhel ding a, huainung in mipi leh ZOGAMonline users te'n SMS tungtawn in vote theiding uhi. Category 2 a vote mutampen 3 tan panel te'n telkhe ding ua, December 29, 2012 in Judge leh mipi mai ah live in perform ding ua, live concert tawh kithuah in "impact of social network in our society" chih pansan in thugenna hun om ding hi.

B Vaiphei veng a Logos English School in zingchiang in School Annual day zang ding uhi. Huai hun ah TN Haokip MLA 59th Saikot Assembly Constituency, Chief Guest in pang ding a, Guest of Honour in L Mangkhogin Haokip IPS, SP Churachandpur pang ding hi. Huai hun ah Student te'n entretainment item tuamtuam lak in kipahman leng hawmkhe ding ua, nu-le-pa hunkhop inleng uap ding uhi.

Nehru Yuva Kendra Churachandpur, Churachandpur District Disable Union, Liliane Fonds leh Centre for Community Initiative kithuah in December 3, 2012 in The Malsawm Initiative ah "Removing Barrier" chih thupi a nei in World Disability Day 2012 kizang ding hi. Huai hun ah vualphalou naupang te'n talent tuamtuam show ding uhi. World Disability Day zatna ding tawh kisai in The Malsawm Initiative ah November 30, 2012 akipan a hungaihna kipan ding a, huai ah vualphalou naupang te khutsuak Christmas leh New Year Card mipi muhding in display hiding a, a deih te'n leng leitheih ding hi.

GAMDANG THU.

Andra Pradesh ah Nilam cyclone in agriculture leh horticulture lam ah state in 1710 crore mansuah hi. Agriculture crop kichiingna 7.72 lakh hectares ah 1608 crore mansuah a, horticulture crop kichiingna 52,000 hectare ah 102 crore mansuah ahihdan State finance minister Aanam Ramanarayana Reddy in gen hi. finance Minister in a genbehna ah Nilam cyclone in district 19 sukha a, district 5 ah uangdiak chi a, district tuamtuam apan report dungzui a, Nilam cyclone in a suksiat zah ki-hisapkhia ahihdan gen a, tunung sawtlou in thuchiangzaw omlai ding chi hi. Chief Minister N Kiran Kumar Reddy in loubawl mite panpihna dia sum a kinlam peding in Union Finance Minister P Chidambaram kiang ah zan in ngen hi. Huaiban ah huanhai te tungding nawnna dia loan peding leh National Agriculture Insurance Scheme nuai a premium rate hihniam ding inleng ngen hi.

Delhi tumlam a Wazirabad ah zan nitak in Bus hattak a tailai in Subodh Kumar (14) phukha in damzawi inn zotpih ahihlai in damzoulou in lamkal ah si a, thiltung laitak mukha te thangpai in, Bus in mei in hal uhi.Police te'n mipi thangpai te hawlzakna ding in chiang in ban khet ua, meiphelh gari 12 in Bus phelhmit uhi. Bus driver a omna kitheilou a, Police te'n amah tung ah case chaimteh uhi.

Mumbai 26/11 terror attack a terrorist hingmat a omsun Ajmal Kasab khailup ahihnung in United Nations General Secretary Ban Ki Moon in, gam tuamtuam te kiang ah death penalty piak tawpsan ding in ngen hi. Aman a gendan in khovel ah capital punishment kipiak kichi pung deuhdeuh ding in kisa, Member State te'n death penalty beisakna dia United Nations panlakna kithuahpih ding in ngen hi.

China gamsung a mipi te adia hinkhaw nuamzaw om ding ngimna a vaihawmtu a kikhek nung in naupang pasal 5 dusbin sung ah sisa a muhkhiak in om uhi. Hiai thu in China gamsung zelsuak pah in singtanglam a naupang haksatak a khawsa te nelhsiah a om ahihdan kilang mahmah kichi hi. Naupang 3 te ahihleh unau khat hi ua, midang 2 te ahihleh innlum apan sepding zong a Bijie khopi a pemlut hidan in kigen hi. Police te gendan in hiai naupang 5 te ahihleh unau 3 te pi (grandmother) in enkai a, a Pi uh leng mitdel hizawmah hi. Hiai naupang 5 kum 9 leh kum 13 kikal mingen hi ua, kalkhat val paita in innlum apan taikhia in Bijie khopi a dusbin khat sung ah khovot nuai ah giakzel uhi. Naupang pasal 5 te'n khawvot apan ki-hihlumna ding in November 15 nitak in meitawh ua, police te gendan in carbon monoxide poisioning ziak a si hiding un gen uhi. Hiai thiltung tawh kisai in Newspaper tuamtuam in govt. naktak in mohsa ua, gamsung etkaina leh khawtang paidan nguntak a etthak poimoh ding ahihdan taklang in civilized society adia gen vuallouh ding khop a minsiatna ahi chi uhi.

Pakistan a Peshawar khopi sung, Hazar Khuwani Chowk ah Police te'n truck sung ah puakthei kg.600 vel a gik mukhia in truck driver tawh mankhawm uhi. Puakthei thilte lak ah dynamite leh detonator leng tel a, puakthei tamtak matkhiak ahihziak in Pakistan gamsung a thil deih huailou tungding bangtanhiam a kiam ding in thusuak in gen hi.

Jaipur akipan Karanpur zuan a tai passenger bus khat leh truck khat tuzingkal baihtak in Churu district sung Sardarshahar ah kiphukha in mi 13 si in midang 39 liam uhi. Churu District SP, Omprakash in agendan in aliam 39 te lak mi 7 te dinmun lauhthawng huai a, Sikar leh Bikaner hospitalah etkol in om uhi.

Thusuak kingah dan in Pakistan pansan a om Taliban spokesperson Ehsanullah Ehsan in munkhat apan telephone tungtawn a media te kiang a gendan in India in Ajmal Kasab a thah ziak un, phuba lak hiding chi a, India gamsung a mun poimoh te tuptuam in kinei ding chi hi. Mumai terror attack a Taliban te lak a mi poimoh Kasab sihna a mokna in koih hilou ding chi hi. Mumbai terror attack ah mi 166 si uhi.

Tuni'n Parliament winter session kipan a, house nih te ah opposition te'n foreign direct investment deihlouhna vote lakding phut in maban sutzop theilouh in om a, Innpi nih Rajya Sabha leh Lok Sabha sun dak 12 tan khawlsak in om hi. Winter session kipat tung in member phamsa te sunna hun neih ahihlai in opposition member te kikouzak in retail sector a foreign direct investment phalsak ding a UPA solkar in thupukna abawl tungtang a debate neih dig leh vote lakding deih in opposition member te'n innpi nihte subuai uhi. Lok Sabha ah BSP member te Speaker Meira Kumar tutna mun kideihhuan in Uttar Pradesh a law and order thutawh kisai in kiphinna neingal ua, Samajwadi party in LPG man khansakna zukkik ding phut in kiphin uhi. Lok Sabha speaker Meira Kumar in sun dak 12 session kawlsak in sunnung dak 12:30 in kipansak nawn hi. Trinamool Congress in UPA solkar tung ah no-confidence motion puaksuah theihna dia kong honsak ding in Speaker kiang ah session kipatni in ngen ngal uhi.